Chapter 441

śrīnārāyaṇa uvāca |
śṛṇu lakṣmi yathā strīṇāṃ kṛṣṇasyā''rādhanaṃ tathā |
yena muktirbhaveccāpi taṃ dharmaṃ pravadāmyaham || 1 ||
[Analyze grammar]

dharmoḍhā yā bhavet patnī daśadoṣavivarjitā |
aklībā'vyaṅginī śastā mahārogādyadūṣitā || 2 ||
[Analyze grammar]

aninditā śubhakalā cakṣūrogavivarjitā |
bādhiryahīnā capalā kanyā madhurabhāṣiṇī || 3 ||
[Analyze grammar]

dūṣaṇairdaśabhirhīnā yathoktavidhinā naraiḥ |
vivāhitā tu sā patnī gṛhiṇī khyāyate satī || 4 ||
[Analyze grammar]

puṇyakāryeṣu sarveṣu prathamā sā pratiṣṭhati |
tayā suvihito dharmaḥ sampūrṇaphalado bhavet || 5 ||
[Analyze grammar]

kāryaṃ strībhiḥ sadā kṛṣṇaṃ saṃsmṛtya pañcayajñakam |
snānaṃ ca tarpaṇaṃ cāpi vahnihomo'cyutā'rcanam || 6 ||
[Analyze grammar]

atitheḥ satkṛtiśceti pañcayajñānna saṃtyajet |
pañcayajñaistu santuṣṭā bhavanti pitṛdevatāḥ || 7 ||
[Analyze grammar]

striyāḥ pativratāyāstu patiśuśrūṣayā mudā |
patyātmake harau tuṣṭā bhavanti pitṛdevatāḥ || 8 ||
[Analyze grammar]

pativratāyā dehe tu sarve devā vasanti hi |
atastayā svāminā yuktayā dharmasya cāgamaḥ || 9 ||
[Analyze grammar]

ubhayormānase caikye santuṣṭāḥ pitṛdevatāḥ |
sarvakāryaprasiddhiśca phalaṃ sampadyate śubham || 10 ||
[Analyze grammar]

samānajātisaṃbhūtā patnī vivāhitā bhavet |
tasyā bhartā'rdhabhāgī syād dharmakāryeṣu sarvathā || 11 ||
[Analyze grammar]

ardhadehādhikāro'syāstena dharmārdhadhāriṇī |
patirdharmārdhadhārī ca dvayoḥ śubhe'śubhe'pi ca || 12 ||
[Analyze grammar]

yā'nugacchati bhartāraṃ mṛtaṃ sutapasā priye |
sādhvī mahāsatī jñeyā yayā tūddhriyate kulam || 13 ||
[Analyze grammar]

yaṃ kaṃcidvā patiṃ mṛtaṃ dhṛtā vā'tha vivāhitā |
vaiśvānarasya mārgeṇa sā tamuddharate patim || 14 ||
[Analyze grammar]

yathā tu tārako majjantaṃ samuddharate jalāt |
tathā coddharate sādhvī bhartāraṃ yā'nugacchati || 15 ||
[Analyze grammar]

yā kanyā svayamudyamya pitrā dattā varāya sā |
vivāhavidhinodūḍhā pitṛdevārthasādhinī || 16 ||
[Analyze grammar]

vivāhā daśadhā proktāstadanyatamameva yā |
avalambya patiṃ prāptā sā samuddharate kulam || 17 ||
[Analyze grammar]

punarvivāhitā sā'pi satī cet kulatāriṇī |
krayakrītā bhaved dāsī kintu cet sā vivāhitā || 18 ||
[Analyze grammar]

satī proktā dharmavatī sā samuddharate kulam |
pavitrakulajā raṅkā dharmoḍhā yadi sādhvikā || 19 ||
[Analyze grammar]

sā punāti kulaṃ sarvaṃ pātivratyaprabhāvataḥ |
prājāpatyastathā brāhmo daivā''rṣau te saduttamāḥ || 20 ||
[Analyze grammar]

gāndharvaścāsuraścāpi rākṣasaśca piśācakaḥ |
prātibho ghātakaśceti vivāhāḥ kathitā daśa || 21 ||
[Analyze grammar]

