Chapter 6

tataḥ sa martyavapuṣā mālyavānvicaranvane |
nāmnā guṇāḍhaḥ sevitvā sātavāhanabhūpatim || 1 ||
[Analyze grammar]

saṃskṛtādyāstadagre ca bhāṣāstisraḥ pratijñayā |
tyaktvā khinnamanā draṣṭumāyayau vindhyavāsinīm || 2 ||
[Analyze grammar]

tadādeśena gatvā ca kāṇabhūtiṃ dadarśa saḥ |
tato jātiṃ nijāṃ smṛtvā prabuddhaḥ sahasābhavat || 3 ||
[Analyze grammar]

āśritya bhāṣāṃ paiśācīṃ bhāṣātrayavilakṣaṇām |
śrāvayitvā nijaṃ nāma kāṇabhūtiṃ ca so 'bravīt || 4 ||
[Analyze grammar]

puṣpadantācchrutāṃ divyāṃ śīghraṃ kathaya me kathām |
yena śāpaṃ tariṣyāvas tvaṃ cāhaṃ ca samaṃ sakhe || 5 ||
[Analyze grammar]

tacchrutvā praṇato hṛṣṭaḥ kāṇabhūtiruvāca tam |
kathayāmi kathāṃ kiṃ tu kautukaṃ me mahatprabho || 6 ||
[Analyze grammar]

ājanmacaritaṃ tāvacchaṃsa me kurvanugraham |
iti tenārthito vaktuṃ guṇāḍhyo 'tha pracakrame || 7 ||
[Analyze grammar]

pratiṣṭhāne 'sti nagaraṃ supratiṣṭhitasaṃjñakam |
tatrābhūtsomaśarmākhyaḥ ko'pi brāhmaṇasattamaḥ || 8 ||
[Analyze grammar]

vatsaś ca gulmakaś caiva tasya dvau tanayau sakhe |
jāyete sma tṛtīyā ca śrutārthā nāma kanyakā || 9 ||
[Analyze grammar]

kālena brāhmaṇaḥ so 'tha sabhāryaḥ pañcatāṃ gataḥ |
tatputrau tau svasāraṃ tāṃ pālayantāvatiṣṭhatām || 10 ||
[Analyze grammar]

sā cākasmātsagarbhābhūttadṛṣṭvā vatsagulmayoḥ |
tatrānyapuruṣābhāvācchaṅkānyonyamajāyata || 11 ||
[Analyze grammar]

tataḥ śrutārthā cittajñā bhrātarau tāvabhāṣata |
pāpaśaṅkā na kartavyā śṛṇutaṃ kathayāmi vām || 12 ||
[Analyze grammar]

kumāraḥ kīrtisenākhyo nāgarājasya vāsukeḥ |
bhrātuḥ putro 'sti tenāhaṃ dṛṣṭā snātuṃ gatā satī || 13 ||
[Analyze grammar]

tataḥ sa madanākrānto nivedyānvayanāmanī |
gāndharveṇa vivāhena māṃ bhāryāmakarottadā || 14 ||
[Analyze grammar]

viprajāterayaṃ tasmānmama garbha iti svasuḥ |
śrutvā kaḥ pratyayo 'treti vatsagulmāvavocatām || 15 ||
[Analyze grammar]

tato rahasi sasmāra sā taṃ nāgakumārakam |
smṛtamātrāgataḥ so 'tha vatsagulmāvabhāṣata || 16 ||
[Analyze grammar]

bhāryā kṛtā mayaiveyaṃ śāpabhraṣṭā varāpsarāḥ |
yuṣmatsvasā yuvāṃ caiva śāpenaiva cyutau bhuvi || 17 ||
[Analyze grammar]

putro janiṣyate cātra yuṣmatsvasurasaṃśayam |
tato 'syāḥ śāpanirmuktiryuvayośca bhaviṣyati || 18 ||
[Analyze grammar]

ityuktvāntarhitaḥ so 'bhūttataḥ stokaiśca vāsaraiḥ |
śrutārthāyāḥ suto jātastaṃ hi jānīhi māṃ sakhe || 19 ||
[Analyze grammar]

gaṇāvatāro jāto 'yaṃ guṇāḍhyo nāma brāhmaṇaḥ |
iti tatkālam udabhūd antarikṣāt sarasvatī || 20 ||
[Analyze grammar]

