Chapter 258

śrīlakṣmīruvāca |
namo namaste govinda ṛṣikeśa janārdana |
sākṣinprayojaka svāminnārāyaṇa niyāmaka || 1 ||
[Analyze grammar]

dṛśyaprada dṛśerdātardraṣṭṛtvena vyavasthita |
bījapradāṃ'kurātman prastambapatrādiṣu sthita || 2 ||
[Analyze grammar]

kāṇḍanālasupuṣpastha bījātmaka namo'stu te |
phalaprada phale tiṣṭhan svayaṃ phalasi tadṛtau || 3 ||
[Analyze grammar]

karmabījaphalavyāpin vṛṣṭibīja namo'stu te |
vadā''śvinā'sitapakṣe kiṃnāmnyekādaśī bhavet || 4 ||
[Analyze grammar]

ko vidhiḥ kiṃ phalaṃ cāsyāḥ kīdṛśaṃ ca vrataṃ matam |
ko devaḥ pūjyate cātra dānādyaṃ pūjanādi kim || 5 ||
[Analyze grammar]

śrīnārāyaṇa uvāca |
āśvine kṛṣṇapakṣe'sti tvindirānāmanāmataḥ |
upendraḥ subhagāyuktaḥ pūjyo dūrvābhiratra vai || 6 ||
[Analyze grammar]

āmalakīphalaṃ cā'rghye śaṣkulī tu nivedane |
kanyādānaṃ pradhānaṃ ca pūjanaṃ sāṃgameva yat || 7 ||
[Analyze grammar]

pitṝṇāṃ tarpaṇaṃ mukhyaṃ kartavyaṃ tṛptidaṃ śubham |
agatīnāṃ gatikṛcca vrataṃ śrāddhādisaṃyutam || 8 ||
[Analyze grammar]

daśamyāmekabhukto'syā vratī brahmacaro bhavet |
bhūśāyī saṃyamī prātastvekādaśyāṃ vrataṃ caret || 9 ||
[Analyze grammar]

utthāya śrīhariṃ smṛtvā dhyātvā mūrtiṃ harestataḥ |
snātvā pūjāṃ prakuryācca naityikīṃ śuddhamānasaḥ || 10 ||
[Analyze grammar]

maṇḍapaṃ kārayitvā ca sarvatobhadramaṇḍale |
ghaṭaṃ suvarṇajanyaṃ vā tāmrajaṃ sthāpayennavam || 11 ||
[Analyze grammar]

pañcaratnasupallavaphalavāryambarānvitam |
ghaṭopari tilasthālīṃ sthāpayedvai prapūritām || 12 ||
[Analyze grammar]

pārśvetvāmānnamevātra pitṝṇāṃ tṛptidaṃ tathā |
jalaṃ tīrthāhṛtaṃ pātre sthāpayecca kuśāṃstathā || 13 ||
[Analyze grammar]

śarkarāphalapiṣṭādi vinyasyetpārśvatastadā |
mūrtiṃ ca kānakīṃ tatropendrasya subhagāyutām || 14 ||
[Analyze grammar]

indirāsahitāṃ tilasthālyāṃ saṃsthāpayedvratī |
gaṇeśaṃ pūjayitvā ca śaṃkhaṃ ghaṇṭāṃ ghaṭaṃ tathā || 15 ||
[Analyze grammar]

pūjayitvā tataḥ kṛṣṇaṃ hṛdi smṛtvā vicintayet |
mastake mastakaṃ cāstu netrādau harinetrakam || 16 ||
[Analyze grammar]

hṛdaye hṛdayaṃ cāstu hastādau tatkarādikam |
kaṭyādau tasya kaṭyādi pādayorharipatkajam || 17 ||
[Analyze grammar]

mamāṃgeṣu hareraṃgāni santvātmani keśavaḥ |
ityevaṃ sarvatobhāvāt devo bhūtvā'rcayeddharim || 18 ||
[Analyze grammar]

