Chapter 1

[English text for this chapter is available]

janmādyasya yato'nvayāditarataḥ cārtheṣvabhijñaḥ svarāṭ |
tene brahma hṛdā ya ādikavaye muhyanti yat sūrayaḥ |
tejovārimṛdāṃ yathā vinimayo yatra trisargo'mṛṣā |
dhāmnā svena sadā nirastakuhakaṃ satyaṃ paraṃ dhīmahi || 1 ||
[Analyze grammar]

dharmaḥ projjhitakaitavo'tra paramo nirmatsarāṇāṃ satāṃ |
vedyaṃ vāstavamatra vastu śivadaṃ tāpatrayonmūlanam |
śrīmad‍bhāgavate mahāmunikṛte kiṃ vā parairīśvaraḥ |
sadyo hṛdyavarudhyate'tra kṛtibhiḥ śuśrūṣubhiḥ tat kṣaṇāt || 2 ||
[Analyze grammar]

nigamakalpatarorgalitaṃ phalaṃ |
śukamukhād amṛtadravasaṃyutam |
pibata bhāgavataṃ rasamālayaṃ |
muhuraho rasikā bhuvi bhāvukāḥ || 3 ||
[Analyze grammar]

naimiṣe'nimiṣakṣetre ṛṣayaḥ śaunakādayaḥ |
satraṃ svargāyalokāya sahasrasamamāsata || 4 ||
[Analyze grammar]

ta ekadā tu munayaḥ prātarhutahutāgnayaḥ |
satkṛtaṃ sūtamāsīnaṃ papracchuḥ idamādarāt || 5 ||
[Analyze grammar]

ṛṣaya ūcuḥ |
tvayā khalu purāṇāni setihāsāni cānagha |
ākhyātānyapyadhītāni dharmaśāstrāṇi yānyuta || 6 ||
[Analyze grammar]

yāni vedavidāṃ śreṣṭho bhagavān bādarāyaṇaḥ |
anye ca munayaḥ sūta parāvaravido viduḥ || 7 ||
[Analyze grammar]

vettha tvaṃ saumya tatsarvaṃ tattvataḥ tadanugrahāt |
brūyuḥ snigdhasya śiṣyasya guravo guhyamapyuta || 8 ||
[Analyze grammar]

tatra tatrāñjasā'yuṣman bhavatā yad viniścitam |
puṃsāṃ ekāntataḥ śreyaḥ tannaḥ śaṃsitumarhasi || 9 ||
[Analyze grammar]

prāyeṇālpāyuṣaḥ sabhya kalau asmin yuge janāḥ |
mandāḥ sumandamatayo mandabhāgyā hyupadrutāḥ || 10 ||
[Analyze grammar]

bhūrīṇi bhūrikarmāṇi śrotavyāni vibhāgaśaḥ |
ataḥ sādho'tra yatsāraṃ samuddhṛtya manīṣayā |
brūhi naḥ śraddadhānānāṃ yenātmā saṃprasīdati || 11 ||
[Analyze grammar]

sūta jānāsi bhadraṃ te bhagavān sātvatāṃ patiḥ |
devakyāṃ vasudevasya jāto yasya cikīrṣayā || 12 ||
[Analyze grammar]

tannaḥ śuṣrūṣamāṇānāṃ arhasyaṅgānuvarṇitum |
yasyāvatāro bhūtānāṃ kṣemāya ca bhavāya ca || 13 ||
[Analyze grammar]

āpannaḥ saṃsṛtiṃ ghorāṃ yannāma vivaśo gṛṇan |
tataḥ sadyo vimucyeta yad bibheti svayaṃ bhayam || 14 ||
[Analyze grammar]

yatpādasaṃśrayāḥ sūta munayaḥ praśamāyanāḥ |
sadyaḥ punantyupaspṛṣṭāḥ svardhunyāpo'nusevayā || 15 ||
[Analyze grammar]

ko vā bhagavatastasya puṇyaślokeḍyakarmaṇaḥ |
śuddhikāmo na śrṛṇuyād yaśaḥ kalimalāpaham || 16 ||
[Analyze grammar]

tasya karmāṇyudārāṇi parigītāni sūribhiḥ |
brūhi naḥ śraddadhānānāṃ līlayā dadhataḥ kalāḥ || 17 ||
[Analyze grammar]

athākhyāhi harerdhīman avatārakathāḥ śubhāḥ |
līlā vidadhataḥ svairaṃ īśvarasyātmamāyayā || 18 ||
[Analyze grammar]

vayaṃ tu na vitṛpyāma uttamaślokavikrame |
yat śrṛṇvatāṃ rasajñānāṃ svādu svādu pade pade || 19 ||
[Analyze grammar]

kṛtavān kila vīryāṇi saha rāmeṇa keśavaḥ |
atimartyāni bhagavān gūḍhaḥ kapaṭamānuṣaḥ || 20 ||
[Analyze grammar]

kalimāgatamājñāya kṣetre'smin vaiṣṇave vayam |
āsīnā dīrghasatreṇa kathāyāṃ sakṣaṇā hareḥ || 21 ||
[Analyze grammar]

tvaṃ naḥ saṃdarśito dhātrā dustaraṃ nistitīrṣatām |
kaliṃ sattvaharaṃ puṃsāṃ karṇadhāra ivārṇavam || 22 ||
[Analyze grammar]

brūhi yogeśvare kṛṣṇe brahmaṇye dharmavarmaṇi |
svāṃ kāṣṭhāmadhunopete dharmaḥ kaṃ śaraṇaṃ gataḥ || 23 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
prathamaskandhe naimiṣīyopākhāne prathamo'dhyāyaḥ || 1 ||
[Analyze grammar]