kṣīṇaśāpāstataste ca jananīmātulā mama |
kālena pañcatāṃ prāptā gataścāhamadhīratām || 21 ||
[Analyze grammar]

atha śokaṃ samutsṛjya bālo 'pi gatavānaham |
svāvaṣṭambhena vidyānāṃ prāptaye dakṣiṇāpatham || 22 ||
[Analyze grammar]

kālena tatra saṃprāpya sarvā vidyāḥ prasiddhimān |
svadeśam āgato 'bhūvaṃ darśayiṣyan nijān guṇān || 23 ||
[Analyze grammar]

praviśaṃśca cirāttatra nagare supratiṣṭhite |
apaśyaṃ śiṣyasahitaḥ śobhāṃ kāmapyahaṃ tadā || 24 ||
[Analyze grammar]

kvacitsāmāni chandogā gāyanti ca yathāvidhi |
kvacidvivādo viprāṇāmabhūdvedavinirṇaye || 25 ||
[Analyze grammar]

yo 'tra dyūtakalāṃ vetti tasya hastagato nidhiḥ |
ityādikaitavair dyūtam astuvan kitavāḥ kvacit || 26 ||
[Analyze grammar]

anyonyaṃ nijavāṇijyakalākauśalavādinām |
kvacicca vaṇijāṃ madhye vaṇigeko 'bravīdidam || 27 ||
[Analyze grammar]

arthaiḥ saṃyamavān arthān prāpnoti kiyad adbhutam |
mayā punar vinaivārthaṃ lakṣmīr āsāditā purā || 28 ||
[Analyze grammar]

garbhasthasya ca me pūrvaṃ pitā pañcatvamāgataḥ |
manmātuśca tadā pāpairgotrajaiḥ sakalaṃ hṛtam || 29 ||
[Analyze grammar]

tataḥ sā tadbhayād gatva rakṣaṇtī garbham ātmanaḥ |
tasthau kumāradattasya pitṛmitrasya veśmani || 30 ||
[Analyze grammar]

tatra tasyāśca jāto 'haṃ sādhvyā vṛttinibandhanam |
tataścāvardhayatsā māṃ kṛcchakarmāṇi kurvatī || 31 ||
[Analyze grammar]

upādhyāyamathābhyarcya tayākiṃcanyadīnayā |
krameṇa śikṣitaścāhaṃ lipiṃ gaṇitameva ca || 32 ||
[Analyze grammar]

vaṇikputro 'si tatputra vāṇijyaṃ kuru sāṃpratam |
viśākhilākhyo deśe 'smin vaṇik cāsti mahādhanaḥ || 33 ||
[Analyze grammar]

daridrāṇāṃ kulīnānāṃ bhāṇḍamūlyaṃ dadāti saḥ |
gaccha yācasva taṃ mūlyamiti mātābravīcca mām || 34 ||
[Analyze grammar]

tato 'hamagamaṃ tasya sakāśaṃ so 'pi tatkṣaṇam |
ity avocat krudhā kaṃcid vaṇikputraṃ viśākhilaḥ || 35 ||
[Analyze grammar]

mūṣako dṛśyate yo 'yaṃ gataprāṇo 'tra bhūtale |
etenāpi hi paṇyena kuśalo dhanamarjayet || 36 ||
[Analyze grammar]

dattāstava punaḥ pāpa dīnārā bahavo mayā |
dūre tiṣṭhatu tadvṛddhistvayā te 'pi na rakṣitāḥ || 37 ||
[Analyze grammar]

tacchrutvā sahasaivāhaṃ tamavocaṃ viśākhilam |
gṛhīto 'yaṃ mayā tvatto bhāṇḍamulyāya mūṣakaḥ || 38 ||
[Analyze grammar]

ityuktvā mūṣakaṃ haste gṛhītvā saṃpuṭe ca tam |
likhitvāsya gato 'bhūvam ahaṃ so 'py ahasad vaṇik || 39 ||
[Analyze grammar]

caṇakāñjaliyugmena mūlyenā sa ca mūṣakaḥ |
mārjārasya kṛte dattaḥ kasyacidvaṇijo mayā || 40 ||
[Analyze grammar]

kṛtvā tāṃś caṇakān bhṛṣṭān gṛhītvā jalakumbhikām |
atiṣṭhaṃ catvare gatvā chāyāyā nagarādvahiḥ || 41 ||
[Analyze grammar]

