Chapter 10

jīva uvāca |
viṣṇuśarmā purā kaścidviprobhūdvedapāragaḥ |
sarvadevamayaṃ viṣṇuṃ pūjayitvā prasannadhīḥ || 1 ||
[Analyze grammar]

anyaissuraiśca saṃpūjyo babhūva haripūjanāt |
bhikṣāvṛttiparo nityaṃ patnīmānputravarjitaḥ || 2 ||
[Analyze grammar]

kadācittasya gehe vai vratī kaścitsamāgataḥ |
dvijapatnīṃ tadaikākīṃ bhaktinamrāṃ daridriṇīm |
dṛṣṭvovāca mahābhāgaḥ sa sparśāḍhyo dayāparaḥ || 3 ||
[Analyze grammar]

anena sparśamaṇinā lohadhātuśca kāṃcanam |
bhavettasmānmahāsādhvi tridināṃtaṃ gṛhāṇa tam || 4 ||
[Analyze grammar]

snātvā tāvatsarayvāṃ cāyāsyāmi teṃtikaṃ mudā |
ityuktvā sa yayau vipro brāhmaṇī bahu kāṃcanam |
kṛtvā lakṣmīṃ samāpyāsīdviṣṇuśarmā tadāgamat || 5 ||
[Analyze grammar]

bahusvarṇayutāṃ patnīṃ dṛṣṭvovāca haripriyaḥ |
gaccha nāri madāghūrṇe yatra vai rasiko janaḥ || 6 ||
[Analyze grammar]

ahaṃ viṣṇuparo dīnaścaurabhītaḥ sadaiva hi |
madhumattāṃ kathaṃ tvāṃ vai gṛhītuṃ bhuvi ca kṣamaḥ || 7 ||
[Analyze grammar]

iti śrutvā vaco ghoraṃ patibhītā pativratā |
sasvarṇaṃ sparśakaṃ tasmai dattvā sevāparābhavat || 8 ||
[Analyze grammar]

dvijo'pi ghargharāmadhye taddravyaṃ balato'kṣipat |
tridinānte ca sa yatistatrāgatya mudānvitaḥ |
uvāca brāhmaṇīṃ dīnāṃ svarṇaṃ kiṃ na kṛtaṃ tvayā || 9 ||
[Analyze grammar]

sāha bho matpatiśśuddho gṛhītvā sparśakaṃ ruṣā |
gharghare ca nicikṣepa tatohaṃ vahnipākinī |
nirloho vartate viprastataḥ prabhṛti he guro || 10 ||
[Analyze grammar]

iti śrutvā tu vacanaṃ sa yatirvismayānvitaḥ |
sthitvā dinānte taṃ vipramuvāca bahu bhartsayan || 11 ||
[Analyze grammar]

daridro bhikṣukaścāsti bhavāndaivena mohitaḥ |
dehi me sparśakaṃ śīghraṃ no cetprāṇāṃstyajāmyaham || 12 ||
[Analyze grammar]

ityuktavaṃtaṃ yatinaṃ viṣṇu śarmā tadābravīt |
gaccha tvaṃ ghargharākūle tatra vai sparśakastava || 13 ||
[Analyze grammar]

ityuktvā yatinā sārddhaṃ gṛhītvā kaṃṭakānbahūn |
yatine darśayāmāsa sparśakāniva kaṃṭakān || 14 ||
[Analyze grammar]

tadā tu sa yatī vipraṃ natvā provāca namradhīḥ |
mayā vai dvādaśābdāṃtaṃ samyagārādhitaḥ śivaḥ |
tataḥ prāptaṃ śubhaṃ ratnaṃ tattu taddarśanena vai || 15 ||
[Analyze grammar]

sparśako bahudhā prāpto mayā lobhātmanā dvija |
ityābhāṣya śubhaṃ jñānaṃ prāpto mokṣamavāptavān || 16 ||
[Analyze grammar]

viṣṇuśarmā sahasrābdamuṣitvā jagatītale |
sūryamārādhya vidhivadviṣṇormokṣamavāptavān || 17 ||
[Analyze grammar]

sa dvijo vaiṣṇavaṃ tejo dhṛtvā vai māsi phālgune |
trailokyamatapatsvāmī devakāryaparāyaṇaḥ || 18 ||
[Analyze grammar]

sūta uvāca |
ityuktvā bhagavāñjīvaḥ punaḥ prāha śacīpatim |
phālgune māsi taṃ sūryaṃ samārādhya sukhī bhava || 19 ||
[Analyze grammar]

ityukto guruṇā devo dhyātvā sarvamayaṃ harim |
pūjanairbahudhākārairdevadevamapūjayat || 20 ||
[Analyze grammar]

