Chapter 17

[English text for this chapter is available]

nārada uvāca |
atha jālaṃdharo'paśyatkabaṃdhacayabhīṣaṇam |
raṇaṃ rudhiramāṃsaugha majjā medo'sthidurgamam || 1 ||
[Analyze grammar]

tatra jālaṃdharo daityaḥ priyāharaṇaduḥkhitaḥ |
raṇe vilokayāmāsa vṛṣasthaṃ pārvatīpatim || 2 ||
[Analyze grammar]

ghorāhibhogenavibhūṣitāṃgaṃ jaṭākalāpe śaśibhūṣaṇāṃkitam |
netrāgnikīlopariśobhitāṃgaṃ vinā raṇaṃ saṃpradadarśa siṃdhujaḥ || 3 ||
[Analyze grammar]

śīghraṃ svarathamāruhya samudratanayastadā |
saṃruṣṭaḥ prāha taṃ śuṃbhaṃ tāpaso na hatastvayā || 4 ||
[Analyze grammar]

prāha jālaṃdharaṃ śuṃbhastapastena mahatkṛtam |
haṃtuṃ na śakyate'smābhirharaḥ saṃgrāmadurjayaḥ || 5 ||
[Analyze grammar]

itiśuṃbhoktamākarṇyasiṃdhujaḥkrodhamūrcchitaḥ |
haraṃ padmasahasreṇa daityasainyena saṃvṛtam || 6 ||
[Analyze grammar]

gṛhītvā kālakedāraṃ dhanurjālaṃdharo yayau |
bāṇāṃstīkṣṇānatisthūlānlohastaṃbhāntathā bahūn || 7 ||
[Analyze grammar]

mumoca yudhi durdharṣo varṣanmegha ivāgame |
āyāṃtaṃ rurudhuḥ siṃdhusūnuṃ śaṃbhugaṇā yudhi || 8 ||
[Analyze grammar]

tato rudreṇa raudraiśca śaraughaistāḍito ruṣā |
rudrabāṇaistadā tasya kavacaṃ bhuvi pātitam || 9 ||
[Analyze grammar]

vivarmāpi babhau so'tha meghamukto yathācalaḥ |
punarjālaṃdharasyāṃgaṃ śaṃbhunā kīlitaṃ śaraiḥ || 10 ||
[Analyze grammar]

rudhiraṃ bahu susrāva jālaṃdharaśarīrataḥ |
tenāśu rudhiraugheṇa plāvitā sakalā mahī || 11 ||
[Analyze grammar]

tato devā bhayaṃ jagmurdānavāśca cakaṃpire |
tyaktvā te pramathā vīrā raṇabhūmiṃ pradudruvuḥ || 12 ||
[Analyze grammar]

nadyā iva parā mūrttiḥ prasṛtā sarvato'pi ca |
athāhārṇavajo rudraṃ dhanurdhara varo hyasi || 13 ||
[Analyze grammar]

idānīṃ tatkariṣyāmi yena gacchasi saṃkṣayam |
ityuktvā kālakedāraṃ saśaraṃ pratigṛhya tat || 14 ||
[Analyze grammar]

śīghraṃ saṃpūrayāmāsa śarairnānāvidhaiḥ śivam |
śivaḥ sahasrakoṭībhiḥ pūritāṃgo raṇe babhau || 15 ||
[Analyze grammar]

vihaṃgamairyathākāśaṃ vṛkṣairiva mahāgiriḥ |
daityamuktaistutairbāṇairdṛṣṭvā vyāptaṃ maheśvaram || 16 ||
[Analyze grammar]

vīrabhadrastathā kopājjālaṃdharamadhāvata |
apīḍayadameyātmā samudratanayaṃ balī || 17 ||
[Analyze grammar]

jālaṃdharo'tha saṃkruddho vidhyanbāṇaiḥ sahasraśaḥ |
dhanuḥ śarānrathaṃ chatraṃ sārathiṃ tilaśaḥ śaraiḥ || 18 ||
[Analyze grammar]

