Chapter 4

[English text for this chapter is available]

jighāṃsoḥ kaṃsasya hastāt unmuktāyā devyā bhagavad |
avatāra sūcanaṃ kaṃsānutāpaḥtadīya durmaṃtriṇāṃ durmaṃtraṇaṃ ca |
śrīśuka uvāca |
bahirantaḥpuradvāraḥ sarvāḥ pūrvavadāvṛtāḥ |
tato bāladhvaniṃ śrutvā gṛhapālāḥ samutthitāḥ || 1 ||
[Analyze grammar]

te tu tūrṇaṃ upavrajya devakyā garbhajanma tat |
ācakhyuḥ bhojarājāya yadudvignaḥ pratīkṣate || 2 ||
[Analyze grammar]

sa talpāt tūrṇamutthāya kālo'yamiti vihvalaḥ |
sūtīgṛhaṃ agāt tūrṇaṃ praskhalan muktamūrdhajaḥ || 3 ||
[Analyze grammar]

taṃ āha bhrātaraṃ devī kṛpaṇā karuṇaṃ satī |
snuṣeyaṃ tava kalyāṇa striyaṃ mā hantumarhasi || 4 ||
[Analyze grammar]

bahavo hiṃsitā bhrātaḥ śiśavaḥ pāvakopamāḥ |
tvayā daivanisṛṣṭena putrikaikā pradīyatām || 5 ||
[Analyze grammar]

nanvahaṃ te hyavarajā dīnā hatasutā prabho |
dātumarhasi mandāyā aṅgemāṃ caramāṃ prajām || 6 ||
[Analyze grammar]

śrīśuka uvāca |
upaguhya ātmajāṃ evaṃ rudatyā dīna adīnavat |
yācitastāṃ vinirbhartsya hastād ācicchide khalaḥ || 7 ||
[Analyze grammar]

tāṃ gṛhītvā caraṇayoḥ jātamātrāṃ svasuḥ sutām |
apothayat śilāpṛṣṭhe svārthonmūlitasauhṛdaḥ || 8 ||
[Analyze grammar]

sā tadhastāt samutpatya sadyo devyaṃbaraṃ gatā |
adṛśyatānujā viṣṇoḥ sāyudhāṣṭamahābhujā || 9 ||
[Analyze grammar]

divyasrag aṃbarālepa rat‍nābharaṇabhūṣitā |
dhanuḥśūleṣucarmāsi śaṃkhacakragadādharā || 10 ||
[Analyze grammar]

siddhacāraṇagandharvaiḥ apsaraḥkinnaroragaiḥ |
upāhṛtorubalibhiḥ stūyamānedamabravīt || 11 ||
[Analyze grammar]

kiṃ mayā hatayā manda jātaḥ khalu tavāntakṛt |
yatra kvaṃ vā pūrvaśatruḥ mā hiṃsīḥ kṛpaṇānvṛthā || 12 ||
[Analyze grammar]

iti prabhāṣya taṃ devī māyā bhagavatī bhuvi |
bahunāmaniketeṣu bahunāmā babhūva ha || 13 ||
[Analyze grammar]

tayā abhihitaṃ ākarṇya kaṃsaḥ paramavismitaḥ |
devakīṃ vasudevaṃ ca vimucya praśrito'bravīt || 14 ||
[Analyze grammar]

aho bhaginyaho bhāma mayā vāṃ bata pāpmanā |
puruṣāda ivāpatyaṃ bahavo hiṃsitāḥ sutāḥ || 15 ||
[Analyze grammar]

sa tvahaṃ tyaktakāruṇyaḥ tyaktajñātisuhṛt khalaḥ |
kān lokān vai gamiṣyāmi brahmaheva mṛtaḥ śvasan || 16 ||
[Analyze grammar]

daivaṃ api anṛtaṃ vakti na martyā eva kevalam |
yad viśraṃbhād ahaṃ pāpaḥ svasurnihatavān śiśūn || 17 ||
[Analyze grammar]

mā śocataṃ mahābhāgau ātmajān svakṛtaṃbhujaḥ |
jantavo na sadaikatra daivādhīnāstadā'sate || 18 ||
[Analyze grammar]

bhuvi bhaumāni bhūtāni yathā yānti apayānti ca |
nāyamātmā tathaiteṣu viparyeti yathaiva bhūḥ || 19 ||
[Analyze grammar]

yathānevaṃvido bhedo yata ātmaviparyayaḥ |
dehayogaviyogau ca saṃsṛtirna nivartate || 20 ||
[Analyze grammar]

tasmād‍bhadre svatanayān mayā vyāpāditānapi |
mānuśoca yataḥ sarvaḥ svakṛtaṃ vindate'vaśaḥ || 21 ||
[Analyze grammar]

yāvaddhato'smi hantāsmīti ātmānaṃ manyate'svadṛk |
tāvat tad abhimānyajño bādhyabādhakatāmiyāt || 22 ||
[Analyze grammar]

kṣamadhvaṃ mama daurātmyaṃ sādhavo dīnavatsalāḥ |
ityuktvāśrumukhaḥ pādau śyālaḥ svasroḥ athāgrahīt || 23 ||
[Analyze grammar]

mocayāmāsa nigaḍāt viśrabdhaḥ kanyakāgirā |
devakīṃ vasudevaṃ ca darśayan ātmasauhṛdam || 24 ||
[Analyze grammar]

bhrātuḥ samanutaptasya kṣāntvā roṣaṃ ca devakī |
vyasṛjat vasudevaśca prahasya tamuvāca ha || 25 ||
[Analyze grammar]

evametanmahābhāga yathā vadasi dehinām |
ajñānaprabhavāhaṃdhīḥ svapareti bhidā yataḥ || 26 ||
[Analyze grammar]