aurasaḥ kṣetrajaścāpi datta kṛtrima ityapi |
gūḍhotpanno'paviddhaśca kānīnaśca sahoḍhajaḥ || 22 ||
[Analyze grammar]

krītaḥ paunarbhavaścāpi putrāste daśadhā matāḥ |
evaṃ sutasutādārapatipitṛkuṭumbinaḥ || 23 ||
[Analyze grammar]

pātivratyena tīryante satībhiḥ kṛṣṇasevayā |
devavad divi dīvyanti striyaḥ satyaḥ pativratāḥ || 24 ||
[Analyze grammar]

sarvāsāṃ yoṣitāṃ lakṣmi kṛṣṇabhaktiḥ sadā śubhā |
śuddhyarthaṃ sadguroḥ sevā gurupūjā sadoditā || 25 ||
[Analyze grammar]

svargārthe svāminaḥ sevā patipūjā sadoditā |
mokṣārthe śrīkṛṣṇanārāyaṇārpaṇaṃ tu yoṣitām || 26 ||
[Analyze grammar]

evaṃ dharme samāśritya śūdraḥ paijavanaḥ purā |
sādhvyā svabhāryayā sākaṃ kṛṣṇalokaṃ yayau purā || 27 ||
[Analyze grammar]

āsīt sa dharmanirato viṣṇubrāhmaṇapūjakaḥ |
nyāyā''gatadhane tuṣṭaḥ strīyutaḥ sevakaḥ satām || 28 ||
[Analyze grammar]

satyavādī vaiṣṇāvo'bhūt tasya bhāryā ca sundarī |
dharmoḍhā tūktavidhinā samānakulajā śubhā || 29 ||
[Analyze grammar]

pativratā mahābhāgā devadvijahite ratā |
kāśyāṃ sambandhitā kanyā vaijayantyāṃ vivāhitā || 30 ||
[Analyze grammar]

sā dharmācaraṇe dakṣā vaiṣṇavavratadhāriṇī |
bhartāraṃ śrīkṛṣṇanārāyaṇaṃ jñātvā prasevate || 31 ||
[Analyze grammar]

arthāptiḥ sukṛtapuṇyairvardhate'syā gṛhe sadā |
vāṇijyena saphalena vyāpāreṇa satīpateḥ || 32 ||
[Analyze grammar]

evamarthaśca bahudhā saṃjāto dharmadarśinaḥ |
putradvayaṃ ca sañjātaṃ putryaśceti ca vaiṣṇavāḥ || 33 ||
[Analyze grammar]

kṛṣṇanārāyaṇabhaktāḥ pitṛsevāparāyaṇāḥ |
pitroḥ śuśrūṣaṇe raktāḥ patnī pativratā sadā || 34 ||
[Analyze grammar]

sarve saṃpūjyapūjāṃ saṃkurvanti sevanādikam |
kṛpṇanārāyaṇaṃ smṛtvā pūjayantyatithīṃstathā || 31 ||
[Analyze grammar]

ṛddhimadbhavanaṃ teṣāṃ dhanadhānyasamanvitam |
gṛhāgato na vimukho yeṣāṃ yāti kadācana || 36 ||
[Analyze grammar]

śītakāle dhanaṃ prāduruṣṇakāle jalā'nnadāḥ |
varṣākāle vastradāśca babhūvānnapradāḥ sadā || 37 ||
[Analyze grammar]

vāpīkūpataḍāgādiprapādevagṛhāṇi ca |
kārayantyucite kāle kṛṣṇabhaktivratasthitāḥ || 38 ||
[Analyze grammar]

paṃktibhedo gṛhe naiṣāṃ samabhāgena toṣiṇaḥ |
evaṃ vai vartamānānāṃ gṛhe śrīgālavo muniḥ || 39 ||
[Analyze grammar]

samājagāma bahubhirbhaktaśiṣyaiḥ samāvṛtaḥ |
sundarīsahitaḥ paijavanaḥ putrādisaṃyutaḥ || 40 ||
[Analyze grammar]

