Chapter 1

[English text for this chapter is available]

śrīparīkṣiduvāca |
nivṛttimārgaḥ kathita ādau bhagavatā yathā |
kramayogopalabdhena brahmaṇā yadasaṃsṛtiḥ || 1 ||
[Analyze grammar]

pravṛttilakṣaṇaścaiva traiguṇyaviṣayo mune |
yo'sāvalīnaprakṛteḥ guṇasargaḥ punaḥ punaḥ || 2 ||
[Analyze grammar]

adharmalakṣaṇā nānā narakāścānuvarṇitāḥ |
manvantaraśca vyākhyāta ādyaḥ svāyambhuvo yataḥ || 3 ||
[Analyze grammar]

priyavratottānapadoḥ vaṃśastat caritāni ca |
dvīpavarṣasamudrādri nadyudyāna vanaspatīn || 4 ||
[Analyze grammar]

dharāmaṇḍalasaṃsthānaṃ bhāgalakṣaṇamānataḥ |
jyotiṣāṃ vivarāṇāṃ ca yathedaṃ asṛjadvibhuḥ || 5 ||
[Analyze grammar]

adhuneha mahābhāga yathaiva narakānnaraḥ |
nānograyātanānneyāt tanme vyākhyātumarhasi || 6 ||
[Analyze grammar]

śrīśuka uvāca |
na cedihaivāpacitiṃ yathāṃhasaḥ |
kṛtasya kuryān manauktapāṇibhiḥ |
dhruvaṃ sa vai pretya narakānupaiti |
ye kīrtitā me bhavataḥ tigmayātanāḥ || 7 ||
[Analyze grammar]

tasmātpuraivāśviha pāpaniṣkṛtau |
yateta mṛtyoravipadyatātmanā |
doṣasya dṛṣṭvā gurulāghavaṃ yathā |
bhiṣakcikitseta rujāṃ nidānavit || 8 ||
[Analyze grammar]

śrīrājovāca |
dṛṣṭaśrutābhyāṃ yatpāpaṃ jānan api ātmano'hitam |
karoti bhūyo vivaśaḥ prāyaścittamatho katham || 9 ||
[Analyze grammar]

kvacit nivartate abhadrāt kvacit carati tatpunaḥ |
prāyaścittamatho'pārthaṃ manye kuñjaraśaucavat || 10 ||
[Analyze grammar]

śrīśuka uvāca |
karmaṇā karmanirhāro na hyātyantika iṣyate |
avidvadadhikāritvāt prāyaścittaṃ vimarśanam || 11 ||
[Analyze grammar]

nāśnataḥ pathyamevānnaṃ vyādhayo'bhibhavanti hi |
evaṃ niyamakṛd rājan śanaiḥ kṣemāya kalpate || 12 ||
[Analyze grammar]

tapasā brahmacaryeṇa śamena ca damena ca |
tyāgena satyaśaucābhyāṃ yamena niyamena vā || 13 ||
[Analyze grammar]

dehavāgbuddhijaṃ dhīrā dharmajñāḥ śraddhayānvitāḥ |
kṣipantyaghaṃ mahadapi veṇugulmamivānalaḥ || 14 ||
[Analyze grammar]

kecitkevalayā bhaktyā vāsudevaparāyaṇāḥ |
aghaṃ dhunvanti kārtsnyena nīhāramiva bhāskaraḥ || 15 ||
[Analyze grammar]

na tathā hyaghavān rājan pūyeta tapa ādibhiḥ |
yathā kṛṣṇārpitaprāṇaḥ tatpūruṣaniṣevayā || 16 ||
[Analyze grammar]

sadhrīcīno hyayaṃ loke panthāḥ kṣemo'kutobhayaḥ |
suśīlāḥ sādhavo yatra nārāyaṇaparāyaṇāḥ || 17 ||
[Analyze grammar]

prāyaścittāni cīrṇāni nārāyaṇaparāṅmukham |
na niṣpunanti rājendra surākumbhamivāpagāḥ || 18 ||
[Analyze grammar]

sakṛnmanaḥ kṛṣṇapadāravindayoḥ |
rniveśitaṃ tad‍guṇarāgi yairiha |
na te yamaṃ pāśabhṛtaśca tad‍bhaṭān |
svansvapne'pi paśyanti hi cīrṇaniṣkṛtāḥ || 19 ||
[Analyze grammar]

atra ca udāharanti imaṃ itihāsaṃ purātanam |
dūtānāṃ viṣṇuyamayoḥ saṃvādastaṃ nibodha me || 20 ||
[Analyze grammar]

kānyakubje dvijaḥ kaścit dāsīpatirajāmilaḥ |
nāmnā naṣṭasadācāro dāsyāḥ saṃsargadūṣitaḥ || 21 ||
[Analyze grammar]

