Chapter 269

śrīkṛṣṇa uvāca |
śṛṇu tvaṃ rādhike tatra tīrthe gatvā'śvapāṭalaḥ |
punaḥ papraccha tīrthasya kiṃnāmādi ca lomaśam || 1 ||
[Analyze grammar]

aśvapāṭala uvāca |
guro tīrthamidaṃ khyātaṃ kiṃnāmnā ca kadā'bhavat |
tatsarvaṃ me tu saṃkṣepād brūhi kiṃ phalamasya ca || 2 ||
[Analyze grammar]

śrīlomaśa uvāca |
śṛṇu rājan pravakṣyāmi tīrthaṃ paramapāvanam |
lakṣmītīrthaṃ tathā nārāyaṇatīrthamidaṃ nṛpa || 3 ||
[Analyze grammar]

purā rājā hyabhayākṣo'bhavat pāṃcālabhūpatiḥ |
dharmakarmasamācāro dānabhaktiyuto harau || 4 ||
[Analyze grammar]

yasya gehe'tithayaśca sādhavo dīnadehinaḥ |
bhuṃjate śataśo nityaṃ tṛptimāyānti śāśvatīm || 5 ||
[Analyze grammar]

yatra nārāyaṇaḥ sākṣāt sādhurūpeṇa rājate |
ajñeyaḥ sarvalokānāṃ viprasaṃsevitaḥ prabhuḥ || 6 ||
[Analyze grammar]

lakṣmīḥ rādhā tathā sādhvīrūpeṇa ca virājate |
devā devyo vijānanti na ca jānanti mānavāḥ || 7 ||
[Analyze grammar]

divyākṣā ye munayaśca te jānanti na cetare |
rājā nityaṃ sevate śrīprabhuṃ śrīpuruṣottamam || 8 ||
[Analyze grammar]

nārāyaṇaṃ bhajate ca caturbhujaṃ śriyaḥ patim |
kathāṃ śṛṇoti satataṃ sādhuviprānanāt sa ca || 9 ||
[Analyze grammar]

kuṭumbasahito rājā tvātmajñānaparo'bhavat |
sādhusevāparaścāpi prajārakṣāparāyaṇaḥ || 10 ||
[Analyze grammar]

nā'sya prajāyāṃ cā'dharmo na stainyaṃ nāpi hiṃsanam |
śaucaṃ prajāḥ pālayanti santuṣṭā nijavastuṣu || 11 ||
[Analyze grammar]

viprāstu tāpasāstasya bhuṃjate bhojanāni vai |
vedaghoṣaparā nityaṃ ṣaṭkarmādiparāyaṇāḥ || 12 ||
[Analyze grammar]

yajñayāgaparāścāpi nārāyaṇaparāyaṇāḥ |
brahmaśīlaparā lokāḥ kāmaṃ na bahu manvate || 13 ||
[Analyze grammar]

arthaṃ cāpekṣitaṃ hyevārjayanti nādhikaṃ tataḥ |
śeṣaṃ tu samayaṃ sarve mokṣārthaṃ kalpayanti vai || 14 ||
[Analyze grammar]

nā'sya rājye'sti vidhavā hyaputrā cā'pyapatyakaḥ |
apatnīko gṛhastho na dhanadhānyayutāḥ prajāḥ || 15 ||
[Analyze grammar]

prātaḥ sarvatra nagare kṛṣṇakṛṣṇasvanāḥ śubhāḥ |
māṃgalikāśca jāyante śrūyante kīrtanāni ca || 16 ||
[Analyze grammar]

nā'snāto vidyate kaścin nā'pūjo vidyate tathā |
mānavānāṃ lalāṭeṣu tilakaṃ candrakānvitam || 17 ||
[Analyze grammar]

dṛśyate cāndanaṃ cordhve smārakaṃ śrīhareḥ śubham |
kaṇṭhe sarvaprajānāṃ vai dṛśyante taulasīsrajaḥ || 18 ||
[Analyze grammar]

kare'pi taulasīmālā japakāryaprabodhinī |
jihvāyāṃ śrīharernāma namaskāre'pi vai hariḥ || 19 ||
[Analyze grammar]

dāne paropakāre'pi śrīhariṃ smaryate janaiḥ |
kanyakāśca kumārāśca vidyābhyāsaparāśca ye || 20 ||
[Analyze grammar]

