Chapter 259

śrīlakṣmīruvāca |
sarvapuṇyamayo devastvameva bhagavān svayam |
dadāsi karuṇāsindhuḥ phalāni karmaṇāṃ yathā || 1 ||
[Analyze grammar]

tvāṃ vismṛtyā'nutiṣṭhanti kurvanti mānavāstu yat |
tatphalaṃ labhyate cātra paratra bhayayuk tu taiḥ || 2 ||
[Analyze grammar]

tvāṃ smṛtvā ye'nutiṣṭhanti kurvanti yāni yāni vai |
tatphalaṃ nirguṇaṃ nityānandamokṣātmakaṃ tvayā || 3 ||
[Analyze grammar]

dayite bhagavaṃstasmai śaraṇāgatiśāline |
evaṃ phalapradātā'si sarvakarmamayo'si yat || 4 ||
[Analyze grammar]

sarvajño'si kṛpāṃ kṛtvā vada me parameśvara |
āśvinaśuklapakṣe tu kiṃnāmnyekādaśī bhavet || 5 ||
[Analyze grammar]

ko devastatra saṃpūjyaḥ ko vidhiḥ kiṃphalaṃ tathā |
kiṃ dānaṃ tatra dātavyaṃ vada sarvaṃ hare'tra me || 6 ||
[Analyze grammar]

śrīnārāyaṇa uvāca |
iṣaśuklaikādaśī tu nāmnā pāśāṃkuśā matā |
sarvapāpaharā puṇyapradā mokṣapradā tathā || 7 ||
[Analyze grammar]

padmanābhaḥ padmavatyā saha pūjyo'tra bhaktitaḥ |
śamīpatrāṇi pūjāyāmarghye kāmaphalaṃ matam || 8 ||
[Analyze grammar]

śālipākastu naivedye dāne taṇḍulamodakāḥ |
sarvābhīṣṭaphalaprāptyai sarvaṃ deyaṃ janārdane || 9 ||
[Analyze grammar]

tapastaptvā cātitīvraṃ ciraṃ muniryatendriyaḥ |
yatphalaṃ samavāpnoti tannatvā padmanābhakam || 10 ||
[Analyze grammar]

bahupāpāni kṛtvāpi mohito mānavo vrate |
padmanābhaṃ hariṃ natvā na yāti narakaṃ hi saḥ || 11 ||
[Analyze grammar]

pṛthivyāṃ tīrthamātrāṇi puṇyānyāyatanāni ca |
kṛtāni tena sarvāṇi padmanābhaprapūjanāt || 12 ||
[Analyze grammar]

devadevaṃ padmanābhaṃ ye prapannā janārdanam |
na teṣāṃ yamalokasya yātanā'sti kadācana || 13 ||
[Analyze grammar]

ekāmekādaśīṃ kṛtvā prasaṃgenāpi mānavaḥ |
yadyapi ghorapāpastho na yāti yamayātanām || 14 ||
[Analyze grammar]

nedṛśaṃ pāvanaṃ kiñcit triṣu lokeṣu vidyate |
yādṛśī padmanābhasyaikādaśī pāpanāśinī || 15 ||
[Analyze grammar]

tāvatpāpāni vai vyaktau nirbhayāni vasanti hi |
yāvannopāvasetprāṇī padmanābhadinavrate || 16 ||
[Analyze grammar]

aśvamedhasahasrāṇi rājasūyaśatāni ca |
ekādaśyupavāsasya kalāṃ nārhanti ṣoḍaśīm || 17 ||
[Analyze grammar]

naikādaśīsamaṃ loke pāpakṣālanakārakam |
svargamokṣapradaṃ tvatra dhanamitrādidāyakam || 18 ||
[Analyze grammar]

śarīrārogyadaṃ dārāsutaputrīkulapradam |
vyājenāpi kṛtaṃ yena na sa yāti yamālayam || 19 ||
[Analyze grammar]

na gaṃgā na gayā lakṣmi na kāśī na ca puṣkaram |
na cāpi kauravaṃ kṣetraṃ śreṣṭhaṃ puṇyaṃ harerdināt || 20 ||
[Analyze grammar]

rātrau jāgaraṇaṃ kāryaṃ hareḥ kāryaṃ mahārcanam |
nirjalaṃ cāpi kartavyaṃ harerdine hyupoṣaṇam || 21 ||
[Analyze grammar]

tena vai labhyate lakṣmi śāśvataṃ dhāma vai mama |
daśaiva mātṛpakṣīyāḥ pitṛpakṣasthitā daśa || 22 ||
[Analyze grammar]

daśa patnīpakṣagatā uddharanti vratād dhruvam |
caturbhujā divyarūpā garuḍāṃ'sakṛtā''sanāḥ || 23 ||
[Analyze grammar]

