Chapter 73

[English text for this chapter is available]

jarāsandharuddhānāṃ rājñāṃ kārāgṛhān mocanam |
śrīśuka uvāca |
ayute dve śatānyaṣṭau niruddhā yudhi nirjitāḥ |
te nirgatā giridroṇyāṃ malinā malavāsasaḥ || 1 ||
[Analyze grammar]

kṣutkṣāmāḥ śuṣkavadanāḥ saṃrodhaparikarśitāḥ |
dadṛśuste ghanaśyāmaṃ pītakauśeyavāsasam || 2 ||
[Analyze grammar]

śrīvatsāṅkaṃ caturbāhuṃ padmagarbhāruṇekṣaṇam |
cāruprasannavadanaṃ sphuranmakarakuṇḍalam || 3 ||
[Analyze grammar]

padmahastaṃ gadāśaṅkha rathāṅgairupalakṣitam |
kirīṭahārakaṭaka kaṭisūtrāṅgadāñcitam || 4 ||
[Analyze grammar]

bhrājadvaramaṇigrīvaṃ nivītaṃ vanamālayā |
pibanta iva cakṣurbhyāṃ lihanta iva jihvayā || 5 ||
[Analyze grammar]

jighranta iva nāsābhyāṃ rambhanta iva bāhubhiḥ |
praṇemurhatapāpmāno mūrdhabhiḥ pādayorhareḥ || 6 ||
[Analyze grammar]

kṛṣṇasandarśanāhlāda dhvastasaṃrodhanaklamāḥ |
praśaśaṃsurhṛṣīkeśaṃ gīrbhiḥ prāñjalayo nṛpāḥ || 7 ||
[Analyze grammar]

rājāna ūcuḥ |
namaste devadeveśa prapannārtiharāvyaya |
prapannā pāhi naḥ kṛṣṇa nirviṇṇān ghorasaṃsṛteḥ || 8 ||
[Analyze grammar]

nainaṃ nāthānusūyāmo māgadhaṃ madhusūdana |
anugraho yad bhavato rājñāṃ rājyacyutirvibho || 9 ||
[Analyze grammar]

rājyaiśvaryamadonnaddho na śreyo vindate nṛpaḥ |
tvanmāyāmohito'nityā manyate sampado'calāḥ || 10 ||
[Analyze grammar]

mṛgatṛṣṇāṃ yathā bālā manyanta udakāśayam |
evaṃ vaikārikīṃ māyāṃ ayuktā vastu cakṣate || 11 ||
[Analyze grammar]

vayaṃ purā śrīmadanaṣṭadṛṣṭayo |
jigīṣayāsyā itaretaraspṛdhaḥ |
ghnantaḥ prajāḥ svā atinirghṛṇāḥ prabho |
mṛtyuṃ purastvāvigaṇayya durmadāḥ || 12 ||
[Analyze grammar]

ta eva kṛṣṇādya gabhīraraṃhasā |
durantavīryeṇa vicālitāḥ śriyaḥ |
kālena tanvā bhavato'nukampayā |
vinaṣṭadarpāścaraṇau smarāma te || 13 ||
[Analyze grammar]

atho na rājyammṛgatṛṣṇirūpitaṃ |
dehena śaśvat patatā rujāṃ bhuvā |
upāsitavyaṃ spṛhayāmahe vibho |
kriyāphalaṃ pretya ca karṇarocanam || 14 ||
[Analyze grammar]

taṃ naḥ samādiśopāyaṃ yena te caraṇābjayoḥ |
smṛtiryathā na viramed api saṃsaratāmiha || 15 ||
[Analyze grammar]

kṛṣṇāya vāsudevāya haraye paramātmane |
praṇatakleśanāśāya govindāya namo namaḥ || 16 ||
[Analyze grammar]

śrīśuka uvāca |
saṃstūyamāno bhagavān rājabhirmuktabandhanaiḥ |
tānāha karuṇastāta śaraṇyaḥ ślakṣṇayā girā || 17 ||
[Analyze grammar]