āvāhanādikaṃ kuryāt paṃcāmṛtābhiṣecanam |
śuddhodakā''plavanaṃ ca kārayitvā'mbarārpaṇam || 19 ||
[Analyze grammar]

keśaprasādhanādyaṃ cā'ttarasugandhikārcanam |
gulālakuṃkumā'bīracandanākṣatapūjanam || 20 ||
[Analyze grammar]

alaktakā''rdracūrṇādiraṃgakajjalaraṃjanam |
kuryāddevasya sarvāṃgeṣvatha bhūṣādi dhārayet || 21 ||
[Analyze grammar]

śṛṃgāraśobhitāṃ mūrtiṃ puṣpahārādibhistataḥ |
kaṭakamukuṭādyaiśca surūpairūpayedbahu || 22 ||
[Analyze grammar]

dhūpadīpasunaivedyajalatāmbūlacūrṇakam |
ārārtrikastutipradakṣiṇadaṇḍavadādikam || 23 ||
[Analyze grammar]

dakṣiṇā'kṣatakusumāṃjalidānaṃ kṣamāpanam |
vidhivatsarvatobhāvayuktena vratī cetasā || 24 ||
[Analyze grammar]

dadyāt kuryācca yadyogyaṃ yācetā'vighnatāṃ vrate |
pitṝnsmṛtvā pradadyācca prasādāḍhyajalāṃjalim || 25 ||
[Analyze grammar]

dadyāddānāni vai prātarmadhyāhne'pi prapūjayet |
bhojayed vividhānnāni devaṃ nārāyaṇaṃ tataḥ || 26 ||
[Analyze grammar]

madhyāhnottarakāle ca pitṝṇāṃ śrāddhamācaret |
pitṛtīrthena salilaṃ dadyāttattatsunāmabhiḥ || 27 ||
[Analyze grammar]

piṇḍān dadyāt phalānyanyat tṛptidaṃ cārpayet pitṝn |
sāyaṃ nīrājanaṃ kṛtvā pūjayetparameśvaram || 28 ||
[Analyze grammar]

bhojayed dugdhapākādi jalapānādi cārpayet |
rātrau jāgaraṇaṃ kuryātsādhusaṃgatimācaret || 29 ||
[Analyze grammar]

kathāṃ kuryāttathā bhaktācchṛṇuyācca paṭhecca vā |
nṛtyaṃ gītaṃ prakuryācca samutsāhamahotsavam || 30 ||
[Analyze grammar]

prātaḥ snātvā hariṃ dhyātvā pūjayitvā vidhānataḥ |
datvā naivedyamīśāya bhojayedvaiṣṇavāṃstataḥ || 31 ||
[Analyze grammar]

āśritān bhojayitvā ca sādhūn sādhvīrdvijāṃstataḥ |
pāraṇāṃ ca vratī kuryād dadyād dānāni pātrake || 32 ||
[Analyze grammar]

guruṃ ca mātaraṃ vṛddhān pitaraṃ pūjayetpatim |
āśīrvādāṃśca gṛhṇīyāt kuryātkāryaṃ svakaṃ tataḥ || 33 ||
[Analyze grammar]

evaṃ kṛte vrate lakṣmi vāñchitaṃ siddhyati dhruvam |
pitṛtṛptikaraṃ bhojyaṃ jalaṃ vastrādi dāpayet || 34 ||
[Analyze grammar]

pitruddhārakaraṃ dānaṃ gavāṃ tvanyacca kārayet |
gṛhodyānapaśukṣetrakanyāvidyāsuvāhanam || 35 ||
[Analyze grammar]

svarṇaratnavibhūṣānnavividhopaskarānvitam |
dāpayet pitṛsantuṣṭibuddhyaiva śraddhayā vratī || 26 ||
[Analyze grammar]

gurave haraye dadyāt pitṛmuktikaraṃ bhavet |
bhuktidānmuktidaṃ śreṣṭhaṃ tato muktidamācaret || 37 ||
[Analyze grammar]

yasmādyasya bhavedicchāśāntyarthaṃ vāñchanā tvati |
tena tasya prakartavyā vāñchāyāḥ śāntiranyathā || 38 ||
[Analyze grammar]

