Chapter 50

śrīnārāyaṇa uvāca |
atha pṛthvyāḥ samīkāraḥ kathaṃ vai pṛthunā kṛtaḥ |
tatte vacmi mahālakṣmi  katheyaṃ brahmadāyinī || 1 ||
[Analyze grammar]

āpo nārā iti proktā āpo vai narasūnavaḥ |
tasya tāsvayanaṃ yasmāttato nārāyaṇo virāṭ || 2 ||
[Analyze grammar]

virājo nābhipadyādvai padmaṃ yadabhavanmahat |
tatra brahmā svayaṃ jajñe dadarśa jālapūritam || 3 ||
[Analyze grammar]

kamalaṃ tu svakīyaṃ tajjale kardamarūpiṇī |
pṛthivīkledimāvyāptā na raukṣyaṃ tatra dṛśyate || 4 ||
[Analyze grammar]

vinā raukṣyaṃ kathaṃ tatra pārthivajanisevinām |
nivāso vṛkṣavallīnāmudbhavaścāpi saṃbhavet || 5 ||
[Analyze grammar]

tatastu brahmaṇā nārāyaṇasya stutirīritā |
nārāyaṇa dayāsindho sarvādhāra prapoṣaka || 6 ||
[Analyze grammar]

vinā pṛthulabhāvaṃ vai jale sthāsyanti kāḥ prajāḥ |
tasmājjale sthitāmārdrāṃ sūkṣmakardamarūpiṇīm || 7 ||
[Analyze grammar]

sthūlāvasthāṃ samānayya pṛthvīrūpaṃ kuru prabho |
tadvinā mānavī sṛṣṭiścatuḥkhanyabhirūpiṇī || 8 ||
[Analyze grammar]

kutra sthāsyanti bhakṣyaṃ vā kasmātprāpsyanti ityapi |
namo'nantasvarūpāya namo dharmadharāya ca || 9 ||
[Analyze grammar]

namaḥ sthūlasvarūpāya namaḥ sūkṣmasvarūpiṇe |
namo'nvayasvarūpāya sarvāntaryāmiṇe namaḥ || 10 ||
[Analyze grammar]

namo'kṣarasvarūpāya namo muktātmakāya te |
namo vyūhasvarūpāya namaḥ kālasvarūpiṇe || 11 ||
[Analyze grammar]

namaḥ kṛṣṇādirūpāya namo hiraṇmayāya ca |
namo vairājarūpāya namo golokavāsine || 12 ||
[Analyze grammar]

namo vaikuṇṭhavāsāya namo'vyākṛtavartine |
namo devāya śāntāya sūkṣmatatvāntarātmane || 13 ||
[Analyze grammar]

namaḥ kāryasvarūpāya namaḥ kāraṇarūpiṇe |
namo nārīsvarūpāya namo bījapradāyine || 14 ||
[Analyze grammar]

namaḥ pṛthusvarūpāya namaḥ salilaśāyine |
namo'gnyarkasvarūpāya namo yajñamayāya ca || 15 ||
[Analyze grammar]

kṛpāṃ kuru kṛpānātha jalātsthaulyaṃ vibhāvaya |
ityevaṃ stūyamānaḥ sa devadevo janārdana || 16 ||
[Analyze grammar]

divyaṃ śvetaṃ saumyarūpaṃ dadhāra kāryasiddhaye |
sahasravadano devaḥ sahasralambadanturaḥ || 17 ||
[Analyze grammar]

sahasraghoṇanāsāsyaḥ sahasrakhurapādukaḥ |
dvisahasramahānetro mahāromāñcagātrakaḥ || 18 ||
[Analyze grammar]

sahasrapucchavālardhiḥ sahasradvayakarṇakaḥ |
mahāmerusamastatra babhūva kṣaṇamātrataḥ || 19 ||
[Analyze grammar]