svāgataṃ kṛtavāṃstasya cābhyutthānāsanādibhiḥ |
atiharṣaṃ gatastatra pādayorjalamāpiban || 41 ||
[Analyze grammar]

kṛtārthaṃ mānayan naijaṃ kuṭumbaṃ samuvāca saḥ |
adya me saphalaṃ janma jātaṃ jīvitamuttamam || 42 ||
[Analyze grammar]

adya me saphalo dharmaḥ sakulaścoddhṛtastvayā |
mama pāpasahasrāṇi dṛṣṭyā dagdhāni te mune || 43 ||
[Analyze grammar]

harirnārāyaṇaḥ kṛṣṇo gālavo me gṛhāgataḥ |
gṛhaṃ mama gṛhasthasya kṛṣṇena pāvitaṃ tvayā || 44 ||
[Analyze grammar]

iti śrutvā mahābhaktyā gatamārgapariśramaḥ |
prasanno gālavaḥ śūdraṃ papraccha kuśalaṃ bahu || 45 ||
[Analyze grammar]

kaccitte kuśalaṃ saumya mano dharme pravartate |
kṛṣṇārthakṛtasarvasvāḥ kaccitte dārabālakāḥ || 46 ||
[Analyze grammar]

kṛṣṇanārāyaṇe kaccidbhaktiste dānapūrvikā |
dharmārthakāmamokṣeṣu sasnehaṃ mānasaṃ tu vai || 47 ||
[Analyze grammar]

viṣṇupādodakaṃ nityaṃ śirasā dhāryate nu kim |
satīyaṃ sarvathā kṛṣṇakāntasevāparā nu kim || 48 ||
[Analyze grammar]

satyā vai dhāryate sarvaṃ satyā saṃrakṣyate tathā |
satyā nistīryate duḥkhāt satī sukhādisādhanam || 49 ||
[Analyze grammar]

sa ityuktaḥ paijavanaḥ pratyuvāca kṛpā tava |
yanme sarvaṃ tathā tvāste viśeṣo'nugrahastava || 50 ||
[Analyze grammar]

śādhi māṃ sevakaṃ matvā sevikā tu satīmimām |
sevakāṃśca sutān sutāḥ prastutāgamakāraṇam || 51 ||
[Analyze grammar]

gālavastān samuvāca yasya bhaktiḥ sadā'cyute |
yasya bhāryā satī sādhvī patikṛṣṇapativratā || 52 ||
[Analyze grammar]

yasya putrā harerdāsā dāsyaḥ putryaḥ sato hareḥ |
kuṭumbaṃ bāndhavādyāśca vaiṣṇavā yasya pāvanāḥ || 53 ||
[Analyze grammar]

eteṣāṃ saṃgame tīrthe muktiḥ kvāpi na durlabhā |
kuṭumbaṃ vaiṣṇavaṃ yaddhi brahmapiṇḍamidaṃ śubham || 54 ||
[Analyze grammar]

yasya saṃdarśanādeva pūto bhavati cāghavān |
nirguṇasya kṛṣṇanārāyaṇasya yogatastava || 55 ||
[Analyze grammar]

sarvaṃ nirguṇatāṃ prāptaṃ bhaktiyug dāsadharmataḥ |
strīṇāmapi ca sādhvīnāṃ bhaktiyug dāsadharmatā || 66 ||
[Analyze grammar]

premadharmo ballavīnāṃ śabaryāśca harāvabhūt |
piṅgalāyāḥ premadharmo muktidaḥ pāvano'bhavat || 57 ||
[Analyze grammar]

kṛṣṇaśvetagireḥ putryāḥ premadharmo'bhavacchive |
tena varṣasahasrānte samprāpa sā maheśvaram || 58 ||
[Analyze grammar]

pārvatyāśca prabhāyāśca lalitāyāstathā priye |
lakṣmyā jayāyā māṇikyāyāśca sneho'tikāṣṭhagaḥ || 59 ||
[Analyze grammar]

abhavacchrīkṛṣṇanārāyaṇe'vāpuśca tāḥ patim |
vṛndāyāśca tulasyāśca vivāhaḥ snehamūlagaḥ || 60 ||
[Analyze grammar]

