Chapter 129

śrīnārāyaṇa uvāca |
śṛṇu kānta tataḥ śaṃbhuḥ pārvatīṃ prāha śobhanam |
kṣīrasāgarasaṃsthānaṃ vaikuṇṭhaṃ vai caturthakam || 1 ||
[Analyze grammar]

divaukasāṃ rakṣaṇārthaṃ dugdhābdhau parameśvaraḥ |
sadā śāntiparo devo nidrayā yogasaṃjñayā || 2 ||
[Analyze grammar]

svātmanyavasthito nīlāmbujavarṇo hariḥ svayam |
vartate'bhyantaratale divyuvāsāya nirmite || 5 ||
[Analyze grammar]

vaikuṇṭhe vistṛte matsyakūrmā''virbhāvarājite |
dugdhābdhau medinīpīṭhe nārāyaṇasya tejasā || 4 ||
[Analyze grammar]

sudarśanena cakreṇa stambhite kṣīrasustare |
jātāni bhūtalānyatra dugdhadhavalabhūmikāḥ || 5 ||
[Analyze grammar]

dugdhānāmeva pakvānāṃ prākārāṇāṃ catuṣṭayam |
vitānaprastaraṃ divyaṃ dugdhānāmeva nirmitam || 6 ||
[Analyze grammar]

bhittayo gopurāḥ saudhāḥ prāsādā vanarājayaḥ |
mārgopamārgāḥ panthāno vṛkṣavallīvanāni ca || 7 ||
[Analyze grammar]

maṇayo bhūṣaṇānyatra vāsāṃsi bhojanāni ca |
peyāni śayanānyeva yānāni vāhanāni ca || 8 ||
[Analyze grammar]

dugdhotpannāni sarvāṇi nārāyaṇasamīhayā |
pradīpā maṇayastatra phalāni kṣīrajāni ca || 9 ||
[Analyze grammar]

puṣpasrakcandanādīni gandhadravyāṇi yāni ca |
kajjalādīni saubhāgyadravyāṇi dugdhajāni vai || 10 ||
[Analyze grammar]

lakṣayojanavistāro maṇḍapo dugdhanirmitaḥ |
dugdhasphaṭikamāṇikyamaṇiratnādinirmitaḥ || 11 ||
[Analyze grammar]

dhavalo brahmatejovat divyau brahmavibhūtivat |
mahāvaikuṇṭhavat saukhya śāntido brahmalokavat || 12 ||
[Analyze grammar]

tatrāneke raṃgasaudhā bhaktānāṃ vāsahetave |
bhavanti śrīhareḥ kāmanayā divyā suṛddhayaḥ || 13 ||
[Analyze grammar]

na nyūnaṃ kiṃcidatrāsti bhogyakaraṇasādhanam |
tanmadhye tu sahasrāsyaḥ śeṣo'nanto vyavasthitaḥ || 14 ||
[Analyze grammar]

dhavalaḥ komalaḥ snigdha uṣṇaḥ śayyādhikāravān |
śarīravalayaistatra kṛtaśayyo hareḥ kṛte || 15 ||
[Analyze grammar]

phaṇābhiśca sahasreṇa kṛtacchatro hareḥ kṛte |
pucchena kṛtasopānastatrā''roḍhuṃ hareḥ kṛte || 16 ||
[Analyze grammar]

phaṇāsthamaṇibhistatra kṛtadīpo hareḥ kṛte |
tasminnanantaparyaṃke śete'sau kamalāpatiḥ || 17 ||
[Analyze grammar]

nūtnayuvā śyāmalaśca pītāmbaradharo hariḥ |
sakeśamukuṭamūrdhā hārakaustubharājitaḥ || 18 ||
[Analyze grammar]

yajñopavītapuṃḍrā'bjajalabhūcakrahetimān |
sagadaḥ sagaruḍaśca vanamālāvirājitaḥ || 19 ||
[Analyze grammar]

lakṣmīmarditacaraṇaḥ kaṭakāṃgadabhūṣitaḥ |
sphuradraktāravindābhahastāṃghritalaśobhitaḥ || 20 ||
[Analyze grammar]

