Chapter 19

[English text for this chapter is available]

śrībhagavānuvāca |
yo vidyāśrutasampannaḥ ātmavānnānumānikaḥ |
māyāmātramidaṃ jñātvā jñānaṃ ca mayi sannyaset || 1 ||
[Analyze grammar]

jñāninastvahameveṣṭaḥ svārtho hetuśca sammataḥ |
svargaścaivāpavargaśca nānyo'rtho madṛte priyaḥ || 2 ||
[Analyze grammar]

jñānavijñānasaṃsiddhāḥ padaṃ śreṣṭhaṃ vidurmama |
jñānī priyatamo'to me jñānenāsau bibharti mām || 3 ||
[Analyze grammar]

tapastīrthaṃ japo dānaṃ pavitrāṇītarāṇi ca |
nālaṃ kurvanti tāṃ siddhiṃ yā jñānakalayā kṛtā || 4 ||
[Analyze grammar]

tasmājjñānena sahitaṃ jñātvā svātmānamuddhava |
jñānavijñānasampanno bhaja māṃ bhaktibhāvataḥ || 5 ||
[Analyze grammar]

jñānavijñānayajñena māmiṣṭvātmānamātmani |
sarvayajñapatiṃ māṃ vai saṃsiddhiṃ munayo'gaman || 6 ||
[Analyze grammar]

tvayyuddhavāśrayati yastrividho vikāro |
māyāntarāpatati nādyapavargayoryat |
janmādayo'sya yadamī tava tasya kiṃ syur |
ādyantayoryadasato'sti tadeva madhye || 7 ||
[Analyze grammar]

śrīuddhava uvāca |
jñānaṃ viśuddhaṃ vipulaṃ yathaitadvairāgyavijñānayutaṃ purāṇam |
ākhyāhi viśveśvara viśvamūrte tvadbhaktiyogaṃ ca mahadvimṛgyam || 8 ||
[Analyze grammar]

tāpatrayeṇābhihatasya ghore santapyamānasya bhavādhvanīśa |
paśyāmi nānyaccharaṇaṃ tavāṅghri dvandvātapatrādamṛtābhivarṣāt || 9 ||
[Analyze grammar]

daṣṭaṃ janaṃ sampatitaṃ bile'sminkālāhinā kṣudra sukhorutarṣam |
samuddharainaṃ kṛpayāpavargyairvacobhirāsiñca mahānubhāva || 10 ||
[Analyze grammar]

śrībhagavānuvāca |
itthametatpurā rājā bhīṣmaṃ dharmabhṛtāṃ varam |
ajātaśatruḥ papraccha sarveṣāṃ no'nuśṛṇvatām || 11 ||
[Analyze grammar]

nivṛtte bhārate yuddhe suhṛnnidhanavihvalaḥ |
śrutvā dharmānbahūnpaścānmokṣadharmānapṛcchata || 12 ||
[Analyze grammar]

tānahaṃ te'bhidhāsyāmi devavratamukhācchrutān |
jñānavairāgyavijñāna śraddhābhaktyupabṛṃhitān || 13 ||
[Analyze grammar]

navaikādaśa pañca trīnbhāvānbhūteṣu yena vai |
īkṣetāthaikamapyeṣu tajjñānaṃ mama niścitam || 14 ||
[Analyze grammar]

etadeva hi vijñānaṃ na tathaikena yena yat |
sthityutpattyapyayān paśyedbhāvānāṃ triguṇātmanām || 15 ||
[Analyze grammar]

ādāvante ca madhye ca sṛjyātsṛjyaṃ yadanviyāt |
punastatpratisaṅkrāme yacchiṣyeta tadeva sat || 16 ||
[Analyze grammar]

śrutiḥ pratyakṣamaitihyamanumānaṃ catuṣṭayam |
pramāṇeṣvanavasthānādvikalpātsa virajyate || 17 ||
[Analyze grammar]

karmaṇāṃ pariṇāmitvādāviriñcyādamaṅgalam |
vipaścinnaśvaraṃ paśyedadṛṣṭamapi dṛṣṭavat || 18 ||
[Analyze grammar]

bhaktiyogaḥ puraivoktaḥ prīyamāṇāya te'nagha |
punaśca kathayiṣyāmi madbhakteḥ kāraṇaṃ paraṃ || 19 ||
[Analyze grammar]

śraddhāmṛtakathāyāṃ me śaśvanmadanukīrtanam |
pariniṣṭhā ca pūjāyāṃ stutibhiḥ stavanaṃ mama || 20 ||
[Analyze grammar]