vaiparītyaṃ bhavet pitratṛptito vaṃśajasya vai |
tasmātkāmaphalaṃ cā'pyakāmaphalakamityapi || 39 ||
[Analyze grammar]

kuryādvai vaṃśajaḥ pitṛtṛptyarthaṃ kāla āgate |
iṣakṛṣṇe vrate kuryād viśeṣaphalatṛptikṛt || 40 ||
[Analyze grammar]

svalpaṃ vā vipulaṃ vāpi dadyāt tattatsunāmabhiḥ |
paralokagatānāṃ tatsukhadaṃ bhavati dhruvam || 41 ||
[Analyze grammar]

pitaro yadi muktisthāstadā kartuḥ phalaṃ matam |
kṛtaṃ na niṣphalaṃ yāyāditi kṛtvā''cared budhaḥ || 42 ||
[Analyze grammar]

bījaṃ vai cāṃkuraṃ dadyātpatraṃ puṣpaṃ phalaṃ jalam |
na yāti niṣphalaṃ kṣetre śraddhāvāryabhiṣecanam || 43 ||
[Analyze grammar]

uṣare kṣīyate bījaṃ kṣetre pātre na naśyati |
tīrthe pātre satpuruṣe kṣiptaṃ dhruvaṃ prarohati || 44 ||
[Analyze grammar]

vrate pātre harau dadyād kṣiptaṃ cāpi na niṣphalam |
tasmātsvalpaṃ bahulaṃ vā phalasandhānavarjitam || 45 ||
[Analyze grammar]

dadyātpratiphalatyeva haryanugrahakāraṇāt |
śṛṇu lakṣmi kathāṃ ramyāṃ vratena pitṛtṛptidām || 46 ||
[Analyze grammar]

adhoyonigatānāṃ tu pitṝṇāṃ gatidāyinī |
indiraikādaśī śreṣṭhā vājapeyaphalapradā || 47 ||
[Analyze grammar]

indrasenena vai rājñopoṣitā pitṛtāraṇī |
nārmadākhye mahārāṣṭre candrāvatīpurīpatiḥ || 48 ||
[Analyze grammar]

indrasenākhyanṛpatirbabhūva prākkṛte yuge |
dharmeṇa pālayāmāsa prajāḥ putrānivaurasān || 49 ||
[Analyze grammar]

putrapautrasamāyukto dhanadhānyasamanvitaḥ |
gajavājiyānayukto viṣṇubhaktiparāyaṇaḥ || 50 ||
[Analyze grammar]

japan śrīharināmāni muktidāni tu sarvadā |
kālaṃ nayati bhaktyaivā'dhyātmadhyānavicintakaḥ || 51 ||
[Analyze grammar]

tasyaikadā gṛhe śāntyā''sīnasya purato muniḥ |
nārado vyomamārgeṇā'vatīrya samupasthitaḥ || 52 ||
[Analyze grammar]

āgataṃ nāradaṃ vīkṣya pratyutthāya kṛtāṃjaliḥ |
kṛtātithyaṃ muniṃ bṛṣyāsane ramye nyaveśayat || 53 ||
[Analyze grammar]

provāca svāgataṃ te'haṃ karomi brahmavittama |
adya me saphalaṃ rājyaṃ janma karma kulaṃ dhanam || 54 ||
[Analyze grammar]

dānaṃ kraturjapo homaḥ svādhyāyaḥ saphalā mama |
tvatprasādānmuniśreṣṭha bhāgyaṃ dhanyatamaṃ mama || 55 ||
[Analyze grammar]

sutapraputradārādidāsadāsīśatāni me |
gajavājivāhanāni saphalāni tavā''gamāt || 56 ||
[Analyze grammar]

sādhorvai darśanaṃ puṇyaṃ sparśanaṃ pāpanāśakam |
sevanaṃ svargadaṃ divyamokṣadaṃ tvātmano'rpaṇam || 57 ||
[Analyze grammar]

yeṣāṃ gṛhe na sādhūnāṃ caraṇadhūlikārajaḥ |
tāni śmaśānatulyāni bhavanāni gṛhāṇi ca || 58 ||
[Analyze grammar]

