Chapter 180

yudhiṣṭhira uvāca |
bhagavankṣatriyaiḥ śūraiḥ svavīryopāttasaṃcayaiḥ |
kāni dānāni deyāni pavitrāṇi śubhāni ca || 1 ||
[Analyze grammar]

anyairvā puruṣaiḥ kṛṣṇa adharmabhayabhīrubhiḥ |
grahapīḍāṅisaṃtaptairduḥsvapnādyupatāpitaiḥ || 2 ||
[Analyze grammar]

iha loke pare caiva vihitaṃ sarvakāmadam |
viśeṣavihitaṃ dānaṃ kathayasva mahāmate || 3 ||
[Analyze grammar]

śrīkṛṣṇa uvāca |
śṛṇu bhūpāla bhadraṃ te dānadharmamanuttamam |
viśeṣeṇa mahīpānāṃ hitāya ca na saṃśayaḥ || 4 ||
[Analyze grammar]

dānāni bahurūpāṇi nānāśāstroditāni ca |
godānādīni rājendra pradhānāni na saṃśayaḥ || 5 ||
[Analyze grammar]

kiṃ tu pradhānamekaṃ te dānaṃ vakṣyāmi bhārata |
vairocanāya yatsarvaṃ śukraḥ provāca bhārata || 6 ||
[Analyze grammar]

śukra uvāca |
śṛṇu daityapate dānaṃ sarvapāpapraṇāśanam |
ādhayo vyādhayaścaiva grahapīḍā sudāruṇāḥ || 7 ||
[Analyze grammar]

yena dattena naśyaṃti puṇyamāpnoti cottamam |
kārttikyāmayane caiva grahaṇe śaśisūryayoḥ || 8 ||
[Analyze grammar]

dānametatpradātavyaṃ viṣuve sūryasaṃkrame |
puṇyaṃ dinamathāsādya jitakrodho jiteṃdriyaḥ || 9 ||
[Analyze grammar]

saṃsthāpya dārujaṃ divyaṃ hemapaṭṭairalaṃkṛtam |
rathaṃ sucakrākṣadharaṃ yugayoktrasamanvitam || 10 ||
[Analyze grammar]

suvarṇadhvajasaṃyuktaṃ sitāsitapatākinam |
puṣpaprakarasaṃkīrṇe prāgudakpravaṇe śubhe || 11 ||
[Analyze grammar]

nadyāstīre'tha vā goṣṭhe vicitre vā gṛhāṃgaṇe |
rathasya pūrvabhāge tu kṛtvā vedīmanuttamām || 12 ||
[Analyze grammar]

purāṇavedavidyāvānvinayācārasaṃyutaḥ |
tasyāṃ saṃsthāpayeddevānbrahmādīnkathayāmi te || 13 ||
[Analyze grammar]

madhye brahmā pratiṣṭhāpyaḥ pūjayetpraṇavena tam |
viṣṇuruttarataḥ sthāpyaḥ pauruṣeṇa tamarcayet || 14 ||
[Analyze grammar]

sūktena rudraṃ raudreṇa dakṣiṇasyāṃ samarcayet |
grahānsūryamukhāṃścaiva vidhivatpūjayettathā |
puṣpairgaṃdhaiḥ phalairbhakṣyairdīpamālābhireva ca || 15 ||
[Analyze grammar]

pūjayedgaṃdhakusumaiḥ śvetavastraiḥ sacaṃdanaiḥ |
śaṃkhabherīmṛdaṃgānāṃ śabdaiḥ sarvatragāmibhiḥ || 16 ||
[Analyze grammar]

brahmaghoṣavimiśraiśca kārayeta mahotsavam |
kuṃḍaṃ kṛtvā vidhānena hastamātrapramāṇataḥ || 17 ||
[Analyze grammar]

āgneyyāṃ diśi rājeṃdra brāhmaṇāṃstatra pūjayet |
catuścāraṇikānviprānpūjitānbrahmabhūṣaṇaiḥ || 18 ||
[Analyze grammar]

caturoṣṭau mahārāja gurureko'thavā bhavet |
homopakaraṇaṃ sarvaṃ melayitvā tilānghṛtam || 19 ||
[Analyze grammar]

agnikāryaṃ tataḥ kuryādyathāvadvidhipūrvakam |
āghārāvājyabhāgau tu hutvā prāgvacca tau tataḥ || 20 ||
[Analyze grammar]

viṣṇave śitikaṇṭhāya maṃtraiḥ pūrvoditaiḥ śubhaiḥ |
grahayajñoditaiścaiva grahāṇāṃ homa iṣyate || 21 ||
[Analyze grammar]

evaṃ yajñavidhiṃ kṛtvā yajamāno dvijaiḥ saha |
yojayeta rathe dāṃtau gajau lakṣaṇasaṃyutau || 22 ||
[Analyze grammar]

vicitratanusaṃvītau śubhakakṣau sughaṃṭikī |
hemapaṭṭaiḥ sutilakaiḥ śobhitau śaṃkhacāmaraiḥ || 23 ||
[Analyze grammar]

divyamuktāparicchannau divyāṃkuśasamanvitau |
mahāmātrānvitau caiva sarvābharaṇabhūṣitau || 24 ||
[Analyze grammar]

evaṃ vidhiṃ tataḥ kṛtvā rathaṃ taṃ sagajaṃ naraḥ |
āropayettatastasminbrāhmaṇaṃ śaṃsitavratam || 25 ||
[Analyze grammar]