prahasyā'jaṃ svayaṃ prāha jalānme vai pratāpataḥ |
pṛthvīṃ sthūlāṃ kariṣye'hamānayiṣye tatastadut || 20 ||
[Analyze grammar]

mama vaktreṣu danteṣu lambamāneṣu sarvathā |
amblamākarṣakaṃ piṇḍīkāraṃ sāmarthyamābhṛtam || 21 ||
[Analyze grammar]

mama dantasamāśleṣājalāni nirmalāni ca |
bhaviṣyantyacirāt tatra sthūlabhāvaḥ pṛthagbhavet || 22 ||
[Analyze grammar]

kardamānāṃ piṇḍībhāvasāmarthyena tu danturāḥ |
piṇḍān vidhāpya tānsarvānekīkṛtya samagrataḥ || 23 ||
[Analyze grammar]

kāṭhinyabhāvamāpannāṃ pṛthvīṃ golakarūpiṇīm |
kṣaṇataścānayiṣyanti jalordhvasthāṃ tavāgrataḥ || 24 ||
[Analyze grammar]

brahmaṃstatra nivāsastu sarveṣāṃ sugamo bhavet |
ityāmantrya gato devo vārāhaḥ śvetarūpavān || 25 ||
[Analyze grammar]

jalamālokya kṛtsnaṃ tatsthaulyakardamasaṃstarān |
piṇḍānkṛtvā svake ghoṇe sthāpayāmāsa koṭiśaḥ || 26 ||
[Analyze grammar]

ekīkṛtya ca tānsarvāngolakaṃ saṃvidhāya ca |
dhṛtvā ghoṇadatormadhye hyājagāma jalopari || 27 ||
[Analyze grammar]

golaṃ pṛthvīmahāpiṇḍaṃ nidhāya ca jalopari |
virarāma mahābhūtaḥ śūkaraḥ parameśvaraḥ || 28 ||
[Analyze grammar]

brahmā ca ṛṣayaḥ sarve nāradādyā munīśvarāḥ |
tuṣṭuvuḥ kṛtakāryaṃ taṃ saumyaṃ pṛthvīdharaṃ harim || 29 ||
[Analyze grammar]

namo yajñasvarūpāya citīmukhāya te namaḥ |
vedapādyupadaṃṣṭrāya tatkratuvakṣase namaḥ || 30 ||
[Analyze grammar]

analajihvāya darbharomṇe tapasvine namaḥ |
brahmaśirṣṇe namo vedatadaṃgaśratisragviṇe || 31 ||
[Analyze grammar]

ahorātrakṣaṇadhṛge namaḥ sruvasutuṇḍine |
namaḥ sadājyanāsāya sāmaghoṣasvanāya ca || 32 ||
[Analyze grammar]

mahate satyadharmāya namo vikramaśāline |
prāyaścittarathāya oṃ ghorāya paśujānave || 33 ||
[Analyze grammar]

udgātrantrāya devāya homaliṃgāya te namaḥ |
sthānabījāya devāya sanmahauṣadhaye namaḥ || 34 ||
[Analyze grammar]

namo mantrasphije bhūmne namo vedyāntarātmane |
nama ājyaspṛje somaśoṇitāya ca te namaḥ || 35 ||
[Analyze grammar]

vedaskandhāya śāntāya havirgandhāya te namaḥ |
havyakavyātivegāya namaḥ prāgvaṃśadehine || 36 ||
[Analyze grammar]

namo dyutimate nānādīkṣānvitāya te namaḥ |
namaste dakṣiṇāhṛde yogine satrarūpiṇe || 37 ||
[Analyze grammar]

namaḥ pravargyavittādibhūṣaṇāya mahātmane |
upākarmeṣṭirucirabrahmaṇe prabhave namaḥ || 38 ||
[Analyze grammar]

nānāchandogatipathajuṣe prāṇāya te namaḥ |
namo guhyopaniṣadāsanāya savanāya te || 39 ||
[Analyze grammar]