cakāra vīrabhadrasya siṃdhusūnuḥ pratāpavān |
vīrabhadro'tha viratho hatavāngadayābdhijam || 19 ||
[Analyze grammar]

tathaiva gadayā so'pi taṃ hatvāpātayadbhuvi |
gadāprahārapatitamālokyātivimūrcchitam || 20 ||
[Analyze grammar]

maṇibhadro'tha samare jālaṃdharamadhāvata |
atikruddhaṃ tamāyāṃtaṃ dṛṣṭvā daityo mahāraṇe || 21 ||
[Analyze grammar]

śarairvyastopakaraṇaṃ sa cakāra nadīsutaḥ |
atha mūrcchāṃ parityajya uttasthau siṃhavannadan || 22 ||
[Analyze grammar]

vīrabhadrastataḥ kopānmaṇibhadraḥ pratāpavān |
jaghnatuḥ parvatābhyāṃ tau vyomasthaṃ taṭinīsutam || 23 ||
[Analyze grammar]

tadaṃge patitau dṛṣṭvā parvatau vininadya ca |
jaghāna muṣṭipātena vīrabhadro nadīsutam || 24 ||
[Analyze grammar]

maṇibhadraścaraṇayordhṛtvā sāgaranaṃdanam |
syaṃdanādbhrāmayāmāsa tadadbhutamivābhavat || 25 ||
[Analyze grammar]

maṇibhadra gṛhīto'pi daityarāṭsa mahābalaḥ |
hatvā caraṇaghātena maṇibhadramapātayat || 26 ||
[Analyze grammar]

jālaṃdharo mahābāhurvīrabhadraṃ ca muṣṭinā |
athāgataḥ parivṛto gaṇairvai naṃdikeśvaraḥ || 27 ||
[Analyze grammar]

śuṃbhastamāgataṃ dṛṣṭvā rurodha saha sainikaiḥ |
dvaṃdvayuddhairathājagmurgaṇā daityaiḥ parasparam || 28 ||
[Analyze grammar]

śuṃbhaḥ śilādajaṃ rāhurmahākālaṃ raṇe yayau |
kolāhalaṃ niśuṃbho'tha ketuḥ kālamadhāvata || 29 ||
[Analyze grammar]

śailodaro guhaṃ jaṃbho mālyavaṃtaṃ mahābalaḥ |
mahāpārśvo yayau caṃḍaṃ caṃḍīśo romakaṃṭakam || 30 ||
[Analyze grammar]

vikaṭāsyo'tha vai bhṛṃgimurunetro vināyakam |
evaṃ daityeśvaraiḥ sārddhaṃ gaṇānāmadhipā yayuḥ || 31 ||
[Analyze grammar]

atha śuṃbhāyudhairbāṇaiḥ prahataśca śilādajaḥ |
cūrṇīcakārādriśṛṃgaiḥ kapituṃḍo mahattaraiḥ || 32 ||
[Analyze grammar]

śuṃbhastenārditaḥ śaktyā śilādaṃ ca jaghāna tam |
mahākālo jaghānātha taṃ rāhuṃ raṇamūrddhani || 33 ||
[Analyze grammar]

śaktyātha tasya hatavānsyaṃdanaṃ sa mahādriṇā |
kolāhalo hataḥ śaktyā niśuṃbhena pratāpavān || 34 ||
[Analyze grammar]

