Chapter 322

śrīnārāyaṇa uvāca |
śṛṇu lakṣmyadhimāsānte dine tvakṣaradhāmani |
kṛtamudyāpanaṃ sarvaiḥ puruṣottamamandire || 1 ||
[Analyze grammar]

rādhākṛṣṇādayaḥ sarve golokasthāḥ samāyayuḥ |
vāsudevādayo vyūhāḥ svaprajābhiḥ samāyayuḥ || 2 ||
[Analyze grammar]

mahāvaikuṇṭhalokasthā vayaṃ nārāyaṇādayaḥ |
tvayā saha prajābhiśca gatā abhūma cākṣaram || 3 ||
[Analyze grammar]

avyākṛtā'mṛtadhāmabhūmaśrīpuratatstriyaḥ |
nyāyeśvarādayaḥ sarve mudā tatra yayustadā || 4 ||
[Analyze grammar]

mahāviṣṇuprabhṛtayo hiraṇyagarbhasṛṣṭayaḥ |
pravairājāścāvaraṇā īśvarā jagmurakṣaram || 5 ||
[Analyze grammar]

viṣṇorjalāvaraṇordhvavaikuṇṭhasthā yayustathā |
sadāśivasya dhāmasthā mahāmāyāprajā yayuḥ || 6 ||
[Analyze grammar]

evaṃ ta īśvarāścāvatārā gatvā'kṣaraṃ param |
cakrurudyāpanaṃ tatra puruṣottamamāsikam || 7 ||
[Analyze grammar]

brahmaṇaḥ satyaloke carṣayo munijanāstathā |
mātṛgaṇāḥ pitaraśca devā jagmuśca vaiṣṇavaḥ || 8 ||
[Analyze grammar]

udyāpanaprakartāro divyā yayurnarādayaḥ |
tīrthāni devatāḥ sarvā devyo jagmurdiśastathā || 9 ||
[Analyze grammar]

tattvānyapi yayustatra saritaḥ sindhavastathā |
parvatāśca tathā'khātā dvīpāḥ khaṇḍā yayustathā || 10 ||
[Analyze grammar]

grahāstārāśca nakṣatramaṇḍala vṛkṣavallayaḥ |
divyā vai bhaktavaryāstu daityā dānavarākṣasāḥ || 11 ||
[Analyze grammar]

oṣadhayastathā sarpā nāgāḥ patattrayo'malāḥ |
jalavāsāḥ sthalavāsā vāyuvāsā yayustadā || 12 ||
[Analyze grammar]

pātālasthā vivarasthā divyādivyā yayustadā |
vratinaḥ sahavāsāśca bhaktā udyāpanaṃkṛte || 13 ||
[Analyze grammar]

satye paitāmahe loke sannidhau yayurādarāt |
puruṣottamamāsasyodyāpanārthaṃ yayuśca te || 14 ||
[Analyze grammar]

gandharvāḥ kinnarāḥ sūtādayaśca suramānavāḥ |
bhaṭṭacāraṇabhṛtyāśca raudrā api ca śāṃkarāḥ || 15 ||
[Analyze grammar]

ete cānye vratapūrtiphalārthaṃ cotsave gatāḥ |
śṛṇu lakṣmi tatra tatra yathāśakti yathādhanam || 16 ||
[Analyze grammar]

kṛtamudyāpanaṃ sarvaiḥ sarveṣṭasiddhidāyakam |
bhuktimuktipradaṃ dravyadānapūrvaṃ kṛtaṃ tu taiḥ || 17 ||
[Analyze grammar]

śṛṇu taistu kṛtamudyāpanaṃ saṃśrāvayāmi te |
puruṣottamamāsasya yaduktaṃ hariṇā svayam || 18 ||
[Analyze grammar]

pakṣadvaye caturdaśyāmamāyāṃ pūrṇimātithau |
ekādaśyāṃ navamyāṃ vā vratāhe'ṣṭamikātithau || 19 ||
[Analyze grammar]

yatra tithau bhavedānukūlyaṃ tatrāpi vā tithau |
udyāpanaṃ prakuryādvai vratasampūrtihetave || 20 ||
[Analyze grammar]

puruṣottamamāsasya dundubhiśca sthale sthale |
uddhoṣayati gatvaiva kurvantūdyāpanaṃ śubham || 21 ||
[Analyze grammar]

puruṣottamamāsasya phalaṃ pūrṇaṃ bhaviṣyati |
śrutvā'pi ḍiṇḍamaṃ cānye cakrurudyāpanaṃ gṛhe || 22 ||
[Analyze grammar]