śālāyāṃ prathamaṃ kṛtvā kīrtanaṃ śrīharestataḥ |
abhyasyanti pāṭhayanti copādhyāyā hariśritāḥ || 21 ||
[Analyze grammar]

nyāyālaye'pi satataṃ śrūyate'gre'vasānake |
harerāma harekṛṣṇa nārāyaṇa namo'stviti || 22 ||
[Analyze grammar]

nadītīre gṛhe kṣetre vāṭikāsu vane'pi ca |
karṣukāḥ śilpinaḥ kāṣṭhahārāstṛṇādinindakāḥ || 23 ||
[Analyze grammar]

sarve kṛṣṇaparāḥ kṛṣṇaṃ smṛtvā kurvanti vai śramam |
āndhasikā harerbhaktāḥ sthāle kṛtvā tu pācitam || 24 ||
[Analyze grammar]

annaṃ sarvavidhaṃ cāpi phalamūlajalādikam |
samarpya haraye paścād bhojayanti gṛheśvarān || 25 ||
[Analyze grammar]

devārpaṇaṃ prakṛtvaiva bhuṃjate ca pibanti ca |
āpaṇasthāḥ śreṣṭhivaryā gaṇeśārcanamityapi || 26 ||
[Analyze grammar]

kṛtvā ghṛtapradīpaṃ ca tataḥ śrīkṛṣṇapūjanam |
vyāpārayanti divase rātrau bhajanti mādhavam || 27 ||
[Analyze grammar]

paśupālā hariṃ natvā gāṃ sampūjya ca mandiram |
śrīkṛṣṇasya vīkṣya paścāt kṛtvā kṛṣṇasya darśanam || 28 ||
[Analyze grammar]

yāntyaraṇyabhūbhāgān harismṛtiparāyaṇāḥ |
kāṣṭhahārāḥ kṛṣṇakṛṣṇa bhajanto yānti vai pathi || 29 ||
[Analyze grammar]

rajakā vastrasampuṭakṣālane rāmanāma vai |
kṛṣṇanārāyaṇetyuktvā kṣālayanti jalāśaye || 30 ||
[Analyze grammar]

śukādyāḥ pakṣiṇaścāpi vakṣanti śrīnarāyaṇa |
raṃbhaṃte paśavaścāpyoṃkāramiśraṃ hi vaiṣṇavāḥ || 31 ||
[Analyze grammar]

tauryatrikā vādayanti kṛṣṇakīrtanagītikāḥ |
kavayaścāraṇādyāśca kṛṣṇaprabandhakāriṇaḥ || 32 ||
[Analyze grammar]

abhayākṣaṃ svakaṃ nāma vivṛttya bhūbhujā svayam |
adhokṣajaṃ harernāma khyāpitaṃ copanāma tat || 33 ||
[Analyze grammar]

prajānāṃ cāpi nāmāni pareśārthayutāni ca |
kāritāmīti rāṣṭraṃ sad vaiṣṇavaṃ saṃvyajāyata || 34 ||
[Analyze grammar]

evaṃvidho'bhayabhakto vicārya naśvaraṃ gṛham |
dhanaṃ rājyaṃ ca sampacca gatvaraṃ ca vapurnijam || 35 ||
[Analyze grammar]

vairāgyāveśataścāyamaśvapaṭṭasaro yayau |
prajā viprāstathā vṛddhāstaṃ rājānaṃ samanvayuḥ || 36 ||
[Analyze grammar]

mārge kīrtanabhaktyaiva samāyātān vilokya tān |
mārgagrāmāgatā lokāḥ kautūhalasamanvitāḥ || 37 ||
[Analyze grammar]

saha cāśvasarastīrthaṃ pratyāyayuḥ samutsukāḥ |
uttare sarasastīre vāsaṃ cakrurdrumālaye || 38 ||
[Analyze grammar]

kṛtvā tīrthāni sarvāṇi lomaśasyāśramaṃ yayuḥ |
tato'nādikṛṣṇanārāyaṇaprāsādamāyayuḥ || 39 ||
[Analyze grammar]

pupūjuḥ parayā prītyā śrīmatkṛṣṇanarāyaṇam |
mātaraṃ pitaraṃ natvā dṛṣṭvā kuṃkumavāpikām || 40 ||
[Analyze grammar]

kuṃkumavāpikāvāri pītvā śrīpūjanaṃ tathā |
vidhāya datvā dānāni yayuḥ sarastaṭe punaḥ || 41 ||
[Analyze grammar]