śaktiṃ gṛhītvā hyahanadrathaṃ sārathinā saha |
virathenātha daityena bhṛśaṃ kruddhena saṃyuge || 35 ||
[Analyze grammar]

kolāhalo sureṃdreṇa sahasraphaṇinā hataḥ |
taṃ hatvā cātivegena rathaṃ cānyamupāgataḥ || 36 ||
[Analyze grammar]

phaṇicakrahataḥ saṃkhye kṣaṇānmūrcchāṃ vihāya ca |
svarathātśīghramuttīrya gṛhītvā khaḍgacarmaṇī || 37 ||
[Analyze grammar]

sarvaṃ cakre niśuṃbhasya sa rathādyasinā pṛthak |
punaḥ svarathamāruhya daityaṃ bāṇairatāḍayat || 38 ||
[Analyze grammar]

niśuṃbho'pyatiroṣācca tatparākramavismitaḥ |
śaktyā mahābalastasya rathaṃ sāśvaṃ nyaṣūdayat || 39 ||
[Analyze grammar]

kolāhalo raṇe dhāvanniśuṃbhaṃ viratho balī |
gataḥ sa sarathaṃ cakre virathaṃ bhujabaṃdhanāt || 40 ||
[Analyze grammar]

ketupucchaṃ gṛhītvā ca bhrāmayāmāsa cāṃbare |
kālaścikṣepa so'pyadriṃ sa ciccheda giriṃ javāt || 41 ||
[Analyze grammar]

taṃ nagaṃ cūrṇitaṃ dṛṣṭvā tāḍayāmāsa muṣṭinā |
kālaścūrṇitasarvāṃgaḥ ketunā prādravadbhayāt || 42 ||
[Analyze grammar]

śailodarastathā skaṃdaṃ jaghāna gadayorasi |
ṣaḍānano'pi taṃ śaktyā hatvā bhūmāvapātayat || 43 ||
[Analyze grammar]

śaktiprahāreṇa mṛtaṃ dānavaṃ vīkṣya ṣaṇmukhaḥ |
jagarja tatra vaicitryaṃ yathā krauṃce vidārite || 44 ||
[Analyze grammar]

mālyavānatha bāṇaughairjaṃbhamabhyardayadraṇe |
jaṃbho'pi sāyakaistīkṣṇairbhittvā taṃ mūrcchitaṃ jahau || 45 ||
[Analyze grammar]

mahāpārśvo rathaṃ dhṛtvā bāṇaughairvājivarjitam |
līlayaiva ca khe nītvā vyaśvaṃ caṃḍamapātayat || 46 ||
[Analyze grammar]

vyaśvaṃ rathaṃ vilokyātha tataścaṃḍo'grahīdgajam |
āpataṃtaṃ mahāpārśvaṃ caṃḍastaṃ gadayāhanat || 47 ||
[Analyze grammar]

aciṃtyaiva gadāpātaṃ so'suro bhṛśadāruṇaḥ |
prahatya muṣṭinā caṃḍaṃ pātayāmāsa bhūtale || 48 ||
[Analyze grammar]

caṃḍīśaśastrābhihato romakaṃṭho mahāsuraḥ |
caṃḍīśaṃ pādayordhṛtvā rathamūrdhni nyapātayat || 49 ||
[Analyze grammar]

papāta sahasā bhūmau yayau taṃ bhīṣaṇekṣaṇaḥ |
urunetreṇa samare hato laṃbodaraḥ śaraiḥ || 50 ||
[Analyze grammar]

daṃtenorasi taṃ hatvā pātayāmāsa bhūtale |
ūrunetraḥ kṣaṇācchāṃtimāgatyāśu rathaṃ kṣaṇāt || 51 ||
[Analyze grammar]

jaghāna mudgareṇāsau mūrdhni siṃdūramaṃḍite |
gaṇeśvaraḥ paṭṭiśena jaghānorasi dānavam || 52 ||
[Analyze grammar]

tanmukhādatha niṣkrāṃto navaśīrṣo'suro mahān |
aṣṭādaśabhujo rājanso'pyadhāvata śāṃkarim || 53 ||
[Analyze grammar]

navaśīrṣorunetrābhyāṃ raṇe ruddho vināyakaḥ |
jarjarīkṛtadeho'pi jagrāha paraśuṃ ruṣā || 54 ||
[Analyze grammar]

tena ciccheda śastrāṇi tayorājau gaṇeśvaraḥ |
ruddhaṃ gaṇeśvaraṃ dṛṣṭvā tābhyāṃ saṃkhye'tha ṣaṇmukhaḥ || 55 ||
[Analyze grammar]