sragviṇaḥ pītavastrāste viṣṇutulyaparākramāḥ |
nāryo lakṣmīsamā bhūtvā prayānti harimandiram || 24 ||
[Analyze grammar]

bālatve yauvane vāpi vārdhakye pāravaśyake |
upoṣyaikādaśīṃ dehī naiti pāpo'pi durgatim || 25 ||
[Analyze grammar]

pāśāṃkuśāmupoṣyaiva harerlokaṃ prayāti vai |
datvā hematilān gāśca jalamannaṃ tathā'mbaram || 26 ||
[Analyze grammar]

upānacchatramanyadvā yamalokaṃ na paśyati |
puṇyavratavihīnasya jīvanaṃ niṣphalaṃ matam || 27 ||
[Analyze grammar]

yasya puṇyavihīnāni dinānyāyānti yānti ca |
sa lohakārabhastreva śvasannapi na jīvati || 28 ||
[Analyze grammar]

snānaṃ dānaṃ japaṃ homaṃ dhyānaṃ satrādikaṃ tathā |
samācaran yathāśakti hyavandhyaṃ divasaṃ nayet || 29 ||
[Analyze grammar]

dīrghāyuṣo dhanāḍhyāśca kulīnā rogavarjitāḥ |
dṛśyante mānavā loke puṇyakartāra īdṛśāḥ || 30 ||
[Analyze grammar]

tasmād vrataṃ prakartavyaṃ pāśāṃkuśādinātmakam |
daśamyāmekabhuktaḥ syād brahmacārī bhavettathā || 31 ||
[Analyze grammar]

bhūśāyī syānniśi prātaḥ snātvā svanaityakārcanam |
kuryāt ṣoḍaśasaṃcārairarthayed vratapūrṇatām || 32 ||
[Analyze grammar]

maṇḍalaṃ sarvatobhadraṃ kārayetsaptadhānyakaiḥ |
madhye ghaṭaṃ vāripūrṇaṃ paṃcaratnasamanvitam || 33 ||
[Analyze grammar]

dhanapūrṇaṃ ca vā kṛtvā savastraṃ saphalaṃ nyaset |
ghaṭopari tilasthālīṃ sthāpayetkānakīṃ śubhām || 34 ||
[Analyze grammar]

mūrtiṃ śrīpadmanābhasya padmāvatyanvitāṃ śubhām |
pāśāṃkuśāsahitāṃ ca sthāpayedarcayettathā || 35 ||
[Analyze grammar]

āvāhanādikaṃ kṛtvā paṃcāmṛtādibhistataḥ |
tīrthajalairhariṃ saṃsthāpayed vastrāṇi dhārayet || 36 ||
[Analyze grammar]

candanā'ttarasaugandhyaṃ tvarpayetkajjalādikam |
puṣparatnasuvarṇādihārābhūṣāḥ samarpayet || 37 ||
[Analyze grammar]

bhojanaṃ vividhaṃ dadyājjalaṃ miṣṭaṃ samarpayet |
mukhavāsaṃ phalaṃ datvā nīrājayennamenmuhuḥ || 38 ||
[Analyze grammar]

stutvā pradakṣiṇādaṇḍavataḥ kṛtvā'rthayetkṣamām |
dhūpadīpādisaṃjuṣṭe dolāṃ vyomni prabandhayet || 39 ||
[Analyze grammar]

hariṃ saṃsthāpayettatra madhyāhne'pi subhojayet |
tāmbūlajalapānādi datvā sāyaṃ tathā''caret || 40 ||
[Analyze grammar]

ṣoḍaśopaskaraiḥ kṛṣṇaṃ samarcyārārtrikādikam |
kuryātsarvaṃ suvidhinā bhojyaṃ peyaṃ samarpayet || 41 ||
[Analyze grammar]

rātrau jāgaraṇaṃ kuryād bhāgavateṣu saṃsthitaḥ |
nartanaṃ gāyanaṃ gītaṃ kīrtanaṃ smaraṇaṃ tathā || 2 ||
[Analyze grammar]

vandanaṃ caraṇāṃgānāṃ mardanaṃ sevanādikam |
kuryātprātarhariṃ dhyātvā snātvā saṃpūjya keśavam || 43 ||
[Analyze grammar]

bhojayedbhagavantaṃ ca tāmbūlaṃ jalamarpayet |
sādhūn sādhvīḥ svāśritāṃśca bhojayenmānayettataḥ || 44 ||
[Analyze grammar]

vṛddhānnatvā hariṃ smṛtvā kṛtvā paṃcamakhān pṛthak |
tato vai pāraṇāṃ kuryād dadyād dānāni bhāvataḥ || 45 ||
[Analyze grammar]

evaṃ vrataṃ samāpyaiva dvādaśyāṃ vai hariṃ bhajet |
bhavapāśavināśo'sya vratino bhavati dhruvam || 46 ||
[Analyze grammar]