adhokṣajaḥ sa rājā'tra sthale ceyeṣa vai kratum |
kartuṃ nārāyaṇaṃ samprasādayituṃ mahejyayā || 42 ||
[Analyze grammar]

lomaśaṃ saṃprārthayacca yajñārthaṃ sa hyadhokṣajaḥ |
lakṣasauvarṇamudrābhiryajñaṃ cakāra vaiṣṇavam || 43 ||
[Analyze grammar]

devānatarpayaddhavyaiḥ pitṝn śrāddhaiḥ sato'nnakaiḥ |
janān dānaistathā cātmārpaṇaiḥ sādhūn sureśvarān || 44 ||
[Analyze grammar]

pūrṇāhutau svayaṃ kṛṣṇo nārāyaṇaścaturbhujaḥ |
śaṃkhacakragadāpadmadharo vahnāvadṛśyata || 45 ||
[Analyze grammar]

bhuñjan havyāni sarvāṇi lakṣmyā samanvitaḥ prabhuḥ |
ramānandasunandādisevito garuḍānvitaḥ || 46 ||
[Analyze grammar]

prasannavadanaḥ śyāmo yuvā koṭyarkabhāsvaraḥ |
viprāścānye janāḥ sarve'bhavannāścaryasaṃbhṛtāḥ || 47 ||
[Analyze grammar]

aho rājñaḥ subhaktiśca sneho nārāyaṇasya ca |
lakṣmīnārāyaṇaḥ sākṣād bhuṃkte havyaṃ nṛpā'rpitam || 48 ||
[Analyze grammar]

rājānaṃ bhagavānāha mandiraṃ cātra kāraya |
lakṣmyā sākaṃ nivatsye'haṃ pratiṣṭhāpaya māṃ nṛpa || 49 ||
[Analyze grammar]

sādhudīkṣāṃ gṛhītvaiva tvaṃ me pūjāṃ vidhehi ca |
sthāsye vaśe ca te rājan sādho'dhokṣaja māṃ bhaja || 50 ||
[Analyze grammar]

ityuktvā ca prabhuktvā ca havyāni bhagavāṃstataḥ |
tirobhavat tato rājā'dhokṣajo bhūsurādike || 51 ||
[Analyze grammar]

dakṣiṇā vitarayyaiva bhojayitvā samastakān |
svataḥprakāśaṛṣitastyāgidīkṣāṃ samagrahīt || 52 ||
[Analyze grammar]

upavāsaṃ cakārā'sau dehaśuddhiṃ cakāra ca |
muṇḍanaṃ kārayāmāsa snātvā cakre'nale havam || 53 ||
[Analyze grammar]

nārāyaṇaṃ pupūjā'pi sarvatobhadramaṇḍale |
godānaṃ pṛthivīdānaṃ svarṇadānādikaṃ dadau || 54 ||
[Analyze grammar]

lakṣmīnārāyaṇasyā'pi mandirasya nimittakam |
lakṣaṃ suvarṇamudrāṇāṃ dānaṃ ca gurave dadau || 55 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
śaraṇaṃ śrīkṛṣṇanārāyaṇo'stu mama sarvadā || 56 ||
[Analyze grammar]

kālamāyāpāpakarmaśatruyāmyakuhṛdbhayāt |
śūlamīnadhvajadhanuścakrasvastikavānava || 57 ||
[Analyze grammar]

brahmā'haṃ śrīkṛṣṇanārāyaṇabhakto'smi śāśvata |
anādiśrīkṛṣṇanārāyaṇaḥ svāmī patiśca me || 58 ||
[Analyze grammar]

bālakṛṣṇaḥ parabrahma mama vai śāśvataḥ patiḥ |
pitā bandhuḥ suhṛn mitraṃ rakṣakaḥ pālako'stu saḥ || 59 ||
[Analyze grammar]

śrīkṛṣṇavallabhonāthaḥ śrīsvāmī śaraṇaṃ mama |
kṛṣṇavallabhabhakto'haṃ śrīhariḥ śaraṇaṃ mama || 60 ||
[Analyze grammar]

