Chapter 130

śrīnārāyaṇa uvāca |
śṛṇu lakṣmi yathā pṛṣṭaṃ tvayā mahyaṃ tathaiva hi |
pārvatyā'pi harāyedaṃ pṛṣṭaṃ bhasmādi kiṃ dhṛtam || 1 ||
[Analyze grammar]

śaṃbhuḥ prāha tadā devīṃ kathāṃ ramyāṃ purātanīm |
sakāraṇā śṛṇu tvaṃ tāmāsurāṇāṃ tu mohinīm || 2 ||
[Analyze grammar]

pārvatyuvāca guhyaṃ te pṛcchāmi deva śaṃkara |
mayi prītyā samācakṣva saṃśayo vartate bhṛśam || 3 ||
[Analyze grammar]

kapālabhasmacarmāsthidhāraṇaṃ bahugarhitam |
tattvayā dhāryate śaṃbho garhitaṃ kena hetunā || 4 ||
[Analyze grammar]

strīcāpalyena deveśa pṛcchāmi tvāṃ mahāmate |
apraṣṭavyamapi praśnaṃ kṣantumarhasi me prabho || 5 ||
[Analyze grammar]

iti devyā haraḥ pṛṣṭo rahasye janavarjite |
uvāca paramaṃ guhyaṃ yadyadācaritaṃ svakam || 6 ||
[Analyze grammar]

śṛṇu devi pravakṣyāmi guhyādguhyataraṃ param |
apṛthaktvāccharīrasya vakṣyāmi tava suvrate || 7 ||
[Analyze grammar]

na vaktavyaṃ tvayā'nyatra vā janeṣu kathañcana |
namucyādyā mahādaityāḥ khalāḥ svāyaṃbhuve'ntare || 8 ||
[Analyze grammar]

mahābalaparīvārā mahāvīryā mahaujasaḥ |
yadāsaṃstairarditāśca bhagnā indrapurogamāḥ || 9 ||
[Analyze grammar]

viṣṇoḥ samīpamāgatya rakṣaṇaṃ vavrire surāḥ |
ajeyānsumahāvīrāntaponirdhūtakalmaṣān || 10 ||
[Analyze grammar]

tvamevaitānmahādaityān jetumarhasi keśava |
ityākarṇya haristeṣāṃ devānāṃ bhayamāgatam || 11 ||
[Analyze grammar]

tānavadhyānviditvātha śaṃkaraṃ prāha māṃ hariḥ |
tvaṃ hi rudra mahābāho mohanārthe suradviṣām || 12 ||
[Analyze grammar]

pākhaṇḍācaraṇaṃ kiṃciddharmaṃ kuruṣva mohakam |
yena pathā gatā daityā nirbalāḥ syuradhogatāḥ || 13 ||
[Analyze grammar]

balahīnā bhaveyuśca nistejaskāśca sarvathā |
yathā svakarmabhraṣṭāṃstānpatitānmṛtasadṛśān || 14 ||
[Analyze grammar]

devā vijitya sukhino bhaveyuḥ śūnyakaṇṭakāḥ |
dharmaṃ pākhaṇḍamūrdhanyaṃ granthānpākhaṇḍakalpitān || 15 ||
[Analyze grammar]

daityamohakarānviṣṇuvirodhipravarānkuru |
malinānyapi cihnāni kalpitāni tathā kuru || 16 ||
[Analyze grammar]

yathā vai tāmasānāṃ tatsarvaṃ surucikaṃ bhavet |
tavopadeśātte śāstrāttava kalpitavartanāt || 17 ||
[Analyze grammar]

tāmasāste vinaṣṭā vai bhaviṣyanti svabhāvataḥ |
ahaṃ viṣṇustathā devā daityaviśvāsahetave || 18 ||
[Analyze grammar]

tvayā kṛtaṃ ca tatsarvaṃ kiṃcitkālaṃ ca bāhyataḥ |
samanumodayiṣyāmastena viśvāsamāgatāḥ || 19 ||
[Analyze grammar]

daityāstaṃ kalpitaṃ sarvaṃ pākhaṇḍaṃ pātakāraṇam |
satyadhiyā grahīṣyanti tato'smadvijayo bhavet || 20 ||
[Analyze grammar]