tatra śrāntāgatāyāmbhaḥ śītalaṃ caṇakāṃśca tān |
kāṣṭhabhārikasaṃghāya sapraśrayamadāmaham || 42 ||
[Analyze grammar]

ekaikaḥ kāṣṭhikaḥ prītyā kāṣṭhe dve dve dadau mama |
cikrītavānahaṃ tāni nītvā kāṣṭhāni cāpaṇe || 43 ||
[Analyze grammar]

tataḥ stokena mūlyena krītvā tāṃścaṇakāṃstataḥ |
tathaiva kāṣṭhikebhyo 'hamanyedyuḥ kāṣṭhamāharam || 44 ||
[Analyze grammar]

evaṃ pratidinaṃ kṛtvā prāpya mūlyaṃ kramānyayā |
kāṣṭhikebhyo 'khilaṃ dāru krītaṃ tebhyo dinatrayam || 45 ||
[Analyze grammar]

akasmādatha saṃjāte kāṣṭhacchede 'tivṛṣṭibhiḥ |
mayā taddāru vikrītaṃ paṇānāṃ bahubhiḥ śataiḥ || 46 ||
[Analyze grammar]

tenaiva vipaṇiṃ kṛtvā dhanena nijakauśalāt |
kurvanvaṇijyāṃ kramaśaḥ saṃpanno 'smi mahādhanaḥ || 47 ||
[Analyze grammar]

sauvarṇo mūṣakaḥ kṛtvā mayā tasmai samarpitaḥ |
viśākhilāya so 'pi svāṃ kanyāṃ mahyamadāttataḥ || 48 ||
[Analyze grammar]

ata eva ca loke 'smin prasiddho mūṣakākhyayā |
evaṃ lakṣmīr iyaṃ prāptā nirdhanena satā mayā || 49 ||
[Analyze grammar]

tacchrutvā tatra te 'bhūvanvaṇijo 'nye savismayāḥ |
dhīrna citrīyate kasmādabhittau citrakarmaṇā || 50 ||
[Analyze grammar]

kvacitpratigrahaprāptahemamāṣāṣṭako dvijaḥ |
chandogaḥ kaścidityukto viṭaprāyeṇa kenacit || 51 ||
[Analyze grammar]

brāhmaṇyādbhojanaṃ tāvadasti te tattvayāmunā |
lokayātrā suvarṇena vaidagdhyāyeha śikṣyatām || 52 ||
[Analyze grammar]

ko māṃ śiṣayatītyukte tena mugdhena so 'bravīt |
yaiṣā caturikā nāma veśyā tasyā gṛhaṃ vraja || 53 ||
[Analyze grammar]

tatra kiṃ karavāṇīti dvijenokto viṭo 'bravīt |
svarṇaṃ dattvā prayuñjīthā rañjayansāma kiṃcana || 54 ||
[Analyze grammar]

śrutvety agacchac chandogo drutaṃ caturikāgṛham |
upāviśat praviśyātra kṛtapratyudgatistayā || 55 ||
[Analyze grammar]

māmadya lokayātrāṃ tvaṃ śikṣayaitena sāṃpratam |
iti jalpansa tattasyai svarṇamarpitavāndvijaḥ || 56 ||
[Analyze grammar]

prahasatyatha tatrasthe jane kiṃcidvicintya saḥ |
gokarṇasadṛśau kṛtvā karāvābaddhasāraṇau || 57 ||
[Analyze grammar]

tārasvaraṃ tathā sāma gāyati sma jaḍāśayaḥ |
yathā tatra milanti sma viṭā hāsyadidṛkṣavaḥ || 58 ||
[Analyze grammar]

te cāvocañ śṛgālo 'yaṃ praviṣṭo 'tra kuto 'nyathā |
tac chīghram ardhacandro 'sya gale 'smin dīyatām iti || 59 ||
[Analyze grammar]

ardhacandraṃ śaraṃ matvā śiraśchedabhayāddrutam |
śikṣitā lokayātreti garjansa niragāttataḥ || 60 ||
[Analyze grammar]

tatsakāśaṃ tato 'gacchadyenāsu preṣito 'bhavat |
vṛttāntaṃ cāvadattasmai so 'pi cainamabhāṣata || 61 ||
[Analyze grammar]

sāma sāntvaṃ mayoktaṃ te vedasyāvasaro 'tra kaḥ |
kiṃ vā dhārādhirūḍhaṃ hi jāḍyaṃ vedajaḍe jane || 62 ||
[Analyze grammar]

