Chapter 334

śrīlakṣmīruvāca |
nārāyaṇapriyā kutra sambhūtā tulasī tataḥ |
kasya vā sā kule jātā kasya daityasya sā vadhūḥ || 1 ||
[Analyze grammar]

kena vā tapasā prāpa punarnārāyaṇaṃ patim |
vistareṇa hare brūhi matkathāṃ vismṛtāṃ mayā || 2 ||
[Analyze grammar]

śrīnārāyaṇa uvāca |
vacmi manoḥ samārabhya śṛṇu lakṣmi kathāṃ tava |
vismṛtā praśnarūpeṇa smāritāṃ kathayāmi te || 3 ||
[Analyze grammar]

viṣṇoraṃśo manurdakṣasāvarṇiḥ saṃbabhūva ha |
tatsuto dharmasāvarṇivaiṣṇavaścātha tatsutaḥ || 4 ||
[Analyze grammar]

viṣṇusāvarṇirityuktastasyāpi vaiṣṇavaḥ sutaḥ |
devasāvarṇiretasya rājasāvarṇiraṃgajaḥ || 5 ||
[Analyze grammar]

tasya putro vṛṣadhvajo babhūva śivabhaktimān |
putrādapi paraḥ sneho vṛṣadhvaje śivasya yat || 6 ||
[Analyze grammar]

rājā nārāyaṇaṃ lakṣmīṃ mene nāpi sarasvatīm |
yajñaṃ divākaraṃ devān na mene mattavad yadā || 7 ||
[Analyze grammar]

bhraṣṭaśrīrbhava bhūpeti tvaśapat taṃ ravistadā |
rājā śivasya śaraṇaṃ rakṣaṇārthaṃ yayau drutam || 8 ||
[Analyze grammar]

śaṃbhustriśūlamādāya raviṃ prahartumāgataḥ |
bhayāt palāyitaḥ sūryo brahmāṇaṃ śaraṇaṃ yayau || 9 ||
[Analyze grammar]

brahmā sūryaṃ puraskṛtya vaikuṇṭhaṃ prayayau drutam |
nārāyaṇaṃ praṇemuste cakruḥ sarvaṃ nivedanam || 10 ||
[Analyze grammar]

nārāyaṇastu kṛpayā hyabhayaṃ dattavāṃstadā |
śivastriśūlahastaśca teṣāṃ pṛṣṭhaṃ yayau krudhā || 11 ||
[Analyze grammar]

nārāyaṇaṃ namaskṛtya niṣasādā'rpitāsane |
śivaṃ nārāyaṇaḥ prāha brūhyāgamanakāraṇam || 12 ||
[Analyze grammar]

mahādevastataḥ prāha kṛṣṇanārāyaṇaṃ harim |
sūryaḥ śaśāpa me bhaktaṃ vṛṣadhvajamasupriyam || 13 ||
[Analyze grammar]

bhaktavāsalyaśokena sūryaṃ hantumahaṃ gataḥ |
sa brahmāṇaṃ puraskṛtya tvāṃ śaraṇyaṃ samāgataḥ || 14 ||
[Analyze grammar]

tvāṃ ye śaraṇamāpannā dhyānena vacasā'pi vā |
nirāpadaste niḥśaṃkā jarāmṛtyū jitau tu taiḥ || 15 ||
[Analyze grammar]

kintu nārāyaṇa sūryaśāpena śrīhatasya vai |
kiṃ me bhaktasya bhavitā tanme brūhi jagatprabho || 16 ||
[Analyze grammar]

nārāyaṇo haraṃ prāha vṛṣadhvajo'tra cāgataḥ |
haṃsadhvajastu tatputro rājāpi vṛddhatāṃ gataḥ || 17 ||
[Analyze grammar]

tatputrau vaiṣṇavau tvadya dharmadhvajakuśadhvajau |
vartete tau śriyā bhraṣṭau tayostu bhāryayorhara || 18 ||
[Analyze grammar]

lakṣmīrdvedhā mama patnī putrīdvayaṃ bhaviṣyati |
sampadyuktau ca madbhaktau nṛpaśreṣṭhau bhaviṣyataḥ || 19 ||
[Analyze grammar]

vaikuṇṭhe ghaṭikārdhaṃ vai bhūmau yugaikaviṃśatiḥ |
vyatīto bhavate kālastasmācchaṃbho na citratā || 20 ||
[Analyze grammar]

ityuktāste yayuḥ sarve yathāsthānaṃ svakaṃ svakam |
vṛṣadhvajo nijaṃ rājyamāgatya nidhanaṃ gataḥ || 21 ||
[Analyze grammar]

haṃsadhvajo'pi kālena tato vai nidhanaṃ gataḥ |
athogratapasā bhūpau dharmadhvajakuśadhvajau || 22 ||
[Analyze grammar]