tulasīpatrakaiḥ kṛṣṇārcayā mokṣo bhaved dhruvam |
snehamūlo harau mokṣaḥ satyāḥ patyau tathā mataḥ || 61 ||
[Analyze grammar]

vṛndādyā api lokānāṃ tārakāścā'bhavan kṣitau |
śṛṇu bhaktaikadā sarve pitaro hi purā yuge || 62 ||
[Analyze grammar]

yayurbhojanatṛptyarthaṃ brahmāṇaṃ śaraṇaṃ tadā |
tṛptyarthaṃ salilaṃ yadyad varuṇādhiṣṭhitaṃ śubham || 63 ||
[Analyze grammar]

vinā tu tarpaṇairnaiva grāhyaṃ no pitṝṇāṃ yataḥ |
kenāpi dīyamānaṃ tad grāhyaṃ bhavati tṛptikṛt || 64 ||
[Analyze grammar]

tasmādasmatpratṛptyarthaṃ kiñcidvidhehi pūrvaja |
ityarthitastadā brahmā śrīkṛṣṇaśaraṇaṃ yayau || 65 ||
[Analyze grammar]

prārthayāmāsa tṛptyarthaṃ pitṝṇāṃ tu jalāptaye |
tadā bhagavatā śrīmatkṛṣṇanārāyaṇena vai || 66 ||
[Analyze grammar]

kṣaṇaṃ vicārya kathitaṃ sarvātmā bhagavānaham |
sarveṣāṃ tṛptikṛccāsmi nānyo bhavati tādṛśaḥ || 67 ||
[Analyze grammar]

tasmānmayā yathā teṣāṃ tṛptiḥ syāt kāryameva tat |
sarve janāśca māṃ kutra prāpsyanti divyarūpiṇam || 68 ||
[Analyze grammar]

tasmānmayā śubhaṃ rūpaṃ jalatarpaṇahetave |
dhāraṇīyaṃ jagatprāṇidattakalyāṇakṛdbhavet || 69 ||
[Analyze grammar]

vicāryetthaṃ svayaṃ kṛṣṇo'śvattharūpo babhūva ha |
pippalo mūrtimān bhūtvā divyadeho janārdanaḥ || 70 ||
[Analyze grammar]

revatādrau kṛṣṇanārāyaṇadāmodarasthale |
dvābhyāṃ pūrvaṃ kṛtaṃ śrāddhaṃ tatra nārāyaṇe hrade || 71 ||
[Analyze grammar]

tasthau tadā plakṣamūle kṛṣṇadvayena mantrataḥ |
jalaṃ pradattaṃ tīrthasya tṛptāste pitarastataḥ || 72 ||
[Analyze grammar]

evaṃ śrīmatkṛṣṇanārāyaṇaḥ śrībhagavān svayam |
plakṣā'vatāraṃ dhṛtavān raivatādrau purā yuge || 73 ||
[Analyze grammar]

atharṣibhirjaladānaṃ pippalasya sadā kṛtam |
pippale'rpitasalilaṃ trailokyāṃ prāpyate gataiḥ || 74 ||
[Analyze grammar]

atha devā mahendrādyāḥ śivādyā vaiṣṇavāstathā |
kṛṣṇaṃ lokayituṃ tatra yayurnārāyaṇe hrade || 75 ||
[Analyze grammar]

svarṇarekhānadītīre vane kṛṣṇaḥ pramārgitaḥ |
anveṣyamāṇo'pi hariḥ kaiścittatra hi māyayā || 76 ||
[Analyze grammar]

vṛkṣarūpo hi bhagavān vijñāto naiva naiva ca |
tato devā bṛhaspatiṃ prāhurvai bhagavān hariḥ || 77 ||
[Analyze grammar]

drumatā saṃgataḥ so'yaṃ kathaṃ draṣṭuṃ hi śakyate |
tadā bṛhaspatiḥ prāha vṛkṣaśced draṣṭumīṣyate || 78 ||
[Analyze grammar]