tāritaṃ mama sambandhikuṭumbaṃ sarvameva yat |
prasādaṃ kuru devarṣe nispṛhā''gamakāraṇam || 59 ||
[Analyze grammar]

nāradaḥ prāha rājarṣe śṛṇu vismayakārakam |
brahmalokādahaṃ prāpto yamalokaṃ mahīpate || 60 ||
[Analyze grammar]

dharmeṇa satkṛto bhaktyā hyupaviṣṭo varāsane |
dharmarājaṃ satyaśīlā dhārmikāḥ samupāsate || 61 ||
[Analyze grammar]

teṣāṃ sadasi pṛṣṭhasthaṃ nistejaskaṃ sthitaṃ tava |
pitaraṃ prahasantyanye bahupuṇyātimāninaḥ || 62 ||
[Analyze grammar]

sabhāyāṃ śrāddhadevasya prāha mahyaṃ pitā tava |
sandeśaṃ duḥkhanāśāya taṃ nibodha mahīpate || 63 ||
[Analyze grammar]

indrasena iti khyātaṃ candrāvatyā nṛpaṃ sutam |
brahman kathaya sandeśaṃ pitā te candrasenakaḥ || 64 ||
[Analyze grammar]

tiṣṭhati dharmarājasya nagaryāṃ puṇyapuṃjataḥ |
dānaṃ bahukṛtaṃ tena na kṛtaṃ vratameva yat || 65 ||
[Analyze grammar]

tena puṇyena dharmasya nagaryāmasti saṃsthitaḥ |
vratapuṇyena vidhuro nistejasko'tipṛṣṭhagaḥ || 66 ||
[Analyze grammar]

niṣīdati sabhāyāṃ vai cātiduḥkhānvitaḥ sadā |
tasmāt kuryād vrataṃ caikādaśyā uddiśya māṃ sutaḥ || 67 ||
[Analyze grammar]

mokṣaṃ kuryātsa me putra indirāpuṇyadānataḥ |
ityukto'haṃ samāyātaḥ samīpaṃ tava bhūpate || 68 ||
[Analyze grammar]

piturmokṣakṛte rājannindirāvratamācara |
tvatpitā tena puṇyena vaikuṇṭhaṃ yāsyati dhruvam || 69 ||
[Analyze grammar]

śrutvā pituḥ sa sandeśaṃ nāradaṃ pṛṣṭhavān vratam |
vidhinā kena kartavyaṃ kasmin pakṣe tithau tathā || 70 ||
[Analyze grammar]

nāradaḥ prāha rājānamāśvinā'sitapakṣake |
daśamyāṃ prātarutthāya smṛtvā kṛṣṇaṃ tataḥ param || 71 ||
[Analyze grammar]

snātvā devaṃ pūjayitvā madhyāhne snānamācaret |
datvā haraye naivedyamekabhuktaṃ samācaret || 72 ||
[Analyze grammar]

sāyaṃ snātvā hariṃ dhyātvā rātrau bhūmau śayīta ca |
ekādaśyāṃ prabhāte'yaṃ vratī nidrāṃ vihāya vai || 73 ||
[Analyze grammar]

smṛtvā dhyātvā hariṃ nāma raṭan śaucādikaṃ caret |
mukhaprakṣālanaṃ kuryājjalairdvādaśadhā muhuḥ || 74 ||
[Analyze grammar]

snānaṃ tīrthajalaiḥ kuryād devapūjāṃ samācaret |
harermūrtiṃ namaskṛtyā''camanādigrahottaram || 75 ||
[Analyze grammar]

ṣoḍaśopaskaraiḥ kṛṣṇamupendraṃ pūjayed vratī |
upavāsasya niyamaṃ gṛhṇīyācca tadagrataḥ || 76 ||
[Analyze grammar]

adya sthitvā nirāhāraḥ sarvabhogavivarjitaḥ |
śvo bhokṣye puṇḍarīkākṣa vrataṃ pūrṇaṃ kuru prabho || 77 ||
[Analyze grammar]

evaṃ niyamamāsthāya sarvatobhadramaṇḍale |
ghaṭe kṛṣṇaṃ sthāpayitvā mahāpūjanamācaret || 78 ||
[Analyze grammar]

samāpya vidhinā pūjāṃ nīrājayecca bhojayet |
madhyāhnepi svayaṃ snātvā śrīhariṃ bhojayettathā || 79 ||
[Analyze grammar]

nīrājayet svāpayeccotthāpayet pāyayejjalam |
vījayenmardayennāthaṃ sukhayediṣṭadānakaiḥ || 80 ||
[Analyze grammar]