evaṃ vihasya gatvā ca tenoktā sā vilāsinī |
dvipadasya paśorasya tatsuvarṇatṛṇaṃ tyaja || 63 ||
[Analyze grammar]

hasantyā ca tayā tyaktaṃ suvarṇaṃ prāpya sa dvijaḥ |
punarjātamivātmānaṃ manvāno gṛhamāgataḥ || 64 ||
[Analyze grammar]

evaṃprāyāṇy ahaṃ paśyan kautukāni pade pade |
prāptavān rājabhavanaṃ mahendrasadanopamam || 65 ||
[Analyze grammar]

tataś cāntaḥ praviṣṭo 'haṃ śiṣyair agre niveditaḥ |
āsthānasthitamadrākṣaṃ rājānaṃ sātavāhanam || 66 ||
[Analyze grammar]

śarvavarmaprabhṛtibhirmantribhiḥ parivāritam |
ratnasiṃhāsanāsīnamamarairiva vāsavam || 67 ||
[Analyze grammar]

vihitasvastikāraṃ māmupaviṣṭamathāsane |
rājñā kṛtādaraṃ caiva śarvavarmādayo 'stuvan || 68 ||
[Analyze grammar]

ayaṃ deva bhuvi khyātaḥ sarvavidyāviśāradaḥ |
guṇāḍhya iti nāmāsya yathārthamata eva hi || 69 ||
[Analyze grammar]

ityādi tatstutiṃ dṛṣṭvā mantribhiḥ sātavāhanaḥ |
prītaḥ sapadi satkṛtya mantritve māṃ nyayojayat || 70 ||
[Analyze grammar]

athāhaṃ rājakāryāṇi cintayannavasaṃ sukham |
śiṣyānadhyāpayaṃstatra kṛtadāraparigrahaḥ || 71 ||
[Analyze grammar]

kadācitkautukādbhrāmyansvairaṃ godāvarītaṭe |
devīkṛtiriti khyātamudyānaṃ dṛṣṭavānaham || 72 ||
[Analyze grammar]

taccātiramyamālokya kṣitisthamiva nandanam |
udyānapālaḥ pṛṣṭo 'bhūnmayā tatra tadāgamam || 73 ||
[Analyze grammar]

sa ca māmabravītsvāminvṛddhebhyaḥ śrūyate yathā |
pūrvaṃ maunī nirāhāro dvijaḥ kaścitamāyayau || 74 ||
[Analyze grammar]

sa divyamidamudyānaṃ sadevabhavanaṃ vyadhāt |
tato 'tra brāhmaṇāḥ sarve milanti sma sakautukāḥ || 75 ||
[Analyze grammar]

nirbandhāttaiḥ sa pṛṣṭaḥ svaṃ vṛttāntam avadad dvijaḥ |
astīha bharukacchākhyo viṣayo narmadātaṭe || 76 ||
[Analyze grammar]

tasminn ahaṃ samutpanno viprastasya ca me purā |
na bhikṣāmapyadātkaściddaridrasyālasasya ca || 77 ||
[Analyze grammar]

atha khedādgṛhaṃ tyaktvā virakto jīvitaṃ prati |
bhrāntvā tīrthānyahaṃ draṣṭumagacchaṃ vindhyavāsinīm || 78 ||
[Analyze grammar]

dṛṣṭvā tataśca tāṃ devīmiti saṃcintitaṃ mayā |
lokaḥ paśūpahāreṇa prīṇāti varadāmimām || 79 ||
[Analyze grammar]

ahaṃ tvātmānameveha hanmi mūrkhamimaṃ paśum |
niścityeti śiraśchettuṃ mayā śastramagṛhyata || 80 ||
[Analyze grammar]

tatkṣaṇaṃ sā prasannā māṃ devī svayamabhāṣata |
putra siddho 'si mātmānaṃ vadhīstiṣṭha mamāntike || 81 ||
[Analyze grammar]

iti devīvaraṃ labdhvā saṃprāptā divyatā mayā |
tataḥ prabhṛti naṣṭā me bubhukṣā ca tṛṣā saha || 82 ||
[Analyze grammar]

kadācidatha devī māṃ tatrasthaṃ svayamādiśat |
gatvā putra pratiṣṭhāne racayodyānamuttamam || 83 ||
[Analyze grammar]

