Chapter 5

evamuktvā vararuciḥ punaretadavarṇayat |
kālena yoganando 'tha kāmādivaśamāyayau || 1 ||
[Analyze grammar]

gajendra iva mattaśca nāpaikṣata sa kiṃcana |
akāṇḍapātopanatā kaṃ na lakṣmīr vimohayet || 2 ||
[Analyze grammar]

acintayaṃ tataścāhaṃ rājā tāvadviśṛṅkhalaḥ |
tatkāryacintayākrāntaḥ svadharmo me 'vasīdati || 3 ||
[Analyze grammar]

tasmādvaraṃ sahāyaṃ taṃ śakaṭālaṃ samuddhare |
kriyetā cedviruddhaṃ ca kiṃ da kuryānmayi sthite || 4 ||
[Analyze grammar]

niścityaitanmayābhyarthya rājānaṃ so 'ndhakūpataḥ |
uddhṛtaḥ śakaṭālo 'tha mṛdavo hi dvijātayaḥ || 5 ||
[Analyze grammar]

durjayo yoganando 'yaṃ sthite vararucāvataḥ |
āśraye vaitasīṃ vṛttiṃ kālaṃ tāvatpratīkṣitum || 6 ||
[Analyze grammar]

iti saṃcintya sa prājñaḥ śakaṭālo madicchayā |
akarodrājakāryāṇi punaḥ saṃprāpya mantritām || 7 ||
[Analyze grammar]

kadācidyoganando 'tha nirgato nagarādvahiḥ |
śliṣyatpañcāṅguliṃ hastaṃ gaṅgāmadhye vyalokayat || 8 ||
[Analyze grammar]

kimetaditi papraccha māmāhūya sa tatkṣaṇam |
ahaṃ ca dve nijāṅgulyau diśi tasyāmadarśayam || 9 ||
[Analyze grammar]

tena tasmiṃstirobhūte haste rājātivismayāt |
bhūyo 'pi tadapṛcchanmāṃ tataścāhaṃ tamabravam || 10 ||
[Analyze grammar]

pañcabhirmilitaiḥ kiṃ yajjagatīha na sādhyate |
ityuktavānasau hastaḥ śvāṅgulīḥ pañca darśayan || 11 ||
[Analyze grammar]

tato 'sya rājan naṅgulyāv ete dve darśite mayā |
aikacitye dvayoreva kimasādhyaṃ bhavediti || 12 ||
[Analyze grammar]

ityukte gūḍhavijñāne samatuṣyattato nṛpaḥ |
śakaṭālo vyaṣīdacca madbuddhiṃ vīkṣya durjayām || 13 ||
[Analyze grammar]

ekadā yoganandaśca dṛṣṭavānmahiṣīṃ nijām |
vātāyanāgrāt paśyantīṃ brāhmaṇātithimunmukham || 14 ||
[Analyze grammar]

tanmātrādeva kupito rājā viprasa tasya saḥ |
ādiśadbadhamīrṣyā hi vivekaparipanthinī || 15 ||
[Analyze grammar]

hantuṃ vadhyabhuvaṃ tasmin nīyamāne dvije tadā |
ahasadgatajīvo 'pi matsyo vipaṇimadhyagaḥ || 16 ||
[Analyze grammar]

tadaiva rājā tadbuddhvā vadhaṃ tasya nyavārayat |
viprasya māmapṛcchacca matsyahāsasya kāraṇam || 17 ||
[Analyze grammar]

nirūpya kathayāmyetadityuktvā nirgataṃ ca mām |
cintitopasthitaikānte sarasvatyevamabravīt || 18 ||
[Analyze grammar]

asya tālataroḥ pṛṣṭhe tiṣṭha rātrābalakṣitaḥ |
atra śroṣyasi matsyasya hāsahetum asaṃśayam || 19 ||
[Analyze grammar]

tacchrutvā niśi tatrāhaṃ gatvā tālopari sthitaḥ |
apaśyaṃ rākṣasīṃ ghorāṃ bālaiḥ putraiḥ sahāgatam || 20 ||
[Analyze grammar]

sā bhakṣyaṃ yācamānāṃstānavādītpratipālyatām |
prātarvo vipramāṃsāni dāsyāmyadya hato na saḥ || 21 ||
[Analyze grammar]