ityājñāgrahaṇārthaṃ vai śaṃbhuṃ prāha tadā'cyutam |
tvayoditamidaṃ deva karomi yadi bhūtale || 21 ||
[Analyze grammar]

tena nāśo'pi me nātha bhavedeva bhayāvahaḥ |
na śakyaṃ hi mayā kartumetatkṛtyaṃ tvadāśriṇā || 22 ||
[Analyze grammar]

tvadājñāpi ca nollaṃghyā hyetadduḥkhataraṃ mahat |
evamuktastadā devaḥ samāśvāsya ca māṃ punaḥ || 23 ||
[Analyze grammar]

prāha śaṃbho na te nāśo bhavedyatte'smi rakṣakaḥ |
devatānāṃ hitārthāya kuruṣva vacanaṃ mama || 24 ||
[Analyze grammar]

mamājñayā kuru śaṃbho na te bādho bhaviṣyati |
kartā sannapi nirbādho hyakartā mama śāsanāt || 25 ||
[Analyze grammar]

japannāmāni nityaṃ me madājñayā'nusaṃcaran |
karoti laukikaṃ vāpi naiva badhnāti mānavaḥ || 26 ||
[Analyze grammar]

hṛdaye māṃ smaran śāśvajjapa mantraṃ madarthakam |
oṃ haraye nama itimantraṃ brahma samācara || 27 ||
[Analyze grammar]

bha ja māṃ bhaktilabhyaṃ tvaṃ kuru kāryaṃ madarthitam |
mamājñaiva mahān dharmā madbhaktasya mayā kṛtaḥ || 28 ||
[Analyze grammar]

kāmaḥ krodhastathā lobho vaṃcanā kapaṭaṃ ghṛṇā |
aśubhaṃ vā ca hiṃsā vā mayoktaṃ dharma eva saḥ || 29 ||
[Analyze grammar]

mayā yaduktaṃ sākṣādvai sa eva veda ucyate |
pratyakṣaṃ vā parokṣaṃ vā maduktaṃ veda eva saḥ || 30 ||
[Analyze grammar]

yadā niyuñje kurviti tadā dharmastu tanmayaḥ |
yadā ruṇadhmi mā kuru tadā dharmo nivartanā || 31 ||
[Analyze grammar]

tasmānmamājñā dharmaḥ syādanājñā tadviparyayaḥ |
kuru śaṃbho tava kṛtaṃ pūjayiṣye yuge yuge || 32 ||
[Analyze grammar]

tena daityāstāmasāśca pūjayiṣyanti tai kṛtam |
yathā'haṃ ca tathā tvaṃ vai nirlopo'si sadā prabhuḥ || 33 ||
[Analyze grammar]

śīghraṃ kuru hitaṃ vighnān nāśayiṣyāmyahaṃ tava |
madanyadevatābhaktirna te śaṃbho bhaviṣyati || 34 ||
[Analyze grammar]

manasaivā'rcaya māṃ vai yāvatkālaṃ prayojanam |
madājñāṃ kuru matprītyā sarvametacchubhaṃ tava || 35 ||
[Analyze grammar]

iti sandiśya māṃ devi visasarja marudgaṇān |
mayāpi cintitaṃ tatra kiyatyākhaṇḍakalpanam || 36 ||
[Analyze grammar]

yena daityā mohitāḥ syurnirbalāścaraṇāttathā |
tato devahitārthāya daityasaṃhārahetave || 37 ||
[Analyze grammar]

kapālacarma bhasmā'sthidhāraṇaṃ vai kṛtaṃ mayā |
tripuṃḍrarekhārudrākṣadhāraṇaṃ vai kṛtaṃ mayā || 38 ||
[Analyze grammar]

bāhyatastāni sarvāṇi vārayāmi na cāntaram |
antaḥpraviśya deveśi tulasīkaṇṭhamālikām || 39 ||
[Analyze grammar]