rātrau bhūśāyino bhūtvā brahmacaryaṃ prarakṣya ca |
prātarutthāya te sarve cakrurdhyānaṃ harestataḥ || 23 ||
[Analyze grammar]

kṛtvā śaucādikāḥ sarvā daihikīrbāhyataḥ kriyāḥ |
divyādivyaṃ yathāvarṣma kṛtvā snānādikaṃ tataḥ || 24 ||
[Analyze grammar]

japaṃ homaṃ tathā sandhyāṃ svādhyāyaṃ tarpaṇādikam |
yathālokaṃ yathāvarṣma yathāyogyaṃ vidhāya te || 25 ||
[Analyze grammar]

nityāṃ pūjāṃ vṛddhapūjāṃ kṛtvā pūjyārhaṇādikam |
ācamya ca bhuvaṃ kṛtvā saṃskṛtāṃ bahuvistarām || 26 ||
[Analyze grammar]

cakruśca maṇḍapaṃ tatra bahustaṃbhasamanvitam |
ratnahīrakahārādyairāmrā'śokāditoraṇaiḥ || 27 ||
[Analyze grammar]

kadalīstambhapatrādyaiḥ kalpavallyāstaroḥ phalaiḥ |
kalaśaiḥ raṃgavallībhiścāmbaraiḥ kānakānvitaiḥ || 28 ||
[Analyze grammar]

bandhayitvā pradīpaiśca śobhayitvā sugandhibhiḥ |
vāsayitvā ca tanmadhye pañcadhānyaiśca saptabhiḥ || 29 ||
[Analyze grammar]

dhānyairvā kārayitvaiva sarvatobhadramaṇḍalam |
sapatnīkān viṣṇubhaktān nimantrya ca yathābalam || 30 ||
[Analyze grammar]

nyasuścaturaḥ kalaśāṃścaturdikṣu ca maṇḍale |
suvastraśrīphalapūgīnāgavallīdalānvitān || 31 ||
[Analyze grammar]

tatrā'kṣatān pūrayitvā śarkarādravyamiśritān |
vāsudevaṃ saṃkarṣaṇaṃ pradyumnaṃ cāniruddhakam || 32 ||
[Analyze grammar]

īśānataḥ kramānnyasya madhye ca kalaśe śubhe |
saphale sāmbare pūgīsvarṇamudrā'kṣatānvite || 33 ||
[Analyze grammar]

pañcaratnayute svarṇe nyadhuḥ śrīpuruṣottamam |
rādhālakṣmyādisahitaṃ sauvarṇe divyarūpiṇam || 34 ||
[Analyze grammar]

evaṃ tairvratibhiḥ sarvaiḥ sthāpanaṃ śrīhareḥ kṛtam |
ācāryaśca gurustatra pūjanārthaṃ praveśitaḥ || 35 ||
[Analyze grammar]

dehaśuddhiḥ kāritā ca yajamānasya tena vai |
tata āvāhito devaścāsanaṃ ca pradāpitaḥ || 36 ||
[Analyze grammar]

pādaprakṣālanārtha vai dattaṃ jalaṃ sutīrthajam |
caturdikṣu kṛtā dīpāḥ sugandhastatra kāritaḥ || 37 ||
[Analyze grammar]

arghyaṃ phalādibhiryuktaṃ dampatyā ca samarpitam |
ācamanīyasalilaṃ dattaṃ devāya tīrthajam || 38 ||
[Analyze grammar]

dadhi dugdhaṃ ghṛtaṃ kṣaudraṃ śarkarā cāmṛtaṃ tathā |
abhiṣeka jalasnānaṃ dattāni keśavāya vai || 39 ||
[Analyze grammar]

vastreṇa mārjito devau vastrābhūṣaṇabhūṣitaḥ |
gandhasārottaratailasugandhādyaiḥ suvāsitaḥ || 40 ||
[Analyze grammar]

kuṃkumakajjalacūrṇacandanādyaiḥ suśobhitaḥ |
maṇihīrakamauttikahāropavītabhūṣitaḥ || 41 ||
[Analyze grammar]

kirīṭakuṇḍalakaṭakormikāśṛṃkhalānvitaḥ |
chatrayaṣṭinaktakacāmarapattrāṇarakṣitaḥ || 42 ||
[Analyze grammar]

paryaṃka genduka kaśipvā darśādi pradāpitaḥ |
puṣpatulasīpadmādyaiḥ puṇḍraiścandraiḥ suśobhitaḥ || 43 ||
[Analyze grammar]

atha tanmaṇḍape tāmrapātre homaśca kāritaḥ |
caturthyantairnāmamantraistilairghṛtena satphalaiḥ || 44 ||
[Analyze grammar]

