Chapter 19

[English text for this chapter is available]

yayātergṛhatyāgaḥ |
śrīśuka uvāca |
sa itthaṃ ācaran kāmān straiṇo'pahnavamātmanaḥ |
buddhvā priyāyai nirviṇṇo gāthāmetāmagāyata || 1 ||
[Analyze grammar]

śrṛṇu bhārgavyamūṃ gāthāṃ madvidhācaritāṃ bhuvi |
dhīrā yasyānuśocanti vane grāmanivāsinaḥ || 2 ||
[Analyze grammar]

basta eko vane kaścid vicinvan priyamātmanaḥ |
dadarśa kūpe patitāṃ svakarmavaśagāmajām || 3 ||
[Analyze grammar]

tasyā uddharaṇopāyaṃ bastaḥ kāmī vicintayan |
vyadhatta tīrthamuddhṛtya viṣāṇāgreṇa rodhasī || 4 ||
[Analyze grammar]

sottīrya kūpāt suśroṇī tameva cakame kila |
tayā vṛtaṃ samudvīkṣya bahvyo'jāḥ kāntakāminīḥ || 5 ||
[Analyze grammar]

pīvānaṃ śmaśrulaṃ preṣṭhaṃ mīḍhvāṃsaṃ yābhakovidam |
sa eko'javṛṣastāsāṃ bahvīnāṃ rativardhanaḥ |
reme kāmagrahagrasta ātmānaṃ nāvabudhyata || 6 ||
[Analyze grammar]

tameva preṣṭhatamayā ramamāṇamajānyayā |
vilokya kūpasaṃvignā nāmṛṣyad bastakarma tat || 7 ||
[Analyze grammar]

taṃ durhṛdaṃ suhṛdrūpaṃ kāminaṃ kṣaṇasauhṛdam |
indriyārāmaṃ utsṛjya svāminaṃ duḥkhitā yayau || 8 ||
[Analyze grammar]

so'pi cānugataḥ straiṇaḥ kṛpaṇastāṃ prasāditum |
kurvanniḍaviḍākāraṃ nāśaknot pathi saṃdhitum || 9 ||
[Analyze grammar]

tasya tatra dvijaḥ kaścit ajāsvāmyacchinad ruṣā |
lambantaṃ vṛṣaṇaṃ bhūyaḥ sandadhe'rthāya yogavit || 10 ||
[Analyze grammar]

saṃbaddhavṛṣaṇaḥ so'pi hyajayā kūpalabdhayā |
kālaṃ bahutithaṃ bhadre kāmairnādyāpi tuṣyati || 11 ||
[Analyze grammar]

tathāhaṃ kṛpaṇaḥ subhru bhavatyāḥ premayantritaḥ |
ātmānaṃ nābhijānāmi mohitastava māyayā || 12 ||
[Analyze grammar]

yat pṛthivyāṃ vrīhiyavaṃ hiraṇyaṃ paśavaḥ striyaḥ |
na duhyanti manaḥprītiṃ puṃsaḥ kāmahatasya te || 13 ||
[Analyze grammar]

na jātu kāmaḥ kāmānāṃ upabhogena śāmyati |
haviṣā kṛṣṇavartmeva bhūya evābhivardhate || 14 ||
[Analyze grammar]

yadā na kurute bhāvaṃ sarvabhūteṣvamaṃgalam |
samadṛṣṭestadā puṃsaḥ sarvāḥ sukhamayā diśaḥ || 15 ||
[Analyze grammar]

yā dustyajā durmatibhiḥ jīryato yā na jīryate |
tāṃ tṛṣṇāṃ duḥkhanivahāṃ śarmakāmo drutaṃ tyajet || 16 ||
[Analyze grammar]

mātrā svasrā duhitrā vā nāviviktāsano bhavet |
balavān indriyagrāmo vidvāṃsamapi karṣati || 17 ||
[Analyze grammar]

pūrṇaṃ varṣasahasraṃ me viṣayān sevato'sakṛt |
tathāpi cānusavanaṃ tṛṣṇā teṣūpajāyate || 18 ||
[Analyze grammar]

tasmādetāmahaṃ tyaktvā brahmaṇyadhyāya mānasam |
nirdvandvo nirahaṃkāraḥ cariṣyāmi mṛgaiḥ saha || 19 ||
[Analyze grammar]

dṛṣṭaṃ śrutamasad buddhvā nānudhyāyenna sandiśet |
saṃsṛtiṃ cātmanāśaṃ ca tatra vidvān sa ātmadṛk || 20 ||
[Analyze grammar]

ityuktvā nāhuṣo jāyāṃ tadīyaṃ pūrave vayaḥ |
dattvā svāṃ jarasaṃ tasmād ādade vigataspṛhaḥ || 21 ||
[Analyze grammar]

diśi dakṣiṇapūrvasyāṃ druhyuṃ dakṣiṇato yadum |
pratīcyāṃ turvasuṃ cakra udīcyāmanumīśvaram || 22 ||
[Analyze grammar]

bhūmaṇḍalasya sarvasya pūrumarhattamaṃ viśām |
abhiṣicyāgrajān tasya vaśe sthāpya vanaṃ yayau || 23 ||
[Analyze grammar]

āsevitaṃ varṣapūgān ṣaḍvargaṃ viṣayeṣu saḥ |
kṣaṇena mumuce nīḍaṃ jātapakṣa iva dvijaḥ || 24 ||
[Analyze grammar]

sa tatra nirmuktasamastasaṃga |
ātmānubhūtyā vidhutatriliṃgaḥ |
pare'male brahmaṇi vāsudeve |
lebhe gatiṃ bhāgavatīṃ pratītaḥ || 25 ||
[Analyze grammar]

śrutvā gāthāṃ devayānī mene prastobhamātmanaḥ |
strīpuṃsoḥ snehavaiklavyāt parihāsamiveritam || 26 ||
[Analyze grammar]

sā sannivāsaṃ suhṛdāṃ prapāyāmiva gacchatām |
vijñāyeśvara tantrāṇāṃ māyāviracitaṃ prabhoḥ || 27 ||
[Analyze grammar]

sarvatra saṃgaghgamutsṛjya svapnaupamyena bhārgavī |
kṛṣṇe manaḥ samāveśya vyadhunolliṃgamātmanaḥ || 28 ||
[Analyze grammar]

namastubhyaṃ bhagavate vāsudevāya vedhase |
sarvabhūtādhivāsāya śāntāya bṛhate namaḥ || 29 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ navamaskandhe ekonaviṃśo'dhyāyaḥ || 19 ||
[Analyze grammar]