śrīkṛṣṇavallabhasvāmī śrīhariḥ śaraṇaṃ mama |
itimantrān sa jagrāha svataḥprākāśasadguroḥ || 61 ||
[Analyze grammar]

tataḥ kāṣāyāmbarāṇi dhārayāmāsa sadvratī |
yajñopavītakaṃ kaṇṭhīṃ taulasīṃ ca srajaṃ kare |
tilakaṃ cāndanaṃ cordhvapuṇḍraṃ cakrādimudrikāḥ || 62 ||
[Analyze grammar]

pūjārthaṃ kānakīṃ kārṣṇanārāyaṇīṃ ramāyutām |
pratimāṃ cāpi jagrāha gurupūjāṃ cakāra ca || 63 ||
[Analyze grammar]

adho'kṣajaprakāśeti nāma naijaṃ rarakṣa vai |
dīkṣāṃgaṃ vidhivadvaidhaṃ samāpya sarasastaṭe || 64 ||
[Analyze grammar]

parṇakuṭyāṃ sadāvāsaṃ cakre tvatra makhasthale |
jajāpa parayā bhaktyā śrīśaṃ kṛṣṇanarāyaṇam || 65 ||
[Analyze grammar]

kārayāmāsa subhagaṃ lakṣmīnārāyaṇālayam |
lakṣmīṃ nārāyaṇaṃ pratiṣṭhāpayāmāsa mandire || 66 ||
[Analyze grammar]

tadidaṃ mandiraṃ rājan rājate śrīhariśritam |
kuru vai darśanaṃ tatra śriyo hareśca vai tataḥ || 67 ||
[Analyze grammar]

dānāni dehi rājendra snānaṃ cātra samācāra |
etattīrthaṃ mahātīrthaṃ sarvayajñaphalapradam || 68 ||
[Analyze grammar]

yajñatīrthaṃ sādhutīrthaṃ lakṣmītīrthaṃ tathā matam |
adhokṣajākhyatīrthaṃ ca nārāyaṇākhyatīrthakam || 69 ||
[Analyze grammar]

dīkṣātīrthaṃ tathā khyātaṃ pāvanaṃ tvetadeva yat |
mārgaśīrṣe keśavaṃ ca prapūjya vidhinā'tra vai || 70 ||
[Analyze grammar]

mārgaśīrṣe snānadānādaśvamedhaphalaṃ labhet |
pauṣe snānācca dānācca śriyā yuktaṃ narāyaṇam || 71 ||
[Analyze grammar]

prapūjya labhate puṇyaṃ vājapeyamakhotthitam |
māghamāse snānadānānmādhavaṃ samprapūjya ca || 72 ||
[Analyze grammar]

tīrthakṛllabhate cātra rājasūyaphalaṃ param |
phālgune snānadānācca govindaṃ samprapūjya ca || 73 ||
[Analyze grammar]

atirātrākhyayajñotthaṃ phalaṃ labheddhi tīrthakṛt |
caitre snānāttathā dānādatra viṣṇuṃ prapūjya ca || 74 ||
[Analyze grammar]

puṇḍarīkaphalaṃ tīrthakartā prayāti pāvanam |
vaiśākhe snānadānācca prapūjya madhūsūdanam || 75 ||
[Analyze grammar]

agniṣṭomaphalaṃ rājan labhate'tra sa tīrthakṛt |
jyeṣṭhe snānāttathā dānāt trivikramaṃ prapūjya ca || 76 ||
[Analyze grammar]

labhate tīrthakṛccātra gavāyanakratoḥ phalam |
āṣāḍhe snānadānācca vāmanaṃ samprapūjya ca || 77 ||
[Analyze grammar]

labhate tīrthakṛccātra phalaṃ vai somayāgajam |
śrāvaṇe snānadānācca śrīdharaṃ samprapūjya ca || 78 ||
[Analyze grammar]

labhate tīrthakṛccātra viśvajitkratujaṃ phalam |
bhādre snānāttathā dānāt hṛṣīkeśaṃ prapūjya ca || 79 ||
[Analyze grammar]

labhate tīrthakṛccātra phalaṃ sautrāmaṇikratoḥ |
āśvine snānadānābhyāṃ padmanābhaṃ prapūjya ca || 80 ||
[Analyze grammar]

tīrthakṛllabhate puṇyaṃ vividhaṃ somayogajam |
kārtike snānadānābhyāṃ dāmodaraṃ prapūjya ca || 81 ||
[Analyze grammar]

labhate'tra tīrthaśāyī viṣṇuyāgodbhavaṃ phalam |
adhimāse snānadānāt prapūjya puruṣottamam || 82 ||
[Analyze grammar]

tīrthakṛllabhate sarvamedhayajñaphalaṃ param |
yatra kvaciddine tvatra snānād dānājapādibhiḥ || 83 ||
[Analyze grammar]

