Chapter 5

[English text for this chapter is available]

śrīśuka uvāca |
dvāri dyunadyā ṛṣabhaḥ kurūṇāṃ |
maitreyamāsīnamagādhabodham |
kṣattopasṛtyācyutabhāvasiddhaḥ |
papraccha sauśīlyaguṇābhitṛptaḥ || 1 ||
[Analyze grammar]

vidura uvāca |
sukhāya karmāṇi karoti loko |
na taiḥ sukhaṃ vānyadupāramaṃ vā |
vindeta bhūyastata eva duḥkhaṃ |
yadatra yuktaṃ bhagavān vadennaḥ || 2 ||
[Analyze grammar]

janasya kṛṣṇād vimukhasya daivād |
adharmaśīlasya suduḥkhitasya |
anugrahāyeha caranti nūnaṃ |
bhūtāni bhavyāni janārdanasya || 3 ||
[Analyze grammar]

tatsādhuvaryādiśa vartma śaṃ naḥ |
saṃrādhito bhagavān yena puṃsām |
hṛdi sthito yacchati bhaktipūte |
jñānaṃ satattvādhigamaṃ purāṇam || 4 ||
[Analyze grammar]

karoti karmāṇi kṛtāvatāro |
yānyātmataṃtro bhagavān tryadhīśaḥ |
yathā sasarjāgra idaṃ nirīhaḥ |
saṃsthāpya vṛttiṃ jagato vidhatte || 5 ||
[Analyze grammar]

yathā punaḥ sve kha idaṃ niveśya |
śete guhāyāṃ sa nivṛttavṛttiḥ |
yogeśvarādhīśvara eka etad |
anupraviṣṭo bahudhā yathā'sīt || 6 ||
[Analyze grammar]

krīḍan vidhatte dvijagosurāṇāṃ |
kṣemāya karmāṇyavatārabhedaiḥ |
mano na tṛpyatyapi śṛṇvatāṃ naḥ |
suślokamauleścaritāmṛtāni || 7 ||
[Analyze grammar]

yaistattvabhedaiḥ adhilokanātho |
lokānalokān saha lokapālān |
acīkḷpadyatra hi sarvasattva |
nikāyabhedo'dhikṛtaḥ pratītaḥ || 8 ||
[Analyze grammar]

yena prajānāmuta ātmakarma |
rūpābhidhānāṃ ca bhidāṃ vyadhatta |
nārāyaṇo viśvasṛgātmayoniḥ |
etacca no varṇaya vipravarya || 9 ||
[Analyze grammar]

parāvareṣāṃ bhagavan vratāni |
śrutāni me vyāsamukhādabhīkṣṇam |
atṛpnuma kṣullasukhāvahānāṃ |
teṣāmṛte kṛṣṇakathāmṛtaughāt || 10 ||
[Analyze grammar]

kastṛpnuyāttīrthapado'bhidhānāt |
satreṣu vaḥ sūribhirīḍyamānāt |
yaḥ karṇanāḍīṃ puruṣasya yāto |
bhavapradāṃ geharatiṃ chinatti || 11 ||
[Analyze grammar]

munirvivakṣurbhagavad‍guṇānāṃ |
sakhāpi te bhāratamāha kṛṣṇaḥ |
yasmin nṛṇāṃ grāmyasukhānuvādaiḥ |
matirgṛhītā nu hareḥ kathāyām || 12 ||
[Analyze grammar]

sā śraddadhānasya vivardhamānā |
viraktimanyatra karoti puṃsaḥ |
hareḥ padānusmṛtinirvṛtasya |
samastaduḥkhāpyayamāśu dhatte || 13 ||
[Analyze grammar]

tān śocyaśocyān avido'nuśoce |
hareḥ kathāyāṃ vimukhānaghena |
kṣiṇoti devo'nimiṣastu yeṣāṃ |
āyurvṛthāvādagatismṛtīnām || 14 ||
[Analyze grammar]

tadasya kauṣārava śarmadātuḥ |
hareḥ kathāmeva kathāsu sāram |
uddhṛtya puṣpebhya ivārtabandho |
śivāya naḥ kīrtaya tīrthakīrteḥ || 15 ||
[Analyze grammar]

sa viśvajanmasthitisaṃyamārthe |
kṛtāvatāraḥ pragṛhītaśaktiḥ |
cakāra karmāṇyatipūruṣāṇi |
yānīśvaraḥ kīrtaya tāni mahyam || 16 ||
[Analyze grammar]