śīghramāgatya senānīrjaghāna navaśīrṣakam |
navaśīrṣaṃ raṇe hatvā urunetramadhāvata || 56 ||
[Analyze grammar]

skaṃdaḥ svaśaktighātena pātayāmāsa taṃ nṛpa |
paśyañjālaṃdharaḥ skaṃdaṃ yayau sainyena saṃvṛtaḥ || 57 ||
[Analyze grammar]

putraprītyāsurānhaṃtuṃ sagaṇaḥ śaṃkaro'pi ca |
tato ghorataraṃ yuddhamabhūdadbhutasainyayoḥ || 58 ||
[Analyze grammar]

harasiṃdhujayoryuddhe gataprāṇeva rodasī |
atha jālaṃdharaḥ kruddho bāṇaṃ saṃdhāya dāruṇam || 59 ||
[Analyze grammar]

sahasraśatasaṃkhyākaiḥ patraiḥ sarvatra bhūṣitam |
daityeṃdrastena bāṇena lalāṭetāḍayacchivam || 60 ||
[Analyze grammar]

mamajjāpuṃkhamaryādaṃ lalāṭe śaṃkarasya ca |
bhāle śaśāṃkavacchaṃbhoḥ sa rarāja mahāprabhaḥ || 61 ||
[Analyze grammar]

yathādityo hi gharmāṃte saṃdhyākāleṃbudāgame |
atha rudro mahābāṇaṃ jagrāha jvalanopamam || 62 ||
[Analyze grammar]

yasya vege tu pavanaḥ phale yasyāgnibhāskarau |
kālo graṃthiṣu sarveṣu śare devī dharā sthitā || 63 ||
[Analyze grammar]

harastena śareṇāśu vivyādha hṛdi siṃdhujam |
tena bāṇaprahāreṇa rudhiraughapariplutaḥ || 64 ||
[Analyze grammar]

papāta śarabhinnāṃgo vajrāhata ivācalaḥ |
tadā daityāḥ samākraṃdanjagarjuḥ pramathāstathā || 65 ||
[Analyze grammar]

siṃdhujaṃ mūrchitaṃ dṛṣṭvā rurudhurdānavāḥ śivam |
rakṣārthamudyatāḥ kecitkecittaṃ paritaḥ sthitāḥ || 66 ||
[Analyze grammar]

yāvajjālaṃdharo mūrchāṃ prāpto vāridhinaṃdanaḥ |
tāvadrudreṇa nārācairhatā jālaṃdharī camūḥ || 67 ||
[Analyze grammar]

cirājjālaṃdharastyaktvā mūrchāṃ sainyaṃ hataṃ nṛpa |
dṛṣṭvā bhayānvitaḥ senāṃ vikīrṇāṃ ca tathā raṇe || 68 ||
[Analyze grammar]

tataḥ kāvyaṃ sa sasmāra manasā paramaṃ gurum |
smṛtastena tvaranprāptaḥ kavirjālaṃdharaṃ prati || 69 ||
[Analyze grammar]

svasti kṛtvā jagādātha bhārgavaḥ siṃdhunaṃdanam |
kiṃ karomi mahārāja tava kāryaṃ mahābala || 70 ||
[Analyze grammar]

nārada uvāca |
iti kāvyavacaḥ śrutvā bhārgavaṃ bahu mānayan |
natvā gurumuvācātha rājā jālaṃdharastathā || 71 ||
[Analyze grammar]

rājovāca |
jīvayaitānmṛtāñchukra daityānsarvānsamaṃtataḥ |
ityuktaḥ siṃdhujenājau sainyaṃ tatra vyalokayat || 72 ||
[Analyze grammar]