aṣṭottaraśatavāraṃ tataśca tarpaṇaṃ kṛtam |
devāśca pitaraśceti tṛpyantāṃ puruṣottamaḥ || 45 ||
[Analyze grammar]

atha nīrājito devo bahuvartyanalaistathā |
namaskṛtaḥ stutaḥ pradakṣiṇīkṛtaśca vaiṣṇavaiḥ || 46 ||
[Analyze grammar]

daṇḍavatsatkṛtaścāpi dhyātaḥ śrīpuruṣottamaḥ |
kṣamāpito hariḥ puṣpāṃjalirdattaśca śārṅgiṇe || 47 ||
[Analyze grammar]

atha saṃbhojito devo miṣṭānnaistarpito'mṛtaiḥ |
arpitaśca jalairmiṣṭaphalaistāmbūlacarvitaḥ || 48 ||
[Analyze grammar]

sugandhairudvartitaśca karayoḥ puruṣottamaḥ |
svāsthyairviśramito devaḥ pādayorabhivāhitaḥ || 49 ||
[Analyze grammar]

evaṃ sarvaiḥ pūjitaśca bhagavān puruṣottamaḥ |
āvirbhūto'dṛśyatāgre phalantvanantakaṃ dadau || 50 ||
[Analyze grammar]

athā''cāryāya saṃdattā dakṣiṇā hemarūpyakā |
dhenudānaṃ kṛtaṃ cāpi svarṇaśṛṃgārabhūṣitam || 51 ||
[Analyze grammar]

ghṛtavastratilapātraṃ dattaṃ viprāya tatra ca |
pratimā ca pradattā saṃhitāśāstraṃ samarpitam || 52 ||
[Analyze grammar]

kāṃsyāni saṃpuṭātmāni triṃśaddattāni vai tadā |
tadā triṃśattriṃśadapūpaiśca madhye sampūritāni vai || 53 ||
[Analyze grammar]

etadbrahmāṇḍadānaṃ vai kalpitaṃ puruṣottame |
pratyaṅgaṃ tu yāvanti chidrāṇi santi padmaje || 54 ||
[Analyze grammar]

tāvadvarṣasahasrāṇi vaikuṇṭhe vasatirbhavet |
tato vasatirgoloke tato dhāmnyakṣare pare || 55 ||
[Analyze grammar]

athavā'pūpasāmagryapakvā deyā dvijanmane |
atha saṃbhojitā viprāḥ santaḥ sādhyaśca bālakāḥ || 56 ||
[Analyze grammar]

pāyasānnaiśca miṣṭānnairvyañjanaiścāmṛtādibhiḥ |
caturdhā bhojanairbhakṣyabhojyalehyasucoṣyakaiḥ || 57 ||
[Analyze grammar]

rasairdugdhādibhirvārbhiḥ śarkarailādimiśritaiḥ |
tato jalaṃ mukhaśuddhistāmbūlakaṃ ca dakṣiṇā || 58 ||
[Analyze grammar]

vastrāṇyābharaṇānyuttamottamānyarpitāni vai |
devībhyo devatābhyaśca gurubhyo'pyarpitāni ca || 59 ||
[Analyze grammar]

tattallokaja tattvāni dānayogyāni yāni vai |
bhūtebhya āśritebhyaścātithibhyo'nnaṃ samarpitam || 60 ||
[Analyze grammar]

tato bhuktaṃ svajanaiśca saha vratibhirādarāt |
phalāhārādikaṃ yogyaṃ vratabhaṃgā'karaṃ hi yat || 61 ||
[Analyze grammar]

madhyāhne'pi kṛtaṃ tadvanniśi rātrau ca vai tathā |
pūjito bhojito devo jāgareṇa yutairjanaiḥ || 62 ||
[Analyze grammar]

gītaṃ ca nartanaṃ puṇyaṃ bhajanaṃ ca kṛtaṃ janaiḥ |
prātaḥ snātvā pūjitaśca kṣamāpyā'tha visarjitaḥ || 63 ||
[Analyze grammar]