nārāyaṇaṃ prasādyaiva varaṃ prāpaturīpsitam |
lakṣmīrdvedhā yuvayorvai putrī bhaviṣyati dhruvam || 23 ||
[Analyze grammar]

tatpratāpena sampannau rājyaśreṣṭhau bhaviṣyathaḥ |
atha tau kārayāmāsatuśca lakṣmyāḥ samarcanam || 24 ||
[Analyze grammar]

vrataṃ cāpi prasannā'bhūllakṣmīḥ prāha varaṃ ca tau |
dhanavantau putravantau pṛthvīśeśau śriyā yutau || 25 ||
[Analyze grammar]

nārāyaṇasya kṛpayā bhavataṃ nṛpapūjitau |
ityāśiṣā pariplutāvavadatāṃ tathāstviti || 26 ||
[Analyze grammar]

śriyā yutāvitivākyaṃ yathārthaṃ kuru padmaje |
ityācintya ca lakṣmīḥ sā dvedhā rūpamathā'karot || 27 ||
[Analyze grammar]

kuśadhvajagṛhe kanyā jātā kālena śrīkarī |
kuśadhvajapriyā putrīṃ suṣuve kamalāṃśajām || 28 ||
[Analyze grammar]

jātamātrā vedavatī dhvaniṃ cakāra kanyakā |
tena vedavatī nāmnā khyātimāpa tadaiva ha || 29 ||
[Analyze grammar]

pitarau sā namaskṛtya yayau tapase sadvanam |
puṣkare tapasā sādhvī śuśrāva vyomabhāratīm || 30 ||
[Analyze grammar]

janmāntare tu te bhartā bhaviṣyati hariḥ svayam |
iti śrutvā punā ruṣṭā cakāra tu punastapaḥ || 31 ||
[Analyze grammar]

gandhamādanamāśritya sthitā ciraṃ tatāpa ca |
dadarśa puratastatra brāhmaṇaṃ rāvaṇābhidham || 32 ||
[Analyze grammar]

sā tvatithiṃ namaskṛtya pādyaṃ phalaṃ jalādikam |
dadau tasmai so'pi duṣṭo manovikṛtimāpa vai || 33 ||
[Analyze grammar]

tāṃ kareṇa samākṛṣya saṃbhogaṃ kartumudyataḥ |
vedavatī kopadṛṣṭyā staṃbhitaṃ ta cakāra ha || 34 ||
[Analyze grammar]

śaśāpa ca madarthe tvaṃ vinaśyasi sabāndhavaḥ |
ityuktvā sā satī dehaṃ vilīyā'dṛśyatāṃ gatā || 35 ||
[Analyze grammar]

sā tu vedavatī pṛthvyāḥ putrī janakanandinī |
sītādevī prasaṃjātā yadarthe rāvaṇo hataḥ || 36 ||
[Analyze grammar]

seyaṃ lakṣmīstvamevā''sīḥ kalpāntareṣu sarvathā |
sītārūpā bhavasi tvamahaṃ rāmo bhavāmi ca || 37 ||
[Analyze grammar]

rākṣasānāṃ vināśāya tathāklṛptaṃ mayāsti vai |
tvāṃ vinā tāmasānāṃ tu nānyad vināśakāraṇam || 38 ||
[Analyze grammar]

mahātapasvinī lakṣmīrlebhe rāmaṃ patiṃ harim |
jātismarā sma smarati viṣehe duḥkhameva sā || 39 ||
[Analyze grammar]

rāmaḥ piturvacanena śatarathasya kānanam |
jagāma sītayā sākaṃ lakṣmaṇenā'nujena vai || 40 ||
[Analyze grammar]

saṃdadarśa tatra vahniṃ rāmo brāhmaṇarūpiṇam |
vahniruvāca bhagavān rāvaṇāntakaro hyayam || 41 ||
[Analyze grammar]

sītāharaṇadvāreṇa samayaḥ samupāgataḥ |
ahamagniḥ suraiḥ prasthāpito'smi viprarūpadhṛk || 42 ||
[Analyze grammar]

sītāṃ mayi tu sannyasya chāyāṃ sītāṃ gṛhāṇa vai |
dāsyāmi sītāṃ samaye matprasū vai parīkṣaṇe || 43 ||
[Analyze grammar]

rāmastadvacanaṃ śrutvā drāgeva kṛtavāṃstathā |
lakṣmaṇo naiva bubudhe gopyamanyasya kā kathā || 44 ||
[Analyze grammar]

etasminnantare rāmo dadarśa kānakaṃ mṛgam |
jagāma tadvināśāya sītāyā āgraheṇa vai || 45 ||
[Analyze grammar]

lakṣmaṇo'pi yayau paścāt sītāṃ nināya rāvaṇaḥ |
vijayākhyaḥ pārṣadaḥ sa mṛdhe mṛtvā yayau punaḥ || 46 ||
[Analyze grammar]

pretatvamatha ca jayaḥ savarṇo'pi raṇāntare |
mṛtvā jagāma vai pretatvaṃ tṛtīyajaneḥ kṛte || 47 ||
[Analyze grammar]

rāmabāṇena laṃkāyāṃ rākṣasā bahavo hatāḥ |
vibhīṣaṇo'bhavadbhaktastasmai rājyaṃ dadau hariḥ || 48 ||
[Analyze grammar]

