Chapter 53

[English text for this chapter is available]

atha tripañcāśattamo'dhyāyaḥ 10. || 53 ||
[Analyze grammar]

śrīśuka uvāca |
vaidarbhyāḥ sa tu sandeśaṃ niśamya yadunandanaḥ |
pragṛhya pāṇinā pāṇiṃ prahasannidamabravīt || 1 ||
[Analyze grammar]

śrībhagavānuvāca |
tathāhamapi taccitto nidrāṃ ca na labhe niśi |
vedāhamrukmiṇā dveṣānmamodvāho nivāritaḥ || 2 ||
[Analyze grammar]

tāmānayiṣya unmathya rājanyāpasadānmṛdhe |
matparāmanavadyāṅgī medhaso'gniśikhāmiva || 3 ||
[Analyze grammar]

śrīśuka uvāca |
udvāharkṣaṃ ca vijñāya rukmiṇyā madhusūdanaḥ |
rathaḥ saṃyujyatāmāśu dāruketyāha sārathim || 4 ||
[Analyze grammar]

sa cāśvaiḥ śaibyasugrīva meghapuṣpabalāhakaiḥ |
yuktaṃ rathamupānīya tasthau prāñjaliragrataḥ || 5 ||
[Analyze grammar]

āruhya syandanaṃ śaurirdvijamāropya tūrṇagaiḥ |
ānartādekarātreṇa vidarbhānagamaddhayaiḥ || 6 ||
[Analyze grammar]

rājā sa kuṇḍinapatiḥ putrasnehavaśānugaḥ |
śiśupālāya svāṃ kanyāṃ dāsyankarmāṇyakārayat || 7 ||
[Analyze grammar]

puraṃ sammṛṣṭasaṃsikta mārgarathyācatuṣpatham |
citradhvajapatākābhistoraṇaiḥ samalaṅkṛtam || 8 ||
[Analyze grammar]

sraggandhamālyābharaṇairvirajo'mbarabhūṣitaiḥ |
juṣṭaṃ strīpuruṣaiḥ śrīmad gṛhairagurudhūpitaiḥ || 9 ||
[Analyze grammar]

pitṝndevānsamabhyarcya viprāṃśca vidhivannṛpa |
bhojayitvā yathānyāyaṃ vācayāmāsa maṅgalam || 10 ||
[Analyze grammar]

susnātāṃ sudatīṃ kanyāṃ kṛtakautukamaṅgalām |
āhatāṃśukayugmena bhūṣitāṃ bhūṣaṇottamaiḥ || 11 ||
[Analyze grammar]

cakruḥ sāmargyajurmantrairvadhvā rakṣāṃ dvijottamāḥ |
purohito'tharvavidvai juhāva grahaśāntaye || 12 ||
[Analyze grammar]

hiraṇyarūpya vāsāṃsi tilāṃśca guḍamiśritān |
prādāddhenūśca viprebhyo rājā vidhividāṃ varaḥ || 13 ||
[Analyze grammar]

evaṃ cedipatī rājā damaghoṣaḥ sutāya vai |
kārayāmāsa mantrajñaiḥ sarvamabhyudayocitam || 14 ||
[Analyze grammar]

madacyudbhirgajānīkaiḥ syandanairhemamālibhiḥ |
pattyaśvasaṅkulaiḥ sainyaiḥ parītaḥ kuṇḍinaṃ yayau || 15 ||
[Analyze grammar]

taṃ vai vidarbhādhipatiḥ samabhyetyābhipūjya ca |
niveśayāmāsa mudā kalpitānyaniveśane || 16 ||
[Analyze grammar]

tatra śālvo jarāsandho dantavaktro vidūrathaḥ |
ājagmuścaidyapakṣīyāḥ pauṇḍrakādyāḥ sahasraśaḥ || 17 ||
[Analyze grammar]

kṛṣṇarāmadviṣo yattāḥ kanyāṃ caidyāya sādhitum |
yadyāgatya haretkṛṣṇo rāmādyairyadubhirvṛtaḥ || 18 ||
[Analyze grammar]

yotsyāmaḥ saṃhatāstena iti niścitamānasāḥ |
ājagmurbhūbhujaḥ sarve samagrabalavāhanāḥ || 19 ||
[Analyze grammar]