śokaharṣabhayadveṣa lobhamohamadānvitāḥ |
mitho ghnantaṃ na paśyanti bhāvairbhāvaṃ pṛthagdṛśaḥ || 27 ||
[Analyze grammar]

śrīśuka uvāca |
kaṃsa evaṃ prasannābhyāṃ viśuddhaṃ pratibhāṣitaḥ |
devakī vasudevābhyāṃ anujñāto āviśat gṛham || 28 ||
[Analyze grammar]

tasyāṃ rātryāṃ vyatītāyāṃ kaṃsa āhūya maṃtriṇaḥ |
tebhya ācaṣṭa tat sarvaṃ yaduktaṃ yoganidrayā || 29 ||
[Analyze grammar]

ākarṇya bharturgaditaṃ taṃ ūcuḥ devaśatravaḥ |
devān prati kṛtāmarṣā daiteyā nātikovidāḥ || 30 ||
[Analyze grammar]

evaṃ cettarhi bhojendra puragrāma vrajādiṣu |
anirdaśān nirdaśāṃśca haniṣyāmo'dya vai śiśūn || 31 ||
[Analyze grammar]

kiṃ udyamaiḥ kariṣyanti devāḥ samarabhīravaḥ |
nityaṃ udvignamanaso jyāghoṣairdhanuṣastava || 32 ||
[Analyze grammar]

asyataste śaravrātaiḥ hanyamānāḥ samantataḥ |
jijīviṣava utsṛjya palāyanaparā yayuḥ || 33 ||
[Analyze grammar]

kecit prāñjalayo dīnā nyastaśastrā divaukasaḥ |
muktakacchaśikhāḥ kecid bhītāḥ sma iti vādinaḥ || 34 ||
[Analyze grammar]

na tvaṃ vismṛtaśastrāstrān virathān bhayasaṃvṛtān |
haṃsyanyāsaktavimukhān bhagnacāpānayudhyataḥ || 35 ||
[Analyze grammar]

kiṃ kṣemaśūrairvibudhaiḥ asaṃyugavikatthanaiḥ |
rahojuṣā kiṃ hariṇā śaṃbhunā vā vanaukasā |
kiṃ iṃdreṇālpavīryeṇa brahmaṇā vā tapasyatā || 36 ||
[Analyze grammar]

tathāpi devāḥ sāpat‍nyān nopekṣyā iti manmahe |
tataḥ tanmūlakhanane niyuṃkṣvāsmān anuvratān || 37 ||
[Analyze grammar]

yathāmayoṃ'ge samupekṣito nṛbhiḥ |
na śakyate rūḍhapadaścikitsitum |
yathendriyagrāma upekṣitastathā |
ripurmahān baddhabalo na cālyate || 38 ||
[Analyze grammar]

mūlaṃ hi viṣṇuḥ devānāṃ yatra dharmaḥ sanātanaḥ |
tasya ca brahmagoviprāḥ tapo yajñāḥ sadakṣiṇāḥ || 39 ||
[Analyze grammar]

tasmātsarvātmanā rājan brāhmaṇān brahmavādinaḥ |
tapasvino yajñaśīlān gāśca hanmo havirdughāḥ || 40 ||
[Analyze grammar]

viprā gāvaśca vedāśca tapaḥ satyaṃ damaḥ śamaḥ |
śraddhā dayā titikṣā ca kratavaśca harestanūḥ || 41 ||
[Analyze grammar]

sa hi sarvasurādhyakṣo hyasuradviḍ guhāśayaḥ |
tanmūlā devatāḥ sarvāḥ seśvarāḥ sacaturmukhāḥ |
ayaṃ vai tadvadhopāyo yadṛṣīṇāṃ vihiṃsanam || 42 ||
[Analyze grammar]

śrīśuka uvāca |
evaṃ durmaṃtribhiḥ kaṃsaḥ saha sammantrya durmatiḥ |
brahmahiṃsāṃ hitaṃ mene kālapāśāvṛto'suraḥ || 43 ||
[Analyze grammar]

sandiśya sādhulokasya kadane kadanapriyān |
kāmarūpadharān dikṣu dānavān gṛhamāviśat || 44 ||
[Analyze grammar]

te vai rajaḥprakṛtayaḥ tamasā mūḍhacetasaḥ |
satāṃ vidveṣamāceruḥ ārāt āgatamṛtyavaḥ || 45 ||
[Analyze grammar]

āyuḥ śriyaṃ yaśo dharmaṃ lokānāśiṣa eva ca |
hanti śreyāṃsi sarvāṇi puṃso mahadatikramaḥ || 46 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe pūrvārdhe caturtho'dhyāyaḥ || 4 ||
[Analyze grammar]