śālagrāmaśilāgre ca śrāddhaṃ kuryād yathāvidhi |
pitṝṇāṃ prītaye śrāddhaṃ kuryāt śraddhāsamanvitaḥ || 81 ||
[Analyze grammar]

godhūmacūrṇairyacchrāddhaṃ kṛtaṃ tanmadhyamaṃ bhavet |
yavairvrīhitilairmāṣairgodhūmaiścaṇakaistathā || 82 ||
[Analyze grammar]

śrāddhaṃ kṛtaṃ bhavecchreṣṭhaṃ kartavyaṃ vratinā tu taiḥ |
śrāddhaṃ kṛtvā vratinā na bhoktavyaṃ pitṛsevitam || 83 ||
[Analyze grammar]

vratarakṣaṇalābhāya ghrātavyameva cārpitam |
paitryamannaṃ samāghrāya gave dadyādvicakṣaṇaḥ || 84 ||
[Analyze grammar]

rātrau mahārcanaṃ kuryājjāgaraṃ sotsavaṃ tathā |
dvādaśyāṃ prātarevā'yaṃ snātvā samarcya mādhavam || 85 ||
[Analyze grammar]

naivedyaṃ phalatāmbūle tvarpayitvā tato vratī |
ārārtrikādikaṃ kṛtvā kṣamāyācanikāṃ tathā || 86 ||
[Analyze grammar]

dadyād dānāni bhūrīṇi brāhmaṇādīn prabhojayet |
sādhūnsādhvīrbhojayecca bandhūn dauhitraputrakān || 87 ||
[Analyze grammar]

bhojayitvā ca dīnāndhān svayaṃ bhuñjīta vāgyataḥ |
anena vidhinā rājan kuru vratamatandritaḥ || 88 ||
[Analyze grammar]

viṣṇulokaṃ prayāsyanti pitarastava bhūpate |
ityuktvā nṛpatiṃ lakṣmi nārado'ntaradhīyata || 89 ||
[Analyze grammar]

yathoktavidhinā hīndrasenaścakāra tadvratam |
antaḥpureṇa sahitaḥ putrabhṛtyasamanvitaḥ || 90 ||
[Analyze grammar]

kṛte vrate gavāṃ dāne puṣpavṛṣṭirabhūd divaḥ |
puṇyārpaṇe kṛte cendrasenasya janakaḥ khalu || 91 ||
[Analyze grammar]

candrasenastathā'nye tatpitaro'pi vyavasthitāḥ |
garuḍasthā vimānasthā yayurvai viṣṇumandiram || 92 ||
[Analyze grammar]

indraseno'pi kṛtvā tadvrataṃ vaiṣṇavapālitāḥ |
rājyaṃ tvakaṇṭakaṃ bhuktvā datvā jyeṣṭhasutāya ca || 93 ||
[Analyze grammar]

mahīsenāya tatpaścājjagāma tridivaṃ svayam |
tatra puṇyaṃ samāpyaiva vaikuṇṭhamagamaddhi saḥ || 94 ||
[Analyze grammar]

ityevaṃ vratamāhātmyaṃ lakṣmi te kathitaṃ mayā |
paṭhanācchravaṇāccāpi vratapuṇyaṃ bhavedapi || 95 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne āśvinakṛṣṇendiraikādaśīvratamāhātmyam indrasenanṛpapitṛcandrasenaprabhṛtīnāṃ pitṝṇāṃ vratapuṇyabalād yamalokānmokṣaṇamityādinirūpaṇanāmā'ṣṭapaṃcāśadadhikadviśatatamo'dhyāyaḥ || 258 ||
[Analyze grammar]