ācāryāya pradattaḥ sa mūrtirūpaḥ pareśvaraḥ |
evamudyāpanaṃ kṛtvā yayuḥ sarve nijālayam || 64 ||
[Analyze grammar]

phalaṃ cānantakaṃ prāptaṃ puruṣottamasevanāt |
tato lakṣmi yathāśakti vratametatsamācaret || 65 ||
[Analyze grammar]

duḥkhadāridryadaurbhāgyanāśaḥ syādiṣṭamāpnuyāt |
niyamānāṃ parityāgastataḥ kuryād vratī janaḥ || 66 ||
[Analyze grammar]

madhyabhojī naktabhojī brāhmaṇān bhojayed vratī |
ayācite vrate labdhe svarṇadānaṃ samācaret || 67 ||
[Analyze grammar]

māsopavāsinā deyā dogdhrī gaurdakṣiṇāyutā |
dhātrīvratī pradadyācca dadhiṃ kṣīraṃ ca śarkarām || 68 ||
[Analyze grammar]

phalānāṃ niyame lakṣmi phaladānaṃ samācaret |
tailarodhe ghṛtaṃ deyaṃ ghṛtarodhe payo'rpaṇam || 69 ||
[Analyze grammar]

dhānyānāṃ niyame dadyād dhānyāni tāni tāni ca |
bhūśāyitve tu paryaṃkagendukakaśipucchadān || 70 ||
[Analyze grammar]

phalapatrādiniyame tāni dadyād dvijanmane |
maune ghaṇṭāśaṃkhavādyān dadyād devāya padmaje || 71 ||
[Analyze grammar]

nakhakeśadharo dadyādādarśaṃ keśakarcikām |
upānahau pradadyācca hyupānadādivarjane || 72 ||
[Analyze grammar]

kṣāratyāge rasān dadyād dīpadāne tu dīpakān |
ekāntaropavāsī ca kuṃbhānaṣṭau pradāpayet || 73 ||
[Analyze grammar]

rājñāṃ yāvatya iṣṭāśca smṛddhayo'tra bhavanti vai |
deyā dāne ca tāḥ sarvā yathāśakti yathādhanam || 74 ||
[Analyze grammar]

ekānnena vratī yāyāccaturbāhuḥ parāṃ gatim |
ekabhojyupavāsyeva sarvānkāmānavāpnuyāt || 75 ||
[Analyze grammar]

pūrvāhṇe bhuṃjate devā madhyāhne munayastathā |
aparāhṇe pitṛgaṇā naktabhojī naro bhavet || 76 ||
[Analyze grammar]

dine dine'śvamedhasya phalaṃ naktādano labhet |
dvādaśīvratakṛd yāti garuḍena hareḥ padam || 77 ||
[Analyze grammar]

yasya yasya niyamaḥ syāttattaddāne niyojayet |
tena pūrṇaṃ vrataṃ syācca brahmalokapradaṃ bhavet || 78 ||
[Analyze grammar]

anityena śarīreṇa sādhyaṃ mokṣapadaṃ sadā |
puruṣottamatulyaṃ tu nāsti lakṣmi trilokake || 79 ||
[Analyze grammar]

sahasrajanmataptena tapasā'pi na gamyate |
yatphalaṃ gamyate loke puruṣottamasevayā || 80 ||
[Analyze grammar]

trirātrasnānataścātra śākhāmṛgo'kṣaraṃ yayau |
āsīdvai kerale deśe dvijo dhanātilolupaḥ || 81 ||
[Analyze grammar]

tena kadaryanāmnā saḥ khyātiṃ jagāma dehiṣu |
sadannavastraṃ bhuktaṃ na svāhā svadhā kṛtā na vā || 82 ||
[Analyze grammar]

dhanaṃ pṛthvyāṃ rakṣitaṃ ca dharmakāryaṃ kṛta na ca |
na vrataṃ notsavaścāpi na grahaṇaṃ na kuṃbhanam || 83 ||
[Analyze grammar]

kṛtaṃ kṛtaṃ bhikṣaṇaṃ tu dhanasyā'ṭan vidīnavat |
so'gānmālākāravāṭikāyāṃ duḥkhaṃ rudanmuhuḥ || 84 ||
[Analyze grammar]

mālākāro dayāṃ kṛtvā rarakṣa svāntike hi tam |
vāṭikārakṣakaṃ kṛtvā mālī grāme gato bhavet || 85 ||
[Analyze grammar]

paścājjaghāsa pakvāni cākrīṇata phalāni saḥ |
evaṃ stenakriyākarturjagmurayutavatsarāḥ || 86 ||
[Analyze grammar]

mamāra ca vane tatra nā'vāpa vahnidāruṇī |
yamadūtairnīyamānastāḍyamāno yamālayam || 87 ||
[Analyze grammar]

gacchannuvāca duṣkarmaphalaṃ prāptaṃ mayā'dya vai |
mānuṣaṃ janma saṃprāpya na kiñcit sukṛtaṃ kṛtam || 88 ||
[Analyze grammar]

cauryādisañcitaṃ dravyaṃ sthitaṃ bhūmau nirarthakam |
na dhṛtaṃ nā'ttameveti puṇyaṃ cāpi kṛtaṃ nahi || 89 ||
[Analyze grammar]

na kuṭumbaṃ poṣitaṃ ca bhāryā kaṣṭena yojitā |
kadaryo vilapannevaṃ gato yamapuraṃ tataḥ || 90 ||
[Analyze grammar]

citragupto'vadaddharmaṃ pāpadvayaṃ bahūgrakam |
phalacauryaṃ tathā viśvāsaghātitvaṃ paraṃ bahu || 91 ||
[Analyze grammar]