vṛkṣanetrairvṛkṣarūpo hariḥ pratyakṣatāṃ vrajet |
ityuktāste surāḥ sarve nārāyaṇahradā'ntike || 79 ||
[Analyze grammar]

vṛkṣarūpadharā jātāstadā kṛṣṇaṃ pravīkṣitum |
śrīstatra tulasīrūpā pārvatībhālabindujaḥ || 80 ||
[Analyze grammar]

mahātarurbilvasaṃjñaḥ pārvatī bilvarūpiṇī |
jātā tatra tadā brahmā vaṭarūpo babhūva ha || 81 ||
[Analyze grammar]

sāvitrī tilagulmākhyā satilā saṃbabhūva ha |
mahendro yavavṛkṣo'bhūccūtavṛkṣāḥ prajeśvarāḥ || 82 ||
[Analyze grammar]

gandharvā malayavṛkṣā aguruśca gaṇādhipaḥ |
samudrā vaitasavṛkṣā yakṣāḥ punnāgabhūruhāḥ || 83 ||
[Analyze grammar]

nāgavṛkṣāstadā nāgāḥ siddhāḥ kaṃkolakadrumāḥ |
guhyakāḥ panasavṛkṣāḥ kinnarā maricadrumāḥ || 84 ||
[Analyze grammar]

yaṣṭimadhudruḥ kandarpo vahniḥ raktāṃjanadrumaḥ |
yamo bibhītakavṛkṣo nirṛtirbakuladrumaḥ || 85 ||
[Analyze grammar]

varuṇaḥ kharjurīvṛkṣaḥ pūgavṛkṣastu mārutaḥ |
dhanado'kṣoṭakavṛkṣo rudrāstu badarīdrumāḥ || 86 ||
[Analyze grammar]

saptarṣayo mahātālā elādrumāḥ pare surāḥ |
jambūvṛkṣāstadā meghā aśokā vidyuto'bhavan || 87 ||
[Analyze grammar]

priyālā vasavo jātā ādityāstu japādrumāḥ |
madanau tu tadā'śvinīkumārakau babhūvatuḥ || 88 ||
[Analyze grammar]

viśvedevāstu madhukā rākṣasā gugguladrumāḥ |
sūryastvarkadrumaścātha palāśaścandramā'bhavat || 89 ||
[Analyze grammar]

maṃgalaḥ khadiro jātaścāpāmārgo budho'bhavat |
bṛhaspatistadā'śvatthaḥ śukro hyudumbaro'bhavat || 90 ||
[Analyze grammar]

śanaiścaraḥ śamīvṛkṣo rāhurdurvātmako'bhavat |
keturdarbhasvarūpo'bhūttathā phaladrumo'pi saḥ || 91 ||
[Analyze grammar]

satyastā devapatnyo babhūvurvallayastadā |
viṣṇuḥ śālasvarūpo'bhūt hyapāmārgo'sya vāhanaḥ || 92 ||
[Analyze grammar]

śrīvatso'bhūt kalpavṛkṣaḥ kārtikaścampako hyabhūt |
nārado'bhūtpārijāto gaurī vṛndā'bhavattadā || 93 ||
[Analyze grammar]

lakṣmīstu mālatī jātā dhātrī sarasvatī hyabhūt |
atha sthalāntare'raṇye tatraiva bahurūpadhṛk || 94 ||
[Analyze grammar]

aśvattharūpī bhagavān viṣṇurjātaḥ surūpadhṛk |
vaṭarūpo'bhavadrudro brahmā palāśarūpadhṛk || 99 ||
[Analyze grammar]

dhavaladrustadā nandī śaṃbhurbilvasvarūpadhṛk |
indraḥ śirīṣarūpo'bhūnnimvavṛkṣaḥ prabhākaraḥ || 96 ||
[Analyze grammar]