bhūṣitaṃ kaṇṭhakaṭakaiḥ karṇaveṣṭāṃgulīyakaiḥ |
āguptacolakacchatra vastrāyudhasamanvitam || 26 ||
[Analyze grammar]

baddhatūṇiṃ dhanuṣpāṇiṃ bahucarmavibhūṣitam |
khaḍgadhenukayā naddhaṃ hārālaṃkṛtavigraham || 27 ||
[Analyze grammar]

yajamānastataḥ prājñaḥ śuklāṃbaradharaḥ śuciḥ |
rathaṃ pradakṣiṇīkṛtya gṛhītakusumāṃjaliḥ || 28 ||
[Analyze grammar]

imamuccārayenmantraṃ sarvapāpapraṇāśanam |
kumudairāvaṇau padmaḥ puṣpadaṃto'tha vāmanaḥ |
supratīkoṃjanaḥ sārvabhaumo'ṣṭau devayonayaḥ || 29 ||
[Analyze grammar]

teṣāṃ vaṃśaprasūtau tu balarūpasamanvitau |
tadyuktarathadānena mama syātāṃ varapradau || 30 ||
[Analyze grammar]

ratho'yaṃ yajñapuruṣo brāhmaṇotra śivaḥ svayam |
mamebharathadānena prīyetāṃ śivakeśavau || 31 ||
[Analyze grammar]

ityuccārya mahābhāge pūjayitvā punaḥpunaḥ |
āropayettatastasminbrāhmaṇaṃ śaṃsitavratam || 32 ||
[Analyze grammar]

svadāranirataṃ śāṃtaṃ vedavedāṃgapāragam |
pañcāgnyabhimataṃ caiva avyaṃgaṃ vyādhivarjitam || 33 ||
[Analyze grammar]

punaḥ pradakṣiṇīkṛtya rathasthaṃ dvijasattamam |
ādvāramanugacchecca praṇipatya gṛhaṃ viśet || 34 ||
[Analyze grammar]

tato yajñāvasāne tu dīnāṃdhādīñjaḍānkṛśān |
pūjayedvividhairdānairvastragodānabhojanaiḥ || 35 ||
[Analyze grammar]

anenaiva vidhānena saṃkalpya rathamuttamam |
kuṇḍamaṃḍapasaṃbhārabhūṣaṇācchādanādikam || 36 ||
[Analyze grammar]

tadeva homadravyaṃ ca homamaṃtrāsta eva hi |
viśeṣo'śvarathe rājankathyamāno nibodhyatām || 37 ||
[Analyze grammar]

hayau lakṣaṇasaṃyuktau khalīnālaṃkṛtānanau |
vicitravastusaṃvītau kaṇṭhābharaṇabhūṣitau || 38 ||
[Analyze grammar]

supragrahayutau yojyau dātā tasminnathottame |
taṃ pradakṣiṇamāvṛttya maṃtrametamudīrayet || 39 ||
[Analyze grammar]

namostu te vedaturaṃgamāya trayīmayāya triguṇātmakāya |
sudurgamārge sukhapānapātre namo'stu te vājidharāya nityam || 40 ||
[Analyze grammar]

ratho'yaṃ savitā sākṣādvedāścāmī turaṃgamāḥ |
aruṇo brāhmaṇaścāyaṃ prayacchaṃtu sukhaṃ mama || 41 ||
[Analyze grammar]

ityuccārya tatastasminrathe brāhmaṇasattamam |
āropayedgṛhāddvāraṃ yāvadetamanuvrajet || 42 ||
[Analyze grammar]

anena vidhinā yastu dadyādvājirathaṃ budhaḥ |
tasmādvāharathaṃ rājyaṃ tasya puṇyaphalaṃ śṛṇu || 43 ||
[Analyze grammar]

sarvapāpavinirmuktaḥ sarvāmayavivarjitaḥ |
manvaṃtaraśataṃ yāvatsarvabhogasamanvitaḥ || 44 ||
[Analyze grammar]

apsarogaṇasaṃkīrṇe vimāne sūryavarcase |
divyabhogānvitaḥ śrīmānkāmacārī vaseddivi || 45 ||
[Analyze grammar]

puṇyakṣayādihābhyetya rājā bhavati dhārmikaḥ |
putrapautrānvitaścaiva ciraṃjīvī priyātithiḥ || 46 ||
[Analyze grammar]

gajenaikena nirdiṣṭaḥ kaścidgajaratho nṛpa |
ekenāśvenāśvarathaḥ kathyate vedavādibhiḥ || 47 ||
[Analyze grammar]

dānamaṃtrāsta evoktāḥ phalaṃ tatra nigadyate || 48 ||
[Analyze grammar]

yacchaṃti ye rathavaraṃ sudhurākṣacakraṃ vikrāṃtavāraṇayutaṃ turagānvitaṃ vā |
sopaskaraṃ kanakapaṭṭavicitritāgaṃ te syaṃdanena surarājapuraṃ prayāṃti || 49 ||
[Analyze grammar]

iti śrībhaviṣye mahāpurāṇa uttaraparvaṇi śrīkṛṣṇayudhiṣṭhirasaṃvāde gajarathā śvarathadānavidhivarṇanaṃ nāmāśītyuttaraśatatamo'dhyāyaḥ || 180 ||
[Analyze grammar]