śrīśuka uvāca |
sa evaṃ bhagavān pṛṣṭaḥ kṣattrā kauṣāravirmuniḥ |
puṃsāṃ niḥśreyasārthena tamāha bahu mānayan || 17 ||
[Analyze grammar]

maitreya uvāca |
sādhu pṛṣṭaṃ tvayā sādho lokān sādhu anugṛhṇatā |
kīrtiṃ vitanvatā loke ātmano'dhokṣajātmanaḥ || 18 ||
[Analyze grammar]

naitaccitraṃ tvayi kṣattaḥ bādarāyaṇavīryaje |
gṛhīto'nanyabhāvena yattvayā harirīśvaraḥ || 19 ||
[Analyze grammar]

māṇḍavyaśāpād bhagavān prajāsaṃyamano yamaḥ |
bhrātuḥ kṣetre bhujiṣyāyāṃ jātaḥ satyavatīsutāt || 20 ||
[Analyze grammar]

bhavān bhagavato nityaṃ sammataḥ sānugasya ha |
yasya jñānopadeśāya mā'diśad‍bhagavān vrajan || 21 ||
[Analyze grammar]

atha te bhagavallīlā yogamāyorubṛṃhitāḥ |
viśvasthiti udbhavāntārthā varṇayāmi anupūrvaśaḥ || 22 ||
[Analyze grammar]

bhagavān eka āsedaṃ agra ātmā'tmanāṃ vibhuḥ |
ātmecchānugatāvātmā nānāmatyupalakṣaṇaḥ || 23 ||
[Analyze grammar]

sa vā eṣa tadā draṣṭā nāpaśyad dṛśyamekarāṭ |
mene'santamivātmānaṃ suptaśaktiḥ asuptadṛk || 24 ||
[Analyze grammar]

sā vā etasya saṃdraṣṭuḥ śaktiḥ sad asadātmikā |
māyā nāma mahābhāga yayedaṃ nirmame vibhuḥ || 25 ||
[Analyze grammar]

kālavṛttyā tu māyāyāṃ guṇamayyāmadhokṣajaḥ |
puruṣeṇātmabhūtena vīryamādhatta vīryavān || 26 ||
[Analyze grammar]

tato'bhavan mahattattvaṃ avyaktāt kālacoditāt |
vijñānātmā'tmadehasthaṃ viśvaṃ vyañjan tamonudaḥ || 27 ||
[Analyze grammar]

so'pyaṃśaguṇakālātmā bhagavad dṛṣṭigocaraḥ |
ātmānaṃ vyakarod ātmā viśvasyāsya sisṛkṣayā || 28 ||
[Analyze grammar]

mahattattvād vikurvāṇād ahaṃtattvaṃ vyajāyata |
kāryakāraṇakartrātmā bhūtendriyamanomayaḥ || 29 ||
[Analyze grammar]

vaikārikastaijasaśca tāmasaścetyahaṃ tridhā |
ahaṃtattvād vikurvāṇāt mano vaikārikāt abhūt |
vaikārikāśca ye devā arthābhivyañjanaṃ yataḥ || 30 ||
[Analyze grammar]

taijasāni indriyāṇyeva jñānakarmamayāni ca |
tāmaso bhūtasūkṣmādiḥ yataḥ khaṃ liṅgamātmanaḥ || 31 ||
[Analyze grammar]

kālamāyāṃśayogena bhagavad vīkṣitaṃ nabhaḥ |
nabhaso'nusṛtaṃ sparśaṃ vikurvan nirmame'nilam || 32 ||
[Analyze grammar]

anilo'pi vikurvāṇo nabhasorubalānvitaḥ |
sasarja rūpatanmātraṃ jyotirlokasya locanam || 33 ||
[Analyze grammar]

anilena anvitaṃ jyotiḥ vikurvat paravīkṣitam |
ādhattāmbho rasamayaṃ kālamāyāṃśayogataḥ || 34 ||
[Analyze grammar]