śivāśivau bilvavṛkṣau śivā vṛndāsvarūpiṇī |
brahmārudrau vaṭavṛkṣau brahmā palāśarūpavān || 97 ||
[Analyze grammar]

candramāśca palāśo'bhūnnimbārkau sūryarūpiṇau |
aśvattharūpau vipṇubṛhaspatī ceti vai dvidhā || 98 ||
[Analyze grammar]

tattadvṛkṣe'vāntarajātīyakau tau matau tadā |
ete kṛṣṇaṃ drusvarūpā drunetraistaṃ vyalokayan || 99 ||
[Analyze grammar]

mahatpatrānvito'śvattho dṛṣṭo nārāyaṇe hrade |
kṛṣṇastena svarūpeṇa jalā''dānasya hetave || 100 ||
[Analyze grammar]

pitṝṇāṃ tṛptilābhāya vartate sma kṛpālayaḥ |
tanmūle brāhmaṇaiścāpi nārāyaṇadvayena ca || 101 ||
[Analyze grammar]

patnīvratena devenārpitaṃ svarṇanadījalam |
tatsarvaṃ śrīkṛṣṇanārāyaṇārpitaṃ tu pitṛṣu || 102 ||
[Analyze grammar]

prāptaṃ tṛptipradaṃ jātaṃ tasmāt pippalamarcayeta |
tadvaśāścāpi te vṛkṣāḥ sthāsyanti pitumokṣadāḥ || 103 ||
[Analyze grammar]

yāvatkṛṣṇaḥ pippaladruḥ sthāsthatyāpralayaṃ kṣiteḥ |
sarveṣāṃ mokṣadāścaite devadrumāḥ supūjitāḥ || 108 ||
[Analyze grammar]

strīṇāṃ tathā'nyavarṇānāṃ mokṣadāḥ sevanāddhi te |
ityuktvā jalamādāya datvā pitṛbhya eva saḥ || 109 ||
[Analyze grammar]

kṛṣṇo yayau nijaṃ lokaṃ mūlrarūpeṇa gosthalam |
devāḥ svaṃ svaṃ yayurlokaṃ kṛṣṇabhaktiparāyaṇāḥ || 106 ||
[Analyze grammar]

gālavasya mukhāttvetat paijavanastriyā śrutam |
sundaryā ca tadā saṃkalpitaṃ pativrataṃ muhuḥ || 107 ||
[Analyze grammar]

yathā vai gālavaścāyaṃ prakāśayati devatāḥ |
yadi tāḥ satyarūpāḥ syurdrumātmānaḥ surādayaḥ || 108 ||
[Analyze grammar]

tadvā me darśanaṃ bhūyātteṣāṃ tattatsvarūpataḥ |
yadyahaṃ patidharmā'smi pātivratyaparāyaṇā || 109 ||
[Analyze grammar]

iti saṃkalpite lakṣmi sarve devāḥ samāyayuḥ |
vṛkṣavallīsvarūpāśca tayā dṛṣṭāstathātmakāḥ || 110 ||
[Analyze grammar]

punaḥ saṃkalpitaṃ tatra sundaryā syāṃ pativratā |
tadā gālavaśiṣyāṇāṃ bhojanāni bhavantviti || 111 ||
[Analyze grammar]

tāvat tatra sumiṣṭānnaparvatāstvabhavan priye |
saśiṣyo gālavo bhuktvā yayau svāśramaṃ priye || 112 ||
[Analyze grammar]

devatā svasvarūpāśca satkṛtāḥ svasthalaṃ yayuḥ |
tadārabhya satīnāryaḥ pūjayanti drumān muhuḥ || 113 ||
[Analyze grammar]

yajñe pavitrarūpāste devadrumāḥ supuṇyadāḥ |
hūyante svargadā mokṣapradāḥ sampatpradāśca te || 114 ||
[Analyze grammar]

iti te kathitaṃ lakṣmi strīṇāṃ vṛkṣādipūjanam |
paṭhanācchravaṇāccāpi svargamokṣasupuṇyadam || 115 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne gālavapradarśitānāṃ strīmokṣapradasaralopāyānāṃ madhye tulasyādivividhavṛkṣāṇāṃ devatādyavatāratvaṃ tatpūjanādinā mokṣaścetyādinirūpaṇanāmaikacatvāriṃśadadhikacatuśśatatamo'dhyāyaḥ || 441 ||
[Analyze grammar]