Chapter 19

[English text for this chapter is available]

maitreya uvāca |
athādīkṣata rājā tu hayamedhaśatena saḥ |
brahmāvarte manoḥ kṣetre yatra prācī sarasvatī || 1 ||
[Analyze grammar]

tadabhipretya bhagavān karmātiśayamātmanaḥ |
śatakraturna mamṛṣe pṛthoryajñamahotsavam || 2 ||
[Analyze grammar]

yatra yajñapatiḥ sākṣād bhagavān harirīśvaraḥ |
anvabhūyata sarvātmā sarvalokaguruḥ prabhuḥ || 3 ||
[Analyze grammar]

anvito brahmaśarvābhyāṃ lokapālaiḥ sahānugaiḥ |
upagīyamāno gandharvaiḥ munibhiścāpsarogaṇaiḥ || 4 ||
[Analyze grammar]

siddhā vidyādharā daityā dānavā guhyakādayaḥ |
sunandanandapramukhāḥ pārṣadapravarā hareḥ || 5 ||
[Analyze grammar]

kapilo nārado datto yogeśāḥ sanakādayaḥ |
tamanvīyurbhāgavatā ye ca tatsevanotsukāḥ || 6 ||
[Analyze grammar]

yatra dharmadughā bhūmiḥ sarvakāmadughā satī |
dogdhi smābhīpsitān arthān yajamānasya bhārata || 7 ||
[Analyze grammar]

ūhuḥ sarvarasānnadyaḥ kṣīradadhyannagorasān |
taravo bhūrivarṣmāṇaḥ prāsūyanta madhucyutaḥ || 8 ||
[Analyze grammar]

sindhavo rat‍nanikarān girayo'nnaṃ caturvidham |
upāyanaṃ upājahruḥ sarve lokāḥ sapālakāḥ || 9 ||
[Analyze grammar]

iti cādhokṣajeśasya pṛthostu paramodayam |
asūyan bhagavān indraḥ pratighātamacīkarat || 10 ||
[Analyze grammar]

carameṇāśvamedhena yajamāne yajuṣpatim |
vainye yajñapaśuṃ spardhan apovāha tirohitaḥ || 11 ||
[Analyze grammar]

taṃ atrirbhagavānaikṣat tvaramāṇaṃ vihāyasā |
āmuktamiva pākhaṇḍaṃ yo'dharme dharmavibhramaḥ || 12 ||
[Analyze grammar]

atriṇā codito hantuṃ pṛthuputro mahārathaḥ |
anvadhāvata saṅkruddhaḥ tiṣṭha tiṣṭheti cābravīt || 13 ||
[Analyze grammar]

taṃ tādṛśākṛtiṃ vīkṣya mene dharmaṃ śarīriṇam |
jaṭilaṃ bhasmanācchannaṃ tasmai bāṇaṃ na muñcati || 14 ||
[Analyze grammar]

vadhānnivṛttaṃ taṃ bhūyo hantave'triracodayat |
jahi yajñahanaṃ tāta mahendraṃ vibudhādhamam || 15 ||
[Analyze grammar]

evaṃ vainyasutaḥ proktaḥ tvaramāṇaṃ vihāyasā |
anvadravad abhikruddho rāvaṇaṃ gṛdhrarāḍiva || 16 ||
[Analyze grammar]

so'śvaṃ rūpaṃ ca taddhitvā tasmā antarhitaḥ svarāṭ |
vīraḥ svapaśumādāya pituryajñaṃ upeyivān || 17 ||
[Analyze grammar]

tattasya cād‍bhutaṃ karma vicakṣya paramarṣayaḥ |
nāmadheyaṃ dadustasmai vijitāśva iti prabho || 18 ||
[Analyze grammar]

upasṛjya tamastīvraṃ jahārāśvaṃ punarhariḥ |
caṣālayūpataśchanno hiraṇyaraśanaṃ vibhuḥ || 19 ||
[Analyze grammar]

atriḥ sandarśayāmāsa tvaramāṇaṃ vihāyasā |
kapālakhaṭvāṅgadharaṃ vīro nainamabādhata || 20 ||
[Analyze grammar]

atriṇā coditastasmai sandadhe viśikhaṃ ruṣā |
so'śvaṃ rūpaṃ ca taddhitvā tasthāvantarhitaḥ svarāṭ || 21 ||
[Analyze grammar]

vīraścāśvamupādāya pitṛyajñamathāvrajat |
tadavadyaṃ hare rūpaṃ jagṛhurjñānadurbalāḥ || 22 ||
[Analyze grammar]