śrutvaitadbhagavānrāmo vipakṣīya nṛpodyamam |
kṛṣṇaṃ caikaṃ gataṃ hartuṃ kanyāṃ kalahaśaṅkitaḥ || 20 ||
[Analyze grammar]

balena mahatā sārdhaṃ bhrātṛsnehapariplutaḥ |
tvaritaḥ kuṇḍinaṃ prāgādgajāśvarathapattibhiḥ || 21 ||
[Analyze grammar]

bhīṣmakanyā varārohā kāṅkṣantyāgamanaṃ hareḥ |
pratyāpattimapaśyantī dvijasyācintayattadā || 22 ||
[Analyze grammar]

aho triyāmāntarita udvāho me'lparādhasaḥ |
nāgacchatyaravindākṣo nāhaṃ vedmyatra kāraṇam |
so'pi nāvartate'dyāpi matsandeśaharo dvijaḥ || 23 ||
[Analyze grammar]

api mayyanavadyātmā dṛṣṭvā kiñcijjugupsitam |
matpāṇigrahaṇe nūnaṃ nāyāti hi kṛtodyamaḥ || 24 ||
[Analyze grammar]

durbhagāyā na me dhātā nānukūlo maheśvaraḥ |
devī vā vimukhī gaurī rudrāṇī girijā satī || 25 ||
[Analyze grammar]

evaṃ cintayatī bālā govindahṛtamānasā |
nyamīlayata kālajñā netre cāśrukalākule || 26 ||
[Analyze grammar]

evaṃ vadhvāḥ pratīkṣantyā govindāgamanaṃ nṛpa |
vāma ūrurbhujo netramasphuranpriyabhāṣiṇaḥ || 27 ||
[Analyze grammar]

atha kṛṣṇavinirdiṣṭaḥ sa eva dvijasattamaḥ |
antaḥpuracarīṃ devīṃ rājaputrīṃ dadarśa ha || 28 ||
[Analyze grammar]

sā taṃ prahṛṣṭavadanamavyagrātmagatiṃ satī |
ālakṣya lakṣaṇābhijñā samapṛcchacchucismitā || 29 ||
[Analyze grammar]

tasyā āvedayatprāptaṃ śaśaṃsa yadunandanam |
uktaṃ ca satyavacanamātmopanayanaṃ prati || 30 ||
[Analyze grammar]

tamāgataṃ samājñāya vaidarbhī hṛṣṭamānasā |
na paśyantī brāhmaṇāya priyamanyannanāma sā || 31 ||
[Analyze grammar]

prāptau śrutvā svaduhiturudvāhaprekṣaṇotsukau |
abhyayāttūryaghoṣeṇa rāmakṛṣṇau samarhaṇaiḥ || 32 ||
[Analyze grammar]

madhuparkamupānīya vāsāṃsi virajāṃsi saḥ |
upāyanānyabhīṣṭāni vidhivatsamapūjayat || 33 ||
[Analyze grammar]

tayorniveśanaṃ śrīmadupākalpya mahāmatiḥ |
sasainyayoḥ sānugayorātithyaṃ vidadhe yathā || 34 ||
[Analyze grammar]

evaṃ rājñāṃ sametānāṃ yathāvīryaṃ yathāvayaḥ |
yathābalaṃ yathāvittaṃ sarvaiḥ kāmaiḥ samarhayat || 35 ||
[Analyze grammar]

kṛṣṇamāgatamākarṇya vidarbhapuravāsinaḥ |
āgatya netrāñjalibhiḥ papustanmukhapaṅkajam || 36 ||
[Analyze grammar]

asyaiva bhāryā bhavituṃ rukmiṇyarhati nāparā |
asāvapyanavadyātmā bhaiṣmyāḥ samucitaḥ patiḥ || 37 ||
[Analyze grammar]

kiñcitsucaritaṃ yannastena tuṣṭastrilokakṛt |
anugṛhṇātu gṛhṇātu vaidarbhyāḥ pāṇimacyutaḥ || 38 ||
[Analyze grammar]

evaṃ premakalābaddhā vadanti sma puraukasaḥ |
kanyā cāntaḥpurātprāgādbhaṭairguptāmbikālayam || 39 ||
[Analyze grammar]

padbhyāṃ viniryayau draṣṭuṃ bhavānyāḥ pādapallavam |
sā cānudhyāyatī samyaṅmukundacaraṇāmbujam || 40 ||
[Analyze grammar]