śuddhyarthaṃ ca tato rāmo vahnau parīkṣaṇaṃ vyadhāt |
tatra hutāśanastasmai vāstavīṃ jānakīṃ dadau || 49 ||
[Analyze grammar]

chāyāṃ provāca bhagavān gaccha tvaṃ puṣkaraṃ priye |
tapasyāṃ tatra kṛtvātha svargalakṣmīrbhaviṣyasi || 50 ||
[Analyze grammar]

sā taptvā'yutavarṣāṇi svarge lakṣmīrbabhūva ha |
saiva lakṣmīryajñakuṇḍe draupadī saṃbhaviṣyati || 51 ||
[Analyze grammar]

satyayuge vedavatī kuśadhvajasutā tu sā |
tretāyāṃ rāmapatnī sā sīteti janakātmajā || 52 ||
[Analyze grammar]

tacchāyā draupadī devī dvāparānte tu bhāvinī |
kalau tu māṇikī devī nārāyaṇaparāyaṇā || 53 ||
[Analyze grammar]

kṛṣṇanārāyaṇārohā bhavatyevaṃ yuge yuge |
iti te'bhihitaṃ caikarūpaṃ śṛṇu dvitīyakam || 54 ||
[Analyze grammar]

dharmadhvajasya patnī tu mādhavīti ca viśrutā |
gandhamādanaśikhare garbhavatī babhūva sā || 55 ||
[Analyze grammar]

kārtikīpūrṇimāyāṃ sā suṣāva padminīṃ sutām |
pādapadmayuge tāṃ tu padmarāgavirājitām || 56 ||
[Analyze grammar]

rājarājeśvarīṃ lakṣmīṃ sarvāvayavasundarīm |
rājalakṣmīlakṣmayuktāṃ rājalakṣmyadhidevatām || 57 ||
[Analyze grammar]

candrānanāṃ padmapatranetrāṃ bimbādharāṃ śubhām |
karapādatalā''raktāṃ nimnanābhiṃ valitrayām || 58 ||
[Analyze grammar]

śvetacampakavarṇābhāṃ tulasīṃ nāmataḥ kṛtām |
tulanā sīdati yatrā'nyāsāṃ sā tulasī sutā || 59 ||
[Analyze grammar]

jātamātrā yuvatī sā jātismerā'tisundarī |
mama nārāyaṇaḥ svāmī bhaviteti viniścitā || 60 ||
[Analyze grammar]

kṛṣṇanārāyaṇaprāptyai jagāma badarīvanam |
tatra ciraṃ tayā cīrṇaṃ kṛṣṇadṃ paramaṃ tapaḥ || 61 ||
[Analyze grammar]

grīṣme pañcatapāḥ śīte jalasthā sā ca kanyakā |
vṛṣṭidhārāṃ sahamānā varṣāsu tvakarot tapaḥ || 62 ||
[Analyze grammar]

pūrvaṃ phalāśanā paścātpatrāśanā jalāśanā |
bāyvaśanā nirāhārā caikapādasthitā'bhavat || 63 ||
[Analyze grammar]

brahmā samāyayau dṛṣṭvā tapaścograṃ ciraṃtanam |
samāgataṃ varaṃ dātuṃ tatra badarikāśrame || 64 ||
[Analyze grammar]

brahmāṇaṃ sā praṇanāma brahmā tāṃ samuvāca ha |
varaṃ vṛṇuṣva tulasi yatte manasi vāñchitam || 65 ||
[Analyze grammar]

kṛṣṇabhaktiṃ ca muktiṃ vā'pyajarāmaratāmapi |
śṛṇu tāta pare dhāmni goloke'haṃ sthitā purā || 66 ||
[Analyze grammar]

kṛṣṇapatnī kiṃkarī ca tadaṃśā tatsakhī priyā |
ramā vṛndā tathā lakṣmīrahamevā'bhavaṃ tadā || 67 ||
[Analyze grammar]

ramārūpāṃ tadā vṛndāṃ govindāsaktamānasām |
ratisthāṃ rādhikā krodhāt śaśāpa māṃ tu sevikām || 68 ||
[Analyze grammar]

tathaiva vāṇīṃ padmāṃ māṃ śaśāpa cāpi vai punaḥ |
yāhi tvaṃ mānavīṃ yoniṃ smarāmyetat purābhavam || 69 ||
[Analyze grammar]

tataḥ padmāvatīṃ māṃ ca gaṇeśaḥ śaptavān purā |
vṛkṣatvaṃ yāhi cetyevaṃ daityapatnī bhavetyapi || 70 ||
[Analyze grammar]

