Chapter 83

[English text for this chapter is available]

sukarmovāca |
samāhūya prajāḥ sarvā dvīpānāṃ vasudhādhipaḥ |
harṣeṇa mahatāviṣṭa idaṃ vacanamabravīt || 1 ||
[Analyze grammar]

iṃdralokaṃ brahmalokaṃ rudralokamataḥ param |
vaiṣṇavaṃ sarvapāpaghnaṃ prāṇināṃ gatidāyakam || 2 ||
[Analyze grammar]

vrajāmyahaṃ na saṃdeho hyanayā saha sattamāḥ |
brāhmaṇāḥ kṣatriyā vaiśyāḥ saśūdrā śca prajā mama || 3 ||
[Analyze grammar]

sukhenāpi sakuṭuṃbaiḥ sthātavyaṃ tu mahītale |
pūrureṣa mahābhāgo bhavatāṃ pālakastviha || 4 ||
[Analyze grammar]

sthāpitosti mayā lokā rājā dhīraḥ sadaṃḍakaḥ |
evamuktāstu tāḥ sarvāḥ prajā rājānamabruvan || 5 ||
[Analyze grammar]

śrūyate sarvavedeṣu purāṇeṣu nṛpottama |
dharma evaṃ yato loke na dṛṣṭaḥ kena vai purā || 6 ||
[Analyze grammar]

dṛṣṭosmābhirasau dharmo daśāṃgaḥ satyavallabhaḥ |
somavaṃśasamutpanno nahuṣasya mahāgṛhe || 7 ||
[Analyze grammar]

hastapādamukhairyuktaḥ sarvācārapracārakaḥ |
jñānavijñānasaṃpannaḥ puṇyānāṃ ca mahānidhiḥ || 8 ||
[Analyze grammar]

guṇānāṃ hi mahārāja ākaraḥ satyapaṃḍitaḥ |
kurvaṃti ca mahādharmaṃ satyavaṃto mahaujasaḥ || 9 ||
[Analyze grammar]

taṃ dharmaṃ dṛṣṭavaṃtaḥ sma bhavaṃtaṃ kāmarūpiṇam |
bhavaṃtaṃ kāmakartāramīdṛśaṃ satyavādinam || 10 ||
[Analyze grammar]

karmaṇā trividhenāpi vayaṃ tyaktuṃ na śaknumaḥ |
yatra tvaṃ tatra gacchāmaḥ susukhaṃ puṇyameva ca || 11 ||
[Analyze grammar]

narakepi bhavānyatra vayaṃ tatra na saṃśayaḥ |
kiṃ dārairdhanabhogaiśca kiṃ jīvairjīvitena ca || 12 ||
[Analyze grammar]

tvāṃ vināsumahārāja tena nāstyatra kāraṇam |
tvayaiva saha rājeṃdra vayaṃ yāsyāma nānyathā || 13 ||
[Analyze grammar]

evaṃ śrutvā vacastāsāṃ prajānāṃ pṛthivīpatiḥ |
harṣeṇa mahatāviṣṭaḥ prajāvākyamuvāca ha || 14 ||
[Analyze grammar]

āgacchaṃtu mayā sārddhaṃ sarve lokāḥ supuṇyakāḥ |
nṛpo rathaṃ samāruhya tayā vai kāmakanyayā || 15 ||
[Analyze grammar]

rathena haṃsavarṇena caṃdrabiṃbānukāriṇā |
cāmarairvyajanaiścāpi vījyamāno gatavyathaḥ || 16 ||
[Analyze grammar]

ketunā tena puṇyena śubhreṇāpi mahīyasā |
śobhamāno yathā devo devarājaḥ puraṃdaraḥ || 17 ||
[Analyze grammar]

ṛṣibhiḥ stūyamānastu baṃdibhiścāraṇaistathā |
prajābhiḥ stūyamānaśca yayātirnahuṣātmajaḥ || 18 ||
[Analyze grammar]

prajāḥ sarvāstato yānaiḥ samāyātā nareśvaram |
gajairaśvai rathaiścānyaiḥ prasthitāśca divaṃ prati || 19 ||
[Analyze grammar]

brāhmaṇāḥ kṣatriyā vaiśyāḥ śūdrāścānye pṛthagjanāḥ |
sarve ca vaiṣṇavā lokā viṣṇudhyānaparāyaṇāḥ || 20 ||
[Analyze grammar]

teṣāṃ tu ketavaḥ śuklā hemadaṃḍairalaṃkṛtāḥ |
śaṃkhacakrāṃkitāḥ sarve sadaṃḍāḥ sapatākinaḥ || 21 ||
[Analyze grammar]

