Chapter 40

[English text for this chapter is available]

īśvara uvāca |
catvāriṃśattamaṃ viddhi kuṃḍeśvaramataḥ śṛṇu |
yasya darśanamātreṇa labhyate sadgatiḥ parā || 1 ||
[Analyze grammar]

vijñapto'haṃ tvayā devi maṃdare cārukaṃdare |
vīrakaṃ draṣṭumicchāmi kva gato mama putrakaḥ || 2 ||
[Analyze grammar]

mayā proktaṃ viśālākṣi mahākālavano ttame |
jalamadhye sthitastepe tapaḥ paramadāruṇam || 3 ||
[Analyze grammar]

munibhiḥ sahito dhīmānbhrājamānoṃ'śumāniva |
gacchāmastatra taṃ draṣṭuṃ gaṇaiḥ sārddhaṃ varānane || 4 ||
[Analyze grammar]

madīyaṃ vacanaṃ śrutvā tvayāhaṃ preritastadā |
uttiṣṭha śambho gacchāmo vṛṣamāruha satvaram || 5 ||
[Analyze grammar]

saprasnavau stanau jātau sadyaḥ saṃsmṛtya vīrakam |
mayā smṛto vṛṣo devi dharmarūpī sanātanaḥ || 6 ||
[Analyze grammar]

madīyaṃ ciṃtitaṃ jñātvā mamapārśvamupāgataḥ |
ārūḍho'haṃ tvayā sārddhaṃ tasminneva vṛṣe tadā || 7 ||
[Analyze grammar]

prasthitastatkṣaṇācchīghraṃ gaṇairnānāvidhaiḥ saha |
vegātprayāto vṛṣabhaskaṃdhālaṃbitayā tvayā || 8 ||
[Analyze grammar]

raṇadvalayabāhubhyāṃ gāḍhamāliṃgito hyaham |
tvaṃ bhītā ca tadā jātā yadātīva praṇoditaḥ || 9 ||
[Analyze grammar]

vṛṣo mayā viśālākṣi sa kṛṣṭo gaṇapaistadā |
kṛṣṭaṃ ca satvaraṃ dṛṣṭvā proktaṃ ca bhītayā tadā || 10 ||
[Analyze grammar]

śrāṃtāsmi sāṃprataṃ deva vegenānena bhīṣitā |
tadviśramitumicchāmi bhūdharasya taṭe vibho || 11 ||
[Analyze grammar]

kṣaṇaṃ padbhyāṃ gamiṣyāmi viṣamoyaṃ girirmahān |
tvadīyaṃ vacanaṃ śrutvā bāḍhamuktaṃ priye mayā || 12 ||
[Analyze grammar]

muhūrttaṃ cārujaghane śailapādamupāśritā |
kuru śramāpanayanaṃ yāvadvegātprayāmyaham || 13 ||
[Analyze grammar]

paṃthāna tvatsukhaṃ yatra taṃ vayaṃ mṛgayāvahe |
eṣa kuṇḍo gaṇādhyakṣastvatsamīpe vasiṣyati |
tvadājñāvaśavarttī ca kiṃkaraḥ sthāpito mayā || 14 ||
[Analyze grammar]

evamuktvā tato devi saṃsthāpya gaṇarakṣakam |
ārūḍho'haṃ gireḥ prāṃtamudayādriṃ raviryathā || 15 ||
[Analyze grammar]

tato'valokito'tyarthaṃ ramaṇīyo mahā giriḥ |
idaṃ ramyamidaṃ ramyamityasminvaraparvate || 16 ||
[Analyze grammar]

paśyato mama śaileṃdraṃ gatāḥ saṃvatsarā daśa |
tvayātha ciṃtitaṃ devi kva gatastripurāṃtakaḥ || 17 ||
[Analyze grammar]

nūnaṃ na madanātaptāṃ vetti māṃ rativarjitām |
māṃ vihāya mahādevo nirviśaṃkaḥ kva varttate || 18 ||
[Analyze grammar]

harasya kvāpi yātasya vairaṃ saṃsmṛtya cittajaḥ |
bādhate māmanaṃgopi cāparopitamārgaṇaḥ |
vilokayaṃtīṃ hā dṛṣṭvā vilapaṃtīṃ punaḥ punaḥ || 19 ||
[Analyze grammar]

tataḥ kuṇḍo gaṇādhyakṣo jñātvā bhāvaṃ tvadīyakam |
utkṛṣṭena svareṇoktaṃ mā devi vimanā bhava || 20 ||
[Analyze grammar]