ityuktvā saiva me bījaṃ divyaṃ prādāttato mayā |
ihāgatya kṛtaṃ kāntamudyānaṃ tatprabhāvataḥ || 84 ||
[Analyze grammar]

pālyametacca yuṣmākamityuktvā sa tirodadhe |
iti nirmitam udyānam idaṃ devyā purā prabho || 85 ||
[Analyze grammar]

udānapālād ityevaṃ taddeśe devyanugraham |
ākarṇya vismayāviṣṭo gṛhāya gatavānaham || 86 ||
[Analyze grammar]

evamukte guṇāḍhena kāṇabhūtirabhāṣata |
sātavāhana ityasya kasmannāmābhavatprabho || 87 ||
[Analyze grammar]

tato 'bravīdguṇāḍhyo 'pi śṛṇvetatkathayāmi te |
dīpakarṇiriti khyāto rājābhūtprājyavikramaḥ || 88 ||
[Analyze grammar]

tasya śaktimatī nāma bhāryā prāṇādhikābhavat |
ratāntasuptām udyāne sarpastāṃ jātu daṣṭavān || 89 ||
[Analyze grammar]

gatāyāmatha pañcatvaṃ tasyāṃ tadgatamānasaḥ |
aputro 'pi sa jagrāha brahmacaryavrataṃ nṛpaḥ || 90 ||
[Analyze grammar]

tataḥ kadācid rājyārhaputrāsadbhāvaduḥkhitam |
ityādideśa taṃ svapne bhagavāninduśekharaḥ || 91 ||
[Analyze grammar]

aṭavyāṃ drakṣasi bhrāmyansiṃhārūḍhaṃ kumārakam |
taṃ gṛhītvā gṛhaṃ gaccheḥ sa te putro bhaviṣyati || 92 ||
[Analyze grammar]

atha prabuddhas taṃ svapnaṃ svaranrājā jaharṣa saḥ |
kadācicca yayau dūrāmaṭavīṃ mṛgayārasāt || 93 ||
[Analyze grammar]

dadarśa tatra madhyāhne siṃhārūḍhaṃ sa bhūpatiḥ |
bālakaṃ padmasarasastīre tapanatejasam || 94 ||
[Analyze grammar]

atha rājā smaransvapnamavatāritabālakam |
jalābhilāṣiṇaṃ siṃhaṃ jaghānaikaśareṇa tam || 95 ||
[Analyze grammar]

sa siṃhas tadvapus tyaktvā sadyo 'bhūtpuruṣākṛtiḥ |
kaṣṭaṃ kim etad brūhīti rājñā pṛṣṭo jagāda ca || 96 ||
[Analyze grammar]

dhanadasya sakhā yakṣaḥ sāto nāmāsmi bhūpate |
so 'haṃ snāntīmapaśyaṃ prāggaṅgāyāmṛṣikanyakām || 97 ||
[Analyze grammar]

sāpi māṃ vīkṣya saṃjātamanmathābhūdahaṃ tathā |
gāndharveṇa vivāhena tato bhāryā kṛtā mayā || 98 ||
[Analyze grammar]

tacca tadbāndhavā buddhvā tāṃ ca māṃ cāśapan krudhā |
siṃhau bhaviṣyataḥ pāpau svecchācārau yuvām iti || 99 ||
[Analyze grammar]

putrajanmāvadhiṃ tasyāḥ śāpāntaṃ munayo vyadhuḥ |
mama tu tvaccharāghātaparyantaṃ tadanantaram || 100 ||
[Analyze grammar]

athāvāṃ siṃhamithunaṃ saṃjātau sāpi kālataḥ |
garbhiṇyabhūttato jāte dārake 'sminvyapadyata || 101 ||
[Analyze grammar]

ayaṃ ca vardhito 'nyāsāṃ siṃhīnāṃ payasā mayā |
adya cāhaṃ vimukto 'smi śāpādbāṇāhatastvayā || 102 ||
[Analyze grammar]

tadgṛhāṇa mahāsattvaṃ mayā dattamamuṃ sutam |
ayaṃ hyarthaḥ samādiṣṭastaireva munibhiḥ purā || 103 ||
[Analyze grammar]

ityuktvāntarhite tasminsātanāmani guhyake |
sa rājā taṃ samādāya bālaṃ pratyāyayau gṛham || 104 ||
[Analyze grammar]

sātena yasmād ūḍho 'bhūt tasmāt taṃ sātavāhanam |
nāmnā cakāra kālena rājye cainaṃ nyaveśayet || 105 ||
[Analyze grammar]

