Chapter 2

[English text for this chapter is available]

śrīśuka uvāca – |
tataścānudinaṃ dharmaḥ satyaṃ śaucaṃ kṣamā dayā |
kālena balinā rājan naṅkṣyatyāyurbalaṃ smṛtiḥ || 1 ||
[Analyze grammar]

vittameva kalau nṝṇāṃ janmācāraguṇodayaḥ |
dharmanyāya vyavasthāyāṃ kāraṇaṃ balameva hi || 2 ||
[Analyze grammar]

dāmpatye'bhirucirhetuḥ māyaiva vyāvahārike |
strītve puṃstve ca hi ratiḥ vipratve sūtrameva hi || 3 ||
[Analyze grammar]

liṅgaṃ evāśramakhyātau anyonyāpatti kāraṇam |
avṛttyā nyāyadaurbalyaṃ pāṇḍitye cāpalaṃ vacaḥ || 4 ||
[Analyze grammar]

anāḍhyataiva asādhutve sādhutve daṃbha eva tu |
svīkāra eva codvāhe snānameva prasādhanam || 5 ||
[Analyze grammar]

dūre vāryayanaṃ tīrthaṃ lāvaṇyaṃ keśadhāraṇam |
udaraṃbharatā svārthaḥ satyatve dhārṣṭyameva hi || 6 ||
[Analyze grammar]

dākṣyaṃ kuṭuṃbabharaṇaṃ yaśo'rthe dharmasevanam |
evaṃ prajābhirduṣṭābhiḥ ākīrṇe kṣitimaṇḍale || 7 ||
[Analyze grammar]

brahmaviṭkṣatraśūdrāṇāṃ yo balī bhavitā nṛpaḥ |
prajā hi lubdhai rājanyaiḥ nirghṛṇaiḥ dasyudharmabhiḥ || 8 ||
[Analyze grammar]

ācchinnadāradraviṇā yāsyanti girikānanam |
śākamūlāmiṣakṣaudra phalapuṣpāṣṭibhojanāḥ || 9 ||
[Analyze grammar]

anāvṛṣṭyā vinaṅkṣyanti durbhikṣakarapīḍitāḥ |
śītavātātapaprāvṛḍ himairanyonyataḥ prajāḥ || 10 ||
[Analyze grammar]

kṣuttṛḍbhyāṃ vyādhibhiścaiva saṃtapsyante ca cintayā |
triṃśadviṃśati varṣāṇi paramāyuḥ kalau nṛṇām || 11 ||
[Analyze grammar]

kṣīyamāṇeṣu deheṣu dehināṃ kalidoṣataḥ |
varṇāśramavatāṃ dharme naṣṭe vedapathe nṛṇām || 12 ||
[Analyze grammar]

pāṣaṇḍapracure dharme dasyuprāyeṣu rājasu |
cauryānṛtavṛthāhiṃsā nānāvṛttiṣu vai nṛṣu || 13 ||
[Analyze grammar]

śūdraprāyeṣu varṇeṣu cchāgaprāyāsu dhenuṣu |
gṛhaprāyeṣvāśrameṣu yaunaprāyeṣu bandhuṣu || 14 ||
[Analyze grammar]

aṇuprāyāsvoṣadhīṣu śamīprāyeṣu sthāsnuṣu |
vidyutprāyeṣu megheṣu śūnyaprāyeṣu sadmasu || 15 ||
[Analyze grammar]

itthaṃ kalau gataprāye jane tu kharadharmiṇi |
dharmatrāṇāya sattvena bhagavān avatariṣyati || 16 ||
[Analyze grammar]

carācara gurorviṣṇoḥ īśvarasyākhilātmanaḥ |
dharmatrāṇāya sādhūnāṃ janma karmāpanuttaye || 17 ||
[Analyze grammar]

saṃbhalagrāma mukhyasya brāhmaṇasya mahātmanaḥ |
bhavane viṣṇuyaśasaḥ kalkiḥ prādurbhaviṣyati || 18 ||
[Analyze grammar]

aśvaṃ āśugamāruhya devadattaṃ jagatpatiḥ |
asināsādhudamanaṃ aṣṭaiśvarya guṇānvitaḥ || 19 ||
[Analyze grammar]

vicaran āśunā kṣauṇyāṃ hayenāpratimadyutiḥ |
nṛpaliṅgacchado dasyūn koṭiśo nihaniṣyati || 20 ||
[Analyze grammar]

atha teṣāṃ bhaviṣyanti manāṃsi viśadāni vai |
vāsudevāṅgarāgāti puṇyagaṃdhānilaspṛśām |
paurajānapadānāṃ vai hateṣvakhiladasyuṣu || 21 ||
[Analyze grammar]

teṣāṃ prajāvisargaśca sthaviṣṭhaḥ saṃbhaviṣyati |
vāsudeve bhagavati sattvamūrtau hṛdi sthite || 22 ||
[Analyze grammar]

yadāvatīrṇo bhagavān kalkirdharmapatirhariḥ |
kṛtaṃ bhaviṣyati tadā prajāsūtiśca sāttvikī || 23 ||
[Analyze grammar]

yadā candraśca sūryaśca tathā tiṣyabṛhaspatī |
ekarāśau sameṣyanti bhaviṣyati tadā kṛtam || 24 ||
[Analyze grammar]

ye'tītā vartamānā ye bhaviṣyanti ca pārthivāḥ |
te te uddeśataḥ proktā vaṃśīyāḥ somasūryayoḥ || 25 ||
[Analyze grammar]