kasmātsa na hato 'dyeti pṛṣṭā tairabravītpunaḥ |
taṃ hi dṛṣṭva mṛto 'pīha matsyo hasitavāniti || 22 ||
[Analyze grammar]

hasitaṃ kimu teneti pṛṣṭā bhūyaḥ sutaiśca sā |
avocadrākṣasī rājñaḥ sarvā rājño 'pi viplutāḥ || 23 ||
[Analyze grammar]

sarvatrāntaḥpure hyatra strīrūpāḥ puruṣāḥ sthitāḥ |
hanyate 'naparādhas tu vipra ity ahasat timiḥ || 24 ||
[Analyze grammar]

bhūtānāṃ pārthivātyarthanirvivekatvahāsinām |
sarvāntaścāriṇāṃ hyetā bhavantyeva ca vikriyāḥ || 25 ||
[Analyze grammar]

etattasyā vacaḥ śrutvā tato 'pakrāntavāhanam |
prāptaśca matsyahāsasya hetuṃ rājñe nyavedayam || 26 ||
[Analyze grammar]

prāpya cāntaḥpurebhyas tān strīrūpān puruṣāṃs tataḥ |
bahv amanyata māṃ rājā vadhādvipraṃ ca muktavān || 27 ||
[Analyze grammar]

ityādi ceṣṭitaṃ dṛṣṭvā tasya rājño viśṛṅkhalam |
khinne mayi kadācicca tatrāgāccitrakṛnnavaḥ || 28 ||
[Analyze grammar]

alikhat sa mahādevīṃ yoganandaṃ ca taṃ paṭe |
sajīvam iva taccitraṃ vākceṣṭārahitaṃ tv abhūt || 29 ||
[Analyze grammar]

taṃ ca citrakaraṃ rājā tuṣṭo vittairapūrayat |
taṃ ca vāsagṛhe citrapaṭaṃ bhittāvakārayat || 30 ||
[Analyze grammar]

ekadā ca praviṣṭasya vāsake tatra sā mama |
saṃpūrṇalakṣaṇā devī pratibhāti sma citragā || 31 ||
[Analyze grammar]

lakṣaṇāntarasaṃbandhādabhyūhya pratibhāvaśāt |
athākārṣamahaṃ tasyāstilakaṃ mekhalāpade || 32 ||
[Analyze grammar]

saṃpūrṇalakṣaṇāṃ tena kṛtvaināṃ gatavānaham |
praviṣṭo yoganando 'tha tilakaṃ taṃ vyalokayat || 33 ||
[Analyze grammar]

kenāyaṃ racito 'treti so 'pṛcchacca mahattarān |
te ca nyavedayaṃstasmai kartāraṃ tilakasya mām || 34 ||
[Analyze grammar]

devyā guptapradeśasthamimaṃ nānyo mayā vinā |
vetti tajjñātavānevamasau vararuciḥ katham || 35 ||
[Analyze grammar]

channaḥ kṛto 'munā nūnaṃ mamāntaḥpuraviplavaḥ |
dṛṣṭavānata evāyaṃ strīrūpāṃstatra tānnarān || 36 ||
[Analyze grammar]

iti saṃcintayāmāsa yoganandaḥ krudhā jvalan |
jāyante bata mūḍhānāṃ saṃvāda api tādṛśāḥ || 37 ||
[Analyze grammar]

tataḥ svairaṃ samāhūya śakaṭālaṃ samādiśat |
tvayā vararucirvadhyo devīvidhvaṃsanāditi || 38 ||
[Analyze grammar]

yathā jñāpayasītyuktvā śakaṭālo 'gamadbahiḥ |
acintayacca śaktiḥ syāddhantuṃ vararuciṃ na me || 39 ||
[Analyze grammar]

divyabuddhiprabhāvo 'sābuddhartā ca mamāpadaḥ |
viprasya tadvaraṃ guptaṃ saṃprati svīkaromi tam || 40 ||
[Analyze grammar]

iti niścitya so 'bhyetya rājñaḥ kopamakāraṇam |
vadhāntaṃ kathayitvā me śakaṭālo 'bravīttataḥ || 41 ||
[Analyze grammar]

