Chapter 2

[English text for this chapter is available]

śrīśuka uvāca |
evaṃ te bhagavaddūtā yamadūtābhibhāṣitam |
upadhāryātha tān rājan pratyāhurnayakovidāḥ || 1 ||
[Analyze grammar]

śrīviṣṇudūtā ūcuḥ |
aho kaṣṭaṃ dharmadṛśāṃ adharmaḥ spṛśate sabhām |
yatrādaṇḍyeṣvapāpeṣu daṇḍo yairdhriyate vṛthā || 2 ||
[Analyze grammar]

prajānāṃ pitaro ye ca śāstāraḥ sādhavaḥ samāḥ |
yadi syātteṣu vaiṣamyaṃ kaṃ yānti śaraṇaṃ prajāḥ || 3 ||
[Analyze grammar]

yad yad ācarati śreyān itaraḥ tat tadīhate |
sa yatpramāṇaṃ kurute lokastadanuvartate || 4 ||
[Analyze grammar]

yasyāṅke śira ādhāya lokaḥ svapiti nirvṛtaḥ |
svayaṃ dharmamadharmaṃ vā na hi veda yathā paśuḥ || 5 ||
[Analyze grammar]

sa kathaṃ nyarpitātmānaṃ kṛtamaitramacetanam |
visrambhaṇīyo bhūtānāṃ saghṛṇo drogdhumarhati || 6 ||
[Analyze grammar]

ayaṃ hi kṛtanirveśo janmakoṭyaṃhasāmapi |
yad vyājahāra vivaśo nāma svastyayanaṃ hareḥ || 7 ||
[Analyze grammar]

etenaiva hyaghono'sya kṛtaṃ syādaghaniṣkṛtam |
yadā nārāyaṇāyeti jagāda caturakṣaram || 8 ||
[Analyze grammar]

stenaḥ surāpo mitradhrug brahmahā gurutalpagaḥ |
strīrājapitṛgohantā ye ca pātakino'pare || 9 ||
[Analyze grammar]

sarveṣāṃ apyaghavatāṃ idameva suniṣkṛtam |
nāmavyāharaṇaṃ viṣṇoḥ yatastad viṣayā matiḥ || 10 ||
[Analyze grammar]

na niṣkṛtairuditairbrahmavādibhiḥ |
tathā viśuddhyatyaghavān vratādibhiḥ |
yathā harernāmapadairudāhṛtaiḥ |
taduttamaśloka guṇopalambhakam || 11 ||
[Analyze grammar]

naikāntikaṃ taddhi kṛte'pi niṣkṛte |
manaḥ punardhāvati cedasatpathe |
tatkarmanirhāramabhīpsatāṃ hareḥ |
guṇānuvādaḥ khalu sattvabhāvanaḥ || 12 ||
[Analyze grammar]

athainaṃ māpanayata kṛtāśeṣāghaniṣkṛtam |
yadasau bhagavannāma mriyamāṇaḥ samagrahīt || 13 ||
[Analyze grammar]

sāṅketyaṃ pārihāsyaṃ vā stobhaṃ helanameva vā |
vaikuṇṭhanāmagrahaṇaṃ aśeṣāghaharaṃ viduḥ || 14 ||
[Analyze grammar]

patitaḥ skhalito bhagnaḥ sandaṣṭastapta āhataḥ |
harirityavaśenāha pumānnārhati yātanām || 15 ||
[Analyze grammar]

gurūṇāṃ ca laghūnāṃ ca gurūṇi ca laghūni ca |
prāyaścittāni pāpānāṃ jñātvoktāni maharṣibhiḥ || 16 ||
[Analyze grammar]

taistānyaghāni pūyante tapodānajapādibhiḥ |
nādharmajaṃ tad hṛdayaṃ tadapīśāṅghrisevayā || 17 ||
[Analyze grammar]

ajñānādathavā jñānāt uttamaślokanāma yat |
saṅkīrtitamaghaṃ puṃso dahededho yathānalaḥ || 18 ||
[Analyze grammar]

yathāgadaṃ vīryatamaṃ upayuktaṃ yadṛcchayā |
ajānato'pyātmaguṇaṃ kuryān maṃtro'pyudāhṛtaḥ || 19 ||
[Analyze grammar]

śrīśuka uvāca |
te evaṃ suvinirṇīya dharmaṃ bhāgavataṃ nṛpa |
taṃ yāmyapāśānnirmucya vipraṃ mṛtyoramūmucan || 20 ||
[Analyze grammar]

iti pratyuditā yāmyā dūtā yātvā yamāntike |
yamarājñe yathā sarvaṃ ācacakṣurarindama || 21 ||
[Analyze grammar]

dvijaḥ pāśādvinirmukto gatabhīḥ prakṛtiṃ gataḥ |
vavande śirasā viṣṇoḥ kiṅkarān darśanotsavaḥ || 22 ||
[Analyze grammar]

taṃ vivakṣumabhipretya mahāpuruṣakiṅkarāḥ |
sahasā paśyatastasya tatrāntardadhire'nagha || 23 ||
[Analyze grammar]

ajāmilo'pyathākarṇya dūtānāṃ yamakṛṣṇayoḥ |
dharmaṃ bhāgavataṃ śuddhaṃ traivedyaṃ ca guṇāśrayam || 24 ||
[Analyze grammar]