bandyakṣaiḥ kaitavaiścauryaiḥ garhitāṃ vṛttimāsthitaḥ |
bibhratkuṭumbaṃ aśuciḥ yātayāmāsa dehinaḥ || 22 ||
[Analyze grammar]

evaṃ nivasatastasya lālayānasya tatsutān |
kālo'tyagān mahān rājan naṣṭāśītyāyuṣaḥ samāḥ || 23 ||
[Analyze grammar]

tasya pravayasaḥ putrā daśa teṣāṃ tu yo'vamaḥ |
bālo nārāyaṇo nāmnā pitrośca dayito bhṛśam || 24 ||
[Analyze grammar]

sa baddhahṛdayastasmin arbhake kalabhāṣiṇi |
nirīkṣamāṇastallīlāṃ mumude jaraṭho bhṛśam || 25 ||
[Analyze grammar]

bhuñjānaḥ prapiban khādan bālakaṃ snehayantritaḥ |
bhojayan pāyayanmūḍho na vedāgatamantakam || 26 ||
[Analyze grammar]

sa evaṃ vartamāno'jño mṛtyukāla upasthite |
matiṃ cakāra tanaye bāle nārāyaṇāhvaye || 27 ||
[Analyze grammar]

sa pāśahastān trīn dṛṣṭvā puruṣān ati dāruṇān |
vakratuṇḍān ūrdhvaromṇa ātmānaṃ netumāgatān || 28 ||
[Analyze grammar]

dūre krīḍanakāsaktaṃ putraṃ nārāyaṇāhvayam |
plāvitena svareṇoccaiḥ ājuhāvākulendriyaḥ || 29 ||
[Analyze grammar]

niśamya mriyamāṇasya mukhato harikīrtanam |
bharturnāma mahārāja pārṣadāḥ sahasā'patan || 30 ||
[Analyze grammar]

vikarṣato'ntarhṛdayād dāsīpatimajāmilam |
yamapreṣyān viṣṇudūtā vārayāmāsurojasā || 31 ||
[Analyze grammar]

ūcurniṣedhitāstāṃste vaivasvatapuraḥsarāḥ |
ke yūyaṃ pratiṣeddhāro dharmarājasya śāsanam || 32 ||
[Analyze grammar]

kasya vā kuta āyātāḥ kasmādasya niṣedhatha |
kiṃ devā upadevā yā yūyaṃ kiṃ siddhasattamāḥ || 33 ||
[Analyze grammar]

sarve padmapalāśākṣāḥ pītakauśeyavāsasaḥ |
kirīṭinaḥ kuṇḍalino lasatpuṣkaramālinaḥ || 34 ||
[Analyze grammar]

sarve ca nūt‍navayasaḥ sarve cārucaturbhujāḥ |
dhanurniṣaṅgāsigadā śaṅkhacakrāmbujaśriyaḥ || 35 ||
[Analyze grammar]

diśo vitimirālokāḥ kurvantaḥ svena tejasā |
kimarthaṃ dharmapālasya kiṅkarānno niṣedhatha || 36 ||
[Analyze grammar]

śrīśuka uvāca |
ityukte yamadūtaiste vāsudevoktakāriṇaḥ |
tān pratyūcuḥ prahasyedaṃ meghanirhrādayā girā || 37 ||
[Analyze grammar]

śrīviṣṇudūtā ūcuḥ |
yūyaṃ vai dharmarājasya yadi nirdeśakāriṇaḥ |
brūta dharmasya nastattvaṃ yacca dharmasya lakṣaṇam || 38 ||
[Analyze grammar]

kathaṃ svid dhriyate daṇḍaḥ kiṃ vāsya sthānamīpsitam |
daṇḍyāḥ kiṃ kāriṇaḥ sarve āho svit katicinnṛṇām || 39 ||
[Analyze grammar]

yamadūtā ūcuḥ |
vedapraṇihito dharmo hyadharmastadviparyayaḥ |
vedo nārāyaṇaḥ sākṣāy svayambhūḥ iti śuśruma || 40 ||
[Analyze grammar]

yena svadhāmnyamī bhāvā rajaḥsattvatamomayāḥ |
guṇanāmakriyārūpaiḥ vibhāvyante yathātatham || 41 ||
[Analyze grammar]

sūryo'gniḥ khaṃ marudgāvaḥ somaḥ sandhyāhanī diśaḥ |
kaṃ kuḥ svayaṃ dharma iti hyete daihyasya sākṣiṇaḥ || 42 ||
[Analyze grammar]

etairadharmo vijñātaḥ sthānaṃ daṇḍasya yujyate |
sarve karmānurodhena daṇḍamarhanti kāriṇaḥ || 43 ||
[Analyze grammar]

sambhavanti hi bhadrāṇi viparītāni cānaghāḥ |
kāriṇāṃ guṇasaṅgo'sti dehavān na hyakarmakṛt || 44 ||
[Analyze grammar]