śrutvā prāha yamo dūtān pretamenaṃ vidhattha vai |
tato'stu vānaro'yaṃ tu muhurnarakayātanaḥ || 92 ||
[Analyze grammar]

iti dūtaiḥ prāpitaḥ saḥ pretatāṃ nirjale vane |
tataḥ kapirabhūt kālaṃjare śaile bhayaṃkare || 93 ||
[Analyze grammar]

tatrendreṇa kṛtaḥ pūrvaṃ kuṇḍo mṛgasutīrthakaḥ |
tatraiva vānaro jātaḥ pūrvapuṇyāt tadalpakāt || 94 ||
[Analyze grammar]

śṛṇu pūrvakṛtaṃ puṇyaṃ puruṣottamaśaṃsanam |
citrakuṇḍalavaiśyo'bhūt puruṣottamasadvratī || 95 ||
[Analyze grammar]

dānakṛt taṃ ca bhikṣārthaṃ kadaryo gatavān purā |
praśaśaṃsa ca taṃ vaiśyaṃ dhanalobhena bhikṣukaḥ || 96 ||
[Analyze grammar]

puruṣottamamāsasya vrataṃ yad vidhinā tvayā |
kṛtaṃ tādṛk kṛtaṃ naiva kenāpi tvatra bhūtale || 97 ||
[Analyze grammar]

kṛtārtho'si tvayā yatsevitaḥ śrīpuruṣottamaḥ |
dhanyado mokṣadaścāyaṃ māsaḥ śrīpuruṣottamaḥ || 98 ||
[Analyze grammar]

dehi mahyaṃ dhanaṃ kiñciditi māsaṃ śaśaṃsa saḥ |
tena puṇyena tīrthe'tra vānaratvamupāgamat || 99 ||
[Analyze grammar]

janmatastasya vaktre'bhūtpīḍā'sṛgavraṇasaṃbhavā |
dantāḥ petuḥ kṣudhā vyāpto jvarātipīḍito'bhavat || 100 ||
[Analyze grammar]

patitaḥ kuṇḍanikaṭe āyānmāḥ puruṣottamaḥ |
daśamīdinataḥ pañcāhāni kuṇḍajale yayuḥ || 101 ||
[Analyze grammar]

vyasustīrthajale jātastena divyavapurdharaḥ |
caturbhujo'bhavad divyadevīpārṣasevitaḥ || 102 ||
[Analyze grammar]

tīrthamṛtestathā jātaḥ snānāt pañcāhasatkṛtān |
ajñānācca tathā jātaṃ kiṃ punarvidhinā kṛtāt || 103 ||
[Analyze grammar]

te sadā subhagāḥ puṇyāsteṣāṃ ca saphalo bhavaḥ |
yeṣāṃ pumuttamo māsaḥ snānadānajapairgataḥ || 104 ||
[Analyze grammar]

tāni koṭiguṇānyeva kṛtāni puruṣottame |
kapirjagāma golokaṃ vimānavaramāsthitaḥ || 105 ||
[Analyze grammar]

evaṃ kadaryaścauro'pi vānaratvaṃ gato'pi ca |
puruṣottamayogena prāpto gaulokameva saḥ || 106 ||
[Analyze grammar]

puruṣottamamāsasya kathāyāḥ śravaṇādapi |
māsopoṣaṇapūjādiphalaṃ pūrṇamavāpyate || 107 ||
[Analyze grammar]

śrutvā dharmaṃ vijānāti śrutvā pāpaṃ ca naśyati |
śrutvā nivartate mohaḥ śrutvā jñānāmṛtaṃ milet || 108 ||
[Analyze grammar]

lakṣmīnārāyaṇasaṃhitākhyaṃ vedaṃ paṭhed vratī |
śṛṇuyācchrīpuruṣottamamāse mokṣadā hi sā || 109 ||
[Analyze grammar]

yayā nāryā kṛto naiva māsaḥ śrīpuruṣottamaḥ |
tatpatinā''dṛtaścet sā labhet tatphalaṃ varam || 110 ||
[Analyze grammar]

satī nārī sadā pātivratyadharmaparā yadi |
patirūpo bhavatyasyā māsaḥ śrīpuruṣottamaḥ || 111 ||
[Analyze grammar]