śṛṇu lakṣmi kathāṃ divyāṃ yamapāśavimocanīm |
āsītpūrve kṛtayuge vāmadevābhidhaḥ ṛṣiḥ || 47 ||
[Analyze grammar]

āsan śiṣyā aneke'sya brahmavettṛsamagragāḥ |
munayastyāginaścānye gṛhasthā brahmavittamāḥ || 48 ||
[Analyze grammar]

snānaṃ sandhyāṃ japaṃ homaṃ svādhyāyaṃ pitṛtarpaṇam |
kurvanti sma ravau prāpte ratāḥ prāptaḥ svakarmasu || 49 ||
[Analyze grammar]

ekasteṣu karmakāṇḍī ṛṣirvedaśirā iti |
nāmnā'bhavatsuvaidikakriyāniṣṇāta eva ca || 50 ||
[Analyze grammar]

cāturmāsyaṃ vratī kandāhāraṃ kurvannināya saḥ |
kandavikṛtijanyo vai rogastasyodare'bhavat || 51 ||
[Analyze grammar]

jāṭharasyātimandatvamāntrāṇāmuṣṇaphullatā |
apācanaṃ bhavatyasya yatkiṃcidbhakṣitaṃ bhavet || 52 ||
[Analyze grammar]

evaṃ śarīrakṣīṇatve'śaktiḥ samyag vyavardhata |
ālasyaṃ snānagāyatrījapapūjādike'bhavat || 53 ||
[Analyze grammar]

evaṃ nityaṃ kṣīṇabhāvāt tyaktvā snānaṃ ca pūjanam |
śūdravad vartayandehayātrāṃ karoti vai muniḥ || 54 ||
[Analyze grammar]

karmatyāgena ca vedaśirasaḥ pratyavāyakam |
jātaṃ tatpratyavāyena puṇyaṃ vai kṣīṇatāṃ gatam || 55 ||
[Analyze grammar]

āyuṣyāntaḥ samāyāto yāmyā netuḥ samāgatāḥ |
vedaśirāstadā samyagākulo hyavadattu tān || 56 ||
[Analyze grammar]

kathaṃ me yamadūtānāṃ darśanaṃ kena karmaṇā |
pratyūcuryamadūtāstaṃ vedakarma vihāya vai || 57 ||
[Analyze grammar]

yatheṣṭaṃ vartase tvaṃ yatphalaṃ tad yāmyavāsadam |
utpathapratipannasya brāhmaṇasya yamālayaḥ || 58 ||
[Analyze grammar]

prāyaścittārthamevāsti bhuṃkṣva tatpratyavāyakam |
uktvaivaṃ bedaśirasaṃ yayurnītvā yamagṛham || 59 ||
[Analyze grammar]

yamarājastadīyaṃ vai dṛṣṭvā karma yathārthataḥ |
citraguptaṃ tadā prāha pratyavāyo'sya vai mahān || 60 ||
[Analyze grammar]

adhītavedavismārātmakaṃ yatpātakaṃ mahat |
brahmahatyāsamaṃ proktaṃ pāśairbadhvā hi nīyatām || 61 ||
[Analyze grammar]

pātyatāṃ narake brahmaghātināṃ kālasūtrake |
asipatravane tvenaṃ nītvā saṃpraharantvapi || 62 ||
[Analyze grammar]

ityuktvā virarāmā'sau yamarājastu nītikṛt |
vedaśirāstadā prāha yamarājaṃ subuddhimān || 63 ||
[Analyze grammar]

āpatkāle śarīrasya mayā vedastu vismṛtaḥ |
tyaktaṃ karmā'pyaśaktyā vai kathaṃ me narakaṃ bhavet || 64 ||
[Analyze grammar]

āpatkālasya dharmā vai nā'dharmagaṇanāṃ gatā |
tasmātpāpaṃ na me tvasti nāsti me yamapūrakam || 65 ||
[Analyze grammar]

dharmarājastataḥ prāha yāvadrāgo'pi vidyate |
tāvadāpatkṛto dharmo rugṇā'bhāve sa no mataḥ || 66 ||
[Analyze grammar]

svalpāpadi bahutyāgaḥ sa tvadharmo mahānmataḥ |
na te'sti tādṛśo rogo yena noccāritā śrutiḥ || 67 ||
[Analyze grammar]

vismṛtā ca tvayā tvālasyena vai sakalā śrutiḥ |
pratyavāyastato jātastyaktaṃ karmāpi sarvathā || 68 ||
[Analyze grammar]

yathāśaktiprakartavyaṃ brāhmaṇena vijānatā |
sujānatā tadā sarvaṃ tyaktavyaṃ saṃbhavet katham || 69 ||
[Analyze grammar]

