Chapter 63

[English text for this chapter is available]

śrīhara uvāca |
dhanuḥsāhasranāmānamīśvaraṃ śṛṇu pārvati |
triṣaṣṭisaṃkhyakaṃ divyaṃ darśanātpāpanāśanam || 1 ||
[Analyze grammar]

vidūrathonāma nṛpaḥ khyātakīrttirabhūdbhuvi |
tasya putradvayaṃ jātaṃ sunītiḥ sumatistathā || 2 ||
[Analyze grammar]

ekadā tu vanaṃ yāto mṛgayāṃ sa vidūrathaḥ |
dadarśa garttaṃ sumahadbhūmermukhamivodgatam || 3 ||
[Analyze grammar]

taṃ dṛṣṭvā ciṃtayāmāsa kimetaditi pārthivaḥ |
pātālavivaraṃ manye vaḍavānalasaṃnibham || 4 ||
[Analyze grammar]

ciṃtayanniva tatrāsau dadarśa vijane vane |
brāhmaṇaṃ suvrataṃ nāma tapasvinamakalmaṣam || 5 ||
[Analyze grammar]

sa taṃ papraccha nṛpatiḥ kimetaditi bho dvija || 6 ||
[Analyze grammar]

brāhmaṇa uvāca |
dānavaḥ sumahāvīryo vasatyugro rasātale |
kujaṃbhonāma vikhyāto bhinatti vasudhāmimām || 7 ||
[Analyze grammar]

tamajitvā kathaṃ rājyaṃ bhokṣyase vasudhādhipa |
tena vidhvaṃsitā viprā rātrau niḥsṛtya pārthiva || 8 ||
[Analyze grammar]

upadrutāstathā deśā dhvastāścaiva tathāśramāḥ |
āpyāyayati daityo'yaṃ sabalī muśalāyudhaḥ || 9 ||
[Analyze grammar]

yadi tvaṃ ghātayasyenaṃ pātālāṃtaragocaram |
tataḥ samastavasudhāpatireva bhaviṣyasi || 10 ||
[Analyze grammar]

iti vipra vacaḥ śrutvā maṃtrayāmāsa pārthivaḥ |
maṃtribhiḥ sahito'moghaṃ śrutvā muśalamadrije || 11 ||
[Analyze grammar]

taṃ maṃtraṃ kriyamāṇaṃ tu sūnubhyāṃ saha maṃtribhiḥ |
tatpārśvavarttinī kanyā śuśrāvātha mudāvatī || 12 ||
[Analyze grammar]

tataḥ katipayāhe tu tāṃ kanyāṃ jalajekṣaṇām |
jahāropavanāddaityaḥ kujaṃbhaḥ svasakhīvṛtām || 13 ||
[Analyze grammar]

etacchrutvā mahīpālaḥ krodhaparyākulekṣaṇaḥ |
uvāca putrau jāne'haṃ sakujaṃbho mahāsuraḥ || 14 ||
[Analyze grammar]

dṛṣṭvā bhūmau purā gatteṃ tatra saṃśayite mayi |
kathito dvijamukhyena mayā pṛṣṭena putrakau || 15 ||
[Analyze grammar]

sa hanyatāṃ so'paharttā mudāvatyāḥ sudurmatiḥ |
prasthitau nṛpabhaktyātha svasainyaparivāritau || 16 ||
[Analyze grammar]

tau sutau tatra saṃprāptau pātāle pitṛśāsanāt |
yuyudhāte kujaṃbhena svaśaktyā senayā vṛtau || 17 ||
[Analyze grammar]

tataḥ parighanistriṃśaśaktiśūlaparaśvadhaiḥ |
bāṇaiścirataraṃ yuddhaṃ teṣāmāsītsadāruṇam || 18 ||
[Analyze grammar]

tato māyābalavatā tena daityena tatkṣaṇāt |
amoghenādvitīyena muśalena varānane || 19 ||
[Analyze grammar]

hata sainyau raṇe baddhau rājaputrau mahābalau || 20 ||
[Analyze grammar]

tataḥ śrutvā mahīpālo vivarṇavadano'bhavat |
baddhaputraḥ parāmārttiṃ jagāma giriputrike || 21 ||
[Analyze grammar]

ruroda bahudhātyarthaṃ putrasnehena pārthivaḥ |
tato vilapatastasya mārkaṃḍeyo mahāmuniḥ |
anekasṛṣṭisaṃhāradṛṣṭakāryaparāvaraḥ || 22 ||
[Analyze grammar]

uditādityasaṃkāśaḥ saptakalpānugo vaśī |
ājagāma nṛpābhyāśe vilapaṃtaṃ dadarśa saḥ |
rājānaṃ kathayāmāsa trikālajño mahāmuniḥ || 23 ||
[Analyze grammar]

mā śucastvaṃ mahīpāla kṣattriyo'si dṛḍhavrataḥ |
kva śoka kva mahīpālo durjayo lokapālavat || 24 ||
[Analyze grammar]