anyaṃ kaṃcitpravādāya hanmyahaṃ tvaṃ ca madgṛhe |
pracchannas tiṣṭha mām asmād rakṣituṃ kopanān nṛpāt || 42 ||
[Analyze grammar]

iti tadvacanāc channas tadgṛhe 'vasthito 'bhavam |
sa cānyaṃ hatavān kaṃcin madvadhākhyātaye niśi || 43 ||
[Analyze grammar]

evaṃ prayuktanītiṃ taṃ prītyāvocamahaṃ tadā |
eko mantrī bhavānyena hantuṃ māṃ na kṛtā matiḥ || 44 ||
[Analyze grammar]

nahi hantumahaṃ śakyo rākṣaso mittramasti me |
dhyātamātrāgato viśvaṃ grasate sa madicchayā || 45 ||
[Analyze grammar]

rājā tvihendradattākhyaḥ sakhā vadhyo na me dvijaḥ |
tacchrutvā so 'bravīnmantrī rakṣo me darśyatāmiti || 46 ||
[Analyze grammar]

tato dhyātāgataṃ tasmi tadrakṣo 'hamadarśayam |
taddarśanācca vitrasto vismitaśca vabhūva saḥ || 47 ||
[Analyze grammar]

rakṣasyantarhite tasmiñ śakaṭālaḥ sa māṃ punaḥ |
kathaṃ te rākṣaso mittraṃ saṃjāta iti pṛṣṭavān || 48 ||
[Analyze grammar]

tato 'hamavadaṃ pūrvaṃ rakṣārthaṃ nagare bhraman |
rātrau rātrau kṣayaṃ prāpadekaiko nagarādhipaḥ || 49 ||
[Analyze grammar]

tacchrutvā yoganando māmakaronnagarādhipam |
bhramaṃścāpaśyamatrāhaṃ bhramantaṃ rākṣasaṃ niśi || 50 ||
[Analyze grammar]

sa ca māmavadadbrūhi vidyate nagare 'tra kā |
surūpā strīti tacchrutvā vihasyāhaṃ tamabravam || 51 ||
[Analyze grammar]

yā yasyābhimatā mūrkha surūpā tasya sā bhavet |
tacchrutvaiva tvayaikena jito 'smītyavadatsa mām || 52 ||
[Analyze grammar]

praśnamokṣādvadhottirṇaṃ māṃ punaścābravīdasau |
tuṣṭo 'smīti suhṛnme tvaṃ saṃnidhāsye ca te smṛtaḥ || 53 ||
[Analyze grammar]

ityuktvāntarhite tasminyathāgatamagāmaham |
evam āpatsahāyo me rākṣaso mittratāṃ gataḥ || 54 ||
[Analyze grammar]

ityuktavānahaṃ bhūyaḥ śakaṭālena cārthitaḥ |
gaṅgāmadarśayaṃ tasmai mūrtāṃ dhyānādupasthitām || 55 ||
[Analyze grammar]

stutibhistoṣitā sā ca mayā devī tirodadhe |
babhūva śakaṭālaśca sahāyaḥ praṇato mayi || 56 ||
[Analyze grammar]

ekadā ca sa mantrī māṃ guptasthaṃ khinnamabravīt |
sarvajñenāpi khedāya kimātmā dīyate tvayā || 57 ||
[Analyze grammar]

kiṃ na jānāsi yadrājñāmavicāraratā dhiyaḥ |
acirācca bhavecchuddhistathā cātra kathaṃ śṛṇu || 58 ||
[Analyze grammar]

