Chapter 20

[English text for this chapter is available]

maitreya uvāca |
bhagavānapi vaikuṇṭhaḥ sākaṃ maghavatā vibhuḥ |
yajñairyajñapatistuṣṭo yajñabhuk tamabhāṣata || 1 ||
[Analyze grammar]

śrībhagavānuvāca |
eṣa te'kārṣīd‍bhaṅgaṃ hayamedhaśatasya ha |
kṣamāpayata ātmānaṃ amuṣya kṣantumarhasi || 2 ||
[Analyze grammar]

sudhiyaḥ sādhavo loke naradeva narottamāḥ |
nābhidruhyanti bhūtebhyo yarhi nātmā kalevaram || 3 ||
[Analyze grammar]

puruṣā yadi muhyanti tvādṛśā devamāyayā |
śrama eva paraṃ jāto dīrghayā vṛddhasevayā || 4 ||
[Analyze grammar]

ataḥ kāyamimaṃ vidvān avidyākāmakarmabhiḥ |
ārabdha iti naivāsmin pratibuddho'nuṣajjate || 5 ||
[Analyze grammar]

asaṃsaktaḥ śarīre'smin amunotpādite gṛhe |
apatye draviṇe vāpi kaḥ kuryānmamatāṃ budhaḥ || 6 ||
[Analyze grammar]

ekaḥ śuddhaḥ svayaṃjyotiḥ nirguṇo'sau guṇāśrayaḥ |
sarvago'nāvṛtaḥ sākṣī nirātmā'tmā'tmanaḥ paraḥ || 7 ||
[Analyze grammar]

ya evaṃ santamātmānaṃ ātmasthaṃ veda pūruṣaḥ |
nājyate prakṛtistho'pi tad‍guṇaiḥ sa mayi sthitaḥ || 8 ||
[Analyze grammar]

yaḥ svadharmeṇa māṃ nityaṃ nirāśīḥ śraddhayānvitaḥ |
bhajate śanakaistasya mano rājan prasīdati || 9 ||
[Analyze grammar]

parityaktaguṇaḥ samyag darśano viśadāśayaḥ |
śāntiṃ me samavasthānaṃ brahma kaivalyamaśnute || 10 ||
[Analyze grammar]

udāsīnamivādhyakṣaṃ dravyajñānakriyātmanām |
kūṭasthaṃ imamātmānaṃ yo vedāpnoti śobhanam || 11 ||
[Analyze grammar]

bhinnasya liṅgasya guṇapravāho |
dravyakriyākārakacetanātmanaḥ |
dṛṣṭāsu sampatsu vipatsu sūrayo |
na vikriyante mayi baddhasauhṛdāḥ || 12 ||
[Analyze grammar]

samaḥ samānottamamadhyamādhamaḥ |
sukhe ca duḥkhe ca jitendriyāśayaḥ |
mayopakḷptākhilalokasaṃyuto |
vidhatsva vīrākhilalokarakṣaṇam || 13 ||
[Analyze grammar]

śreyaḥ prajāpālanameva rājño |
yatsāmparāye sukṛtāt ṣaṣṭhamaṃśam |
hartānyathā hṛtapuṇyaḥ prajānāṃ |
arakṣitā karahāro'ghamatti || 14 ||
[Analyze grammar]

evaṃ dvijāgryānumatānuvṛtta |
dharmapradhāno'nyatamo'vitāsyāḥ |
hrasvena kālena gṛhopayātān |
draṣṭāsi siddhānanuraktalokaḥ || 15 ||
[Analyze grammar]

varaṃ ca mat kañcana mānavendra |
vṛṇīṣva te'haṃ guṇaśīlayantritaḥ |
nāhaṃ makhairvai sulabhastapobhiḥ |
yogena vā yatsamacittavartī || 16 ||
[Analyze grammar]

maitreya uvāca |
sa itthaṃ lokaguruṇā viṣvaksenena viśvajit |
anuśāsita ādeśaṃ śirasā jagṛhe hareḥ || 17 ||
[Analyze grammar]

spṛśantaṃ pādayoḥ premṇā vrīḍitaṃ svena karmaṇā |
śatakratuṃ pariṣvajya vidveṣaṃ visasarja ha || 18 ||
[Analyze grammar]

bhagavānatha viśvātmā pṛthunopahṛtārhaṇaḥ |
samujjihānayā bhaktyā gṛhītacaraṇāmbujaḥ || 19 ||
[Analyze grammar]

prasthānābhimukho'pyenaṃ anugrahavilambitaḥ |
paśyan padmapalāśākṣo na pratasthe suhṛtsatām || 20 ||
[Analyze grammar]