ārabhya bhavato janma yāvat nandābhiṣecanam |
etad varṣasahasraṃ tu śataṃ pañcadaśottaram || 26 ||
[Analyze grammar]

saptarṣīṇāṃ tu yau pūrvau dṛśyete uditau divi |
tayostu madhye nakṣatraṃ dṛśyate yatsamaṃ niśi || 27 ||
[Analyze grammar]

tenaiva ṛṣayo yuktāḥ tiṣṭhantyabdaśataṃ nṛṇām |
te tvadīye dvijāḥ kāle adhunā cāśritā maghāḥ || 28 ||
[Analyze grammar]

viṣṇorbhagavato bhānuḥ kṛṣṇākhyo'sau divaṃ gataḥ |
tadāviśat kalirlokaṃ pāpe yad ramate janaḥ || 29 ||
[Analyze grammar]

yāvat sa pādapadmābhyāṃ spṛśanāste ramāpatiḥ |
tāvat kalirvai pṛthivīṃ parākrāntuṃ na cāśakat || 30 ||
[Analyze grammar]

yadā devarṣayaḥ sapta maghāsu vicaranti hi |
tadā pravṛttastu kaliḥ dvādaśābda śatātmakaḥ || 31 ||
[Analyze grammar]

yadā maghābhyo yāsyanti pūrvāṣāḍhāṃ maharṣayaḥ |
tadā nandāt prabhṛtyeṣa kalirvṛddhiṃ gamiṣyati || 32 ||
[Analyze grammar]

yasmin kṛṣṇo divaṃ yātaḥ tasmin eva tadāhani |
pratipannaṃ kaliyugaṃ iti prāhuḥ purāvidaḥ || 33 ||
[Analyze grammar]

divyābdānāṃ sahasrānte caturthe tu punaḥ kṛtam |
bhaviṣyati tadā nṝṇāṃ mana ātmaprakāśakam || 34 ||
[Analyze grammar]

ityeṣa mānavo vaṃśo yathā saṅkhyāyate bhuvi |
tathā viṭśūdraviprāṇāṃ tāstā jñeyā yuge yuge || 35 ||
[Analyze grammar]

eteṣāṃ nāmaliṅgānāṃ puruṣāṇāṃ mahātmanām |
kathāmātrāvaśiṣṭānāṃ kīrtireva sthitā bhuvi || 36 ||
[Analyze grammar]

devāpiḥ śāntanorbhrātā maruścekṣvākuvaṃśajaḥ |
kalāpagrāma āsāte mahāyogabalānvitau || 37 ||
[Analyze grammar]

tāvihaitya kalerante vāsudevānuśikṣitau |
varṇāśramayutaṃ dharmaṃ pūrvavat prathayiṣyataḥ || 38 ||
[Analyze grammar]

kṛtaṃ tretā dvāparaṃ ca kaliśceti caturyugam |
anena kramayogena bhuvi prāṇiṣu vartate || 39 ||
[Analyze grammar]

rājan ete mayā proktā naradevāstathāpare |
bhūmau mamatvaṃ kṛtvānte hitvemāṃ nidhanaṃ gatāḥ || 40 ||
[Analyze grammar]

kṛmiviḍ bhasmasaṃjñānte rājanāmno'pi yasya ca |
bhūtadhruk tatkṛte svārthaṃ kiṃ veda nirayo yataḥ || 41 ||
[Analyze grammar]

kathaṃ seyamakhaṇḍā bhūḥ pūrvairme puruṣairdhṛtā |
matputrasya ca pautrasya matpūrvā vaṃśajasya vā || 42 ||
[Analyze grammar]

tejo'bannamayaṃ kāyaṃ gṛhītvā'tmatayābudhāḥ |
mahīṃ mamatayā cobhau hitvānte'darśanaṃ gatāḥ || 43 ||
[Analyze grammar]

ye ye bhūpatayo rājan bhuṃjate bhuvamojasā |
kālena te kṛtāḥ sarve kathāmātrāḥ kathāsu ca || 44 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ dvādaśaskandhe dvitīyo'dhyāyaḥ || 2 ||
[Analyze grammar]