tatas tasmin gate 'raṇyaṃ dīpakarṇau kṣitīśvare |
saṃvṛttaḥ sārvabhaumo 'sau bhūpatiḥ sātavāhanaḥ || 106 ||
[Analyze grammar]

evamuktvā kathāṃ madhye kāṇabhūtyanuyogataḥ |
guṇāḍhyaḥ prakṛtaṃ dhīmānanusmṛtyābravītpunaḥ || 107 ||
[Analyze grammar]

tataḥ kadācidadhyāsta vasantasamayotsave |
devīkṛtaṃ tadudyānaṃ sa rājā sātavāhanaḥ || 108 ||
[Analyze grammar]

viharansuciraṃ tatra mahendra iva nandane |
vāpījale 'vatīrṇo 'bhūtkrīḍituṃ kāminīsakhaḥ || 109 ||
[Analyze grammar]

asiñcattatra dayitāḥ sahelaṃ karavāribhiḥ |
asicyata sa tābhiśca vaśābhiriva vāraṇaḥ || 110 ||
[Analyze grammar]

mukhairdhautāñjanātāmranetrairjahnujalāplutaiḥ |
aṅgaiḥ saktāmbaravyaktavibhāgaiśca tamaṅganāḥ || 111 ||
[Analyze grammar]

vidalatpatratilakāḥ sa cakre vanamadhyagāḥ |
cyutābharaṇapuṣpāstā latā vāyuriva priyāḥ || 112 ||
[Analyze grammar]

athaikā tasya mahiṣī rājñaḥ stanabharālasā |
śirīṣasukumārāṅgī krīḍantī klamamabhyagāt || 113 ||
[Analyze grammar]

sā jalairabhiṣiñcantaṃ rājānamasahā satī |
abravīnmodakairdeva paritāḍaya māmiti || 114 ||
[Analyze grammar]

tac chrutvā modakān rājā drutam ānāyayad bahūn |
tato vihasya sā rājñī punar evam abhāṣata || 115 ||
[Analyze grammar]

rājannavasaraḥ ko 'tra modakānāṃ jalāntare |
udakaiḥ siñca mā tvaṃ māmityuktaṃ hi mayā tava || 116 ||
[Analyze grammar]

saṃdhimātraṃ na jānāsi māśabdodakaśabdayoḥ |
na ca prakaraṇaṃ vetsi mūrkhastvaṃ kathamīdṛśaḥ || 117 ||
[Analyze grammar]

ityuktaḥ sa tayā rājā śabdaśāstravidā nṛpaḥ |
parivāre hasatyantarlajjākrānto jhagityabhūt || 118 ||
[Analyze grammar]

parityaktajalakrīḍo vītadarpaśca tatkṣaṇam |
jātāvamāno nirlakṣaḥ prāviśannijamandiram || 119 ||
[Analyze grammar]

tataścintāparo muhyannāharādiparāṅmukhaḥ |
citrastha iva pṛṣṭo 'pi naiva kiṃcidabhāṣata || 120 ||
[Analyze grammar]

pāṇḍityaṃ śaraṇaṃ vā me mṛtyurveti vicintayan |
śayanīyaparityaktagāraḥ saṃtāpavānabhūt || 121 ||
[Analyze grammar]

akasmādatha rājñastāṃ dṛṣṭvāvasthāṃ tathāvidhām |
kimetaditi saṃbhrāntaḥ sarvaḥ parijano 'bhavat || 122 ||
[Analyze grammar]

tato 'haṃ śarvavarmā ca jñātavantau krameṇa tām |
atrāntare sa ca prāyaḥ paryahīyata vāsaraḥ || 123 ||
[Analyze grammar]

asmin kāle na ca svastho rājety ālocya tatkṣaṇam |
āvābhyāṃ rājahaṃsākhya āhūto rājaceṭakaḥ || 124 ||
[Analyze grammar]