kurūpo vā kuvṛtto vā duḥsvabhāvo'pi madyapaḥ |
rogī krodhī sthavīro vā mūko'ndho badhiro'pi vā || 112 ||
[Analyze grammar]

raudro dīnaḥ kadaryo vā daridraḥ kutsito'pi vā |
kātaraḥ kitavo vāpi viṣayī lampaṭo'pi vā || 113 ||
[Analyze grammar]

satataṃ devavatpūjyaḥ satyā sādhvyā patirhariḥ |
vidhavayā kanyayā ca patireva hariḥ sadā || 114 ||
[Analyze grammar]

sevanīyaḥ pūjanīyo dhyātavyo'dhyāsitavya ut |
vācā ca karmaṇā dehenāpi bhāvanayā tathā || 115 ||
[Analyze grammar]

na patyurviṣamaṃ kāryaṃ nodvejanīya īśvaraḥ |
bālā yuvatī jaraṭhā patyadhīnā priyā bhavet || 116 ||
[Analyze grammar]

kāmena lobhena balena vāpi dainyena bhāvena samāśrayeṇa |
rūpeṇa vāsena dhanādinā vā satṛṣṇayā vendriyadhātupuṣṭyā || 117 ||
[Analyze grammar]

sadambarairyānavaraiśca vāhanairābhūṣaṇairhīrakaratnakoṭibhiḥ |
sunṛtyagītairbahulāsanairapi nānyaṃ bhajet sā khalu sādhulakṣaṇā || 118 ||
[Analyze grammar]

anyasmai darśanārthaṃ śṛṃgāraṃ kurute na vai |
svānurūpaṃ naraṃ yā na cintayati priyā satī || 119 ||
[Analyze grammar]

surūpaṃ taruṇaṃ ramyaṃ kāminīnāṃ ca vallabham |
dṛṣṭvā na vikṛtiṃ yāti sā vai bodhyā mahāsatī || 120 ||
[Analyze grammar]

bhuṃkte bhukte yathā patyau duḥkhite duḥkhinā ca yā |
mudite muditā supte suptā jāgarti jāgrati || 121 ||
[Analyze grammar]

vṛddhabhaktā patikārye'nukūlā nā'dhikavyayā |
gṛhā''gataṃ patiṃ pratyuttiṣṭhatyāsanavāribhiḥ || 122 ||
[Analyze grammar]

prasannavadanā kāle bhojanādipradāyinī |
bhuktavantaṃ śrāvayennā'priyaṃ śāntiṃ dadettathā || 123 ||
[Analyze grammar]

sevārthaṃ sarvadā bhāvyaṃ prītyarthaṃ priyayā sadā |
vastuvyayaṃ na cātyarthaṃ kurvīta gṛharakṣikā || 124 ||
[Analyze grammar]

śṛṃgāraścātibhūṣādi dhārayet patituṣṭaye |
tretādau pramadānāṃ syādārtavā'śocameva ha || 125 ||
[Analyze grammar]

tatra caturahānyeva gṛhakāryaṃ na saṃspṛśet |
snātvā sūryaṃ patiṃ kṛṣṇaṃ dṛṣṭvā paścāt kriyāparā || 126 ||
[Analyze grammar]

bhavet bhavetputrakāmā yugmarātriratipriyā |
putrīkāmā tvayugmāsu rātriṣu svāmisevikā || 127 ||
[Analyze grammar]

āṣoḍaśarātrikaṃ vai garbhādhānabalaṃ bhavet |
taduttaraṃ kamalasya dvāraṃ baddhaṃ prajāyate || 128 ||
[Analyze grammar]

na bibhatsā bhavet kvāpi rūkṣavāṇī bhavenna ca |
śūrpavātaṃ nā''dadīta nopāviśettathāṃ'gane || 129 ||
[Analyze grammar]

dvāradārau cullikāyāṃ peṣaṇyāṃ niṣadīta na |
guruṃ vā'tyuṣṇamāhāramajīrṇaṃ na samācaret || 130 ||
[Analyze grammar]

tenā'patyavatī syādanyathā garbhakṣaro bhavet |
sapatnī sthānamirṣyāyāḥ sādhvīrṣyā parivarjayet || 131 ||
[Analyze grammar]

gṛhakleśaṃ na janayed rakṣayet sarvathā gṛham |
nā''krośet patimālakṣya bhartsayenna vimānayet || 132 ||
[Analyze grammar]

ratyā dadyātsukhaṃ tasmai svāmine rakṣiṇe sadā |
patyājñayā bahirgacched devadarśanahetave || 133 ||
[Analyze grammar]

