Chapter 379

śrīnārāyaṇa uvāca |
śṛṇu lakṣmi kathayāmi menoktān pārvatīṃ prati |
pātivratyaparān dharmān bhuktimuktipradān śubhān || 1 ||
[Analyze grammar]

kṛtvā vivāhaṃ pārvatyā menā himagireḥ priyā |
putrīṃ sayāpayāmāsa dharmānuktvā parān yathā || 2 ||
[Analyze grammar]

girije śṛṇu suprītyā dharmavṛddhikaraṃ vacaḥ |
ihā'mutrā''nandakaraṃ śṛṇvatāṃ ca sukhapradam || 3 ||
[Analyze grammar]

dhanyā pativratā nārī tvādṛśī śaṃkarapriyā |
pāvanī sarvakāntānāṃ sarvapāpapraṇāśinī || 4 ||
[Analyze grammar]

yā satī sevate premṇā kṛṣṇanārāyaṇaṃ patim |
iha bhuktvā'khilān bhogān patyānte yāti sadgatim || || 9 ||
[Analyze grammar]

pātivratyena dharmeṇa patnī yāti prapūjyatām |
brahmaviṣṇuharairmānyā munimānyā bhavatyapi || 6 ||
[Analyze grammar]

tvayā patiḥ sadā sevyaḥ śaṃkaro lokaśaṃkaraḥ |
bhuñjād bhukte priye patyau pātivratyaparāyaṇā || 7 ||
[Analyze grammar]

tiṣṭhet tasmin sukhe nārī patyau yadā tu tiṣṭhati |
svapyāt svapiti patyau sā buddhyettu prathamaṃ sadā || 8 ||
[Analyze grammar]

sarvadā taddhitaṃ kuryādakaitavagatiḥ priyā |
analaṃkṛtamātmānaṃ darśayenna kvacit satī || 9 ||
[Analyze grammar]

kāryārthaṃ proṣite tasmin bhavenmaṇḍanavarjitā |
patyurnāma na gṛhṇīyāt kadāpīha pativratā || 10 ||
[Analyze grammar]

ākruṣṭāpi na cākrośet prasīdettāḍitā'pi ca |
āhūtā gṛhakāryāṇi tyaktvā gacchettadantikam || 11 ||
[Analyze grammar]

tadādiṣṭā caret karma manasā karmaṇā priyā |
ciraṃ tiṣṭhenna vai dvāre paragṛhe na sañcaret || 12 ||
[Analyze grammar]

gṛhatattvaṃ parasmai na kathayeccārpayettathā |
pūjāvastūni sarvāṇi tvanuktāpi prasādhayet || 13 ||
[Analyze grammar]

gacchenna tīrthayātrādo patyurājñāṃ vinā kvacit |
tīrthārthinī satī svasyāḥ patyuḥ pādodakaṃ pibet || 14 ||
[Analyze grammar]

patyuḥ pādodake sarvatīrthakṣetrāṇi tatkṛte |
bhuṃjyātpatiprasādaṃ ca miṣṭamannādikaṃ jalam || 15 ||
[Analyze grammar]

avibhajya na vai bhuṃjyād devātithipitṛṣvapi |
paricārakavargeṣu goṣu bhikṣukuleṣu ca || 16 ||
[Analyze grammar]

saṃskṛtopaskarā hṛṣṭā cātivyayaparāṅmukhī |
patyājñayā vratakartrī bhavetpatiparāyaṇā || 17 ||
[Analyze grammar]

sukhāsīnaṃ ramamāṇaṃ patiṃ notthāpayet kvacit |
dīnaṃ klībaṃ vyādhitaṃ ca vṛddhaṃ vāpi na tarjayet || 18 ||
[Analyze grammar]

strīdharmiṇī trirātraṃ ca svamukhaṃ naiva darśayet |
susnātā bhartṛvadanamīkṣetā'nyasya na kvacit || 19 ||
[Analyze grammar]

patyau cānupasthite taṃ smṛtvā sūryaṃ vilokayet |
haridrāṃ kuṃkumaṃ binduṃ sindūraṃ kajjalādikam || 20 ||
[Analyze grammar]

tāmbūlaṃ maṃgalasūtraṃ śṛṃgārā''bhūṣaṇāni ca |
keśasādhana kabarīṃ kaṃkaṇaṃ karṇabhūṣaṇam || 21 ||
[Analyze grammar]

nāsikābhūṣaṇaṃ sūtraṃ saubhāgyadravyamityapi |
bhartrāyuṣyecchukī sādhvī dūrayenna kadācana || 22 ||
[Analyze grammar]

bharturvidveṣiṇī saṃbhāṣayennaiva pativratā |
yatra yatra rucirbhartustatra premaratirbhavet || 23 ||
[Analyze grammar]

hṛṣṭaṃ hṛṣṭā viṣaṇṇāsyā viṣaṇṇāsye priye priyā |
vipadi saṃpadi sādhvī bhavet patyekarūpiṇī || 24 ||
[Analyze grammar]