śarīravārtāṃ bhūpasya sa ca pṛṣṭo 'bravīd idam |
nedṛśo durmanāḥ pūrvaṃ dṛṣṭo devaḥ kadācana || 125 ||
[Analyze grammar]

viṣṇuśaktiduhitrā ca mithyāpaṇḍitayā tayā |
vilakṣīkṛta ityāhurdevyo 'nyāḥ kopanirbharam || 126 ||
[Analyze grammar]

etattasya mukhācchrutvā rājaceṭasya durmanāḥ |
śarvavarmadvitīyo 'haṃ saṃśayādityacintayam || 127 ||
[Analyze grammar]

vyādhiryadi bhavedrājñaḥ praviśeyuścikitsakāḥ |
ādhirvā yadi tatrāsya kāraṇaṃ nopalabhyate || 128 ||
[Analyze grammar]

nāstyeva hi vipakṣo 'sya rājye nihatakaṇṭake |
anuraktāḥ prajāścaitā na hāniḥ paridṛśyate || 129 ||
[Analyze grammar]

tatkasmād eṣa khedaḥ syād īdṛśaḥ sahasa prabhoḥ |
evaṃ vicintite dhīmāñ śarvavarmedam abravīt || 130 ||
[Analyze grammar]

ahaṃ jānāmi rājño 'sya manyurmaurkhyānutāpataḥ |
mūrkho 'ham iti pāṇḍityaṃ sadaivāyaṃ hi vāñchati || 131 ||
[Analyze grammar]

upalabdho mayā caiṣa pūrvam eva tadāśayaḥ |
rājñyāvamānitaś cādya tannimittam iti śrutam || 132 ||
[Analyze grammar]

evamanyonyamālocya tāṃ rātrimativāhya ca |
prātar āvāma gacchāva vāsaveśma mahīpateḥ || 133 ||
[Analyze grammar]

tatra sarvasya ruddhe 'pi praveśe kathamapyaham |
prāviśaṃ mama paścācca śarvavarmā laghukramam || 134 ||
[Analyze grammar]

upaviśyātha nikaṭe vijñaptaḥ sa mayā nṛpaḥ |
akāraṇaṃ kathaṃ deva vartase vimanā iti || 135 ||
[Analyze grammar]

tacchrutvāpi tathaivāsītsa tūṣṇīṃ sātavāhanaḥ |
śarvavarmā tataścedamadbhutaṃ vākyamabravīt || 136 ||
[Analyze grammar]

śrutaṃ mama syāt kāpīti prāguktaṃ deva me tvayā |
tenāhaṃ kṛtavānadyā svapnamāṇavakaṃ niśi || 137 ||
[Analyze grammar]

svapne tato mayā dṛṣṭaṃ nabhasaścyutamambujam |
tacca divyena kenāpi kumāreṇa vikāsitam || 138 ||
[Analyze grammar]

tataśca nirgatā tasmāddivyā strī dhavalāmbarā |
tava deva mukhaṃ sā ca praviṣṭā samanantaram || 139 ||
[Analyze grammar]

iyaddṛṣṭvā prabuddho 'smi manye sā ca sarasvatī |
devasya vadane sākṣāt saṃpraviṣṭā na saṃśayaḥ || 140 ||
[Analyze grammar]

evaṃ niveditasvapne śarvavarmaṇi tatkṣaṇam |
māmastamaunaḥ sākūtamavadatsātavāhanaḥ || 141 ||
[Analyze grammar]

śikṣamāṇaḥ prayatnenā kālena kiyatā pumān |
adhigacchati pāṇḍityametanme kathyatāṃ tvayā || 142 ||
[Analyze grammar]

mama tena vinā hyeṣā lakṣmīrna pratibhāsate |
vibhavaiḥ kiṃ nu mūrkhasya kāṣṭhasyābharaṇairiva || 143 ||
[Analyze grammar]

tato 'hamavadaṃ rājanvarṣairdvādaśabhiḥ sadā |
jñāyate sarvavidyānāṃ mukhaṃ vyākaraṇaṃ naraiḥ || 144 ||
[Analyze grammar]

ahaṃ tu śikṣayāmi tvāṃ varṣaṣaṭkena tadvibho |
śrutvaitatsahasā serṣyaṃ śarvavarmā kilāvadat || 145 ||
[Analyze grammar]

sukhocito janaḥ kleśaṃ kathaṃ kuryadiyacciram |
tadahaṃ māsaṣaṭkena deva tvāṃ śikṣayāmi tat || 146 ||
[Analyze grammar]

śrutvaivaitad asaṃbhāvyaṃ tam avocam ahaṃ ruṣā |
ṣaḍbhir māsais tvayā devaḥ śikṣitaś cet tato mayā || 147 ||
[Analyze grammar]

saṃskṛtaṃ prākṛtaṃ tadvaddeśabhāṣā ca sarvadā |
bhāṣātrayamidaṃ tyaktaṃ yanmanuṣyeṣu saṃbhavet || 148 ||
[Analyze grammar]