ādaraḥ paricaryāyāṃ sarvāṅgairabhivandanam |
madbhaktapūjābhyadhikā sarvabhūteṣu manmatiḥ || 21 ||
[Analyze grammar]

madartheṣvaṅgaceṣṭā ca vacasā madguṇeraṇam |
mayyarpaṇaṃ ca manasaḥ sarvakāmavivarjanam || 22 ||
[Analyze grammar]

madarthe'rthaparityāgo bhogasya ca sukhasya ca |
iṣṭaṃ dattaṃ hutaṃ japtaṃ madarthaṃ yadvrataṃ tapaḥ || 23 ||
[Analyze grammar]

evaṃ dharmairmanuṣyāṇāmuddhavātmanivedinām |
mayi sañjāyate bhaktiḥ ko'nyo'rtho'syāvaśiṣyate || 24 ||
[Analyze grammar]

yadātmanyarpitaṃ cittaṃ śāntaṃ sattvopabṛṃhitam |
dharmaṃ jñānaṃ sa vairāgyamaiśvaryaṃ cābhipadyate || 25 ||
[Analyze grammar]

yadarpitaṃ tadvikalpe indriyaiḥ paridhāvati |
rajasvalaṃ cāsanniṣṭhaṃ cittaṃ viddhi viparyayam || 26 ||
[Analyze grammar]

dharmo madbhaktikṛtprokto jñānaṃ caikātmyadarśanam |
guṇesvasaṅgo vairāgyamaiśvaryaṃ cāṇimādayaḥ || 27 ||
[Analyze grammar]

śrīuddhava uvāca |
yamaḥ katividhaḥ prokto niyamo vārikarṣaṇa |
kaḥ śamaḥ ko damaḥ kṛṣṇa kā titikṣā dhṛtiḥ prabho || 28 ||
[Analyze grammar]

kiṃ dānaṃ kiṃ tapaḥ śauryaṃ kiṃ satyamṛtamucyate |
kastyāgaḥ kiṃ dhanaṃ ceṣṭaṃ ko yajñaḥ kā ca dakṣiṇā || 29 ||
[Analyze grammar]

puṃsaḥ kiṃ svidbalaṃ śrīman bhago lābhaśca keśava |
kā vidyā hrīḥ parā kā śrīḥ kiṃ sukhaṃ duḥkhameva ca || 30 ||
[Analyze grammar]

kaḥ paṇḍitaḥ kaśca mūrkhaḥ kaḥ panthā utpathaśca kaḥ |
kaḥ svargo narakaḥ kaḥ svit ko bandhuruta kiṃ gṛham || 31 ||
[Analyze grammar]

āḍhyaḥ ko daridro vā kṛpaṇaḥ kaḥ ka īśvaraḥ |
etānpraśnānmama brūhi viparītāṃśca satpate || 32 ||
[Analyze grammar]

śrībhagavānuvāca |
ahiṃsā satyamasteyamasaṅgo hrīrasañcayaḥ |
āstikyaṃ brahmacaryaṃ ca maunaṃ sthairyaṃ kṣamābhayam || 33 ||
[Analyze grammar]

śaucaṃ japastapo homaḥ śraddhātithyaṃ madarcanam |
tīrthāṭanaṃ parārthehā tuṣṭirācāryasevanam || 34 ||
[Analyze grammar]

ete yamāḥ saniyamā ubhayordvādaśa smṛtāḥ |
puṃsāmupāsitāstāta yathākāmaṃ duhanti hi || 35 ||
[Analyze grammar]

śamo manniṣṭhatā buddherdama indriyasaṃyamaḥ |
titikṣā duḥkhasammarṣo jihvopasthajayo dhṛtiḥ || 36 ||
[Analyze grammar]

daṇḍanyāsaḥ paraṃ dānaṃ kāmatyāgastapaḥ smṛtam |
svabhāvavijayaḥ śauryaṃ satyaṃ ca samadarśanam || 37 ||
[Analyze grammar]

anyacca sunṛtā vāṇī kavibhiḥ parikīrtitā |
karmasvasaṅgamaḥ śaucaṃ tyāgaḥ sannyāsa ucyate || 38 ||
[Analyze grammar]

dharma iṣṭaṃ dhanaṃ nṝṇāṃ yajño'haṃ bhagavattamaḥ |
dakṣiṇā jñānasandeśaḥ prāṇāyāmaḥ paraṃ balam || 39 ||
[Analyze grammar]

bhago ma aiśvaro bhāvo lābho madbhaktiruttamaḥ |
vidyātmani bhidābādho jugupsā hrīrakarmasu || 40 ||
[Analyze grammar]

śrīrguṇā nairapekṣyādyāḥ sukhaṃ duḥkhasukhātyayaḥ |
duḥkhaṃ kāmasukhāpekṣā paṇḍito bandhamokṣavit || 41 ||
[Analyze grammar]

mūrkho dehādyahaṃbuddhiḥ panthā mannigamaḥ smṛtaḥ |
utpathaścittavikṣepaḥ svargaḥ sattvaguṇodayaḥ || 42 ||
[Analyze grammar]

narakastamaunnāho bandhurgururahaṃ sakhe |
gṛhaṃ śarīraṃ mānuṣyaṃ guṇāḍhyo hyāḍhya ucyate || 43 ||
[Analyze grammar]

daridro yastvasantuṣṭaḥ kṛpaṇo yo'jitendriyaḥ |
guṇeṣvasaktadhīrīśo guṇasaṅgo viparyayaḥ || 44 ||
[Analyze grammar]

eta uddhava te praśnāḥ sarve sādhu nirūpitāḥ |
kiṃ varṇitena bahunā lakṣaṇaṃ guṇadoṣayoḥ |
guṇadoṣadṛśirdoṣo guṇastūbhayavarjitaḥ || 45 ||
[Analyze grammar]