sarpirlavaṇatailādikṣaye kaṣṭe na yojayet |
vidherviṣṇorharādvāpi nārāyaṇācca sarvathā || 25 ||
[Analyze grammar]

patirekaḥ paraḥ satyāḥ parabrahmasvarūpakaḥ |
bharturājñāṃ vinā copavāsavratādi nācaret || 26 ||
[Analyze grammar]

uktā pratyuttaraṃ kruddhā dadyāt sā saramā bhavet |
śṛgālī ca bhavet tiraskāriṇī vānarī bhavet || 27 ||
[Analyze grammar]

uccāsanaṃ na seveta nā'bhimānavatī bhavet |
apavādaṃ kalahaṃ ca kalaṃkaṃ na dadet priye || 28 ||
[Analyze grammar]

gurūṇāṃ sannidhau noccairvadennāpi haset satī |
bāhyādāyāntamālokya bhartāraṃ tvaritā satī || 29 ||
[Analyze grammar]

jalānnaphalatāmbūlapādasaṃvāhanādibhiḥ |
śramanodanavākyaiśca priyaiḥ saṃprīṇayet patim || 30 ||
[Analyze grammar]

mitaṃ dadāti janako mātā bhrātā suto mitam |
amitasya pradātāraṃ patiṃ santoṣayet sadā || 31 ||
[Analyze grammar]

patirdevaḥ patirdharmastīrthaṃ bhartā patirguruḥ |
paratreha ca sukhadastaṃ patiṃ sevayet sadā || 32 ||
[Analyze grammar]

vinā patiṃ rahaścārā tūlūkī jāyate drume |
patyustāḍanakartrī ca vyāghrī daṃśā ca jāyate || 33 ||
[Analyze grammar]

narānye cakṣuṣordātrī vakrākṣī miñjarī bhavet |
patiṃ tyaktvā tu miṣṭādī sūkarī valgurī bhavet || 34 ||
[Analyze grammar]

tūṃkṛtya svāminaṃ brūte yā sā mūkā'lpajihvikā |
sapatnīdveṣayuktā syād durbhagā guptarogiṇī || 35 ||
[Analyze grammar]

patyanyaṃ kāmanāyuktaṃ mukhaṃ darśayati svakam |
kāṇā kubjā kurūpā ca kumukhī ca bhavettu sā || 36 ||
[Analyze grammar]

abhartṛkā suvarṇā'pi nārī śavasamā matā |
mātā dhanyā pitā dhanyo dhanyāḥ sambandhibāndhavāḥ || 37 ||
[Analyze grammar]

dhanyo grāmaḥ patirdeśo yatrāste vai pativratā |
pitṛvaṃśyā mātṛvaṃśyāḥ pativaṃśyāstrayastrayaḥ || 38 ||
[Analyze grammar]

pativratāprapuṇyaiste divi devā bhavanti vai |
pativratāpadanyāsā bhūmivaikuṇṭhamucyate || 39 ||
[Analyze grammar]

candraḥ sūryo'nalo vāyuḥ pāvitryātha satīpadam |
spṛśatyeva jalaṃ tadvat tīrthaṃ bhavati pāvanam || 40 ||
[Analyze grammar]

bhāryā gārhasthyamūlaṃ cā''nandamūlaṃ prajāpradā |
puṇyamūlaṃ sarvaloke jayadā gṛhameva sā || 41 ||
[Analyze grammar]

gaṃgāvatpāvanī sādhvī yā sadā bhartṛtoṣiṇī |
pāpanāśakarī devī smaratāṃ sadgatipradā || 42 ||
[Analyze grammar]

satītvaṃ sati duṣprāpyaṃ nisargācchrīprasaṃbhavam |
sādhvītvaṃ prāpya saddharma pramādāttaṃ na nāśayet || 43 ||
[Analyze grammar]

pātivratyaṃ sadā rakṣet prāpyā'pi vipadaḥ satī |
satītvaṃ puṇyataḥ prāta nāstikyād yā na manyate || 44 ||
[Analyze grammar]

sā tu dharmacyutā nārī kulaṭātvaṃ prapadyate |
svadharmaniratā satyavādinī ca jitendriyā || 45 ||
[Analyze grammar]

prāpnoti vipulaṃ svargaṃ devānāmapi durlabham |
tasmāt sarvaprayatnena sādhvī svadharmatatparā || 46 ||
[Analyze grammar]

hetuṃ sarvapumarthasya pātivratyaṃ hi rakṣayet |
gavārthaṃ brāhmaṇasyārthaṃ svāmyarthaṃ yā hi vartate || 47 ||
[Analyze grammar]

sā svamokṣamavāpnoti svāmisevāsamarjitam |
śṛṇu sādhvi mama putri pañcacūḍoditaṃ tu yat || 48 ||
[Analyze grammar]

nāradaḥ pañcacūḍākhyāṃ papracchā'psarasaṃ purā |
strīṇāṃ svabhāvamicchāmi tvattaḥ śrotuṃ vadā'tra me || 49 ||
[Analyze grammar]