śarvavarmā tato 'vādīnna cedevaṃ karomyaham |
dvādaśābdānvahāmyeṣa śirasā tava pāduke || 149 ||
[Analyze grammar]

ityuktvā nirgate tasminnahamapyagamaṃ gṛham |
rājāpyubhayataḥ siddhiṃ matvāśvasto babhūva saḥ || 150 ||
[Analyze grammar]

vihastaḥ śarvavarmā ca pratijñāṃ tāṃ sadustarām |
paśyansānuśayaḥ sarvaṃ svabhāryāyai śaśaṃsa tat || 151 ||
[Analyze grammar]

sāpi taṃ duḥkhitāvocatsaṃkaṭe 'smiṃstava prabho |
vinā svāmikumāreṇa gatiranyā na dṛśyate || 152 ||
[Analyze grammar]

tatheti niścayaṃ kṛtvā paścime prahare niśi |
śarvavarmā nirāhārastatraiva prasthito 'bhavat || 153 ||
[Analyze grammar]

tacca cāramukhādbuddhvā mayā prātarniveditam |
rājñe so 'pi tadākarṇya kiṃ bhavedityacintayat || 154 ||
[Analyze grammar]

tatastaṃ siṃhaguptākhyo rājaputro hito 'bravīt |
tvayi khinne tadā deva nirvedo me mahānabhūt || 155 ||
[Analyze grammar]

tataḥ śreyonimittaṃ te caṇḍikāgre nijaṃ śiraḥ |
chettuṃ prārabdhavānasmi gatvāsmānnagarādvahiḥ || 156 ||
[Analyze grammar]

maivaṃ kṛthā nṛpasyecchā setsyatyevetyavārayat |
vāgantarikṣādatha māṃ tanmanye siddhirasti te || 157 ||
[Analyze grammar]

ityuktvā nṛpamāmantrya satvaraṃ śarvavarmaṇaḥ |
paścāccāradvayaṃ so 'tha siṃhagupto vyasarjayat || 158 ||
[Analyze grammar]

so 'pi vātaikabhakṣaḥ san kṛtamaunaḥ suniścayaḥ |
prāpa svāmikumārasya śarvavarmāntikaṃ kramāt || 159 ||
[Analyze grammar]

śarīranirapekṣeṇa tapasā tatra toṣitaḥ |
prasādamakarottasya kārtikeyo yathepsitam || 160 ||
[Analyze grammar]

āgatyāgre tato rājñe cārābhyāṃ sa niveditaḥ |
siṃhaguptavisṛṣṭābhyāmudayaḥ śarvavarmaṇaḥ || 161 ||
[Analyze grammar]

tacchrutvā mama rājñaśca viṣādapramadau dvayoḥ |
abhūtāṃ mekhamālokya haṃsacātakayoriva || 162 ||
[Analyze grammar]

āgatya śarvavarmātha kumāravarasiddhimān |
cintitopasthitā rājñe sarvā vidyāḥ pradattavān || 163 ||
[Analyze grammar]

prādurāsaṃśca tāstasya sātavāhanabhūpateḥ |
tatkṣaṇaṃ kiṃ na kuryāddhi prasādaḥ pārameśvaraḥ || 164 ||
[Analyze grammar]

atha tam akhilavidyālābham ākarṇya rājñaḥ pramuditavati rāṣṭre tatra ko 'pyutsavo 'bhūt |
api pavanavidhūtāstatkṣaṇollāsyamānāḥ prativasati patākā baddhanṛttā ivāsan || 165 ||
[Analyze grammar]

rājārharatnanicayairatha śarvavarmā tenārcito gururiti praṇatena rājñā |
svāmīkṛtaśca viṣaye marukacchanāmni kūlopakaṇṭhaviniveśini narmadāyāḥ || 166 ||
[Analyze grammar]

yo 'gre cāramukhena ṣaṇmukhavaraprāptiṃ samākarṇayat saṃtuṣyātmasamaṃ śriyā narapatistaṃ siṃhaguptaṃ vyadhāt |
rājñīṃ tām api viṣṇuśaktitanayāṃ vidyāgame kāraṇaṃ devīnāmupari prasahya kṛtavān prītyābhiṣicya svayam || 167 ||
[Analyze grammar]