tadā prasanno bhagavānsamabhūtsūryamaṇḍalāt |
caturbhujo hi raktāṃgo yathā yakṣastathaiva saḥ |
paśyatāṃ sarvadevānāṃ śakradehamupāgamat || 21 ||
[Analyze grammar]

tattejasā tadā śakraḥ svāntarlīya svakaṃ vapuḥ || |
ayonissa dvijo bhūtvā śacī devī tathaiva sā || 22 ||
[Analyze grammar]

tadā tau mithunībhūtau vaiṣṇavāgniprapīḍitau |
remāte varṣaparyantaṃ gaṃgākūle mahāvane || 23 ||
[Analyze grammar]

adhādgarbhaṃ tadā devī śacī tu dvijarūpiṇī |
bhādraśukle gurau vāre dvādaśyāṃ brāhmamaṇḍale || 24 ||
[Analyze grammar]

prādurāsītsvayaṃ viṣṇurdhṛtvā sarva kalāṃ hariḥ |
caturbhujaśca raktāṅgo ravikuṃbhasamaprabhaḥ || 25 ||
[Analyze grammar]

tadā rudrāśca vasavo viśvedevā marudgaṇāḥ |
sādhyāśca bhāskarāḥ siddhāstuṣṭuvustaṃ sanātanam || 26 ||
[Analyze grammar]

devā ūcuḥ |
kuliśadhvajapadmagadāṃkuśābhaṃ caraṇaṃ tava nātha mahābharaṇam |
ramaṇaṃ munibhirvidhiśaṃbhuyutaṃ praṇamāma vayaṃ bhavabhītiharam || 27 ||
[Analyze grammar]

daracakragadāmbujamānadharaḥ suraśatrukaṭhoraśarīraharaḥ |
sacarācaralokabharaścapalaḥ khalanāśakarassurakārya karaḥ || 28 ||
[Analyze grammar]

namaste śacīnaṃdanānandakārinmahāpāpasantāpadurlāpahārin |
surārīnnihatyāśu lokādhidhārinsvabhaktyāghajātāṅgakoṭi prahārin || 29 ||
[Analyze grammar]

tvayā haṃsarūpeṇa satyaṃ prapālyaṃ tvayā yajñarūpeṇa vedaḥ prarakṣya |
sa vai yajñarūpo bhavāṃllokadhārī śacīnandanaḥ śakraśarmaprasaktaḥ || 30 ||
[Analyze grammar]

anarpitacarocirātkaruṇayāvatīrṇaḥ kalau samarpayitumunnatojvalarasāṃ svabhaktiśriyam |
hareḥ punarasundaradyutikadaṃbasandīpitaḥ sadā sphuratu no hṛdayakandare śacīnaṃdanaḥ || 31 ||
[Analyze grammar]

visarjati narānbhavānkaruṇayā prapālya kṣitau nivedayitumudbhavaḥ parātparaṃ svakīyaṃ padam |
kalau ditijasaṃbhavādhivyathābdhisuramagnagānsamuddhara mahāprabho kṛṣṇacaitanya śacīsuta || 32 ||
[Analyze grammar]

mādhuryyairmadhubhissugaṃdhavadanaḥ svarṇāṃbujānāṃ vanaṃ kāruṇyā mṛtanirjharairupacitaḥ satpremahemācalaḥ |
bhaktāṃbhodharadhāriṇī vijayinī niṣkaṃpasaptāvalī devo naḥ kuladevataṃ vijayate caitanyakṛṣṇo hariḥ || 33 ||
[Analyze grammar]

devārātijanairadharmajanitaissapīḍiteyaṃ mahī saṃkucyāśu kalau kalevaramidaṃ bījāya hā vartate |
tvannāmnaiva surārayo vidalitāḥ pātālagāḥ pīḍitā mlecchā dharmaparāḥ sureśanamanāstasmai namo vyāpine || 34 ||
[Analyze grammar]

sūta uvāca |
ityabhiṣṭūya puruṣaṃ yajñeśaṃ ca śacīpatim |
bṛhaspatimupāgamya devā vacanamabruvan || 35 ||
[Analyze grammar]

vayaṃ rudrā mahābhāga ime ca vasavo'śvinau |
kena kenāṃśakenaiva janiṣyāmo mahītale |
tatsarvaṃ kṛpayā deva vaktu marhati no bhavān || 36 ||
[Analyze grammar]

bṛhaspatiruvāca |
ahaṃ vaḥ kathayiṣyāmi śṛṇudhvaṃ surasattamāḥ |
purā pūrvabhave cāsīnmṛgavyādho dvijādhamaḥ |
dhanurbāṇadharo nityaṃ mārge vipravihiṃsakaḥ || 37 ||
[Analyze grammar]

hatvā dvijānmahāmūḍhasteṣāṃ yajñopavītakam |
gṛhītvā helayā duṣṭo mahākrośastu tatkṛtaḥ || 38 ||
[Analyze grammar]

brāhmaṇasya ca yaddravyaṃ sudhopamamanuttamam |
madhuraṃ kṣatriyasyaiva vaiśyasyānnasamaṃ smṛtam || 39 ||
[Analyze grammar]