ādityavarmanāmātra babhūva nṛpatiḥ purā |
śivavarmābhidhāno 'sya mantrī cābhūnmahāmatiḥ || 59 ||
[Analyze grammar]

rājñastasyaikadā caikā rājñī garbhamadhārayat |
tadbuddhvā sa nṛpo 'pṛcchadityantaḥ purarakṣiṇaḥ || 60 ||
[Analyze grammar]

varṣadvayaṃ praviṣṭasya vartate 'ntaḥpure 'tra me |
tadeṣā garbhasaṃbhūtiḥ kutaḥ saṃprati kathyatām || 61 ||
[Analyze grammar]

athocuste praveśo 'tra puṃso 'nyasyāsti na prabho |
śivavarmā tu te mantrī praviśatyanivāritaḥ || 62 ||
[Analyze grammar]

tacchrutvācintayadrājā nūnaṃ drohī sa eva me |
prakāśaṃ ca hate tasminnapavādo bhavenmama || 63 ||
[Analyze grammar]

ityālocya sa taṃ yuktyā śivavarmāṇamīśvaraḥ |
sāmantasyāntikaṃ sakhyuḥ prāhiṇodbhogavarmaṇaḥ || 64 ||
[Analyze grammar]

tadvadhaṃ tasya lekhena saṃdiśya tadanantaram |
nigūḍhaṃ sa nṛpastatra lekhahāraṃ vyasarjayat || 65 ||
[Analyze grammar]

yāte mantriṇi saptāhe gate bhītyā palāyitā |
sā rājñī rakṣibhirlabdhā puṃsā strīrupiṇā saha || 66 ||
[Analyze grammar]

ādityavarmā tadbuddhvā sānutāpo 'bhavattadā |
kiṃ mayā tādṛśo mantrī ghātito 'kāraṇāditi || 67 ||
[Analyze grammar]

atrāntare sa ca prāpa nikaṭaṃ bhogavarmaṇaḥ |
śivavarmā sa copāgāllekhamādāya pūruṣaḥ || 68 ||
[Analyze grammar]

vācayitvā ca taṃ lekhamekānte śivavarmaṇe |
śaśaṃsa vadhanirdeśaṃ bhogavarmā vidhervaśāt || 69 ||
[Analyze grammar]

śivavarmāpy avocat taṃ sāmantaṃ mantrisattamaḥ |
tvaṃ vyāpādaya māṃ no cen nihanmyātmānam ātmanā || 70 ||
[Analyze grammar]

tacchrutvā vismayāviṣṭo bhogavarmā jagāda tam |
kimetadbrūhi me vipra śāpito 'si na vakṣi cet || 71 ||
[Analyze grammar]

atha vakti sma taṃ mantrī hanyeyaṃ yatra bhūpate |
tatra dvādaśa varṣāṇi deśe devo na varṣati || 72 ||
[Analyze grammar]

tacchrutvā mantribhiḥ sārdhaṃ bhogavarmā vyacintayat |
duṣṭaḥ sa rājā deśasya nāśamasmākamicchati || 73 ||
[Analyze grammar]

kiṃ hi tatra na santyeva vadhakā guptagāminaḥ |
tasmānmantrī na vadhyo 'sau rakṣyaḥ svātmavadhādapi || 74 ||
[Analyze grammar]

iti saṃmantrya dattvā ca rakṣakān bhogavarmaṇā |
śivavarmā tato deśāt preṣito 'bhūt tataḥ kṣaṇāt || 75 ||
[Analyze grammar]

evaṃ pratyāyayau jīvansa mantrī prajñayā svayā |
śuddhiścāsyānyato jātā nahi dharmo 'nyathā bhavet || 76 ||
[Analyze grammar]

itthaṃ tavāpi śuddhiḥ syāttiṣṭha tāvadgṛhe mama |
kātyāyana nṛpo 'pyeṣa sānutāpo bhaviṣyati || 77 ||
[Analyze grammar]

ityuktaḥ śakaṭālena cchanno 'haṃ tasya veśmani |
pratīkṣamāṇo 'vasaraṃ tānyahānyatyavāhayam || 78 ||
[Analyze grammar]

tasyātha yoganandasya kāṇabhūteḥ kadācana |
putro hiraṇyaguptākhyo mṛgayāyai gato 'bhavat || 79 ||
[Analyze grammar]

aśvavegātprayātasya kathaṃciddūramantaram |
ekākino vane tasya vāsaraḥ paryahīyata || 80 ||
[Analyze grammar]

tataśca tāṃ niśāṃ netuṃ vṛkṣamārohati sma saḥ |
kṣaṇāttatraiva cārohadṛkṣaḥ siṃhena bhīṣitaḥ || 81 ||
[Analyze grammar]

sa dṛṣṭvā rājaputraṃ taṃ bhītaṃ mānuṣabhāṣayā |
mā bhaiṣīrmama mittraṃ tvamityuktvā nirbhayaṃ vyadhāt || 82 ||
[Analyze grammar]

visrambhādṛkṣavākyena rājaputro 'tha suptavān |
ṛkṣastu jāgradevāsīdadhaḥ siṃho 'tha so 'bravīt || 83 ||
[Analyze grammar]