paṃcaviṃśatsahasrāṇi yojanānāṃ pramāṇataḥ |
daityāṃgarathasaṃkīrṇamuparyupari pārthiva || 73 ||
[Analyze grammar]

ucchraye paṃcanavatiyojanānāṃ mahīṃ citām |
yodhavāhanadehādyairiva pūrṇāṃ dharāṃ tataḥ || 74 ||
[Analyze grammar]

maṃtrodakena cābhyukṣya daityānutthāpayatkaviḥ |
yāvadrudro jaṭājūṭaṃ babaṃdha bhujagairdṛḍham || 75 ||
[Analyze grammar]

tāvatkāvyena tatsainyaṃ maṃtreṇotthāpitaṃ nṛpa |
vyāghrānyathā kesariṇo gajeṃdrāḥ śūkarānyathā || 76 ||
[Analyze grammar]

āgatāndānavāndṛṣṭvā ciṃtayāmāsa śaṃkaraḥ |
kimetadiha saṃjātaṃ mṛtānsṛjati kutracit || 77 ||
[Analyze grammar]

dadarśa ciṃtayankāvya iti tasminraṇe bhavaḥ |
jīvayaṃtaṃ raṇe daityāndhāvaṃtaṃ vegavattaram || 78 ||
[Analyze grammar]

tataḥ kruddho mahādevaḥ śukraṃ haṃtuṃ mano dadhe |
triśūlinamanujñāya rahaścovāca taṃ kaviḥ || 79 ||
[Analyze grammar]

brāhmaṇo'haṃ kathaṃ haṃsi sarvavidyāviśāradam |
brahmahatyā mayi hate tava rudra bhaviṣyati || 80 ||
[Analyze grammar]

iti śrutvā kavervākyaṃ śūlaṃ tatyāja śaṃkaraḥ |
smṛtvā tatpūrvavṛttāṃtaṃ yallagnaṃ brahmaṇaḥ śiraḥ || 81 ||
[Analyze grammar]

brāhmaṇo na hi haṃtavyo haranprāṇānapi priyān |
ayaṃ tu jīvayandaityānnigrāhyaḥ sarvathā mayā || 82 ||
[Analyze grammar]

tasmādenaṃ kṣipāmyāśu strīyonau daityajīvanam |
evamuktavataḥ śaṃbhostṛtīyanayanāddrutam || 83 ||
[Analyze grammar]

kṛtyā vivāsā cātyugrā muktakeśī mahodarā |
sthūlalaṃbastanī yonī daṃṣṭrālocanabhīṣaṇā || 84 ||
[Analyze grammar]

ājñāpayeti sa tayā proktastāmabravīcchivaḥ |
kṛtye tvaṃ dānavācāryaṃ svayonau kṣipa durmatim || 85 ||
[Analyze grammar]

yāvajjālaṃdharaṃ hanmi tāvadenaṃ bhage vaha |
hate jālaṃdhare daitye paścānnistīrya mocaya || 86 ||
[Analyze grammar]

hareṇokteti sā kṛtyā bhārgavaṃ samadhāvata |
papāta bhūmau tāṃ dṛṣṭvā kavirdaityāḥ pradudruvuḥ || 87 ||
[Analyze grammar]

keśeṣvākṛṣya dhunvānā nagnamāliṃgya bhārgavam |
yonau dadhāra sā kṛtyā hasaṃtī jayanaṃdana || 88 ||
[Analyze grammar]

bhage kṣiptaṃ guruṃ dṛṣṭvā yāvajjālaṃdharo'suraḥ |
saṃdadhe mārgaṇāṃstāvatsā kṛtyādṛśyatāṃ gatā || 89 ||
[Analyze grammar]

iti śrīpādme mahāpurāṇe paṃcapaṃcāśatasahasrasaṃhitāyāṃ yudhiṣṭhiranāradasamvāde jālaṃdharopākhyāne śukrayonipraveśonāma saptadaśo'dhyāyaḥ || 17 ||
[Analyze grammar]