śokaṃ kupuruṣācīrṇaṃ tyaja tvaṃ rājasattama |
udyamaṃ kuru rājeṃdra kujaṃbhaṃ ghātayiṣyasi || 25 ||
[Analyze grammar]

nātyuccaṃ meruśikharaṃ nātinīcaṃ rasātalam |
vyavasāyaḥ sakhā yasya nāsti dūre mahodadhiḥ || 26 ||
[Analyze grammar]

mahākālavane liṃgamārādhaya samāhitaḥ |
rūpeśvarasya devasya pārśve dakṣiṇataḥ sthitam || 27 ||
[Analyze grammar]

dhanuḥsāhasratulyaṃ tu muśalasya nivāraṇam |
dhanuḥ prāpsyasi rājeṃdra kujaṃbhaṃ vinipātaya || 28 ||
[Analyze grammar]

dhanuḥsāhasrahastaistu rakṣitaṃ yodhasattamaiḥ |
liṃgaṃ devāsurairyuddhe sahasrākṣeṇa sevitam |
iṃdreṇa ca dhanurlabdhaṃ jaṃbho vai yena pātitaḥ || 29 ||
[Analyze grammar]

tasya tadvacanaṃ śrutvā sa rājātha vidūrathaḥ |
jagāma tvarito devi mahākālavanaṃ śubham || 30 ||
[Analyze grammar]

dadarśa tatra talliṃgaṃ pūjayāmāsa bhaktitaḥ |
tasya tuṣṭastadā devo dadau divyaṃ dhanustadā || 31 ||
[Analyze grammar]

dhanuḥsāhasratulyaṃ ca muśalasya nivāraṇam |
dhanurlabdhvā tadā rājā baddhagodhāṃgulitravān |
jagāma dhīraḥ pātālaṃ tena gartena satvaram || 32 ||
[Analyze grammar]

tato jyāsvanamatyugraṃ sa cakre pārthivastadā |
yena pātālamakhilamāsīdāpūritāṃtaram || 33 ||
[Analyze grammar]

tato jyāsvanamākarṇya kujaṃbho dānaveśvaraḥ |
ājagāmātikopena svasainyaparivāritaḥ || 34 ||
[Analyze grammar]

tato yuddhamabhūttasya saha rājñā varānane |
dināni trīṇi sa yadā yodhitastena dānavaḥ || 35 ||
[Analyze grammar]

tataḥ kopaparītātmā muśalāyābhyadhāvata |
gaṃdhairmālyaistathā dhūpaiḥ pūjyamānaḥ sa tiṣṭhati || 36 ||
[Analyze grammar]

yāvadgṛhṇāti muśalaṃ tāvatsā ca mudāvatī |
pasparśa caṃdanavyājairanekaiśca punaḥpunaḥ || 37 ||
[Analyze grammar]

tataḥ sa gatvā yuyudhe musalenāsureśvaraḥ |
tadā musalapātāste dhanuṣā niṣprabhīkṛtāḥ || 38 ||
[Analyze grammar]

dhanurjyāghātaśabdena patite bhūtale tadā |
gato vaivasvataṃ lokaṃ kujaṃbhonāma dānavaḥ || 39 ||
[Analyze grammar]

tato'patatpuṣpavṛṣṭistasyopari mahīpateḥ |
jagurgaṃdharvapatayo devavādyāni sasvanuḥ || 40 ||
[Analyze grammar]

sa cāpi rājā taṃ hatvā putrau labdhvā sutāṃ tadā |
mudāvatīṃ mudā yukto harṣagadgadanirbharaḥ || 41 ||
[Analyze grammar]

putrābhyāṃ sahito devi susaṃpūrṇamanorathaḥ |
sāṃtaḥpuraparīvāraḥ punarāyādvarānane || 42 ||
[Analyze grammar]

mahākālavane ramye yatra talliṃgamuttamam |
pūjayāmāsa ratnaiśca vastrairābharaṇaistathā || 43 ||
[Analyze grammar]

tataḥ sa pūjito devaiḥ śakreṇa ca punaḥpunaḥ |
asya liṃgasya māhātmyāddhanuḥ prāptaṃ nṛpeṇa 3 || 44 ||
[Analyze grammar]

kujaṃbho'pi hato daityo devavidveṣakārakaḥ |
dhanuḥsāhasranāmāyamataḥ khyātiṃ gamiṣyati || 45 ||
[Analyze grammar]

bhaktyā ye pūjayiṣyaṃti dhanuḥsāhasramīśvaram |
yāsyanti śatravasteṣāṃ kṣayaṃ naivātra saṃśayaḥ || 46 ||
[Analyze grammar]

arcite devadeveśe dhanuḥsāhasrike śive |
arcitāḥ sarvadevāḥ syurvaradāśca na saṃśayaḥ || 47 ||
[Analyze grammar]

prātarmadhye'parāhṇe ca dhanuḥsāhasrakaṃ śivam |
ye namanti narā nityaṃ na te narakabhoginaḥ || 48 ||
[Analyze grammar]

tīrthānāṃ ca yathā gaṃgā rakṣitā yodhasattamaiḥ |
tathāyaṃ rakṣako devo nāmnā dhanuḥsahasrakaḥ || 49 ||
[Analyze grammar]

tatra gaṃgāditīrthāni vidyante vividhāni ca |
surahasyātipuṇyāni sadyaḥ pāpaharāṇi ca || 50 ||
[Analyze grammar]

teṣāṃ phalaṃ vinirdiṣṭaṃ ye paśyanti tu bhaktitaḥ |
dhanuḥsāhasrakaṃ nāma sadā śatrukṣayaṃkaram || 51 ||
[Analyze grammar]

eṣa te kathito devi prabhāvaḥ pāpanā śanaḥ |
dhanuḥsāhasradevasya devaṃ paśupatiṃ śṛṇu || 52 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśīti liṅgamāhātmye dhanuḥsāhasramāhātmyavarṇanaṃnāma triṣaṣṭitamo'dhyāyaḥ || 63 ||
[Analyze grammar]