ṛkṣaṃ mānuṣametaṃ me kṣipa yāvadvrajāmyaham |
ṛkṣastato 'bravītpāpa na mitraṃ ghātayāmyaham || 84 ||
[Analyze grammar]

kramādṛkṣe prasupte ca rājaputre ca jāgrati |
punaḥ siṃho 'bravīdetamṛkṣaṃ me kṣipa mānuṣa || 85 ||
[Analyze grammar]

tacchrutvātmabhayāttena siṃhasyārādhanāya saḥ |
kṣipto 'pi nāpataccitramṛkṣo daivaprabodhitaḥ || 86 ||
[Analyze grammar]

mittradrohin bhavonmatta iti śāpam adāc ca saḥ |
tasya rājasutasyaitadvṛttāntāvagamāvadhim || 87 ||
[Analyze grammar]

prāpyaiva svagṛhaṃ prātarunmatto 'bhūnnṛpātmajaḥ |
yoganandaśca taddṛṣṭvā viṣādaṃ sahasāgamat || 88 ||
[Analyze grammar]

abravīcca sa kāle 'smiñ jīved vararucir yadi |
idaṃ jñāyeta tatsarvaṃ dhiṅ me tadvadhapāṭavam || 89 ||
[Analyze grammar]

tacchrutvā vacanaṃ rājñaḥ śakaṭālo vyacintayat |
hanta kātyāyanasyāyaṃ labdhaḥ kālaḥ prakāśane || 90 ||
[Analyze grammar]

na so 'tra mānī tiṣṭheca rājā mayi ca viśvaset |
ityālocya sa rājānamabravīdyācitābhayaḥ || 91 ||
[Analyze grammar]

rājannalaṃ viṣādena jīvanvararuciḥ sthitaḥ |
yoganandastato 'vādīddrutamānīyatāmiti || 92 ||
[Analyze grammar]

athāhaṃ śakaṭālena yoganandāntikaṃ haṭhāt |
ānītas taṃ tathābhūtaṃ rājaputraṃ vyalokayam || 93 ||
[Analyze grammar]

mittradrohaḥ kṛto 'nena devetyuktvā tathaiva saḥ |
sarasvatīprasādena vṛttāntaḥ kathito mayā || 94 ||
[Analyze grammar]

tatastacchāpamuktena stuto 'haṃ rājasūnunā |
tvayā kathamidaṃ jñātamityapṛcchatsa bhūpatiḥ || 95 ||
[Analyze grammar]

athāham avadaṃ rājaṃl lakṣaṇair anumānataḥ |
pratibhātaśca paśyanti sarvaṃ prajñāvatāṃ dhiyaḥ || 96 ||
[Analyze grammar]

tadyathā tilako jñātastathā sarvamidaṃ mayā |
iti madvacanātso 'bhūdrājā lajjānutāpavān || 97 ||
[Analyze grammar]

athānādṛtasatkāraḥ pariśuddhyaiva lābhavān |
svagṛhaṃ gatavānasmi śīlaṃ hi viduṣāṃ dhanam || 98 ||
[Analyze grammar]

prāptasyaiva ca tatratyo jano 'rodītpuro mama |
abhyetya māṃ samudbhrāntamupavarṣo 'bravīttataḥ || 99 ||
[Analyze grammar]

rājā hataṃ niśamya tvāmupakośāgnisādvapuḥ |
akarodatha mātuste śucā hṛdayamasphuṭat || 100 ||
[Analyze grammar]

tac chrutvābhinavodbhūtaśokāvegavicetanaḥ |
sadyo 'ham apataṃ bhūmau vātarugṇa iva drumaḥ || 101 ||
[Analyze grammar]

kṣaṇācca gatavānasmi pralāpānāṃ rasajñatām |
priyabandhuvināśotthaḥ śokāgniḥ kaṃ na tāpayet || 102 ||
[Analyze grammar]