śrībhagavānuvāca |
adya prabhṛti vo bhūpā mayyātmanyakhileśvare |
sudṛḍhā jāyate bhaktiḥ bāḍhamāśaṃsitaṃ tathā || 18 ||
[Analyze grammar]

diṣṭyā vyavasitaṃ bhūpā bhavanta ṛtabhāṣiṇaḥ |
śrīyaiśvaryamadonnāhaṃ paśya unmādakaṃ nṛṇām || 19 ||
[Analyze grammar]

haihayo nahuṣo veno rāvaṇo narako'pare |
śrīmadād bhraṃśitāḥ sthānād devadaityanareśvarāḥ || 20 ||
[Analyze grammar]

bhavanta etad vijñāya dehādyutpādyamantavat |
māṃ yajanto'dhvarairyuktāḥ prajā dharmeṇa rakṣatha || 21 ||
[Analyze grammar]

saṃtanvantaḥ prajātantūn sukhaṃ duḥkhaṃ bhavābhavau |
prāptaṃ prāptaṃ ca sevanto maccittā vicariṣyatha || 22 ||
[Analyze grammar]

udāsīnāśca dehādau ātmārāmā dhṛtavratāḥ |
mayyāveśya manaḥ samyaṅ māṃ ante brahma yāsyatha || 23 ||
[Analyze grammar]

śrīśuka uvāca |
ityādiśya nṛpān kṛṣṇo bhagavān bhuvaneśvaraḥ |
teṣāṃ nyayuṅkta puruṣān striyo majjanakarmaṇi || 24 ||
[Analyze grammar]

saparyāṃ kārayāmāsa sahadevena bhārata |
naradevocitairvastraiḥ bhūṣaṇaiḥ sragvilepanaiḥ || 25 ||
[Analyze grammar]

bhojayitvā varānnena susnātān samalaṅkṛtān |
bhogaiśca vividhairyuktān tāṃbūlādyairnṛpocitaiḥ || 26 ||
[Analyze grammar]

te pūjitā mukundena rājāno mṛṣṭakuṇḍalāḥ |
virejurmocitāḥ kleśāt prāvṛḍante yathā grahāḥ || 27 ||
[Analyze grammar]

rathān sadaśvān āropya maṇikāñcanabhūṣitān |
prīṇayya sunṛtairvākyaiḥ svadeśān pratyayāpayat || 28 ||
[Analyze grammar]

ta evaṃ mocitāḥ kṛcchrāt kṛṣṇena sumahātmanā |
yayustameva dhyāyantaḥ kṛtāni ca jagatpateḥ || 29 ||
[Analyze grammar]

jagaduḥ prakṛtibhyaste mahāpuruṣaceṣṭitam |
yathānvaśāsad bhagavān tathā cakruratandritāḥ || 30 ||
[Analyze grammar]

jarāsandhaṃ ghātayitvā bhīmasenena keśavaḥ |
pārthābhyāṃ saṃyutaḥ prāyāt sahadevena pūjitaḥ || 31 ||
[Analyze grammar]

gatvā te khāṇḍavaprasthaṃ śaṅkhān dadhmurjitārayaḥ |
harṣayantaḥ svasuhṛdo durhṛdāṃ cāsukhāvahāḥ || 32 ||
[Analyze grammar]

tacchrutvā prītamanasa indraprasthanivāsinaḥ |
menire māgadhaṃ śāntaṃ rājā cāptamanorathaḥ || 33 ||
[Analyze grammar]

abhivandyātha rājānaṃ bhīmārjunajanārdanāḥ |
sarvamāśrāvayāṃ cakruḥ ātmanā yadanuṣṭhitam || 34 ||
[Analyze grammar]

niśamya dharmarājastat keśavenānukampitam |
ānandāśrukalāṃ muñcan premṇā novāca kiñcana || 35 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe uttarārdhe |
kṛṣṇādyāgamane nāma trisaptatitamo'dhyāyaḥ || 73 ||
[Analyze grammar]