iti stutaḥ paro devo hyāśīrdatvā tirodadhe |
vārāhasya tirodhāne pṛthvīṃ dṛṣṭvā svayaṃ tvajaḥ || 40 ||
[Analyze grammar]

cintayāmāsa satataṃ sarvataḥ śikharānvitām |
kvāpi nimnāṃ ca khātāṃ ca kvāpi pāṣāṇaparvatām || 41 ||
[Analyze grammar]

samyagālocya vedhāḥ sa punaḥ sasmāra taṃ prabhum |
tadā pṛthusvarūpeṇa sadhanuṣkaḥ sa ābabhau || 42 ||
[Analyze grammar]

tasya dakṣakare cakradhanuṣościhnamīkṣitam |
brahmaṇā niścito devo bhagavānayamityatha || 43 ||
[Analyze grammar]

pṛthivyāḥ pravibhāgīya pṛthvīṃ nātha samīkuru |
ityarthitaḥ pṛthurdevastadā saṃvartakāgninā || 44 ||
[Analyze grammar]

dāhayāmāsa bhūtuṇḍān viśīrṇā bhasmasaṃcayāḥ |
jātāḥ sarve mṛdavaste mṛttikāstāḥ prakīrtitāḥ || 45 ||
[Analyze grammar]

samīkṛtya mahīṃ sarvāṃ mṛttikāstaraśobhanām |
bījānyādhāya tatsthalyāṃ sasyasampatkarīṃ vyadhāt || 46 ||
[Analyze grammar]

yatrā'dagdhāstu pāṣāṇāstatra tatparvatānvyadhāt |
yatra nimnapradeśāstu tatra sārasakān vyadhāt || 47 ||
[Analyze grammar]

pṛthunā tu bhagavatā nārāyaṇamahātmanā |
svena kṣetrāṇyaraṇyāni grāmanagarakharvaṭāḥ || 48 ||
[Analyze grammar]

khātā'khātāḥ samudrāśca nadyo nadamahāplavāḥ |
kṛtāḥ samayamālokya yatrā''vaśyakatā yathā || 49 ||
[Analyze grammar]

lokānprakalpayitvā ca prajāsargaṃ sasarja saḥ |
pṛthuḥ rājyaṃ paraṃ kṛtvā vyavasthāṃ vāsadāyinīm || 50 ||
[Analyze grammar]

kṛtvā ca brahmaṇe datvā svayamantarbabhūva ha |
tata ārabhya sapaṭā samānā ca samasthalī || 51 ||
[Analyze grammar]

babhūva mahatī devī pṛthvī yogyavasānakā |
punarnāśe punardevaḥ pṛthurbhūtvā hariḥ svayam || 52 ||
[Analyze grammar]

kariṣyati samāṃ pṛthvīṃ rājā bhūtvā muhurmuhuḥ |
brahmaṇaḥ khalu kalpānte daśalokātmikā tu bhūḥ || 53 ||
[Analyze grammar]

layaṃ jale yadā yāyāt tadā tatra muhurmuhuḥ |
svayaṃ hariḥ pṛthurbhūtvā pṛthvīṃ samīkariṣyati || 54 ||
[Analyze grammar]

kadācit pṛthuścāhaṃ mānasaḥ saṃbhavāmi ha |
kadācittu ṛṣibhyo vā rājabhyo vā janigrahaḥ || 55 ||
[Analyze grammar]

iti te sarvamākhyātaṃ pṛthurūpaṃ mayā dhṛtam |
atha vai dvāparānte tu kimabhūt kathayāmi te || 56 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne |
jalaśāyinārāyaṇena vārāharūpeṇa pṛthvyuddhāraḥ pṛthurūpeṇa pṛthvīsamīkaraṇādinirūpaṇanāmā paṃcāśattamo'dhyāyaḥ || 50 ||
[Analyze grammar]