Chapter 2

[English text for this chapter is available]

śrīśuka uvāca |
evaṃ purā dhāraṇayā'tmayoniḥ |
naṣṭāṃ smṛtiṃ pratyavarudhya tuṣṭāt |
tathā sasarjedamamoghadṛṣṭiḥ |
yathāpyayāt prāk vyavasāyabuddhiḥ || 1 ||
[Analyze grammar]

śābdasya hi brahmaṇa eṣa panthā |
yannāmabhirdhyāyati dhīrapārthaiḥ |
paribhraman tatra na vindate'rthān |
māyāmaye vāsanayā śayānaḥ || 2 ||
[Analyze grammar]

ataḥ kavirnāmasu yāvadarthaḥ |
syād apramatto vyavasāyabuddhiḥ |
siddhe'nyathārthe na yateta tatra |
pariśramaṃ tatra samīkṣamāṇaḥ || 3 ||
[Analyze grammar]

satyāṃ kṣitau kiṃ kaśipoḥ prayāsaiḥ |
bāhau svasiddhe hyupabarhaṇaiḥ kim |
satyañjalau kiṃ purudhānnapātryā |
digvalkalādau sati kiṃ dukūlaiḥ || 4 ||
[Analyze grammar]

cīrāṇi kiṃ pathi na santi diśanti bhikṣāṃ |
naivāṅghripāḥ parabhṛtaḥ sarito'pyaśuṣyan |
ruddhā guhāḥ kimajito'vati nopasannān |
kasmād bhajaṃti kavayo dhanadurmadāndhān || 5 ||
[Analyze grammar]

evaṃ svacitte svata eva siddha |
ātmā priyo'rtho bhagavāna anaṃtaḥ |
taṃ nirvṛto niyatārtho bhajeta |
saṃsārahetūparamaśca yatra || 6 ||
[Analyze grammar]

kastāṃ tvanādṛtya parānucintāṃ |
ṛte paśūn asatīṃ nāma kuryāt |
paśyañjanaṃ patitaṃ vaitaraṇyāṃ |
svakarmajān paritāpān juṣāṇam || 7 ||
[Analyze grammar]

kecit svadehāntarhṛdayāvakāśe |
prādeśamātraṃ puruṣaṃ vasantam |
caturbhujaṃ kañjarathāṅgaśaṅkha |
gadādharaṃ dhāraṇayā smaranti || 8 ||
[Analyze grammar]

prasannavaktraṃ nalināyatekṣaṇaṃ |
kadaṃbakiñjalkapiśaṅgavāsasam |
lasanmahārat‍nahiraṇmayāṅgadaṃ |
sphuran mahārat‍nakirīṭakuṇḍalam || 9 ||
[Analyze grammar]

unnidrahṛtpaṅkajakarṇikālaye |
yogeśvarāsthāpitapādapallavam |
śrīlakṣaṇaṃ kaustubharat‍nakandharaṃ |
amlānalakṣmyā vanamālayācitam || 10 ||
[Analyze grammar]

vibhūṣitaṃ mekhalayā'ṅgulīyakaiḥ |
mahādhanairnūpurakaṅkaṇādibhiḥ |
snigdhāmalākuñcitanīlakuntalaiḥ |
virocamānānanahāsapeśalam || 11 ||
[Analyze grammar]

adīnalīlāhasitekṣaṇollasad |
bhrūbhaṅgasaṃsūcitabhūryanugraham |
īkṣeta cintāmayamenamīśvaraṃ |
yāvanmano dhāraṇayā'vatiṣṭhate || 12 ||
[Analyze grammar]

ekaikaśo'ṅgāni dhiyānubhāvayet |
pādādi yāvad hasitaṃ gadābhṛtaḥ |
jitaṃ jitaṃ sthānamapohya dhārayet |
paraṃ paraṃ śuddhyati dhīryathā yathā || 13 ||
[Analyze grammar]

yāvanna jāyeta parāvare'smin |
viśveśvare draṣṭari bhaktiyogaḥ |
tāvat sthavīyaḥ puruṣasya rūpaṃ |
kriyāvasāne prayataḥ smareta || 14 ||
[Analyze grammar]

sthiraṃ sukhaṃ cāsanamāsthito yatiḥ |
yadā jihāsurimamaṅga lokam |
kāle ca deśe ca mano na sajjayet |
prāṇān niyacchenmanasā jitāsuḥ || 15 ||
[Analyze grammar]

manaḥ svabuddhyā'malayā niyamya |
kṣetrajña etāṃ ninayet tamātmani |
ātmānamātmanyavarudhya dhīro |
labdhopaśāntirvirameta kṛtyāt || 16 ||
[Analyze grammar]

na yatra kālo'nimiṣāṃ paraḥ prabhuḥ |
kuto nu devā jagatāṃ ya īśire |
na yatra sattvaṃ na rajastamaśca |
na vai vikāro na mahān pradhānam || 17 ||
[Analyze grammar]

paraṃ padaṃ vaiṣṇavamāmananti |
tad yanneti netītyatadutsisṛkṣavaḥ |
visṛjya daurātmyamananyasauhṛdā |
hṛdopaguhyārhapadaṃ pade pade || 18 ||
[Analyze grammar]

itthaṃ munistūparamed vyavasthito |
vijñānadṛgvīrya surandhitāśayaḥ |
svapārṣṇina'pīḍya gudaṃ tato'nilaṃ |
sthāneṣu ṣaṭsūnnamayejjitaklamaḥ || 19 ||
[Analyze grammar]