śūdrasya vastu rudhiramiti jñātvā dvijā dhamaḥ |
sa jaghāna trivarṇāṃśca brāhmaṇānbahulānkhalaḥ || 40 ||
[Analyze grammar]

dvijanāśātsurāssarve bhayabhītāssamaṃtataḥ |
parameṣṭhinamāgamya kathāṃścakuśca kāraṇam || 41 ||
[Analyze grammar]

śrutvā ca duḥkhito brahmā saptarṣīnprāha lokagān |
uddeśaṃ kuru tatraiva gatvā tasya dvijottama || 42 ||
[Analyze grammar]

iti śrutvā marīcistu vaśiṣṭhādibhiranvitaḥ |
tatra gatvā sthitāssarve mṛgavyādhasya vai vane || 43 ||
[Analyze grammar]

mṛgavyādhastu tāndṛṣṭvā dhanurbāṇadharo balī |
uvāca vacanaṃ ghoraṃ haniṣyehaṃ ca vodya vai || 44 ||
[Analyze grammar]

marīcādyā vihasyāhuḥ kimarthaṃ haṃtumudyataḥ |
kulārthaṃ vātmano'rthaṃ vā śīghraṃ vada mahābala || 45 ||
[Analyze grammar]

ityuktastāndvijaḥ prāha kulārthaṃ cātmano hite |
hanmi yuṣmāndhanairyuktānbrāhmaṇāṃśca viśeṣataḥ || 46 ||
[Analyze grammar]

śrutvā tamāhuste viprā gaccha śīghraṃ dhanurdhara |
viprahatyākṛtaṃ pāpaṃ bhuñjīyātko vicāraya || 47 ||
[Analyze grammar]

iti śrutvā tu ghorātmā teṣāṃ dṛṣṭyā sunirmalaḥ |
gatvā vaṃśajanānāha bhūri pāpaṃ mayārjitam || 48 ||
[Analyze grammar]

tatpāpakaṃ bhavadbhiśca grahaṇīyaṃ dhanaṃ yathā |
te tu śrutvā dvijaṃ prāhurna vayaṃ pāpabhoginaḥ || 49 ||
[Analyze grammar]

sākṣīyaṃ bhūmiracalā sākṣī sūryo'yamuttamaḥ |
iti śrutvā mṛgavyādho munīnāha kṛtāṃjaliḥ || 50 ||
[Analyze grammar]

yathā pāpaṃ kṣayaṃ yāti tathā mājñātumarhatha |
ityuktāstena te prāhuḥ śṛṇu tvaṃ maṃtramuttamam || 51 ||
[Analyze grammar]

rāma nāma hi tajjñeyaṃ sarvāghaughavināśanam |
yāvattvatpārśvamāyāmastāvattvaṃ japa cottamam || 52 ||
[Analyze grammar]

ityuktvā te gatā viprāstīrthāttīrthāntaraṃ prati |
marāmarāmaretyevaṃ sahasrābdaṃ jajāpa ha || 53 ||
[Analyze grammar]

japaprabhāvādabhavadvanamutpalasaṃkulam |
tatsthānamutpalāraṇyaṃ prasiddhamabhavadbhuvi || 54 ||
[Analyze grammar]

tataḥ saptarṣayaḥ prāptā valmīkāttaṃ nirākṛtam |
dṛṣṭvā śuddhaṃ tadā vipramūcuste vismayānvitāḥ || 55 ||
[Analyze grammar]

valmīkānnissṛto yasmāttasmādvālmīkiruttamam |
tava nāma bhavedvipra trikālajña mahāmate || 56 ||
[Analyze grammar]

evamuktvā yayurlokaṃ sa tu rāmāyaṇaṃ muniḥ |
kalpāṣṭādaśayuktaṃ hi śatakoṭipravistaram || 57 ||
[Analyze grammar]

cakāra nirmalaṃ padyaiḥ sarvāghaughavināśanam |
tatpaścātsa śivo bhūtvā tatra vāsamakārayat || 58 ||
[Analyze grammar]

adyāpi saṃsthitaḥ svāmī mṛgavyādhaḥ sanātanaḥ |
śṛṇudhvaṃ ca surāḥ sarve taccaritraṃ harapriyam || 59 ||
[Analyze grammar]

vaivasvate'ntare prāpte cādye satyayuge śubhe |
brahmāgatyotpalāraṇyaṃ tatra yajñaṃ cakāra ha || 60 ||
[Analyze grammar]