sa ādirājo racitāñjalirhariṃ |
vilokituṃ nāśakadaśrulocanaḥ |
na kiñcanovāca sa bāṣpaviklavo |
hṛdopaguhyāmumadhādavasthitaḥ || 21 ||
[Analyze grammar]

athāvamṛjyāśrukalā vilokayan |
atṛptadṛggocaramāha pūruṣam |
padā spṛśantaṃ kṣitimaṃsa unnate |
vinyastahastāgramuraṅgavidviṣaḥ || 22 ||
[Analyze grammar]

pṛthuruvāca |
varān vibho tvadvaradeśvarād‍budhaḥ |
kathaṃ vṛṇīte guṇavikriyātmanām |
ye nārakāṇāmapi santi dehināṃ |
tānīśa kaivalyapate vṛṇe na ca || 23 ||
[Analyze grammar]

na kāmaye nātha tadapyahaṃ kvacit |
na yatra yuṣmat caraṇāmbujāsavaḥ |
mahattamāntarhṛdayānmukhacyuto |
vidhatsva karṇāyutameṣa me varaḥ || 24 ||
[Analyze grammar]

sa uttamaśloka mahanmukhacyuto |
bhavatpadāmbhojasudhā kaṇānilaḥ |
smṛtiṃ punarvismṛtatattvavartmanāṃ |
kuyogināṃ no vitaratyalaṃ varaiḥ || 25 ||
[Analyze grammar]

yaśaḥ śivaṃ suśrava āryasaṅgame |
yadṛcchayā copaśṛṇoti te sakṛt |
kathaṃ guṇajño viramedvinā paśuṃ |
śrīryatpravavre guṇasaṅgrahecchayā || 26 ||
[Analyze grammar]

athābhaje tvākhilapūruṣottamaṃ |
guṇālayaṃ padmakareva lālasaḥ |
apyāvayorekapatispṛdhoḥ kaliḥ |
na syātkṛtatvaccaraṇaikatānayoḥ || 27 ||
[Analyze grammar]

jagajjananyāṃ jagadīśa vaiśasaṃ |
syādeva yatkarmaṇi naḥ samīhitam |
karoṣi phalgvapyuru dīnavatsalaḥ |
sva eva dhiṣṇye'bhiratasya kiṃ tayā || 28 ||
[Analyze grammar]

bhajantyatha tvāmata eva sādhavo |
vyudastamāyāguṇavibhramodayam |
bhavatpadānusmaraṇādṛte satāṃ |
nimittamanyad‍bhagavanna vidmahe || 29 ||
[Analyze grammar]

manye giraṃ te jagatāṃ vimohinīṃ varaṃ |
vṛṇīṣveti bhajantamāttha yat |
vācā nu tantyā yadi te jano'sitaḥ |
kathaṃ punaḥ karma karoti mohitaḥ || 30 ||
[Analyze grammar]

tvanmāyayāddhā jana īśa khaṇḍito |
yadanyadāśāsta ṛtātmano'budhaḥ |
yathā cared‍bālahitaṃ pitā svayaṃ |
tathā tvamevārhasi naḥ samīhitum || 31 ||
[Analyze grammar]

maitreya uvāca |
ityādirājena nutaḥ sa viśvadṛk |
tamāha rājan mayi bhaktirastu te |
diṣṭyedṛśī dhīrmayi te kṛtā yayā |
māyāṃ madīyāṃ tarati sma dustyajām || 32 ||
[Analyze grammar]

tattvaṃ kuru mayādiṣṭaṃ apramattaḥ prajāpate |
madādeśakaro lokaḥ sarvatrāpnoti śobhanam || 33 ||
[Analyze grammar]

maitreya uvāca |
iti vainyasya rājarṣeḥ pratinandyārthavadvacaḥ |
pūjito'nugṛhītvainaṃ gantuṃ cakre'cyuto matim || 34 ||
[Analyze grammar]

devarṣipitṛgandharva siddhacāraṇapannagāḥ |
kinnarāpsaraso martyāḥ khagā bhūtānyanekaśaḥ || 35 ||
[Analyze grammar]

yajñeśvaradhiyā rājñā vāgvittāñjalibhaktitaḥ |
sabhājitā yayuḥ sarve vaikuṇṭhānugatāstataḥ || 36 ||
[Analyze grammar]

bhagavānapi rājarṣeḥ sopādhyāyasya cācyutaḥ |
haranniva mano'muṣya svadhāma pratyapadyata || 37 ||
[Analyze grammar]

adṛṣṭāya namaskṛtya nṛpaḥ sandarśitātmane |
avyaktāya ca devānāṃ devāya svapuraṃ yayau || 38 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
caturthaskandhe pṛthucarite viṃśo'dhyāyaḥ || 20 ||
[Analyze grammar]