yatavāṅmātṛbhiḥ sārdhaṃ sakhībhiḥ parivāritā |
guptā rājabhaṭaiḥ śūraiḥ sannaddhairudyatāyudhaiḥ |
mṛḍaṅgaśaṅkhapaṇavāstūryabheryaśca jaghnire || 41 ||
[Analyze grammar]

nānopahāra balibhirvāramukhyāḥ sahasraśaḥ |
sraggandhavastrābharaṇairdvijapatnyaḥ svalaṅkṛtāḥ || 42 ||
[Analyze grammar]

gāyantyaśca stuvantaśca gāyakā vādyavādakāḥ |
parivārya vadhūṃ jagmuḥ sūtamāgadhavandinaḥ || 43 ||
[Analyze grammar]

āsādya devīsadanaṃ dhautapādakarāmbujā |
upaspṛśya śuciḥ śāntā praviveśāmbikāntikam || 44 ||
[Analyze grammar]

tāṃ vai pravayaso bālāṃ vidhijñā viprayoṣitaḥ |
bhavānīṃ vandayāṃcakrurbhavapatnīṃ bhavānvitām || 45 ||
[Analyze grammar]

namasye tvāmbike'bhīkṣṇaṃ svasantānayutāṃ śivām |
bhūyātpatirme bhagavānkṛṣṇastadanumodatām || 46 ||
[Analyze grammar]

adbhirgandhākṣatairdhūpairvāsaḥsraṅmālya bhūṣaṇaiḥ |
nānopahārabalibhiḥ pradīpāvalibhiḥ pṛthak || 47 ||
[Analyze grammar]

viprastriyaḥ patimatīstathā taiḥ samapūjayat |
lavaṇāpūpatāmbūla kaṇṭhasūtraphalekṣubhiḥ || 48 ||
[Analyze grammar]

tasyai striyastāḥ pradaduḥ śeṣāṃ yuyujurāśiṣaḥ |
tābhyo devyai namaścakre śeṣāṃ ca jagṛhe vadhūḥ || 49 ||
[Analyze grammar]

munivratamatha tyaktvā niścakrāmāmbikāgṛhāt |
pragṛhya pāṇinā bhṛtyāṃ ratnamudropaśobhinā || 50 ||
[Analyze grammar]

tāṃ devamāyāmiva dhīramohinīṃ sumadhyamāṃ kuṇḍalamaṇḍitānanām |
śyāmāṃ nitambārpitaratnamekhalāṃ vyañjatstanīṃ kuntalaśaṅkitekṣaṇām || 51 ||
[Analyze grammar]

śucismitāṃ bimbaphalādharadyuti śoṇāyamānadvijakundakuḍmalām |
padā calantīṃ kalahaṃsagāminīṃ siñjatkalānūpuradhāmaśobhinā || 52 ||
[Analyze grammar]

vilokya vīrā mumuhuḥ samāgatā yaśasvinastatkṛtahṛcchayārditāḥ |
yāṃ vīkṣya te nṛpatayastadudārahāsa vrīḍāvalokahṛtacetasa ujjhitāstrāḥ || 53 ||
[Analyze grammar]

petuḥ kṣitau gajarathāśvagatā vimūḍhā yātrācchalena haraye'rpayatīṃ svaśobhām |
saivaṃ śanaiścalayatī calapadmakośau prāptiṃ tadā bhagavataḥ prasamīkṣamāṇā || 54 ||
[Analyze grammar]

utsārya vāmakarajairalakānapaṅgaiḥ prāptānhriyaikṣata nṛpāndadṛśe'cyutaṃ ca |
tāṃ rājakanyāṃ rathamārurakṣatīṃ jahāra kṛṣṇo dviṣatāṃ samīkṣatām || 55 ||
[Analyze grammar]

rathaṃ samāropya suparṇalakṣaṇaṃ rājanyacakraṃ paribhūya mādhavaḥ |
tato yayau rāmapurogamaḥ śanaiḥ śṛgālamadhyādiva bhāgahṛddhariḥ || 56 ||
[Analyze grammar]

taṃ māninaḥ svābhibhavaṃ yaśaḥkṣayaṃ |
pare jarāsandhamukhā na sehire |
aho dhigasmānyaśa āttadhanvanāṃ |
gopairhṛtaṃ keśariṇāṃ mṛgairiva || 57 ||
[Analyze grammar]