ā saṃsāraṃ jagatyasminnekā nityā hyanityatā |
tadetāmaiśvarīṃ māyāṃ kiṃ jānannapi muhyasi || 103 ||
[Analyze grammar]

ityādibhir upāgatya varṣeṇa vacanair aham |
bodhito 'tha yathātattvaṃ kathaṃciddhṛtimāptavān || 104 ||
[Analyze grammar]

tato viraktahṛdayastyaktvā sarvaṃ nibandhanam |
praśamaikasahāyo 'haṃ tapovanamaśiśriyam || 105 ||
[Analyze grammar]

divaseṣvatha gacchatsu tattapovanamekadā |
ayodhyāta upāgacchadvipra eko mayi sthite || 106 ||
[Analyze grammar]

sa mayā yoganandasya rājyavārtām apṛcchyata |
pratyabhijñāya māṃ so 'tha saśokamidamabravīt || 107 ||
[Analyze grammar]

śṛṇu nandasya yadvṛttaṃ tatsakāśādgate tvayi |
labdhvāvakāśas tatrābhūc chakaṭālaś cireṇa saḥ || 108 ||
[Analyze grammar]

sa cintayanvadhopāyaṃ yoganandasya yuktitaḥ |
kṣitiṃ khanantamadrākṣīccāṇakyākhyaṃ dvijaṃ pathi || 109 ||
[Analyze grammar]

kiṃ bhuvaṃ khanasītyukte tena vipro 'tha so 'bravīt |
darbhamunmūlayāmyatra pādo hyetena me kṣataḥ || 110 ||
[Analyze grammar]

tacchrutvā sahasā mantrī kopanaṃ krūraniścayam |
taṃ vipraṃ yoganandasya vadhopāyamamanyata || 111 ||
[Analyze grammar]

nāma pṛṣṭvābravīttaṃ ca he brahmandāpayāmi te |
ahaṃ trayodaśīśrāddhaṃ gṛhe nandasya bhūpateḥ || 112 ||
[Analyze grammar]

dakṣiṇātaḥ suvarṇasya lakṣaṃ tava bhaviṣyati |
bhokṣyase dhuri cānyeṣāmehi tāvadgṛhaṃ mama || 113 ||
[Analyze grammar]

ityuktvā śakaṭālastaṃ cāṇakyamanayadgṛham |
śrāddhāhe 'darśayattaṃ ca rājñe sa śraddadhe ca tam || 114 ||
[Analyze grammar]

tataḥ sa gatvā cāṇakyo dhuri śrāddha upāviśat |
subandhunāmā vipraśca tāmaicchaddhuramātmanaḥ || 115 ||
[Analyze grammar]

tadgatvā śakaṭālena vijñapto nandabhūpatiḥ |
avādīnnāparo yogyaḥ subandhurdhuri tiṣṭhatu || 116 ||
[Analyze grammar]

āgatyaitāṃ ca rājājñāṃ śakaṭālo bhayānataḥ |
na me 'parādha ityuktvā cāṇakyāya nyavedayat || 117 ||
[Analyze grammar]

so 'tha kopena cāṇakyo jvalanniva samantataḥ |
nijāṃ muktvā śikhāṃ tatra pratijñāmakarodimām || 118 ||
[Analyze grammar]

avaśyaṃ hanta nando 'yaṃ saptabhirdivasairmayā |
vināśyo bandhanīyā ca tato nirbhanyunā śikhā || 119 ||
[Analyze grammar]

ityuktavantaṃ kupite yoganande palāyitam |
alakṣitaṃ svagehe taṃ śakaṭālo nyaveśayat || 120 ||
[Analyze grammar]

tatropakaraṇe datte guptaṃ tenaiva mantriṇā |
sa cāṇakyo dvijaḥ kvāpi gatvā kṛtyāmasādhayat || 121 ||
[Analyze grammar]

tadvaśādyoganando 'tha dāhajvaramavāpya saḥ |
saptame divase prāpte pañcatvaṃ samupāgamat || 122 ||
[Analyze grammar]

