Chapter 165

yudhiṣṭhira uvāca |
bhūmidānaṃ kṣatriyāṇāṃ nānyeṣāmupapadyate |
te hyupārjayituṃ śaktā dātuṃ pālayituṃ yathā || 1 ||
[Analyze grammar]

bhūmidānasamaṃ kiṃcidanyatkathaya yādava |
saṃprāptavittairyacchakyaṃ saṃsārabhayabhīrubhiḥ || 2 ||
[Analyze grammar]

śrīkṛṣṇa uvāca |
sauvarṇāṃ vidhivatkṛtvā sādridrumavatīṃ śubhām |
mahīṃ prayaccha viprāṇāṃ tattulyā sā nigadyate || 3 ||
[Analyze grammar]

śṛṇuṣvaikamanā bhūtvā mahādānaṃ narottama |
savidhānaṃ pravakṣyāmi phalaṃ yatnena yadbhavet || 4 ||
[Analyze grammar]

caṃdrasūryoparāge ca janmarkṣe viṣuve tathā |
yugādiṣu ca dātavyamayane ca vidhānataḥ || 5 ||
[Analyze grammar]

anyeṣvapi ca kāleṣu praśaste dhanasaṃcaye |
pāpakṣayāya dātavyaṃ yaśo'rthe vā narairbhuvi || 6 ||
[Analyze grammar]

hemnaḥ palaśatenoktā tadardhenāpi śaktitaḥ |
kuryātpaṃcapalādūrdhvamasamartho'pi bhaktimān || 7 ||
[Analyze grammar]

kārayetpṛthivīṃ haimīṃ jaṃbudvīpānukāriṇīm |
maryādāparvatavatīṃ madhye merusamanvitām || 8 ||
[Analyze grammar]

lokapālāṣṭakopetāṃ brahmaviśveśasaṃyutām |
nānāparvatapūrṇāṃ ca ratnābharaṇabhūṣitām || 9 ||
[Analyze grammar]

sarvasasyavicitrāṃgīṃ sarvagaṃdhādhivāsitām |
īdṛśīṃ tu mahīṃ kṛtvā kārayenmaṃḍapaṃ tataḥ || 10 ||
[Analyze grammar]

daśadvādaśahastaṃ ca caturvaktra satoraṇam |
madhye ca vedikāṃ kuryāddhanurhastāṃ pramāṇataḥ || 11 ||
[Analyze grammar]

aiśānyāṃ surasaṃsthānamāgneyyāṃ kuṃḍameva ca |
patākābhiralaṃkṛtya devatāyatanānyatha || 12 ||
[Analyze grammar]

lokapālā grahāścaiva pūjyā mālyavilepanaiḥ |
homaṃ kuryurdvijāḥ śāṃtāścātuścaraṇikāḥ śubhāḥ || 13 ||
[Analyze grammar]

sālaṃkārā savastrāśca mālyacaṃdanabhūṣitāḥ |
agnisaṃsthāpanaṃ tatra kṛtvā pūrvaṃ tato mahīm || 14 ||
[Analyze grammar]

ānayeyurdvijā rājanbrahmaghoṣapuraḥsaram |
śaṃkhatūryaninādaiśca geyamaṃgalanisvanaiḥ || 15 ||
[Analyze grammar]

tilaiḥ pracchāditāṃ vediṃ kṛtvā tatrādhivāsayet |
athāṣṭādaśadhānyāni rasāṃśca lavaṇādikān || 16 ||
[Analyze grammar]

tathāṣṭau pūrṇakalaśānsamaṃtātsthāpayecchubhān |
vitānakaṃ ca kauśeyaṃ phalāni vividhāni ca || 17 ||
[Analyze grammar]

aṃśukāni vicitrāṇi śrīkhaṃḍaśakalāni ca |
ityevaṃ racayitvā tāmadhivāsanapūrvakam || 18 ||
[Analyze grammar]

tato homāvasāneṣu niṣpanne sarvaśāṃtike |
śuklamālyāṃbaradharo yajamānaḥ svayaṃ tataḥ || 19 ||
[Analyze grammar]

kṛtvā pradakṣiṇaṃ pṛthvīṃ gṛhītvā kusumāṃjalim |
puṇyakālamathāsādya maṃtrānetānudīrayet || 20 ||
[Analyze grammar]

namaste sarvadevānāṃ tvameva bhavanaṃ yataḥ |
dhātrī tvamasi bhūtānāmataḥ pāhi vasuṃdhare || 21 ||
[Analyze grammar]

vasu dhārayase yasmātsarvasaukhyapradāyakam |
vasuṃdharā tato jātā tasmātpāhi bhayādalam || 22 ||
[Analyze grammar]

caturmukho'pi no gacchedyasmādaṃtaṃ tavācale |
anaṃtāyai namastubhyaṃ pāhi saṃsārakardamāt || 23 ||
[Analyze grammar]

tvameva lakṣmīrgovide śive gaurīti saṃsthitā |
gāyatrī brahmaṇaḥ pārśve jyotsnā caṃdre ravau prabhā || 24 ||
[Analyze grammar]

buddhirbṛhaspatau khyātā medhā muniṣu saṃsthitā |
viśvaṃ prāpya sthitā yasmāttato viśvaṃbharā matā || 25 ||
[Analyze grammar]

dhṛtiḥ kṣitiḥ kṣamā kṣoṇī pṛthivī vasudhā mahī |
etābhirmūrtibhiḥ pāhi devi saṃsārasāgarāt || 26 ||
[Analyze grammar]

evamuccārya tāṃ devīṃ brāhmaṇebhyo niveda yet |
dharārddhaṃ vā caturbhāgaṃ gurave pratipādayet || 27 ||
[Analyze grammar]

anena vidhinā yastu dadyāddevīṃ dharāṃ budhaḥ |
puṇyakāle ca saṃprāpte sa padaṃ yāti vaiṣṇavam || 28 ||
[Analyze grammar]

yadi kartuṃ na śaknoti puṇyehni bahuvistaram |
saