Chapter 15

tatastān vidrutāndṛṣṭvā yakṣāñ śatasahasraśaḥ |
svayameva dhanādhyakṣo nirjagāma raṇaṃ prati || 1 ||
[Analyze grammar]

tatra māṇicāro nāma yakṣaḥ paramadurjayaḥ |
vṛto yakṣasahasraiḥ sa caturbhiḥ samayodhayat || 2 ||
[Analyze grammar]

te gadāmusalaprāsaśaktitomaramudgaraiḥ |
abhighnanto raṇe yakṣā rākṣasānabhidudruvuḥ || 3 ||
[Analyze grammar]

tataḥ prahastena tadā sahasraṃ nihataṃ raṇe |
mahodareṇa gadayā sahasramaparaṃ hatam || 4 ||
[Analyze grammar]

kruddhena ca tadā rāma mārīcena durātmanā |
nimeṣāntaramātreṇa dve sahasre nipātite || 5 ||
[Analyze grammar]

dhūmrākṣeṇa samāgamya māṇibhadro mahāraṇe |
musalenorasi krodhāttāḍito na ca kampitaḥ || 6 ||
[Analyze grammar]

tato gadāṃ samāvidhya māṇibhadreṇa rākṣasaḥ |
dhūmrākṣastāḍito mūrdhni vihvalo nipapāta ha || 7 ||
[Analyze grammar]

dhūmrākṣaṃ tāḍitaṃ dṛṣṭvā patitaṃ śoṇitokṣitam |
abhyadhāvat susaṃkruddho māṇibhadraṃ daśānanaḥ || 8 ||
[Analyze grammar]

taṃ kruddhamabhidhāvantaṃ yugāntāgnimivotthitam |
śaktibhistāḍayāmāsa tisṛbhiryakṣapuṃgavaḥ || 9 ||
[Analyze grammar]

tato rākṣasarājena tāḍito gadayā raṇe |
tasya tena prahāreṇa mukuṭaḥ pārśvamāgataḥ |
tadā prabhṛti yakṣo'sau pārśvamauliriti smṛtaḥ || 10 ||
[Analyze grammar]

tasmiṃstu vimukhe yakṣe māṇibhadre mahātmani |
saṃnādaḥ sumahān rāma tasmiñ śaile vyavardhata || 11 ||
[Analyze grammar]

tato dūrāt pradadṛśe dhanādhyakṣo gadādharaḥ |
śukraproṣṭaḥpadābhyāṃ ca śaṅkhapadmasamāvṛtaḥ || 12 ||
[Analyze grammar]

sa dṛṣṭvā bhrātaraṃ saṃkhye śāpādvibhraṣṭagauravam |
uvāca vacanaṃ dhīmānyuktaṃ paitāmahe kule || 13 ||
[Analyze grammar]

mayā tvaṃ vāryamāṇo'pi nāvagacchasi durmate |
paścādasya phalaṃ prāpya jñāsyase nirayaṃ gataḥ || 14 ||
[Analyze grammar]

yo hi mohādviṣaṃ pītvā nāvagacchati mānavaḥ |
pariṇāme sa vi mūḍho jānīte karmaṇaḥ phalam || 15 ||
[Analyze grammar]

daivatāni hi nandanti dharmayuktena kena cit |
yena tvamīdṛśaṃ bhāvaṃ nītastacca na budhyase || 16 ||
[Analyze grammar]

yo hi mātṝḥ pitṝnbhrātṝnācaryāṃścāvamanyate |
sa paśyati phalaṃ tasya pretarājavaśaṃ gataḥ || 17 ||
[Analyze grammar]

adhruve hi śarīre yo na karoti tapo'rjanam |
sa paścāttapyate mūḍho mṛto dṛṣṭvātmano gatim || 18 ||
[Analyze grammar]

kasya cinna hi durbudheśchandato jāyate matiḥ |
yādṛśaṃ kurute karma tādṛśaṃ phalamaśnute || 19 ||
[Analyze grammar]

buddhiṃ rūpaṃ balaṃ vittaṃ putrānmāhātmyameva ca |
prapnuvanti narāḥ sarvaṃ svakṛtaiḥ pūrvakarmabhiḥ || 20 ||
[Analyze grammar]

evaṃ nirayagāmī tvaṃ yasya te matirīdṛśī |
na tvāṃ samabhibhāṣiṣye durvṛttasyaiṣa nirṇayaḥ || 21 ||
[Analyze grammar]

evamuktvā tatastena tasyāmātyāḥ samāhatāḥ |
mārīcapramukhāḥ sarve vimukhā vipradudruvuḥ || 22 ||
[Analyze grammar]

tatastena daśagrīvo yakṣendreṇa mahātmanā |
gadayābhihato mūrdhni na ca sthānādvyakampata || 23 ||
[Analyze grammar]

tatastau rāma nighnantāvanyonyaṃ paramāhave |
na vihvalau na ca śrāntau babhūvaturamarṣaṇaiḥ || 24 ||
[Analyze grammar]

āgneyamastraṃ sa tato mumoca dhanado raṇe |
vāruṇena daśagrīvastadastraṃ pratyavārayat || 25 ||
[Analyze grammar]

tato māyāṃ praviṣṭaḥ sa rākṣasīṃ rākṣaseśvaraḥ |
jaghāna mūrdhni dhanadaṃ vyāvidhya mahatīṃ gadām || 26 ||
[Analyze grammar]

evaṃ sa tenābhihato vihvalaḥ śoṇitokṣitaḥ |
kṛttamūla ivāśoko nipapāta dhanādhipaḥ || 27 ||
[Analyze grammar]

tataḥ padmādibhistatra nidhibhiḥ sa dhanādhipaḥ |
nandanaṃ vanamānīya dhanado śvāsitastadā || 28 ||
[Analyze grammar]

tato nirjitya taṃ rāma dhanadaṃ rākṣasādhipaḥ |
puṣpakaṃ tasya jagrāha vimānaṃ jayalakṣaṇam || 29 ||
[Analyze grammar]

kāñcanastambhasaṃvītaṃ vaidūryamaṇitoraṇam |
muktājālapraticchannaṃ sarvakāmaphaladrumam || 30 ||
[Analyze grammar]

tattu rājā samāruhya kāmagaṃ vīryanirjitam |
jitvā vaiśravaṇaṃ devaṃ kailāsādavarohata || 31 ||
[Analyze grammar]