patyau deśāntaraṃ prāpte sādhvī varteta sarvathā |
raṃgarāgavihīnā vai śvaśrvādyājñākarī sadā || 134 ||
[Analyze grammar]

vastrairaṃgaiśca malinā na bhavecchuddhimācaret |
svāmiśiṣṭaṃ prasādānnajalaṃ bhuñjīta bhāvataḥ || 135 ||
[Analyze grammar]

snāyānna vastraśūnyā vai na nagnā syāt kadācana |
nolūkhale na musale na ghaṭādau na cāśmani || 136 ||
[Analyze grammar]

na yantre na ca rathyāyāṃ satī tūpāviśet kvacit |
patipādodakaṃ tīrthaṃ pibet tīrthaphalapradam || 137 ||
[Analyze grammar]

vratopavāsaniyamān patimullaṃghya nā''caret |
bhartuścaraṇāvabhyarcya bhoktavyaṃ priyayā sadā || 138 ||
[Analyze grammar]

patyākṣeptrī saramā syādulūkī svodaraṃbharā |
sūkarī cānyapārśvasthā vāgurī guptabhakṣikā || 139 ||
[Analyze grammar]

avamānakarī mūkā sāpatnerṣyā tu durbhagā |
patyuḥ kaṣṭapradā nārī kurūpā rogiṇī bhavet || 140 ||
[Analyze grammar]

bhartā brahmā haro viṣṇurgurustīrthaṃ vrataṃ japaḥ |
śuddhiḥ svargaṃ śubhaṃ dānaṃ tasmātpatiṃ susevayet || 141 ||
[Analyze grammar]

jīvahīno'śucirdehā bhartṛhīnā'śuciḥ satī |
pativratā priyā svasyāḥ patiṃ svargaṃ nayet satī || 142 ||
[Analyze grammar]

yamadūtāḥ palāyante satīṃ dṛṣṭvā tu dūrataḥ |
yāvatsvalomasaṃkhyāsti tāvatkoṭyayutāni vai || 143 ||
[Analyze grammar]

bhartrā svargasukhaṃ bhuṃkte ramamāṇā pativratā |
vidhavayā patiṃ smṛtvā tarpaṇaṃ kāryamanvaham || 144 ||
[Analyze grammar]

darbhatilodakaiḥ piṣṭaphalairgogrāsakaistathā |
anyaiśca dānakāryaiśca puṇyaṃ samarjayettu sā || 145 ||
[Analyze grammar]

brahmāṇḍaṃ saṃpuṭākāraṃ kāṃsyapātrakṛtaṃ dadet |
madhyatriṃśadapūpapūritaṃ tantusuveṣṭitam || 146 ||
[Analyze grammar]

pūjitaṃ cākṣatapuṣpakuṃkumairarpayet satī |
patnīvrato bhavet tadvanpumān patnīparāyaṇaḥ || 147 ||
[Analyze grammar]

svasya prāṇaṃ tathā dehaṃ kṣetraṃ śāntisthalīṃ śubhām |
patnīṃ sammānayennityaṃ mādhuryeṇa vilokayet || 148 ||
[Analyze grammar]

miṣṭaṃ dadyācca bhāṣetā''kārayetpremabhāvataḥ |
tiraskurvīta no patnīṃ tāḍayennā''kṣipenna ca || 149 ||
[Analyze grammar]

vastrabhūṣādyalaṃkārairdravacandanapuṣpakaiḥ |
tailatantukajjalādyaistoṣayet svapriyāṃ sadā || 150 ||
[Analyze grammar]

nodvejayenna prasahya bhuñjīta na ca rodhayet |
kṣudhayā tṛṣayā patnīṃ karmaṇā duḥkhayenna ca || 151 ||
[Analyze grammar]

na cā'vigaṇayenmānahīnāṃ dāsīṃ priyāṃ patiḥ |
vaṃśadāṃ ratidāṃ vallīvadāśritāṃ prapoṣayet || 152 ||
[Analyze grammar]

athecchukīṃ na pravadennetyapi noccaretpatiḥ |
omityuccārya saṃdadyādapekṣitadhanādikam || 153 ||
[Analyze grammar]

bhojyakāryaṃ gṛhakāryaṃ ratikāryaṃ tanukriyām |
patikāryaṃ tathā'nyacca kurvāṇāṃ supramodayet || 154 ||
[Analyze grammar]

nānyāṃ nārīṃ samīkṣeta nānyāṃ vyavāyakṛtadbhavet |
nānyāṃ priyo bhavet kvāpi patnīṃ lakṣmīṃ vihāya vai || 155 ||
[Analyze grammar]