bhaktimānbhagavatyāśu māhātmyaśravaṇāddhareḥ |
anutāpo mahānāsītsmarato'śubhamātmanaḥ || 25 ||
[Analyze grammar]

aho me paramaṃ kaṣṭaṃ abhūd avijitātmanaḥ |
yena viplāvitaṃ brahma vṛṣalyāṃ jāyatātmanā || 26 ||
[Analyze grammar]

dhiṅmāṃ vigarhitaṃ sadbhiḥ duṣkṛtaṃ kulakajjalam |
hitvā bālāṃ satīṃ yo'haṃ surāpīmasatīmagām || 27 ||
[Analyze grammar]

vṛddhāvanāthau pitarau nānyabandhū tapasvinau |
aho mayādhunā tyaktau akṛtajñena nīcavat || 28 ||
[Analyze grammar]

so'haṃ vyaktaṃ patiṣyāmi narake bhṛśadāruṇe |
dharmaghnāḥ kāmino yatra vindanti yamayātanāḥ || 29 ||
[Analyze grammar]

kimidaṃ svapna āho svit sākṣād dṛṣṭamihād‍bhutam |
kva yātā adya te ye māṃ vyakarṣan pāśapāṇayaḥ || 30 ||
[Analyze grammar]

atha te kva gatāḥ siddhāḥ catvāraścārudarśanāḥ |
vyāmocayan nīyamānaṃ baddhvā pāśairadho bhuvaḥ || 31 ||
[Analyze grammar]

athāpi me durbhagasya vibudhottamadarśane |
bhavitavyaṃ maṅgalena yenātmā me prasīdati || 32 ||
[Analyze grammar]

anyathā mriyamāṇasya nāśucervṛṣalīpateḥ |
vaikuṇṭhanāmagrahaṇaṃ jihvā vaktumihārhati || 33 ||
[Analyze grammar]

kva cāhaṃ kitavaḥ pāpo brahmaghno nirapatrapaḥ |
kva ca nārāyaṇetyetad bhagavannāma maṅgalam || 34 ||
[Analyze grammar]

so'haṃ tathā yatiṣyāmi yatacittendriyānilaḥ |
yathā na bhūya ātmānaṃ andhe tamasi majjaye || 35 ||
[Analyze grammar]

vimucya tamimaṃ bandhaṃ avidyā kāmakarmajam |
sarvabhūtasuhṛcchānto maitraḥ karuṇa ātmavān || 36 ||
[Analyze grammar]

mocaye grastamātmānaṃ yoṣinmayyā'tmamāyayā |
vikrīḍito yayaivāhaṃ krīḍāmṛga ivādhamaḥ || 37 ||
[Analyze grammar]

mamāhamiti dehādau hitvāmithyārthadhīrmatim |
dhāsye mano bhagavati śuddhaṃ tatkīrtanādibhiḥ || 38 ||
[Analyze grammar]

śrīśuka uvāca |
iti jātasunirvedaḥ kṣaṇasaṅgena sādhuṣu |
gaṅgādvāramupeyāya muktasarvānubandhanaḥ || 39 ||
[Analyze grammar]

sa tasmin devasadana āsīno yogamāsthitaḥ |
pratyāhṛtendriyagrāmo yuyoja mana ātmani || 40 ||
[Analyze grammar]

tato guṇebhya ātmānaṃ viyujyātmasamādhinā |
yuyuje bhagavad dhāmni brahmaṇyanubhavātmani || 41 ||
[Analyze grammar]

yarhyupāratadhīstasmin adrākṣīt puruṣānpuraḥ |
upalabhyopalabdhān prāg vavande śirasā dvijaḥ || 42 ||
[Analyze grammar]

hitvā kalevaraṃ tīrthe gaṅgāyāṃ darśanādanu |
sadyaḥ svarūpaṃ jagṛhe bhagavan pārśvavartinām || 43 ||
[Analyze grammar]

sākaṃ vihāyasā vipro mahāpuruṣakiṅkaraiḥ |
haimaṃ vimānamāruhya yayau yatra śriyaḥ patiḥ || 44 ||
[Analyze grammar]

evaṃ sa viplāvitasarvadharmā |
dāsyāḥ patiḥ patito garhyakarmaṇā |
nipātyamāno niraye hatavrataḥ |
sadyo vimukto bhagavannāma gṛhṇan || 45 ||
[Analyze grammar]

nātaḥ paraṃ karmanibandhakṛntanaṃ |
mumukṣatāṃ tīrthapadānukīrtanāt |
na yatpunaḥ karmasu sajjate mano |
rajastamobhyāṃ kalilaṃ tato'nyathā || 46 ||
[Analyze grammar]

ya etaṃ paramaṃ guhyaṃ itihāsamaghāpaham |
śrṛṇuyāt śraddhayā yukto yaśca bhaktyānukīrtayet || 47 ||
[Analyze grammar]

na vai sa narakaṃ yāti nekṣito yamakiṅkaraiḥ |
yadyapyamaṅgalo martyo viṣṇuloke mahīyate || 48 ||
[Analyze grammar]

mriyamāṇo harernāma gṛṇan putropacāritam |
ajāmilo'pyagāt dhāma kimuta śraddhayā gṛṇan || 49 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
ṣaṣṭhaskandhe ajāmilopākhyāne dvitīyodhyā'yaḥ || 2 ||
[Analyze grammar]