Chapter 95

rāmasya vacanaṃ śrutvā bharataḥ pratyuvāca ha |
kiṃ me dharmādvihīnasya rājadharmaḥ kariṣyati || 1 ||
[Analyze grammar]

śāśvato'yaṃ sadā dharmaḥ sthito'smāsu nararṣabha |
jyeṣṭha putre sthite rājanna kanīyānbhavennṛpaḥ || 2 ||
[Analyze grammar]

sa samṛddhāṃ mayā sārdhamayodhyāṃ gaccha rāghava |
abhiṣecaya cātmānaṃ kulasyāsya bhavāya naḥ || 3 ||
[Analyze grammar]

rājānaṃ mānuṣaṃ prāhurdevatve saṃmato mama |
yasya dharmārthasahitaṃ vṛttamāhuramānuṣam || 4 ||
[Analyze grammar]

kekayasthe ca mayi tu tvayi cāraṇyamāśrite |
divamārya gato rājā yāyajūkaḥ satāṃ mataḥ || 5 ||
[Analyze grammar]

uttiṣṭha puruṣavyāghra kriyatāmudakaṃ pituḥ |
ahaṃ cāyaṃ ca śatrughnaḥ pūrvameva kṛtodakau || 6 ||
[Analyze grammar]

priyeṇa kila dattaṃ hi pitṛlokeṣu rāghava |
akṣayyaṃ bhavatītyāhurbhavāṃścaiva pituḥ priyaḥ || 7 ||
[Analyze grammar]

tāṃ śrutvā karuṇāṃ vācaṃ piturmaraṇasaṃhitām |
rāghavo bharatenoktāṃ babhūva gatacetanaḥ || 8 ||
[Analyze grammar]

vāgvajraṃ bharatenoktamamanojñaṃ paraṃtapaḥ |
pragṛhya bāhū rāmo vai puṣpitāgro yathā drumaḥ |
vane paraśunā kṛttastathā bhuvi papāta ha || 9 ||
[Analyze grammar]

tathā hi patitaṃ rāmaṃ jagatyāṃ jagatīpatim |
kūlaghātapariśrāntaṃ prasuptamiva kuñjaram || 10 ||
[Analyze grammar]

bhrātaraste maheṣvāsaṃ sarvataḥ śokakarśitam |
rudantaḥ saha vaidehyā siṣicuḥ salilena vai || 11 ||
[Analyze grammar]

sa tu saṃjñāṃ punarlabdhvā netrābhyāmāsramutsṛjan |
upākrāmata kākutsthaḥ kṛpaṇaṃ bahubhāṣitum || 12 ||
[Analyze grammar]

kiṃ nu tasya mayā kāryaṃ durjātena mahātmanā |
yo mṛto mama śokena na mayā cāpi saṃskṛtaḥ || 13 ||
[Analyze grammar]

aho bharata siddhārtho yena rājā tvayānagha |
śatrugheṇa ca sarveṣu pretakṛtyeṣu satkṛtaḥ || 14 ||
[Analyze grammar]

niṣpradhānāmanekāgraṃ narendreṇa vinākṛtām |
nivṛttavanavāso'pi nāyodhyāṃ gantumutsahe || 15 ||
[Analyze grammar]

samāptavanavāsaṃ māmayodhyāyāṃ paraṃtapa |
ko nu śāsiṣyati punastāte lokāntaraṃ gate || 16 ||
[Analyze grammar]

purā prekṣya suvṛttaṃ māṃ pitā yānyāha sāntvayan |
vākyāni tāni śroṣyāmi kutaḥ karṇasukhānyaham || 17 ||
[Analyze grammar]

evamuktvā sa bharataṃ bhāryāmabhyetya rāghavaḥ |
uvāca śokasaṃtaptaḥ pūrṇacandranibhānanām || 18 ||
[Analyze grammar]

sīte mṛtaste śvaśuraḥ pitrā hīno'si lakṣmaṇa |
bharato duḥkhamācaṣṭe svargataṃ pṛthivīpatim || 19 ||
[Analyze grammar]

sāntvayitvā tu tāṃ rāmo rudantīṃ janakātmajām |
uvāca lakṣmaṇaṃ tatra duḥkhito duḥkhitaṃ vacaḥ || 20 ||
[Analyze grammar]

ānayeṅgudipiṇyākaṃ cīramāhara cottaram |
jalakriyārthaṃ tātasya gamiṣyāmi mahātmanaḥ || 21 ||
[Analyze grammar]

sītā purastādvrajatu tvamenāmabhito vraja |
ahaṃ paścādgamiṣyāmi gatirhyeṣā sudāruṇā || 22 ||
[Analyze grammar]

tato nityānugasteṣāṃ viditātmā mahāmatiḥ |
mṛdurdāntaśca śāntaśca rāme ca dṛḍha bhaktimān || 23 ||
[Analyze grammar]

sumantrastairnṛpasutaiḥ sārdhamāśvāsya rāghavam |
avātārayadālambya nadīṃ mandākinīṃ śivām || 24 ||
[Analyze grammar]

te sutīrthāṃ tataḥ kṛcchrādupāgamya yaśasvinaḥ |
nadīṃ mandākinīṃ ramyāṃ sadā puṣpitakānanām || 25 ||
[Analyze grammar]