nānyāṃ puṣṭipradaḥ syācca nānyayā ca rameta vai |
yānavāhanadeśādyutsavasāmājakeṣu ca || 156 ||
[Analyze grammar]

nānyāparo bhavet kvāpi yadi svargaṃ hi vāñchati |
evaṃ dharmaparau tvatra dampatī mokṣabhāginau || 157 ||
[Analyze grammar]

indradyumnaḥ śatadyumno yauvanāśvo bhagīrathaḥ |
kalpakalpāntare cānye vaiṣṇavā rājabhūsurāḥ || 158 ||
[Analyze grammar]

puruṣottamamārādhya yayurbhagavadantikam |
puruṣottamamāsasya dundubhiryena saṃśrutaḥ || 159 ||
[Analyze grammar]

tena tena ca sarvatrotsavo'nuṣṭhita eva ha |
dundubhestu prapūjā ca kṛtā nārāyaṇena ca || 160 ||
[Analyze grammar]

yadā yadā'dhimāso'pi samāgacchet tadā tadā |
dundubhinā paṭahena kartavyā''jñāpraghoṣaṇā || 161 ||
[Analyze grammar]

dhāmnyakṣare rakṣitaḥ śrīpumuttamena sarvadā |
kṛṣṇanārāyaṇena śrīpuruṣottamaśārṅgiṇā || 162 ||
[Analyze grammar]

rādhayā ca śriyā lakṣmyā pārvatyā prabhayā tathā |
māṇikyayā jayayā ca ramayā sahitaḥ prabhuḥ || 163 ||
[Analyze grammar]

pratyahaṃ tvadhimāse'yaṃ pūjanīyaḥ pareśvaraḥ |
bhojanāya sevanīyo dhyātavyaḥ puruṣottamaḥ || 164 ||
[Analyze grammar]

śrotavyaṃ māsamāhātmyaṃ śloko'dhyāyaḥ prapūrṇakaḥ |
gaṃgādisarvatīrthānāṃ phalaṃ syānnātra saṃśayaḥ || 165 ||
[Analyze grammar]

pṛthvīpradakṣiṇāpuṇyaṃ brahmāṇḍoddhārapuṇyakam |
śravaṇena bhavedasya māsā muktistathā bhavet || 166 ||
[Analyze grammar]

varṇāstathā''śramavantaḥ śreṣṭhatāṃ sarvathā gatāḥ |
śrutvā muktiṃ samāyānti paśucaryā janā api || 167 ||
[Analyze grammar]

puruṣottamamāhātmyaṃ lekhayitvā sabandhanam |
dadyādasya phalaṃ vaṃśatrayaṃ golokago bhavet || 168 ||
[Analyze grammar]

māhātmyapustakādhāre gṛhe tīrthāni sarvaśaḥ |
vasanti devatāścāpi vartate puruṣottamaḥ || 169 ||
[Analyze grammar]

śrotā vaktā śrāvayitā varṇayitā praśaṃsakaḥ |
rakṣako vratakṛd dātā sarve te puruṣottamāḥ || 170 ||
[Analyze grammar]

kṛṣṇanārāyaṇo'nādiśrīhariḥ puruṣottamaḥ |
saṃhitopasamādeṣṭā pūjanīyo viśeṣataḥ || 171 ||
[Analyze grammar]

lakṣmīḥ śrutvā cātitṛptā pupūja puruṣottamam |
kṛṣṇanārāyaṇaṃ devaṃ pupūja svapatiṃ harim || 172 ||
[Analyze grammar]

tvanmukhāmṛtapānena kṛtārthā'smītyuvāca sā |
vyāsaṃ patisvarūpaṃ saṃpupūja ca nanāma ca || 173 ||
[Analyze grammar]

ahaṃ nārāyaṇo vaktā lakṣmīstvaṃ ca narāyaṇī |
gṛhṇāmi tvatkṛtāṃ pūjāṃ kimanyacchrotumicchasi || 174 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne puruṣottamamāsamāhātmye'kṣaradhāmni sarvasṛṣṭīśvaraiḥ kṛtaḥ puruṣottamamāsavratodyāpanāvidhiḥ niyamapūrtyarthaṃ dānāni dīpadānaphalaṃ kadaryamuktiḥ vānaramokṣaṇam pativratādharmāḥ patnīvratadharmāḥ kāṃsyasaṃpuṭātmaka brahmāṇḍadānaṃ dundubhipūjanaṃ śravaṇādiphalaṃ cetyādinirūpaṇanāmā dvāviṃśatyadhikatriśatatamo'dhyāyaḥ || 1322 ||
[Analyze grammar]