Chapter 105

tataḥ śirasi kṛtvā tu pāduke bharatastadā |
āruroha rathaṃ hṛṣṭaḥ śatrughnena samanvitaḥ || 1 ||
[Analyze grammar]

vasiṣṭho vāmadevaśca jābāliśca dṛḍhavrataḥ |
agrataḥ prayayuḥ sarve mantriṇo mantrapūjitāḥ || 2 ||
[Analyze grammar]

mandākinīṃ nadīṃ ramyāṃ prāṅmukhāste yayustadā |
pradakṣiṇaṃ ca kurvāṇāścitrakūṭaṃ mahāgirim || 3 ||
[Analyze grammar]

paśyandhātusahasrāṇi ramyāṇi vividhāni ca |
prayayau tasya pārśvena sasainyo bharatastadā || 4 ||
[Analyze grammar]

adūrāccitrakūṭasya dadarśa bharatastadā |
āśramaṃ yatra sa munirbharadvājaḥ kṛtālayaḥ || 5 ||
[Analyze grammar]

sa tamāśramamāgamya bharadvājasya buddhimān |
avatīrya rathāt pādau vavande kulanandanaḥ || 6 ||
[Analyze grammar]

tato hṛṣṭo bharadvājo bharataṃ vākyamabravīt |
api kṛtyaṃ kṛtaṃ tāta rāmeṇa ca samāgatam || 7 ||
[Analyze grammar]

evamuktastu bharato bharadvājena dhīmatā |
pratyuvāca bharadvājaṃ bharato dharmavatsalaḥ || 8 ||
[Analyze grammar]

sa yācyamāno guruṇā mayā ca dṛḍhavikramaḥ |
rāghavaḥ paramaprīto vasiṣṭhaṃ vākyamabravīt || 9 ||
[Analyze grammar]

pituḥ pratijñāṃ tāmeva pālayiṣyāmi tattvataḥ |
caturdaśa hi varṣāṇi ya pratijñā piturmama || 10 ||
[Analyze grammar]

evamukto mahāprājño vasiṣṭhaḥ pratyuvāca ha |
vākyajño vākyakuśalaṃ rāghavaṃ vacanaṃ mahat || 11 ||
[Analyze grammar]

ete prayaccha saṃhṛṣṭaḥ pāduke hemabhūṣite |
ayodhyāyāṃ mahāprājña yogakṣemakare tava || 12 ||
[Analyze grammar]

evamukto vasiṣṭhena rāghavaḥ prāṅmukhaḥ sthitaḥ |
pāduke hemavikṛte mama rājyāya te dadau || 13 ||
[Analyze grammar]

nivṛtto'hamanujñāto rāmeṇa sumahātmanā |
ayodhyāmeva gacchāmi gṛhītvā pāduke śubhe || 14 ||
[Analyze grammar]

etacchrutvā śubhaṃ vākyaṃ bharatasya mahātmanaḥ |
bharadvājaḥ śubhataraṃ munirvākyamudāharat || 15 ||
[Analyze grammar]

naitaccitraṃ naravyāghra śīlavṛttavatāṃ vara |
yadāryaṃ tvayi tiṣṭhettu nimne vṛṣṭimivodakam || 16 ||
[Analyze grammar]

amṛtaḥ sa mahābāhuḥ pitā daśarathastava |
yasya tvamīdṛśaḥ putro dharmātmā dharmavatsalaḥ || 17 ||
[Analyze grammar]

tamṛṣiṃ tu mahātmānamuktavākyaṃ kṛtāñjaliḥ |
āmantrayitumārebhe caraṇāv upagṛhya ca || 18 ||
[Analyze grammar]

tataḥ pradakṣiṇaṃ kṛtvā bharadvājaṃ punaḥ punaḥ |
bharatastu yayau śrīmānayodhyāṃ saha mantribhiḥ || 19 ||
[Analyze grammar]

yānaiśca śakaṭaiścaiva hayaiś nāgaiśca sā camūḥ |
punarnivṛttā vistīrṇā bharatasyānuyāyinī || 20 ||
[Analyze grammar]

tataste yamunāṃ divyāṃ nadīṃ tīrtvormimālinīm |
dadṛśustāṃ punaḥ sarve gaṅgāṃ śivajalāṃ nadīm || 21 ||
[Analyze grammar]

tāṃ ramyajalasaṃpūrṇāṃ saṃtīrya saha bāndhavaḥ |
śṛṅgaverapuraṃ ramyaṃ praviveśa sasainikaḥ || 22 ||
[Analyze grammar]

śṛṅgaverapurādbhūya ayodhyāṃ saṃdadarśa ha |
bharato duḥkhasaṃtaptaḥ sārathiṃ cedamabravīt || 23 ||
[Analyze grammar]

sārathe paśya vidhvastā ayodhyā na prakāśate |
nirākārā nirānandā dīnā pratihatasvanā || 24 ||
[Analyze grammar]