Chapter 42

[English text for this chapter is available]

kubjāyāmanugrahaḥ dhanuṣo bhaṅgaḥ mallaśālāsajjīkaraṇaṃ ca |
śrīśuka uvāca |
atha vrajanrājapathena mādhavaḥ |
striyaṃ gṛhītāṅgavilepabhājanām |
vilokya kubjāṃ yuvatīṃ varānanāṃ |
papraccha yāntīṃ prahasan rasapradaḥ || 1 ||
[Analyze grammar]

kā tvaṃ varorvetadu hānulepanaṃ |
kasyāṅgane vā kathayasva sādhu naḥ |
dehyāvayoraṅgavilepamuttamaṃ |
śreyaḥ tataste na cirād bhaviṣyati || 2 ||
[Analyze grammar]

sairandhri uvāca |
dāsyasmyahaṃ sundara kaṃsasammatā |
trivakranāmā hyanulepakarmaṇi |
mad‍bhāvitaṃ bhojapateratipriyaṃ |
vinā yuvāṃ ko'nyatamastadarhati || 3 ||
[Analyze grammar]

rūpapeśalamādhurya hasitālāpavīkṣitaiḥ |
dharṣitātmā dadau sāndraṃ ubhayoranulepanam || 4 ||
[Analyze grammar]

tatastāvaṅgarāgeṇa svavarṇetaraśobhinā |
samprāptaparabhāgena śuśubhāte'nurañjitau || 5 ||
[Analyze grammar]

prasanno bhagavān kubjāṃ trivakrāṃ rucirānanām |
ṛjvīṃ kartuṃ manaścakre darśayan darśane phalam || 6 ||
[Analyze grammar]

pad‍bhyāmākramya prapade dryaṅgulyuttāna pāṇinā |
pragṛhya cibuke'dhyātmaṃ udanīnamadacyutaḥ || 7 ||
[Analyze grammar]

sā tadarjusamānāṅgī bṛhacchroṇipayodharā |
mukundasparśanāt sadyo babhūva pramadottamā || 8 ||
[Analyze grammar]

tato rūpaguṇaudārya saṃpannā prāha keśavam |
uttarīyān tamakṛṣya smayantī jātahṛcchayā || 9 ||
[Analyze grammar]

ehi vīra gṛhaṃ yāmo na tvāṃ tyaktumihotsahe |
tvayonmathitacittāyāḥ prasīda puruṣarṣabha || 10 ||
[Analyze grammar]

evaṃ striyā yācyamānaḥ kṛṣṇo rāmasya paśyataḥ |
mukhaṃ vīkṣyānugānāṃ ca prahasan tāmuvāca ha || 11 ||
[Analyze grammar]

eṣyāmi te gṛhaṃ subhru puṃsāmādhivikarśanam |
sādhitārtho'gṛhāṇāṃ naḥ pānthānāṃ tvaṃ parāyaṇam || 12 ||
[Analyze grammar]

visṛjya mādhvyā vāṇyā tāṃ vrajan mārge vaṇikpathaiḥ |
nānopāyanatāmbūla sraggandhaiḥ sāgrajo'rcitaḥ || 13 ||
[Analyze grammar]

taddarśanasmarakṣobhād ātmānaṃ nāvidan striyaḥ |
visrastavāsaḥkabara valayā lekhyamūrtayaḥ || 14 ||
[Analyze grammar]

tataḥ paurān pṛcchamāno dhanuṣaḥ sthānamacyutaḥ |
tasmin praviṣṭo dadṛśe dhanuraindraṃ ivād‍bhutam || 15 ||
[Analyze grammar]

puruṣairbahubhirguptaṃ arcitaṃ paramarddhimat |
vāryamāṇo nṛbhiḥ kṛṣṇaḥ prasahya dhanurādade || 16 ||
[Analyze grammar]

kareṇa vāmena salīlamuddhṛtaṃ |
sajyaṃ ca kṛtvā nimiṣeṇa paśyatām |
nṛṇāṃ vikṛṣya prababhañja madhyato |
yathekṣudaṇḍaṃ madakaryurukramaḥ || 17 ||
[Analyze grammar]

dhanuṣo bhajyamānasya śabdaḥ khaṃ rodasī diśaḥ |
pūrayāmāsa yaṃ śrutvā kaṃsastrāsamupāgamat || 18 ||
[Analyze grammar]