raśanāpādukormikāśṛṃkhalābhūṣaṇānvitaḥ |
khaḍgacarmaśārṅgaśaktinārācaparighānvitaḥ || 21 ||
[Analyze grammar]

haricandanakuṃkumakastūryuttamapūjitaḥ |
kalpamandārabakulapārijātādipuṣpavān || 22 ||
[Analyze grammar]

samonnatasunāsāṃsajānubhālavirājitaḥ |
kiṃkiṇījālanupūradhṛtāṃ'ghrinakhakāntimān || 23 ||
[Analyze grammar]

aśokapuṣparaktauṣṭhaḥ pūrṇacandranibhānanaḥ |
mauktikadantasaṃśobhasmitavaktramanoharaḥ || 24 ||
[Analyze grammar]

ārūḍhayauvanā''pūraḥ śaraṇyaḥ śaraṇārthinām |
pariśrānta iva śete virāme iva sarvadā || 25 ||
[Analyze grammar]

daityaiḥ saha suyuddhāni kṛtvā śete punaḥpunaḥ |
sadṛśī tasya lakṣmīstu rūpaśīlaguṇādibhiḥ || 26 ||
[Analyze grammar]

svarṇasadṛśasadrūpā taptakāṃcanabhūṣaṇā |
sevāyā sarvadā tatra śayyāyāṃ saha vartate || 27 ||
[Analyze grammar]

viśālākṣo mṛgākṣī sā taruṇī tanumadhyamā |
rūpalāvaṇyamādhuryakāntiśīlaguṇānvitā || 28 ||
[Analyze grammar]

dugdhaphenaprabhāśāṭīkaṃcukīnaktaśobhitā |
mandāraketakījātīpuṣpāñcitaśiroruhā || 29 ||
[Analyze grammar]

tailasugandhicipiṭasūcīkabarīdhammilā |
kastūrīkṛtatilakā ratnatantīsuśobhitā || 30 ||
[Analyze grammar]

nānāmauktikaratnāḍhyakarṇabhūṣaṇabhūṣitā |
pakvabimbapravālādiraktabhāsādharānvitā || 31 ||
[Analyze grammar]

kaṭyālambinīlavaktrasnigdhakeśairalaṃkṛtā |
svalponnatadṛḍhapīnagaṇḍaśroṇipayodharā || 32 ||
[Analyze grammar]

iṣadunnatasūjjvalamṛdulokakapolakā |
caturhastaiḥ rājamānā premāpagāpravāhiṇī || 33 ||
[Analyze grammar]

udbāhubhyāṃ dhṛtavatī hemapadmayugaṃ śubham |
itarābhyāṃ kvacitpremṇā samāśliṣya patiṃ sthitā || 34 ||
[Analyze grammar]

vartate nityasevāyāṃ lakṣmīrdevī hareḥ priyā |
tathā'nyāstulyarūpāśca narmadā tapatī tathā || 35 ||
[Analyze grammar]

tuṃgabhadrā ca kāverī gaṃgā godāvarī tathā |
sindhuḥ phalgurgaṇḍakī ca tāmraparṇī sarasvatī || 36 ||
[Analyze grammar]

karatoyā karmanāśā sābhramatī ca gomatī |
ojasvatī bhadrāvatī sarayūḥ svarṇarakṣikā || 37 ||
[Analyze grammar]

indradyumnaṃ puṣkaraṃ ca nārāyaṇasarastathā |
aśvapaṭṭasaraścaivā'khātānyanyāni yāni vai || 38 ||
[Analyze grammar]

mānasaṃ ca saro rāmasaraḥ kṛṣṇasarastathā |
matsyasarastathā śoṇo brahmaputraśca gargaraḥ || 39 ||
[Analyze grammar]

evaṃ nadāśca nadyaśca sarāṃsi sāgarāstathā |
krauṃcamainākahīmādrivindhyamandararaivatāḥ || 40 ||
[Analyze grammar]

parvatāḥ pṛthivī devī varuṇo'nye ca vaiṣṇavāḥ |
mārkaṇḍeyo balirbāṇośvatthāmahanumadvarāḥ || 41 ||
[Analyze grammar]