prajāvṛṃdeṣu bhāsaṃte patākā māruteritāḥ |
divyamālādharāssarve śobhitāstulasīdalaiḥ || 22 ||
[Analyze grammar]

divyacaṃdanadigdhāṃgā divyagaṃdhānulepanāḥ |
divyavastrakṛtā śobhā divyābharaṇabhūṣitāḥ || 23 ||
[Analyze grammar]

sarve lokāḥ surūpāste rājānamupajagmire |
prajāśatasahasrāṇi lakṣakoṭiśatāni ca || 24 ||
[Analyze grammar]

arvakharvasahasrāṇi te janāḥ pratijagmire |
te tu rājñā samaṃ sarve vaiṣṇavāḥ puṇyakāriṇaḥ || 25 ||
[Analyze grammar]

viṣṇudhyānaparāḥ sarve japadānaparāyaṇāḥ |
sukarmovāca |
evaṃ te prasthitāḥ sarve harṣeṇa mahatānvitāḥ || 26 ||
[Analyze grammar]

pūruṃ putraṃ mahārāja svarājye pariṣicya tam |
aiṃdraṃ lokaṃ jagāmātha yayātiḥ pṛthivīpatiḥ || 27 ||
[Analyze grammar]

tejasā tasya puṇyena dharmeṇa tapasā tadā |
te janāḥ prasthitāḥ sarve vaiṣṇavaṃ lokamuttamam || 28 ||
[Analyze grammar]

tato devāḥ sagaṃdharvāḥ kinnarāścāraṇāstathā |
sahitā devarājena āgatāḥ saṃmukhaṃ tadā || 29 ||
[Analyze grammar]

tasyaivāpi nṛpeṃdrasya pūjayaṃto nṛpottama |
iṃdra uvāca |
svāgataṃ te mahārāja mama gehaṃ samāviśa || 30 ||
[Analyze grammar]

atra bhogānprabhuṃkṣva tvaṃ divyānkāmānmano'nugān |
rājovāca |
sahasrākṣa mahāprājña tava pādāṃbujadvayam || 31 ||
[Analyze grammar]

namaskaromyahaṃ deva brahmalokaṃ vrajāmyaham |
devaiḥ saṃstūyamānaśca brahmalokaṃ jagāma ha || 32 ||
[Analyze grammar]

padmayonirmahātejāḥ sārdhaṃ munivaraistadā |
ātithyaṃ ca cakārāsya pādyārghādi suviṣṭaraiḥ || 33 ||
[Analyze grammar]

uvāca viṣṇulokaṃ hi prayāhi tvaṃ svakarmaṇā |
evamābhāṣite dhātrā jagāma śivamaṃdiram || 34 ||
[Analyze grammar]

cakre ātithyapūjāṃ ca umayā saha śaṃkaraḥ |
tasyai vāpi nṛpeṃdrasya rājānamidamabravīt || 35 ||
[Analyze grammar]

kṛṣṇabhaktosi rājeṃdra mamāpi supriyo bhavān |
tato yayāte rājeṃdra vasa tvaṃ mama maṃdiram || 36 ||
[Analyze grammar]

sarvānbhogānprabhuṃkṣva tvaṃ duḥkhaprāpyānhi mānuṣaiḥ |
aṃtaraṃ nāsti rājeṃdra mama viṣṇorna saṃśayaḥ || 37 ||
[Analyze grammar]

yosau viṣṇusvarūpeṇa sa vai rudro na saṃśayaḥ |
yo rudro vidyate rājansa ca viṣṇuḥ sanātanaḥ || 38 ||
[Analyze grammar]

ubhayoraṃtaraṃ nāsti tasmāccaiva vadāmyaham |
viṣṇubhaktasyapuṇyasyasthānamevadadāmyaham || 39 ||
[Analyze grammar]

tasmādatra mahārāja sthātavyaṃ hi tvayānagha |
evamuktaḥ śivenāpi yayātirharivallabhaḥ || 40 ||
[Analyze grammar]

bhaktyā praṇamya deveśaṃ śaṃkaraṃ natakaṃdharaḥ |
etatsarvaṃ mahādeva tvayoktamiha sāṃpratam || 41 ||
[Analyze grammar]

yuvayoraṃtaraṃ nāsti ekā mūrtirdvidhābhavat |
vaiṣṇavaṃ gaṃtumicchāmi pādau tava namāmyaham || 42 ||
[Analyze grammar]

evamastu mahārāja gaccha lokaṃ tu vaiṣṇavam |
samādiṣṭaḥ śivenāpi pratasthe vasudhādhipaḥ || 43 ||
[Analyze grammar]

pṛthvīśastairmahāpuṇyairvaiṣṇavairviṣṇuvallabhaiḥ |
nṛtyamānaistatastaistu puratastasya bhūpateḥ || 44 ||
[Analyze grammar]