jyotiṣāmbho'nusaṃsṛṣṭaṃ vikurvad brahmavīkṣitam |
mahīṃ gandhaguṇāṃ ādhāt kālamāyāṃśayogataḥ || 35 ||
[Analyze grammar]

bhūtānāṃ nabhaādīnāṃ yad yad yad bhavyāvarāvaram |
teṣāṃ parānusaṃsargād yathā saṅkhyaṃ guṇān viduḥ || 36 ||
[Analyze grammar]

ete devāḥ kalā viṣṇoḥ kālamāyāṃśaliṅginaḥ |
nānātvāt svakriyānīśāḥ procuḥ prāñjalayo vibhum || 37 ||
[Analyze grammar]

devā ūcuḥ |
namāma te deva padāravindaṃ |
prapannatāpopaśamātapatram |
yanmūlaketā yatayo'ñjasoru |
saṃsāraduḥkhaṃ bahirutkṣipanti || 38 ||
[Analyze grammar]

dhātaryadasmin bhava īśa jīvāḥ |
tāpatrayeṇābhihatā na śarma |
ātmanlabhante bhagavaṃstavāṅghri |
cchāyāṃ savidyāmata āśrayema || 39 ||
[Analyze grammar]

mārganti yatte mukhapadmanīḍai |
śchandaḥsuparṇaiḥ ṛṣayo vivikte |
yasyāghamarṣodasaridvarāyāḥ |
padaṃ padaṃ tīrthapadaḥ prapannāḥ || 40 ||
[Analyze grammar]

yat śraddhayā śrutavatyā ca bhaktyā |
sammṛjyamāne hṛdaye'vadhāya |
jñānena vairāgyabalena dhīrā |
vrajema tatte'ṅghrisarojapīṭham || 41 ||
[Analyze grammar]

viśvasya janmasthitisaṃyamārthe |
kṛtāvatārasya padāmbujaṃ te |
vrajema sarve śaraṇaṃ yadīśa |
smṛtaṃ prayacchatyabhayaṃ svapuṃsām || 42 ||
[Analyze grammar]

yatsānubandhe'sati dehagehe |
mamāhaṃ iti ūḍha durāgrahāṇām |
puṃsāṃ sudūraṃ vasato'pi puryāṃ |
bhajema tatte bhagavan padābjam || 43 ||
[Analyze grammar]

tān vai hyasadvṛttibhirakṣibhirye |
parāhṛtāntarmanasaḥ pareśa |
atho na paśyanti urugāya nūnaṃ |
ye te padanyāsavilāsalakṣyāḥ || 44 ||
[Analyze grammar]

pānena te deva kathāsudhāyāḥ |
pravṛddhabhaktyā viśadāśayā ye |
vairāgyasāraṃ pratilabhya bodhaṃ |
yathāñjasān vīyurakuṇṭhadhiṣṇyam || 45 ||
[Analyze grammar]

tathāpare cātmasamādhiyoga |
balena jitvā prakṛtiṃ baliṣṭhām |
tvāmeva dhīrāḥ puruṣaṃ viśanti |
teṣāṃ śramaḥ syānna tu sevayā te || 46 ||
[Analyze grammar]

tatte vayaṃ lokasisṛkṣayādya |
tvayānusṛṣṭāstribhirātmabhiḥ sma |
sarve viyuktāḥ svavihāratantraṃ |
na śaknumastat pratihartave te || 47 ||
[Analyze grammar]

yāvad‍baliṃ te'ja harāma kāle |
yathā vayaṃ cānnamadāma yatra |
yathobhayeṣāṃ ta ime hi lokā |
baliṃ haranto'nnamadantyanūhāḥ || 48 ||
[Analyze grammar]

tvaṃ naḥ surāṇāmasi sānvayānāṃ |
kūṭastha ādyaḥ puruṣaḥ purāṇaḥ |
tvaṃ deva śaktyāṃ guṇakarmayonau |
retastvajāyāṃ kavimādadhe'jaḥ || 49 ||
[Analyze grammar]

tato vayaṃ matpramukhā yadarthe |
babhūvimātman karavāma kiṃ te |
tvaṃ naḥ svacakṣuḥ paridehi śaktyā |
deva kriyārthe yad anugrahāṇām || 50 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
tṛtīyaskandhe viduroddhavasaṃvāde pañcamo'dhyāyaḥ || 5 ||
[Analyze grammar]