śāpottaraṃ tu goloke kṛṣṇaḥ prāha mudā hasan |
mamaiva pārṣado lakṣmi sudāmā yo madaṃśakaḥ || 71 ||
[Analyze grammar]

so'pi rādhākṛtaśāpācchaṃkhacūḍo bhaviṣyati |
tasya patnī bhāvinī tvaṃ gaṇeśoktānusārataḥ || 72 ||
[Analyze grammar]

tato māṃ tvaṃ tapastaptvā labhiṣyasi na saṃśayaḥ |
ahaṃ nārāyaṇaṃ kāntaṃ patiṃ mama purātanam || 73 ||
[Analyze grammar]

sāmprataṃ labdhumicchāmi varamevaṃ pradehi me |
jātismarā yathā vedmi tatsarvaṃ kathitaṃ tu te || 74 ||
[Analyze grammar]

tasmād brahman yathāśāpaṃ kuru yogyaṃ yathā bhavet |
brahmovāca tadā lakṣmīṃ sarvaṃ jānāsi sundarī || 75 ||
[Analyze grammar]

jātismarā svayaṃ cāsi dharmadhvajasya putrikā |
sudāmā śaṃkhacūḍo'sau jāto'sti bhūtale'suraḥ || 76 ||
[Analyze grammar]

adhunā tasya patnī tvaṃ bhava bhāvini śobhane |
paścānnārāyaṇaṃ kāntaṃ kṛṣṇameva labhiṣyasi || 77 ||
[Analyze grammar]

tulasī tvaṃ vṛkṣarūpā vṛndāvane bhaviṣyasi |
pradhānā sarvapuṣpāṇāṃ pāvanī saṃbhaviṣyasi || 78 ||
[Analyze grammar]

tvayā vinā tu sarveṣāṃ pūjā syād viphalā yathā |
tathā kṛṣṇaḥ prāṇato'pi vallabhāṃ tvāṃ vidhāsyati || 79 ||
[Analyze grammar]

vṛndāvane vṛkṣarūpā vṛndā vṛndāvanīti vai |
bhaviṣyasi tava dalaiḥ pūjayiṣyanti keśavam || 80 ||
[Analyze grammar]

janāstathā tena sārdhaṃ vihariṣyasi santatam |
rādhāsamā tvaṃ subhagā govindasya bhaviṣyasi || 81 ||
[Analyze grammar]

rādhikāyāḥ prāṇatulyā kṛṣṇaprāṇā bhaviṣyasi |
śrutvaitattulasī prāha śīghraṃ syāttattathā kuru || 82 ||
[Analyze grammar]

brahmā lakṣmyai tadā prāha japārthaṃ mantramuttamam |
rādhākṛṣṇāya cātmānaṃ samarpayāmi oṃ namaḥ || 83 ||
[Analyze grammar]

iti ṣoḍaśavarṇāḍhyaṃ datvā cādṛśyatāṃ yayau |
sāpi jajāpa taṃ mantraṃ puṇye badarikāśrame || 84 ||
[Analyze grammar]

svalpakālena mantreṇa tapaḥsiddhirajāyata |
divyā prasannamanasā dadarśa kṛṣṇamagrataḥ || 85 ||
[Analyze grammar]

kṛṣṇa prāha tulasīṃ te tapaḥ siddhirajāyata |
adyataḥ pārṣadabhāryā bhūtvā māṃ prāpsyase priye || 86 ||
[Analyze grammar]

ityuktvā'dṛśyatāṃ yātaḥ sā'pi tatyāja tattapaḥ |
bhuktvā pītvā ca santuṣṭā suṣvāpa śayane śubhe || 87 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne tulasīvivāhākhyāne manuvaṃśīyavṛṣadhvajasya sūryaśāpaḥ vaikuṇṭhe prārthanayā tadvaṃśe kuśadhvajagṛhe sītākhyā laśmīrabhavat dharmadhvajagṛhe tulasyākhyā lakṣmīrabhavat badaryāṃ tulasyāstapastatsiddhiścetyādinirūpaṇanāmā catustriṃśadadhikatriśata |
tamo'dhyāyaḥ || 334 ||
[Analyze grammar]