yāni rūpāṇi jagṛhe indro hayajihīrṣayā |
tāni pāpasya khaṇḍāni liṅgaṃ khaṇḍamihocyate || 23 ||
[Analyze grammar]

evamindre haratyaśvaṃ vainyayajñajighāṃsayā |
tad‍gṛhītavisṛṣṭeṣu pākhaṇḍeṣu matirnṛṇām || 24 ||
[Analyze grammar]

dharma ityupadharmeṣu nagnaraktapaṭādiṣu |
prāyeṇa sajjate bhrāntyā peśaleṣu ca vāgmiṣu || 25 ||
[Analyze grammar]

tadabhijñāya bhagavān pṛthuḥ pṛthuparākramaḥ |
indrāya kupito bāṇaṃ ādattodyatakārmukaḥ || 26 ||
[Analyze grammar]

tamṛtvijaḥ śakravadhābhisandhitaṃ |
vicakṣya duṣprekṣyamasahyaraṃhasam |
nivārayāmāsuraho mahāmate |
na yujyate'trānyavadhaḥ pracoditāt || 27 ||
[Analyze grammar]

vayaṃ marutvantamihārthanāśanaṃ |
hvayāmahe tvacchravasā hatatviṣam |
ayātayāmopahavairanantaraṃ |
prasahya rājan juhavāma te'hitam || 28 ||
[Analyze grammar]

ityāmantrya kratupatiṃ vidurāsyartvijo ruṣā |
srugghastān juhvato'bhyetya svayambhūḥ pratyaṣedhata || 29 ||
[Analyze grammar]

na vadhyo bhavatāṃ indro yadyajño bhagavattanuḥ |
yaṃ jighāṃsatha yajñena yasyeṣṭāstanavaḥ surāḥ || 30 ||
[Analyze grammar]

tadidaṃ paśyata mahad dharmavyatikaraṃ dvijāḥ |
indreṇānuṣṭhitaṃ rājñaḥ karmaitadvijighāṃsatā || 31 ||
[Analyze grammar]

pṛthukīrteḥ pṛthorbhūyāt tarhyekonaśatakratuḥ |
alaṃ te kratubhiḥ sviṣṭaiḥ yad‍bhavān mokṣadharmavit || 32 ||
[Analyze grammar]

naivātmane mahendrāya roṣamāhartumarhasi |
ubhāvapi hi bhadraṃ te uttamaślokavigrahau || 33 ||
[Analyze grammar]

māsminmahārāja kṛthāḥ sma cintāṃ |
niśāmayāsmadvaca ādṛtātmā |
yaddhyāyato daivahataṃ nu kartuṃ |
mano'tiruṣṭaṃ viśate tamo'ndham || 34 ||
[Analyze grammar]

kraturviramatāmeṣa deveṣu duravagrahaḥ |
dharmavyatikaro yatra pākhaṇḍaiḥ indranirmitaiḥ || 35 ||
[Analyze grammar]

ebhirindropasaṃsṛṣṭaiḥ pākhaṇḍairhāribhirjanam |
hriyamāṇaṃ vicakṣvainaṃ yaste yajñadhrugaśvamuṭ || 36 ||
[Analyze grammar]

bhavānparitrātumihāvatīrṇo |
dharmaṃ janānāṃ samayānurūpam |
venāpacārādavaluptamadya |
taddehato viṣṇukalāsi vainya || 37 ||
[Analyze grammar]

sa tvaṃ vimṛśyāsya bhavaṃ prajāpate |
saṅkalpanaṃ viśvasṛjāṃ pipīpṛhi |
aindrīṃ ca māyāmupadharmamātaraṃ |
pracaṇḍapākhaṇḍapathaṃ prabho jahi || 38 ||
[Analyze grammar]

maitreya uvāca |
itthaṃ sa lokaguruṇā samādiṣṭo viśāmpatiḥ |
tathā ca kṛtvā vātsalyaṃ maghonāpi ca sandadhe || 39 ||
[Analyze grammar]

kṛtāvabhṛthasnānāya pṛthave bhūrikarmaṇe |
varāndaduste varadā ye tad‍barhiṣi tarpitāḥ || 40 ||
[Analyze grammar]

viprāḥ satyāśiṣastuṣṭāḥ śraddhayā labdhadakṣiṇāḥ |
āśiṣo yuyujuḥ kṣattaḥ ādirājāya satkṛtāḥ || 41 ||
[Analyze grammar]

tvayā'hūtā mahābāho sarva eva samāgatāḥ |
pūjitā dānamānābhyāṃ pitṛdevarṣimānavāḥ || 42 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
caturthaskandhe ekonaviṃśo'dhyāyaḥ || 19 ||
[Analyze grammar]