hatvā hiraṇyaguptaṃ ca śakaṭālena tatsutam |
pūrvanandasute lakṣmīścandragupte niveśitā || 123 ||
[Analyze grammar]

mantritve tasya cābhyarthya bṛhaspatisamaṃ dhiyā |
cāṇakyaṃ sthāpayitvā taṃ sa mantrī kṛtakṛtyatām || 124 ||
[Analyze grammar]

manvāno yoganandasya kṛtavairapratikriyaḥ |
putraśokena nirviṇṇaḥ praviveśa mahadvanam || 125 ||
[Analyze grammar]

iti tasya mukhācchrutvā viprasya sutarāmaham |
kāṇabhūte gataḥ khedaṃ sarvamālokya cañcalam || 126 ||
[Analyze grammar]

khedāc cāham imāṃ draṣṭum āgato vindhyavāsinīm |
tatprasādena dṛṣṭvā tvāṃ smṛtā jātirmayā sakhe || 127 ||
[Analyze grammar]

prāptaṃ divyaṃ ca vijñānaṃ mayoktā te mahākathā |
idānīṃ kṣīṇaśāpo 'haṃ yatiṣye dehamujjhitum || 128 ||
[Analyze grammar]

tvaṃ ca saṃprati tiṣṭheha yāvadāyāti te 'ntikam |
śiṣyayukto guṇāḍhyākhyastyaktabhāṣātrayo dvijaḥ || 129 ||
[Analyze grammar]

so 'pi hyahamiva krodhāddevyā śapto gaṇottamaḥ |
mālyavānnāma matpakṣapātī martyatvamāgataḥ || 130 ||
[Analyze grammar]

tasmai maheśvaroktaiṣā kathanīyā mahākathā |
tataste śāpanirmuktistasya cāpi bhaviṣyati || 131 ||
[Analyze grammar]

evaṃ vararucistatra kāṇabhūternivedya saḥ |
pratasthe dehamokṣāya puṇyaṃ badarikāśramam || 132 ||
[Analyze grammar]

gacchandadarśa gaṅgāyāṃ so 'tha śākāśinaṃ munim |
tatsamakṣaṃ ca tasyarṣeḥ kuśenābhūtkarakṣatiḥ || 133 ||
[Analyze grammar]

tato 'sya rudhiraṃ niryattena śākarasīkṛtam |
ahaṃkāraparīkṣārthaṃ kautukātsvaprabhāvataḥ || 134 ||
[Analyze grammar]

taddṛṣṭvā hanta siddho 'smītyagāddarpamasau muniḥ |
tato vararuciḥ kiṃcidvihasyeva jagāda tam || 135 ||
[Analyze grammar]

jijñāsanāya raktaṃ te mayā śākarasīkṛtam |
yāvannādyāpyahaṃkāraḥ parityaktastvayā mune || 136 ||
[Analyze grammar]

jñānamārge hyahaṃkāraḥ parigho duratikramaḥ |
jñānaṃ vinā ca nāstyeva mokṣo vrataśatairapi || 137 ||
[Analyze grammar]

svargastu na mumukṣūṇāṃ kṣayī cittaṃ vilobhayet |
tasmādahaṃkṛtityāgājjñāne yatnaṃ mune kuru || 138 ||
[Analyze grammar]

vinīyaivaṃ muniṃ tena praṇatena kṛtastutiḥ |
taṃ badaryāśramoddeśaṃ śāntaṃ vararuciryayau || 139 ||
[Analyze grammar]

atha sa nibiḍabhaktyā tatra devīṃ śaraṇyāṃ śaraṇamupagato 'sau martyabhāvaṃ mumukṣuḥ |
prakaṭitanijamūrtiḥ sāpi tasmai śaśaṃsa svayamanalasamutthāṃ dhāraṇāṃ dehamuktyai || 140 ||
[Analyze grammar]

dagdhvā śarīramatha dhāraṇayā tayā taddivyāṃ gatiṃ vararuciḥ sa nijāṃ prapede |
vindhyāṭavībhuvi tataḥ sa ca kāṇabhūtir āsīdabhīpsitaguṇāḍhyasamāgamotkaḥ || 141 ||
[Analyze grammar]