āyāta eṣa te bharttā mā cetaḥ kaluṣaṃ kuru |
etacchrutvā vacastasya kuṇḍasya kamalānane || 21 ||
[Analyze grammar]

duḥkhārttayā tvayā proktaḥ kuṇḍa vedmi na śaṃkaram |
kva gataḥ kiṃ ca kurute kālaṃ dīrghamimaṃ śivaḥ |
darśayasva mahādevamityukto' sau punaḥpunaḥ || 22 ||
[Analyze grammar]

yadā na darśitastena kuṇḍenāhaṃ varānane |
tadā śaptastvayā devi kruddhayā gaṇarakṣakaḥ || 23 ||
[Analyze grammar]

gaccha tvaṃ mānuṣaṃ lokaṃ yasmānna kathito haraḥ |
etasminnaṃtare devi prāpto'haṃ tvatsamīpataḥ || 24 ||
[Analyze grammar]

pṛṣṭaścāhaṃ tvayā devi vihāya kva gato'si mām |
durgame parvate śūnye tasmāttya kṣyāmi jīvitam || 25 ||
[Analyze grammar]

gatvāgre bhūdharasyāsya kiṃ kṛtaṃ ca tvayā vibho |
mayā tava vacaḥ śrutvā kathitaṃ sarvameva tat || 26 ||
[Analyze grammar]

durādharṣataraḥ śailaḥ samaṃtādduratikramaḥ |
tvatpriyārthaṃ mahābhāge mayā mārgo'valokitaḥ || 27 ||
[Analyze grammar]

yena mārgeṇa viśrabdhaṃ gamiṣyāmaḥ sumadhyame |
ayaṃ kuṇḍo gaṇo devi viṣaṇṇo vyākulaḥ kṛtaḥ || 28 ||
[Analyze grammar]

tvayāpyuktaṃ mahādeva kuṇḍaḥ śapto mayā gaṇaḥ |
mamājñā na kṛtā yasmādviphalaṃ na vaco mama |
tasmādyātu mamādeśā nmahākālavanaṃ śubham || 29 ||
[Analyze grammar]

bhairavaṃ rūpamāsthāya yatra tvaṃ cottare sthitaḥ |
tasyāgrataḥ sthitaṃ liṃgaṃ varttate kāmadaṃ sadā || 30 ||
[Analyze grammar]

tasya darśana mātreṇa gaṇapo'yaṃ bhaviṣyati |
kuṇḍeśvareti vikhyātaḥ sa devo vai bhaviṣyati || 31 ||
[Analyze grammar]

ityuktaḥ sa tvayā devi samāsādya punaḥpunaḥ |
prasthāpitastvayādeśādvraja kuṇḍa mamājñayā || 32 ||
[Analyze grammar]

mahākālavanaṃ śīghraṃ liṃgamārādhya satvaram |
kīrtiste bhavitā putra triṣu lokeṣu śāśvatī || 33 ||
[Analyze grammar]

ityuktastatkṣaṇātprāpto dṛṣṭvā liṅgaṃ tu śāśvatam |
uttarasya śivasyāgre pūjayāmāsa bhaktitaḥ || 34 ||
[Analyze grammar]

tato devāḥ sagaṃdharvāḥ siddhāśca paramarṣayaḥ |
yakṣāścāpsarasaścaiva samājagmuḥ sahasraśaḥ || 35 ||
[Analyze grammar]

athāhaṃ tatkṣaṇātprāptastvayā sārddhaṃ gaṇairvṛtaḥ |
dṛṣṭvā kuṇḍaṃ gaṇeśaṃ tu liṃgārādhanatatparam || 36 ||
[Analyze grammar]

samādhidhyānanirataṃ proktamasmābhirādarāt |
tuṣṭā te pārvatī putra prārthyatāṃ varamuttamam || 37 ||
[Analyze grammar]

akṣayaṃ tu padaṃ prāptaṃ tvayā liṃgasya darśanāt |
adyaprabhṛti devo'yaṃ khyāto bhuvi bhaviṣyati |
nāmnā kuṇḍeśvaro yasmātsarvasaṃpatkaraḥ sadā || 38 ||
[Analyze grammar]

kuṇḍeśvaramanādiṃ tu bhaktyā paśyati yo naraḥ |
so'śvamedhasahasrasya phalaṃ prāpsyati nānyathā || 39 ||
[Analyze grammar]

tasya dānaphalaṃ sarvaṃ sarvatīrthaphalaṃ sadā |
liṃgaṃ kuṇḍeśvaraṃ yastu bhaktyā saṃpūjayiṣyati || 40 ||
[Analyze grammar]

daśānāmaśvamedhānāmagniṣṭomaśatasya ca |
sparśanātphalamāpnoti kuṇḍeśvarasya sarvadā || 41 ||
[Analyze grammar]

prātaḥ paśyaṃti ye bhaktyā kṛtvā niyamapūrvakam |
siddhiṃ sukāmikīṃ hṛṣṭāḥ saṃprāpsyaṃti na saṃśayaḥ || 42 ||
[Analyze grammar]

eṣa te kathito devi prabhāvaḥ pāpanāśanaḥ |
kuṇḍeśvarasya devasya śṛṇu luṃpeśvaraṃ param || 43 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśītiliṅgamāhātmye kuṃḍeśvaramāhātmyavarṇanaṃnāma catvāriṃśo 'dhyāyaḥ || 40 ||
[Analyze grammar]