nimirbibhīṣaṇaḥ parśurāmo vyāso manustathā |
satyavrataśca nandaśca gayaśca tala ityapi || 42 ||
[Analyze grammar]

ete cānye'pi devādyā divyā nārāyaṇāśritāḥ |
vartante divyavapuṣaḥ kṣīrasāgaramaṇḍape || 42 ||
[Analyze grammar]

dugdhābdhau nirmite tatra vaikuṇṭhe vartate prabhuḥ |
daiteyairvadhyamānairhi brahmarudrādibhiḥ suraiḥ || 44 ||
[Analyze grammar]

saṃstūyamāno deveśo garuḍena virājitaḥ |
daityāṃśca rākṣasān hatvā punaretyā'tra tiṣṭhati || 45 ||
[Analyze grammar]

śeṣākhyaśayane śete dāsadāsīprasevitaḥ |
ityevaṃ pārvati devi sarvaṃ te viniveditam || 46 ||
[Analyze grammar]

vṛttayaścendriyāṇāṃ tu jāyante kuṇṭhitā yadā |
yadā tadā tatraiva vaikuṇṭhaṃ boddhavyaṃ mokṣamicchatā || 47 ||
[Analyze grammar]

dhanyā'si kṛtakṛtyā'si bhaktāsi puruṣottame |
ityevaṃ bahudhā vyāptaṃ jānāsi vyūhavaibhavam || 48 ||
[Analyze grammar]

ahaṃ bhajāmi deveśi taṃ śrīnārāyaṇaṃ harim |
mayā tubhyaṃ pramokṣārthaṃ sādhanaṃ śaraṇāgatiḥ || 49 ||
[Analyze grammar]

samantrā ca samudrā ca sakaṇṭhī sordhvapuṃḍrakā |
sā'bhidhā kathitā pālyā yayā muktirbhavediti || 50 ||
[Analyze grammar]

jñānāddhyānācca tapaso yogādyajñādvirāmataḥ |
japācchravāttathā na syādyathā muktistadarpaṇāt || 51 ||
[Analyze grammar]

tadvadātmaniveditvaṃ gṛhāṇa tvaṃ mama priye |
tena muktidhruvā bhāvyā brāhmīśrīharyanugrahān || 52 ||
[Analyze grammar]

evaṃ śaṃbhurdadau dīkṣāṃ svīyapatnyai tu vaiṣṇavīm |
tata ārabhya sā nityaṃ lakṣmīnārāyaṇasya vai || 53 ||
[Analyze grammar]

pūjā kṛtvā'rpaṇaṃ kṛtvā gṛhṇātyannaṃ jalaṃ ca vā |
tatastau vaiṣṇavau bhaktau pārvatīparameśvarau || 54 ||
[Analyze grammar]

mamaivārādhanaparau madarthātmanivedinau |
mamaivānucarau śiṣyau madātmānau mama priyau || 55 ||
[Analyze grammar]

śrīlakṣmīruvāca |
yadi tau vaiṣṇavau devau tvayyevātmanivedinau |
katha bhasmatripuṃḍrarudrākṣāndadhāti śaṃkaraḥ || 56 ||
[Analyze grammar]

soyaṃ me saṃśayo jātastanniṣūdaya satyate |
na jñātā viṣṇutāṃ jahyād bhavedanyattu kāraṇam || 57 ||
[Analyze grammar]

ityāśrutya harirlakṣmīmuvāca tatkathānakam |
kathaṃ bhasmatripuṃḍrādi bāhye dadhāti śaṃkaraḥ || 58 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne kṣīrasāgare caturthavaikuṇṭhavasānamaṇḍapadivyabhogaśeṣatalpalakṣmīnada |
nadīparvatādiciraṃjīvivaiṣṇavabhaktādivaiṣṇavaśaṃbhukṛtabhasmatripuṃḍrādidhāraṇaśaṃkāpradarśananāmaikonatriṃśaṭadhikaśatatamo'dhyāyaḥ || 129 ||
[Analyze grammar]