śaṃkhaśabdaiḥ supāpaghnaiḥ siṃhanādaiḥ supuṣkalaiḥ |
jagāma niḥsvanai rājā pūjyamānaḥ sucāraṇaiḥ || 45 ||
[Analyze grammar]

susvarairgīyamānastu pāṭhakaiḥ śāstrakovidaiḥ |
gāyaṃti puratastasya gaṃdharvā gītatatparāḥ || 46 ||
[Analyze grammar]

ṛṣibhiḥ stūyamānaśca devavṛṃdaiḥ samanvitaiḥ |
apsarobhiḥ surūpābhiḥ sevyamānaḥ sa nāhuṣiḥ || 47 ||
[Analyze grammar]

gaṃdharvaiḥ kinnaraiḥ siddhaiścāraṇaiḥ puṇyamaṃgalaiḥ |
sādhyairvidyādharai rājā marudbhirvasubhistathā || 48 ||
[Analyze grammar]

rudraiścādityavargaiśca lokapālairdigīśvaraiḥ |
stūyamāno mahārājastrailokyena samaṃtataḥ || 49 ||
[Analyze grammar]

dadṛśe vaiṣṇavaṃ lokamanaupamyamanāmayam |
vimānaiḥ kāṃcanai rājansarvaśobhāsamāvilaiḥ || 50 ||
[Analyze grammar]

haṃsakuṃdeṃdudhavalairvimānairupaśobhitaiḥ |
prāsādaiḥ śatabhaumaiśca merumaṃdarasaṃnibhaiḥ || 51 ||
[Analyze grammar]

śikharairullikhadbhiśca svarvyomahāṭakānvitaiḥ |
jājvalyamānaiḥ kalaśaiḥ śobhate supurottamam || 52 ||
[Analyze grammar]

tārāgaṇairyathākāśaṃ tejaḥ śriyā prakāśate |
prajvalattejojvālābhirlocanairiva lokate || 53 ||
[Analyze grammar]

nānāratnairharerlokaḥ prahasaddaśanairiva |
samāhvayati tānpuṇyānvaiṣṇavānviṣṇuvallabhān || 54 ||
[Analyze grammar]

dhvaja vyājena rājeṃdra calitāgraiḥ supallavaiḥ |
śvasanāṃdolitaistaiśca dhvajāgraiśca manoharaiḥ || 55 ||
[Analyze grammar]

hemadaṃḍaiśca ghaṃṭābhiḥ sarvatrasamalaṃkṛtam |
sūryatejaḥ prakāśaiśca gopurāṭṭālakaistataḥ || 56 ||
[Analyze grammar]

gavākṣairjālamālaiśca vātāyanamanoharaiḥ |
pratolīnāṃ prakāśaiśca prākārairhemarūpakaiḥ || 57 ||
[Analyze grammar]

toraṇaiḥ supatākābhirnānāśabdaiḥ sumaṃgalaiḥ |
kalaśāgraiścakrabiṃbai ravibiṃbasamaprabhaiḥ || 58 ||
[Analyze grammar]

subhogaiḥ śatakakṣaiśca nirjalāṃbudasannibhaiḥ |
daṃḍacchatrasamākīrṇaiḥ kalaśairupaśobhitaiḥ || 59 ||
[Analyze grammar]

prāvṛṭkālāṃbudākārairmadirairupaśobhitaiḥ |
kalaśaiḥ śobhamānaistairṛkṣairdyauriva bhūtalam || 60 ||
[Analyze grammar]

daṃḍajālapatākābhirṛkṣajālasamaprabhaiḥ |
tādṛśaiḥ sphāṭikākāraiḥ kāṃtiśaṃkheṃdusannibhaiḥ || 61 ||
[Analyze grammar]

hemaprāsādasaṃbādhairnānādhātumayaistataḥ |
vimānairarbudasaṃkhyaiḥ śatakoṭisahasrakaiḥ || 62 ||
[Analyze grammar]

sarvabhogayutaiścaiva śobhate haripattanam |
yaiḥ samārādhito devaḥ śaṃkhacakragadādharaḥ || 63 ||
[Analyze grammar]