tasmādālasyadoṣeṇa karmadharmātivarjitaḥ |
cyuto brahmakriyāmārgād daṇḍamarhati sarvathā || 70 ||
[Analyze grammar]

tadā vedaśirāstatra mānase'cintayadgurum |
vāmadevaṃ mahābrahmāvatāraṃ so'pi cāyayau || 71 ||
[Analyze grammar]

dharmarājena tu tadā satkṛto vāmadevakaḥ |
niṣasādā''sane datte śiṣyeṇāpi namaskṛtaḥ || 72 ||
[Analyze grammar]

vāmadevena sarvaṃ tatkarma yamamukhācchrutam |
pratyavāyātmakaṃ tathyaṃ vinā daṇḍaṃ na naśyati || 73 ||
[Analyze grammar]

vāmadevaḥ kṛpālurvai cintayāmāsa tatkṛte |
yathā daṇḍo na bhoktavyaḥ karmāpi niṣphalaṃ bhavet || 74 ||
[Analyze grammar]

tādṛśaṃ cintayitvaiva kathayāmi taredayam |
vilokya sarvatastatra prāha śiṣyaṃ yamaṃ tathā || 75 ||
[Analyze grammar]

śṛṇutaṃ dvāvapi śiṣyau yama vedaśirastathā |
vrataṃ cāsti mahatkālasūtrāsipatranāśakam || 76 ||
[Analyze grammar]

āśvinaśuklaikādaśikāvrataṃ balavanmattam |
brahmahatyādipāpānāṃ tatsamānāṃ ca nāśakam || 77 ||
[Analyze grammar]

kartavyaṃ śraddhayā'nena prāyaścittaṃ kṛtaṃ bhavet |
evamekādaśīnāmamātraśravaṇatastadā || 78 ||
[Analyze grammar]

bratasaṃkalpataścāpyāyuṣyaṃ susandhitaṃ punaḥ |
guroścāpi pratāpena punarāyuṣyamāptavān || 79 ||
[Analyze grammar]

gṛhītvā''tīthyasatkāraṃ yayaturyatra vai śavam |
śiṣyaṃ praveśayāmāsa guruḥ prāha tato vratam || 80 ||
[Analyze grammar]

snātvā guroḥ pūjanaṃ ca kṛtvā svāsthyena saṃsthitaḥ |
āgataṃ ceṣaśuklaikādaśīvrataṃ kṛtaṃ tataḥ || 81 ||
[Analyze grammar]

vedavismaraṇotpannapāpadhvaṃso'pyabhūt kṣaṇāt |
karmatyāgādipāpānāṃ bhasmabhāvo'bhavattadā || 82 ||
[Analyze grammar]

tato vedaśirā dīrghamāyuṣyaṃ cāptavān śubham |
gurorbalāttu karaṇādekādaśīvratasya vai || 83 ||
[Analyze grammar]

yamapāśavināśo'syā'bhavatsevāvratena ca |
iyamekādaśī tasmātpāśānāmaṃkuśaṃ matam || 84 ||
[Analyze grammar]

kariṇāmaṃkuśaṃ yadvat tathā pāśāṃkuśāvratam |
kartavyaṃ yamapāśānāṃ nāśanāya janaiḥ śubham || 85 ||
[Analyze grammar]

svargamokṣapradaṃ sarvasampatkaraṃ sukhapradam |
ārogyadaṃ trividhānāṃ tāpānāṃ śamanaṃ param || 86 ||
[Analyze grammar]

vāsanāpāśabandhānāṃ nāśakaṃ pāpanāśakam |
dehadaihikapāśānāṃ nāśakaṃ vipadāṃ tathā || 87 ||
[Analyze grammar]

ahaṃmamatvapāśānāṃ dhvaṃsakaṃ dveṣarāgayoḥ |
śamanaṃ subhagadātṛ dārāpatitvadāyakam || 88 ||
[Analyze grammar]

kleśadāvānalaśāntikaraṃ śāśvatadhāmadam |
hareryogapradaṃ vaikuṇṭhadaṃ golokadaṃ tathā || 89 ||
[Analyze grammar]

pāśāṃkuśāvrataṃ lakṣmi prakartavyaṃ prayatnataḥ |
paṭhanācchravaṇāccāpi vratapuṇyapradaṃ hi tat || 90 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne āśvinaśuklapāśāṃkuśaikādaśīvratamāhātmyaṃ vāmadevarṣiśiṣyavedaśiraso'jīrṇarogādālasyena dharmakarmādivarjanātpātakabalena yamalokaprāptau smṛtaguruvāmadevopasthityā vratena ca yamapāśavimokṣaṇamityādi nirūpaṇanāmā ekonaṣaṣṭyadhikadvipañcā |
śattamo'dhyāyaḥ || 259 ||
[Analyze grammar]