tad rakṣiṇaḥ sānucaraṃ kupitā ātatāyinaḥ |
gṛhītukāmā āvavruḥ gṛhyatāṃ vadhyatāmiti || 19 ||
[Analyze grammar]

atha tān durabhiprāyān vilokya balakeśavau |
kruddhau dhanvana ādāya śakale tāṃśca jaghnatuḥ || 20 ||
[Analyze grammar]

balaṃ ca kaṃsaprahitaṃ hatvā śālāmukhāttataḥ |
niṣkramya ceraturhṛṣṭau nirīkṣya purasampadaḥ || 21 ||
[Analyze grammar]

tayostadad‍bhutaṃ vīryaṃ niśāmya puravāsinaḥ |
tejaḥ prāgalbhyaṃ rūpaṃ ca menire vibudhottamau || 22 ||
[Analyze grammar]

tayorvicaratoḥ svairaṃ ādityo'stamupeyivān |
kṛṣṇarāmau vṛtau gopaiḥ purācchakaṭamīyatuḥ || 23 ||
[Analyze grammar]

gopyo mukundavigame virahāturā yā |
āśāsatāśiṣa ṛtā madhupuryabhūvan |
saṃpaśyatāṃ puruṣabhūṣaṇagātralakṣmīṃ |
hitvetarān nu bhajataścakame'yanaṃ śrīḥ || 24 ||
[Analyze grammar]

avaniktāṅghriyugalau bhuktvā kṣīropasecanam |
ūṣatustāṃ sukhaṃ rātriṃ jñātvā kaṃsacikīrṣitam || 25 ||
[Analyze grammar]

kaṃsastu dhanuṣo bhaṅgaṃ rakṣiṇāṃ svabalasya ca |
vadhaṃ niśamya govinda rāmavikrīḍitaṃ param || 26 ||
[Analyze grammar]

dīrghaprajāgaro bhīto durnimittāni durmatiḥ |
bahūnyacaṣṭobhayathā mṛtyordautyakarāṇi ca || 27 ||
[Analyze grammar]

adarśanaṃ svaśirasaḥ pratirūpe ca satyapi |
asatyapi dvitīye ca dvairūpyaṃ jyotiṣāṃ tathā || 28 ||
[Analyze grammar]

chidrapratītiśchāyāyāṃ prāṇaghoṣānupaśrutiḥ |
svarṇapratītirvṛkṣeṣu svapadānāmadarśanam || 29 ||
[Analyze grammar]

svapne pretapariṣvaṅgaḥ kharayānaṃ viṣādanam |
yāyānnaladamālyekaḥ tailābhyakto digambaraḥ || 30 ||
[Analyze grammar]

anyāni cetthaṃ bhūtāni svapnajāgaritāni ca |
paśyan maraṇasantrasto nidrāṃ lebhe na cintayā || 31 ||
[Analyze grammar]

vyuṣṭāyāṃ niśi kauravya sūrye cād‍bhyaḥ samutthite |
kārayāmāsa vai kaṃso mallakrīḍāmahotsavam || 32 ||
[Analyze grammar]

ānarcuḥ puruṣā raṅgaṃ tūryabheryaśca jaghnire |
mañcāścālaṅkṛtāḥ sragbhiḥ patākācailatoraṇaiḥ || 33 ||
[Analyze grammar]

teṣu paurā jānapadā brahmakṣatrapurogamāḥ |
yathopajoṣaṃ viviśū rājānaśca kṛtāsanāḥ || 34 ||
[Analyze grammar]

kaṃsaḥ parivṛto'mātyai rājamañca upāviśat |
maṇḍaleśvaramadhyastho hṛdayena vidūyatā || 35 ||
[Analyze grammar]

vādyamānesu tūryeṣu mallatālottareṣu ca |
mallāḥ svalaṅkṛtāḥ dṛptāḥ sopādhyāyāḥ samāviśan || 36 ||
[Analyze grammar]

cāṇūro muṣṭikaḥ kūtaḥ śalastośala eva ca |
ta āsedurupasthānaṃ valguvādyapraharṣitāḥ || 37 ||
[Analyze grammar]

nandagopādayo gopā bhojarājasamāhutāḥ |
niveditopāyanāste ekasmin mañca āviśan || 38 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe pūrvārdhe mallaraṅopavarṇanaṃ nāma dvicatvāriṃśo'dhyāyaḥ || 42 ||
[Analyze grammar]