te prasādāttasya teṣu nivasaṃti gṛheṣu ca |
sarvapuṇyeṣu divyeṣu bhogāḍhyeṣu ca mānavāḥ || 64 ||
[Analyze grammar]

vaiṣṇavāḥ puṇyakarmāṇo nirdhūtāśeṣakalmaṣāḥ |
evaṃvidhairgṛhaiḥ puṇyaiḥ śobhitaṃ viṣṇumaṃdiram || 65 ||
[Analyze grammar]

nānāvṛkṣaiḥ samākīrṇaṃ vanaiścaṃdanaśobhitaiḥ |
sarvakāmaphalai rājansarvatra samalaṃkṛtam || 66 ||
[Analyze grammar]

vāpīkuṃḍataḍāgaiśca sārasairupaśobhitaiḥ |
haṃsakāraṃḍavākīrṇaiḥ kalhārairupaśobhitaiḥ || 67 ||
[Analyze grammar]

śatapatrairmahāpadmaiḥ padmotpalavirājitaiḥ |
kanakotpalavarṇaiśca sarobhiśca virājate || 68 ||
[Analyze grammar]

vaikuṃṭhaṃ sarvaśobhāḍhyaṃ devodyānairalaṃkṛtam |
divyaśobhāsamākīrṇaṃ vaiṣṇavairupaśobhitam || 69 ||
[Analyze grammar]

vaikuṃṭhaṃ dadṛśe rājā mokṣasthānamanuttamam |
devavṛṃdaiḥ samākīrṇaṃ yayātirnahuṣātmajaḥ || 70 ||
[Analyze grammar]

praviveśa puraṃ ramyaṃ sarvadāhavivarjitam |
dadṛśe sarvakleśaghnaṃ nārāyaṇamanāmayam || 71 ||
[Analyze grammar]

vimānairupaśobhaṃtaṃ sarvābharaṇaśālinam |
pītavāsaṃ jagannāthaṃ śrīvatsāṃkaṃ mahādyutim || 72 ||
[Analyze grammar]

vainateyasamārūḍhaṃ śriyāyuktaṃ parātparam |
sarveṣāṃ devalokānāṃ yo gatiḥ parameśvaraḥ || 73 ||
[Analyze grammar]

paramānaṃdarūpeṇa kaivalyena virājate |
sevyamānaṃ mahālokaiḥsupuṇyairvaiṣṇavairharim || 74 ||
[Analyze grammar]

devavṛṃdaiḥ samākīrṇaṃ gaṃdharvagaṇasevitam |
apsarobhirmahātmānaṃ duḥkhakleśāpahaṃ harim || 75 ||
[Analyze grammar]

nārāyaṇaṃ nanāmātha svapatnyā saha bhūpatiḥ |
praṇemurmānavāḥ sarve vaiṣṇavā madhusūdanam || 76 ||
[Analyze grammar]

gatā ye vaiṣṇavāḥ sarve saha rājñā mahāmate |
pādāṃbujadvayaṃ tasya nemurbhaktyā mahāmate || 77 ||
[Analyze grammar]

praṇamaṃtaṃ mahātmānaṃ rājānaṃ dīptatejasam |
tamuvāca hṛṣīkeśastuṣṭo'haṃ tava suvrata || 78 ||
[Analyze grammar]

varaṃ varaya rājeṃdra yatte manasi vartate |
tatte dadāmyasaṃdehaṃ madbhaktosi mahāmate || 79 ||
[Analyze grammar]

rājovāca |
yadi tvaṃ devadeveśa tuṣṭosi madhusūdana |
dāsatvaṃ dehi satatamātmanaśca jagatpate || 80 ||
[Analyze grammar]

viṣṇuruvāca |
evamastu mahābhāga mama bhakto na saṃśayaḥ |
loke mama mahārāja sthātavyamanayā saha || 81 ||
[Analyze grammar]

evamukto mahārājo yayātiḥ pṛthivīpatiḥ |
prasādāttasya devasya viṣṇulokaṃ prasādhitam || 82 ||
[Analyze grammar]

nivasatyeṣa bhūpālo vaiṣṇavaṃ lokamuttamam || 83 ||
[Analyze grammar]

iti śrīpadmapurāṇe bhūmikhaṃḍe venopākhyāne pitṛtīrthavarṇane yayāticaritre yayāteḥ svargārohaṇaṃ nāma tryaśītitamo'dhyāyaḥ || 83 ||
[Analyze grammar]