pañcacūḍā prāha tatra nāradaṃ munisattamam |
strīsvabhāvasya kathanaṃ nindāyāṃ parivartate || 50 ||
[Analyze grammar]

mune śakyā kathaṃ nārī nāryā tu nindituṃ vada |
viditāste striyo yāśca yādṛśyaśca svabhāvataḥ || 51 ||
[Analyze grammar]

na māmarhasi devarṣe niyoktuṃ praśnamīdṛśam |
tathāpi tvanniyogādvai kathayāmi yathātatham || 52 ||
[Analyze grammar]

tatra vāṇīkṛto doṣastvayi nārad gṛhyatām |
omityaṃgīcakārarṣistataḥ prāhā'psarovarā || 53 ||
[Analyze grammar]

kulīnā nāthavatyaśca rūpavatyaśca yoṣitaḥ |
maryādāsu na tiṣṭhanti strīṣu cāñcalyadūṣaṇam || 54 ||
[Analyze grammar]

cāñcalyena svakaṃ dharmaṃ pātivratyaṃ gatipradam |
rakṣituṃ na prayatante tato yāntyadhamāṃ gatim || 55 ||
[Analyze grammar]

asaddharmastvayaṃ strīṇāmasmākaṃ bhavati prabho |
pāpīyaso narān yadvai lajjāṃ tyaktvā bhajāmahe || 56 ||
[Analyze grammar]

striyaṃ ca yaḥ prārthayate sannikarṣaṃ ca gacchati |
īṣacca kurute sevāṃ tamevecchanti yoṣitaḥ || 57 ||
[Analyze grammar]

anarthitvānmanuṣyāṇāṃ bhayātpatijanasya ca |
maryādāyāmamaryādāḥ striyastiṣṭhanti bhartṛṣu || 58 ||
[Analyze grammar]

nā''sāṃ kaścidamānyo'sti nā''sāṃ vayasi niścayaḥ |
surūpaṃ vā kurūpaṃ vā pumāṃsamupabhuṃjate || 59 ||
[Analyze grammar]

na bhayādathavā''krośānnārthahetoḥ kathaṃcana |
na jñānikulasambandhāt striyastiṣṭhanti bhartṛṣu || 60 ||
[Analyze grammar]

ityāha strīsvabhāvāṃśca pañcacūḍā'psarovarā |
tān svabhāvān prasaṃmṛdya mano niyamya yatnataḥ || 61 ||
[Analyze grammar]

patiṃ paraṃ prabhuṃ jñātvā cāṃcalyaṃ tatra yojayet |
patimeva paraṃbrahma patimeva ca bhājanam || 62 ||
[Analyze grammar]

sevāyāḥ paramaṃ jñātvā tathā puṇyasya bhājanam |
dharmasya bhājanaṃ caiva tathā mokṣasya bhājanam || 63 ||
[Analyze grammar]

paralokasya sarvasya tathā svargasya bhājanam |
bhājanaṃ sadguṇānāṃ ca paramānandabhājanam || 64 ||
[Analyze grammar]

kulakakīrterbhājanaṃ ca maryādābhājanaṃ tathā |
cāñcalyaśāntipātraṃ ca dharmapātraṃ paraṃ tathā || 65 ||
[Analyze grammar]

kāmanāśāntipātraṃ ca lajjāyā bhājanaṃ tathā |
manaḥśāntermārjanaṃ cā'narthā'nutpādasādhanam || 66 ||
[Analyze grammar]

vaṃśotpatterbījapātraṃ svargamokṣādipātrakam |
patiṃ harisvarūpaṃ vai bhajeddivyaṃ pativratā || 67 ||
[Analyze grammar]

antakaḥ śamano mṛtyuḥ pātālaṃ vaḍavāmukham |
kṣuradhārā viṣaṃ sarpo vahnirityekataḥ striyaḥ || 68 ||
[Analyze grammar]

tadetānantakādisvabhāvān nisargajān guṇān |
vartitavyaṃ vilīyaiva satyā patyau hi sarvathā || 69 ||
[Analyze grammar]

patiṃ jñātvā hariṃ nityaṃ pūjayed yā pativratā |
na tasyāḥ śrīhareḥ pūjā patyarcā'to'tiricyate || 70 ||
[Analyze grammar]

iti jñātvā sadā putri patiṃ sevaya dharmataḥ |
bhuktiṃ muktiṃ tathā sveṣṭaṃ prāpsyasi patyanugrahāt || 71 ||
[Analyze grammar]

iti lakṣmi pātivratyadharmāścoktā hi menayā |
pārvatyai ca mayā tubhyaṃ proktāstvatra prasaṃgataḥ || 72 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pativratāmāhātmye menakoktān pārvatīṃ prati pativratādharmān paṃcacūḍoktānnāradaṃ prati strīsvabhāvāṃśca pradarśya pātivratyadharmanigamanamityādinirūpaṇanāmaikonā'śītyadhikatriśatatamo'dhyāyaḥ || 379 ||
[Analyze grammar]