Chapter 15

[English text for this chapter is available]

maitreya uvāca |
atha tasya punarvipraiḥ aputrasya mahīpateḥ |
bāhubhyāṃ mathyamānābhyāṃ mithunaṃ samapadyata || 1 ||
[Analyze grammar]

tad dṛṣṭvā mithunaṃ jātaṃ ṛṣayo brahmavādinaḥ |
ūcuḥ paramasantuṣṭā viditvā bhagavatkalām || 2 ||
[Analyze grammar]

ṛṣaya ūcuḥ |
eṣa viṣṇorbhagavataḥ kalā bhuvanapālinī |
iyaṃ ca lakṣmyāḥ sambhūtiḥ puruṣasyānapāyinī || 3 ||
[Analyze grammar]

ayaṃ tu prathamo rājñāṃ pumān prathayitā yaśaḥ |
pṛthurnāma mahārājo bhaviṣyati pṛthuśravāḥ || 4 ||
[Analyze grammar]

iyaṃ ca sudatī devī guṇabhūṣaṇabhūṣaṇā |
arcirnāma varārohā pṛthumevāvarundhatī || 5 ||
[Analyze grammar]

eṣa sākṣāt hareraṃśo jāto lokarirakṣayā |
iyaṃ ca tatparā hi śrīḥ anujajñe'napāyinī || 6 ||
[Analyze grammar]

maitreya uvāca |
praśaṃsanti sma taṃ viprā gandharvapravarā jaguḥ |
mumucuḥ sumanodhārāḥ siddhā nṛtyanti svaḥstriyaḥ || 7 ||
[Analyze grammar]

śaṅkhatūryamṛdaṅgādyā nedurdundubhayo divi |
tatra sarva upājagmuḥ devarṣipitṝṇāṃ gaṇāḥ || 8 ||
[Analyze grammar]

brahmā jagad‍gururdevaiḥ sahāsṛtya sureśvaraiḥ |
vainyasya dakṣiṇe haste dṛṣṭvā cihnaṃ gadābhṛtaḥ || 9 ||
[Analyze grammar]

pādayoḥ aravindaṃ ca taṃ vai mene hareḥ kalām |
yasyāpratihataṃ cakraṃ aṃśaḥ sa parameṣṭhinaḥ || 10 ||
[Analyze grammar]

tasyābhiṣeka ārabdho brāhmaṇairbrahmavādibhiḥ |
ābhiṣecanikānyasmai ājahruḥ sarvato janāḥ || 11 ||
[Analyze grammar]

saritsamudrā girayo nāgā gāvaḥ khagā mṛgāḥ |
dyauḥ kṣitiḥ sarvabhūtāni samājahrurupāyanam || 12 ||
[Analyze grammar]

so'bhiṣikto mahārājaḥ suvāsāḥ sādhvalaṅkṛtaḥ |
pat‍nyārciṣālaṅkṛtayā vireje'gnirivāparaḥ || 13 ||
[Analyze grammar]

tasmai jahāra dhanado haimaṃ vīra varāsanam |
varuṇaḥ salilasrāvaṃ ātapatraṃ śaśiprabham || 14 ||
[Analyze grammar]

vāyuśca vālavyajane dharmaḥ kīrtimayīṃ srajam |
indraḥ kirīṭamutkṛṣṭaṃ daṇḍaṃ saṃyamanaṃ yamaḥ || 15 ||
[Analyze grammar]

brahmā brahmamayaṃ varma bhāratī hāramuttamam |
hariḥ sudarśanaṃ cakraṃ tat pat‍nyavyāhatāṃ śriyam || 16 ||
[Analyze grammar]

daśacandramasiṃ rudraḥ śatacandraṃ tathāmbikā |
somo'mṛtamayānaśvān tvaṣṭā rūpāśrayaṃ ratham || 17 ||
[Analyze grammar]

agnirājagavaṃ cāpaṃ sūryo raśmimayāniṣūn |
bhūḥ pāduke yogamayyau dyauḥ puṣpāvalimanvaham || 18 ||
[Analyze grammar]

nāṭyaṃ sugītaṃ vāditraṃ antardhānaṃ ca khecarāḥ |
ṛṣayaścāśiṣaḥ satyāḥ samudraḥ śaṅkhamātmajam || 19 ||
[Analyze grammar]

sindhavaḥ parvatā nadyo rathavīthīrmahātmanaḥ |
sūto'tha māgadho vandī taṃ stotumupatasthire || 20 ||
[Analyze grammar]

stāvakān tānabhipretya pṛthurvainyaḥ pratāpavān |
meghanirhrādayā vācā prahasan idamabravīt || 21 ||
[Analyze grammar]

pṛthuruvāca |
bhoḥ sūta he māgadha saumya vandin |
loke'dhunāspaṣṭaguṇasya me syāt |
kimāśrayo me stava eṣa yojyatāṃ |
mā mayyabhūvan vitathā giro vaḥ || 22 ||
[Analyze grammar]

tasmātparokṣe'smadupaśrutānyalaṃ |
kariṣyatha stotramapīcyavācaḥ |
satyuttamaślokaguṇānuvāde |
jugupsitaṃ na stavayanti sabhyāḥ || 23 ||
[Analyze grammar]

mahad‍guṇānātmani kartumīśaḥ |
kaḥ stāvakaiḥ stāvayate'sato'pi |
te'syābhaviṣyan iti vipralabdho |
janāvahāsaṃ kumatirna veda || 24 ||
[Analyze grammar]

prabhavo hyātmanaḥ stotraṃ jugupsantyapi viśrutāḥ |
hrīmantaḥ paramodārāḥ pauruṣaṃ vā vigarhitam || 25 ||
[Analyze grammar]

vayaṃ tu aviditā loke sūtādyāpi varīmabhiḥ |
karmabhiḥ kathamātmānaṃ gāpayiṣyāma bālavat || 26 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
caturthaskandhe pṛthucarite pañcadaśo'dhyāyaḥ || 15 ||
[Analyze grammar]