tīrthakṛllabhate rājan sarvayajñaphalāni vai |
śivarātryāṃ snānadānānmahārudraphalaṃ bhavet || 84 ||
[Analyze grammar]

ityetatpāvanaṃ kṣetraṃ lakṣmīnārāyaṇoditam |
kuru snānaṃ tathā pūjāṃ lakṣmīnārāyaṇasya vai || 85 ||
[Analyze grammar]

sarvān bhagavato dhyātvā sarvapuṇyānyavāpnuhi |
ityukto rādhike rājā tvaśvapāṭala eva ha || 86 ||
[Analyze grammar]

sakuṭumbo jale sasnau pupūja mandire harim |
śriyā yuktaṃ ṣoḍaśopacārairnīrājanādibhiḥ || 87 ||
[Analyze grammar]

tāvattasya śrīharau vai pratimāyāṃ caturdaśa |
keśavādyā bhagavanto hyadṛśyanta yathoditāḥ || 88 ||
[Analyze grammar]

kṣaṇaṃ svadarśanaṃ datvā'nādikṛṣṇanarāyaṇe |
līnāḥ sarve'vatārāste sa cā'pyantaradhīyata || 89 ||
[Analyze grammar]

aśvapāṭalanṛpatirmahāścaryaṃ jagāma ha |
kṛtakṛtyaṃ nijaṃ mene'dhokṣaje tīrthake tadā || 90 ||
[Analyze grammar]

aśvapāṭala uvāca |
lomaśā'tra mama jātaṃ darśanaṃ keśavādijam |
kṛtakṛtyo bhavāmyeva kiṃ tīrthairdānavistaraiḥ || 91 ||
[Analyze grammar]

śrīlomaśa uvāca |
rājaṃstīrthabalenaitajjātaṃ sarvaṃ vibhāvaya |
atīrthasya balaṃ nāsti nāsti puṇyaṃ pavitratā || 92 ||
[Analyze grammar]

nāsti nairmalyabhāvaśca nāsti kṛṣṇaprasannatā |
nāsti bhaktiratīrthasya nāsti mokṣo divaṃ ca vā || 93 ||
[Analyze grammar]

jaṃgamaṃ vā sthāvaraṃ vā tīrthaṃ kalmaṣanāśanam |
kalmaṣāṇāṃ vināśordhve tīrthī prāpnoti yogyatām || 94 ||
[Analyze grammar]

yogyatāyāṃ susatyāṃ vai hṛdi brahma prakāśate |
brahmarūpasya bhaktasya snehastatra prajāyate || 95 ||
[Analyze grammar]

parabrahmanikaṭatvaṃ jāyate'sya nisargajam |
tato bhavati durlabhyaṃ darśanaṃ sulabhaṃ hareḥ || 96 ||
[Analyze grammar]

evaṃ darśanamāptasya lokasaṃgrahahetave |
kartavyatayā tīrthāni vihitānyeva sarvadā || 97 ||
[Analyze grammar]

tasmāt tīrthāni dānāni kartavyāni kṛpājuṣā |
muktaḥ siddhaśca vā devo divyo vā brahmarūpadhṛk || 98 ||
[Analyze grammar]

yadyadācarate mokṣapradaṃ svargapradaṃ ca vā |
puṇyakṛt tatsamālambyā''carate tvaparo janaḥ || 99 ||
[Analyze grammar]

tena muktirbhavedevā'bhayadānaṃ bhavedapi |
karmaṇā manasā vācā bhāvena tīrthamācaret || 100 ||
[Analyze grammar]

ityuktvā lomaśastaṃ vai cāśvapāṭalabhūpatim |
agre tīrthāntaraṃ ninye viṣṇumandiramuttamam || 101 ||
[Analyze grammar]

rādhike yatra vai viṣṇoḥ śvetā mūrtiḥ sanātanī |
rājate kamalāyuktā garuḍena praśobhitā || 102 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne'bhayākṣanṛpaterbhaktirvairāgyaṃ makhaścāśvapaṭṭasarastīre tyāgidīkṣāgrahaṇaṃ lakṣmīnārāyaṇādidarśanaṃ mandiranirmāṇaṃ lakṣmītīrthaṃ nārāyaṇatīrthaṃ cetyādinirūpaṇanāmā navaṣaṣṭyadhikadviśatatamo'dhyāyaḥ || 269 ||
[Analyze grammar]