yena yāvān yathādharmo dharmo veha samīhitaḥ |
sa eva tatphalaṃ bhuṅkte tathā tāvadamutra vai || 45 ||
[Analyze grammar]

yatheha devapravarāḥ traividhyaṃ upalabhyate |
bhūteṣu guṇavaicitryāt tathānyatrānumīyate || 46 ||
[Analyze grammar]

vartamāno'nyayoḥ kālo guṇābhijñāpako yathā |
evaṃ janmānyayoretad dharmādharmanidarśanam || 47 ||
[Analyze grammar]

manasaiva pure devaḥ pūrvarūpaṃ vipaśyati |
anumīmāṃsate'pūrvaṃ manasā bhagavānajaḥ || 48 ||
[Analyze grammar]

yathājñastamasā yukta upāste vyaktameva hi |
na veda pūrvamaparaṃ naṣṭajanmasmṛtistathā || 49 ||
[Analyze grammar]

pañcabhiḥ kurute svārthān pañca vedātha pañcabhiḥ |
ekastu ṣoḍaśena trīn svayaṃ saptadaśo'śnute || 50 ||
[Analyze grammar]

tadetat ṣoḍaśakalaṃ liṅgaṃ śaktitrayaṃ mahat |
dhatte'nusaṃsṛtiṃ puṃsi harṣaśokabhayārtidām || 51 ||
[Analyze grammar]

dehyajño'jitaṣaḍvargo necchan karmāṇi kāryate |
kośakāra ivātmānaṃ karmaṇā'cchādya muhyati || 52 ||
[Analyze grammar]

na hi kaścit kṣaṇamapi jātu tiṣṭhatyakarmakṛt |
kāryate hyavaśaḥ karma guṇaiḥ svābhāvikairbalāt || 53 ||
[Analyze grammar]

labdhvā nimittamavyaktaṃ vyaktāvyaktaṃ bhavatyuta |
yathāyoni yathābījaṃ svabhāvena balīyasā || 54 ||
[Analyze grammar]

eṣa prakṛtisaṅgena puruṣasya viparyayaḥ |
āsītsa eva na cirād īśasaṅgād vilīyate || 55 ||
[Analyze grammar]

ayaṃ hi śrutasampannaḥ śīlavṛttaguṇālayaḥ |
dhṛtavrato mṛdurdāntaḥ satyavān maṃtravicchuciḥ || 56 ||
[Analyze grammar]

gurvagnyatithivṛddhānāṃ śuśrūṣurnirahaṅkṛtaḥ |
sarvabhūtasuhṛtsādhuḥ mirmitavāganasūyakaḥ || 57 ||
[Analyze grammar]

ekadāsau vanaṃ yātaḥ pitṛsandeśakṛd dvijaḥ |
ādāya tata āvṛttaḥ phalapuṣpasamitkuśān || 58 ||
[Analyze grammar]

dadarśa kāminaṃ kañcit śūdraṃ saha bhujiṣyayā |
pītvā ca madhu maireyaṃ madāghūrṇitanetrayā || 59 ||
[Analyze grammar]

mattayā viślathannīvyā vyapetaṃ nirapatrapam |
krīḍantaṃ anugāyantaṃ hasantamanayāntike || 60 ||
[Analyze grammar]

dṛṣṭvā tāṃ kāmaliptena bāhunā parirambhitām |
jagāma hṛcchayavaśaṃ sahasaiva vimohitaḥ || 61 ||
[Analyze grammar]

stambhayan ātmanātmānaṃ yāvatsattvaṃ yathāśrutam |
na śaśāka samādhātuṃ mano madanavepitam || 62 ||
[Analyze grammar]

tannimittasmaravyāja grahagrasto vicetanaḥ |
tāmeva manasā dhyāyan svadharmād virarāma ha || 63 ||
[Analyze grammar]

tāmeva toṣayāmāsa pitryeṇārthena yāvatā |
grāmyairmanoramaiḥ kāmaiḥ prasīdeta yathā tathā || 64 ||
[Analyze grammar]

viprāṃ svabhāryāmaprauḍhāṃ kule mahati lambhitām |
visasarjācirātpāpaḥ svairiṇyāpāṅgaviddhadhīḥ || 65 ||
[Analyze grammar]

yatastataścopaninye nyāyato'nyāyato dhanam |
babhārāsyāḥ kuṭumbinyāḥ kuṭumbaṃ mandadhīrayam || 66 ||
[Analyze grammar]

yadasau śāstramullaṅghya svairacāryatigarhitaḥ |
avartata ciraṃ kālaṃ aghāyuḥ aśucirmalāt || 67 ||
[Analyze grammar]

tata enaṃ daṇḍapāṇeḥ sakāśaṃ kṛtakilbiṣam |
neṣyāmo'kṛtanirveśaṃ yatra daṇḍena śuddhyati || 68 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
ṣaṣṭhaskandhe ajāmilopākhyāne prathamo'dhyāyaḥ || 1 ||
[Analyze grammar]