nābhyāṃ sthitaṃ hṛdyadhiropya tasmād |
ududānagatyorasi taṃ nayenmuniḥ |
tato'nusandhāya dhiyā manasvī |
svatālumūlaṃ śanakairnayeta || 20 ||
[Analyze grammar]

tasmād bhruvorantaramunnayeta |
niruddhasaptāyatano'napekṣaḥ |
sthitvā muhūrtārdhamakuṇṭhadṛṣṭiḥ |
nirbhidya mūrdhan visṛjet paraṃ gataḥ || 21 ||
[Analyze grammar]

yadi prayāsyan nṛpa pārameṣṭhyaṃ |
vaihāyasānāmuta yad vihāram |
aṣṭādhipatyaṃ guṇasannivāye |
sahaiva gacchenmanasendriyaiśca || 22 ||
[Analyze grammar]

yogeśvarāṇāṃ gatimāhurantaḥ |
bahistrilokyāḥ pavanāntarātmanām |
na karmabhistāṃ gatimāpnuvanti |
vidyātapoyogasamādhibhājām || 23 ||
[Analyze grammar]

vaiśvānaraṃ yāti vihāyasā gataḥ |
suṣumnayā brahmapathena śociṣā |
vidhūtakalko'tha harerudastāt |
prayāti cakraṃ nṛpa śaiśumāram || 24 ||
[Analyze grammar]

yo'ntaḥ pacati bhūtānāṃ yastapatyaṇḍamadhyagaḥ |
so'gnirvaiśvānaro mārgo devānāṃ pitṛṇāṃ muneḥ |
devayānaṃ piṅgalābhiḥ hanyeti śatāyuṣā |
rātrīriḍābhiḥ pitṛṇāṃ viṣuvattāṃ suṣumnayā |
These two shlokas are found only in Madhwa school |
edition and Shri Vijayadhwajatirtha commented on these |
tadviśvanābhiṃ tvativartya viṣṇoḥ |
aṇīyasā virajenātmanaikaḥ |
namaskṛtaṃ brahmavidāmupaiti |
kalpāyuṣo yad vibudhā ramante || 25 ||
[Analyze grammar]

atho anantasya mukhānalena |
dandahyamānaṃ sa nirīkṣya viśvam |
niryāti siddheśvarayuṣṭadhiṣṇyaṃ |
yad dvaiparārdhyaṃ tadu pārameṣṭhyam || 26 ||
[Analyze grammar]

na yatra śoko na jarā na mṛtyuḥ |
na ārtiḥ na codvega ṛte kutaścit |
yaccittato'daḥ kṛpayānidaṃ vidāṃ |
durantaduḥkhaprabhavānudarśanāt || 27 ||
[Analyze grammar]

tato viśeṣaṃ pratipadya nirbhayaḥ |
tenātmanāpo'nalamūrtiratvaran |
jyotirmayo vāyumupetya kāle |
vāyvātmanā khaṃ bṛhadātmaliṅgam || 28 ||
[Analyze grammar]

ghrāṇena gandhaṃ rasanena vai rasaṃ |
rūpaṃ ca dṛṣṭyā śvasanaṃ tvacaiva |
śrotreṇa copetya nabhoguṇatvaṃ |
prāṇena cākūtimupaiti yogī || 29 ||
[Analyze grammar]

sa bhūtasūkṣmendriyasannikarṣaṃ |
manomayaṃ devamayaṃ vikāryam |
saṃsādya gatyā saha tena yāti |
vijñānatattvaṃ guṇasaṃnirodham || 30 ||
[Analyze grammar]

tenātmanātmānamupaiti śāntaṃ |
ānaṃdamānaṃdamayo'vasāne |
etāṃ gatiṃ bhāgavatīṃ gato yaḥ |
sa vai punarneha viṣajjate'ṅga || 31 ||
[Analyze grammar]

ete sṛtī te nṛpa vedagīte |
tvayābhipṛṣṭe ca sanātane ca |
ye vai purā brahmaṇa āha tuṣṭa |
ārādhito bhagavān vāsudevaḥ || 32 ||
[Analyze grammar]

na hyato'nyaḥ śivaḥ panthā viśataḥ saṃsṛtāviha |
vāsudeve bhagavati bhaktiyogo yato bhavet || 33 ||
[Analyze grammar]

bhagavānbrahma kārtsnyena triran vīkṣya manīṣayā |
tadadhyavasyat kūṭastho ratirātman yato bhavet || 34 ||
[Analyze grammar]

bhagavān sarvabhūteṣu lakṣitaḥ svātmanā hariḥ |
dṛśyairbuddhyādibhirdraṣṭā lakṣaṇaiḥ anumāpakaiḥ || 35 ||
[Analyze grammar]

tasmāt sarvātmanā rājan hariḥ sarvatra sarvadā |
śrotavyaḥ kīrtitavyaśca smartavyo bhagavān nṛṇām || 36 ||
[Analyze grammar]

pibanti ye bhagavata ātmanaḥ |
satāṃ kathāmṛtaṃ śravaṇapuṭeṣu sambhṛtam |
punanti te viṣayavidūṣitāśayaṃ |
vrajanti taccaraṇasaroruhāntikam || 37 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
dvitīyaskaṃdhe dvitīyo'dhyāyaḥ || 2 ||
[Analyze grammar]