śīghrasrotasamāsādya tīrthaṃ śivamakardamam |
siṣicustūdakaṃ rājñe tata etadbhavatviti || 26 ||
[Analyze grammar]

pragṛhya ca mahīpālo jalapūritamañjalim |
diśaṃ yāmyāmabhimukho rudan vacanamabravīt || 27 ||
[Analyze grammar]

etatte rājaśārdūla vimalaṃ toyamakṣayam |
pitṛlokagatasyādya maddattamupatiṣṭhatu || 28 ||
[Analyze grammar]

tato mandākinī tīrāt pratyuttīrya sa rāghavaḥ |
pituścakāra tejasvī nivāpaṃ bhrātṛbhiḥ saha || 29 ||
[Analyze grammar]

aiṅgudaṃ badarīmiśraṃ piṇyākaṃ darbhasaṃstare |
nyasya rāmaḥ suduḥkhārto rudan vacanamabravīt || 30 ||
[Analyze grammar]

idaṃ bhuṅkṣva mahārājaprīto yadaśanā vayam |
yadannaḥ puruṣo bhavati tadannāstasya devatāḥ || 31 ||
[Analyze grammar]

tatastenaiva mārgeṇa pratyuttīrya nadītaṭāt |
āruroha naravyāghro ramyasānuṃ mahīdharam || 32 ||
[Analyze grammar]

tataḥ parṇakuṭīdvāramāsādya jagatīpatiḥ |
parijagrāha pāṇibhyāmubhau bharatalakṣmaṇau || 33 ||
[Analyze grammar]

teṣāṃ tu rudatāṃ śabdāt pratiśrutkābhavadgirau |
bhrātṝṇāṃ saha vaidehyā siṃhānāṃ nardatāmiva || 34 ||
[Analyze grammar]

vijñāya tumulaṃ śabdaṃ trastā bharatasainikāḥ |
abruvaṃścāpi rāmeṇa bharataḥ saṃgato dhruvam |
teṣāmeva mahāñ śabdaḥ śocatāṃ pitaraṃ mṛtam || 35 ||
[Analyze grammar]

atha vāsānparityajya taṃ sarve'bhimukhāḥ svanam |
apyeka manaso jagmuryathāsthānaṃ pradhāvitāḥ || 36 ||
[Analyze grammar]

hayairanye gajairanye rathairanye svalaṃkṛtaiḥ |
sukumārāstathaivānye padbhireva narā yayuḥ || 37 ||
[Analyze grammar]

aciraproṣitaṃ rāmaṃ ciraviproṣitaṃ yathā |
draṣṭukāmo janaḥ sarvo jagāma sahasāśramam || 38 ||
[Analyze grammar]

bhrātṝṇāṃ tvaritāste tu draṣṭukāmāḥ samāgamam |
yayurbahuvidhairyānaiḥ khuranemisamākulaiḥ || 39 ||
[Analyze grammar]

sā bhūmirbahubhiryānaiḥ khuranemisamāhatā |
mumoca tumulaṃ śabdaṃ dyaurivābhrasamāgame || 40 ||
[Analyze grammar]

tena vitrāsitā nāgāḥ kareṇuparivāritāḥ |
āvāsayanto gandhena jagmuranyadvanaṃ tataḥ || 41 ||
[Analyze grammar]

varāhamṛgasiṃhāśca mahiṣāḥ sarkṣavānarāḥ |
vyāghra gokarṇagavayā vitreṣuḥ pṛṣataiḥ saha || 42 ||
[Analyze grammar]

rathāṅgasāhvā natyūhā haṃsāḥ kāraṇḍavāḥ plavāḥ |
tathā puṃskokilāḥ krauñcā visaṃjñā bhejire diśaḥ || 43 ||
[Analyze grammar]

tena śabdena vitrastairākāśaṃ pakṣibhirvṛtam |
manuṣyairāvṛtā bhūmirubhayaṃ prababhau tadā || 44 ||
[Analyze grammar]

tānnarānbāṣpapūrṇākṣān samīkṣyātha suduḥkhitān |
paryaṣvajata dharmajñaḥ pitṛvanmātṛvacca saḥ || 45 ||
[Analyze grammar]

sa tatra kāṃścit pariṣasvaje narānnarāśca ke cittu tamabhyavādayan |
cakāra sarvān savayasyabāndhavānyathārhamāsādya tadā nṛpātmajaḥ || 46 ||
[Analyze grammar]

tataḥ sa teṣāṃ rudatāṃ mahātmanāṃ bhuvaṃ ca khaṃ cānuvinādayan svanaḥ |
guhā girīṇāṃ ca diśaśca saṃtataṃ mṛdaṅgaghoṣapratimo viśuśruve || 47 ||
[Analyze grammar]