ūrdhvapuṃḍraṃ tathā mudrā vaiṣṇavāṃkāni sarvathā |
dhārayāmi praguptāni yayā daityā vidurnahi || 40 ||
[Analyze grammar]

nārāyaṇaharerājñā mama dharmaḥ sanātanaḥ |
daityānāṃ ca pratītyarthaṃ pākhaṇḍamiśritāni vai || 41 ||
[Analyze grammar]

tāmasāni śaivapāśupatatantrāṇi nirmame |
tānimānmatkṛtagranthānālambya ca vilokya mām || 42 ||
[Analyze grammar]

bhagavadvimukhāḥ sarve bhavanti daityatāmasāḥ |
bhasmādidhāraṇaṃ kṛtvā māṃsā'srakcandanādibhiḥ || 43 ||
[Analyze grammar]

māmeva pūjayanti sma mahogratamasā''vṛtāḥ |
sarvadharmaparibhraṣṭāḥ kāmakrodhasamanvitāḥ || 44 ||
[Analyze grammar]

matto varapradānāni labdhvā viṣayavartinaḥ |
sattvahīnāśca nirvīryāḥ śanairyāntyadhamāṃ gatim || 45 ||
[Analyze grammar]

bhasmādidhāraṇaṃ ye me mataṃ gṛhṇanti tāmasāḥ |
sarvadhamaistu rahitāḥ paśyanti nirayaṃ hi te || 46 ||
[Analyze grammar]

daityāstu tāmasāḥ sarve tathā cānye'pi tanmatāḥ |
sarvadā devairjitā daityā naśyanti sarvathā || 47 ||
[Analyze grammar]

evaṃ devahitārthāya vṛttirme devi garhitā |
viṣṇorājñāṃ puraskṛtya kṛtaṃ bhasmāsthidhāraṇam || 48 ||
[Analyze grammar]

bāhyacihnamidaṃ devi mohanārthāya vidviṣām |
apyantarhṛdaye nityaṃ dhyāye nārāyaṇaṃ harim || 49 ||
[Analyze grammar]

japanneva ca tannāma sadānandaguṇākaram |
sukhamātyantikaṃ brahma hyaśnāmi ca tvayā saha || 50 ||
[Analyze grammar]

tato bhaktā hyasattvasthā bhasmādyaṃ cāpayanti me |
jānanti tāmasā ye te śaṃbhorbhasmādikaṃ priyam || 51 ||
[Analyze grammar]

māmapi tāmasaṃ devaṃ manyante tai tathāvidhāḥ |
tāmasānyarpayanti me bhaṃgāgaṃjādi tāmasam || 52 ||
[Analyze grammar]

ahaṃ tu vaiṣṇavo devi na gṛhṇāmyaniveditam |
viṣṇuprāsādikaṃ puṇyaṃ gṛhṇāṇi nānyadityataḥ || 53 ||
[Analyze grammar]

mā tvaṃ mohe pata devi tāmasaṃ mā gṛhāṇa ca |
sāttvikaṃ sevaya devi vaiṣṇavī hyasi sarvathā || 54 ||
[Analyze grammar]

mayā nārāyaṇāyaivā'nivedya gṛhyate nahi |
kintu mayā hareragre pratijñātaṃ tu bhaktitaḥ || 55 ||
[Analyze grammar]

svāmibhogyaṃ ca yadvastu dāsabhogyaṃ na tadbhavet |
evaṃ dharma samāśrityā'nivedya nahi bhujyate || 56 ||
[Analyze grammar]

bhujyate svāmyabhogyaṃ yaddhattūrakuṃkumādikam |
tadājñayeti naiva syādātmanivedane kṣatiḥ || 57 ||
[Analyze grammar]

bhasmāsthidhāraṇādyā vai daihikyaśuddhyamaṃgalā |
sāpi śuddhirmaṃgalā tannāmajāpāt tadājñayā || 58 ||
[Analyze grammar]

ityetatte samākhyātaṃ tāmasāṃkādidhāraṇam |
sahetukaṃ mahādevi jñātvā nā'tra vimuhyasi || 59 ||
[Analyze grammar]

aśuddhirhiṃsanaṃ yatra māraṇoccāṭanādikāḥ |
mantrāśca tāmasī pūjā yatra syāttaddhi tāmasam || 60 ||
[Analyze grammar]

tanna grāhyaṃ mahādevi mokṣārthibhiḥ kadācana |
vināśāntaṃ duḥkhadaṃ vai sarvathā tāmasaṃ yataḥ || 61 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne |
vaiṣṇavaśaṃbhorvaiṣṇavīpārvatyā bhasmāsthikapālādidhāraṇasya |
kāraṇapraśne'suravimohanāya viṣṇorājñayā taditivṛttānta |
kathananāmā triṃśadadhikaśatatamo'dhyāyaḥ || 130 ||
[Analyze grammar]