tadā sarasvatī devī nadī bhūtvā samāgatā |
taddarśanātsvayaṃ brahmā mukhato brāhmaṇaṃ śubham || 61 ||
[Analyze grammar]

bāhubhyāṃ kṣatriyaṃ caiva corubhyāṃ vaiśyamuttamam |
padbhyāṃ śūdraṃ śubhācāraṃ janayāmāsa vīryavān || 62 ||
[Analyze grammar]

dvijarājastathā somaścaṃdramā nāmato dvijaḥ |
loke sarvātapaḥ sūryaḥ kaśyaṃ vīryaṃ hi pāti yaḥ || 63 ||
[Analyze grammar]

kaśyapo hi dvitīyo'sau marīcistu tato'bhavat |
ratnānāmākaro yo vai sa hi ratnākaraḥ smṛtaḥ || 64 ||
[Analyze grammar]

lokāndharati yo dravyaiḥ sa tu dharmo hi nāmataḥ |
gaṃbhīraścāsti sadṛśaḥ kośo yasya saritpatiḥ || 65 ||
[Analyze grammar]

lokāndakṣati yaḥ kṛtyaiḥ sa tu dakṣaḥ prajāpatiḥ |
brahmaṇoṃgācca te jātāstasmādvai brāhmaṇāḥ smṛtāḥ || 66 ||
[Analyze grammar]

varṇadharmeṇa te sarve varṇātmānaśca vai kramāt |
dakṣasya manaso jātāḥ kanyāḥ paṃcaśataṃ tataḥ |
viṣṇu māyāprabhāvena kalābhūtāḥ sthitā bhuvi || 67 ||
[Analyze grammar]

tadā tu bhagavānbrahmā somāyāśvinimaṇḍalam |
saptaviṃśadgaṇaṃ śreṣṭhaṃ dadau lokavivṛddhaye || 68 ||
[Analyze grammar]

kaśyapāyāditigaṇaṃ kṣatrarūpaṃ trayodaśam |
dharmāya kīrtiprabhṛtīrdadau sa ca mahāmuniḥ || 69 ||
[Analyze grammar]

nānāvidhāni sṛṣṭāni cāsanvaivasvate'ntare |
teṣāṃ patistvayaṃ dakṣo'bhūdvidherājñayā bhuvi || 70 ||
[Analyze grammar]

tatra vāsaṃ svayaṃ dakṣaḥ kṛtavānyajñatatparaḥ |
sarve devagaṇā dakṣaṃ namaskṛtya caraṃti hi || 71 ||
[Analyze grammar]

bhūtanātho mahādevo na nanāma kadācana |
tadā kruddhaḥ svayaṃ dakṣaḥ śivabhāgaṃ na dattavān || 72 ||
[Analyze grammar]

mṛgavyādhaḥ śivaḥ kruddho vīrabhadro babhūva ha |
triśirāśca trinetraśca tripadastatra cāgataḥ || 73 ||
[Analyze grammar]

tenaiva pīḍitā devā munayaḥ pitaro'bhavan |
tadā vai yajñapuruṣo bhayabhītaḥ samaṃtataḥ || 74 ||
[Analyze grammar]

mṛgabhūto yayau tūrṇaṃ dṛṣṭvā vyādhaḥ śivobhavat |
rudravyādhena sa mṛgo vibhinnāṅgo babhūva ha || 75 ||
[Analyze grammar]

tadā tu bhagavānbrahmā tuṣṭāva madhurasvaraiḥ |
saṃtuṣṭaśca mṛgavyādho yajñaṃ pūrṇamakārayat || 76 ||
[Analyze grammar]

tulārāśisthite bhānau taṃ rudraṃ candramaṇḍale |
sthāpayitvā svayaṃ brahmā saptaviṃśaddinātmake |
prayayau saptalokaṃ vai sa rudraścaṃdrarūpavān || 77 ||
[Analyze grammar]

iti śrutvā vīrabhadro rudraḥ saṃhṛṣṭamānasaḥ |
svāṃśaṃ dehātsamutpādya dvijagehamacodayat || 78 ||
[Analyze grammar]

vipra bhairavadattasya gehaṃ gatvā sa vai śivaḥ |
tatputro'bhūtkalau ghore śaṃkaro nāma viśrutaḥ || 79 ||
[Analyze grammar]

sa bālaśca guṇī vettā brahmacārī babhūva ha |
kṛtvā śaṃkarabhāṣyaṃ ca śaivamārgamadarśayat || 80 ||
[Analyze grammar]

tripuṇḍraścākṣamālā ca maṃtraḥ paṃcākṣaraḥ śubhaḥ |
śaivānāṃ maṃgalakaraḥ śaṃkarācāryanirmitaḥ || 81 ||
[Analyze grammar]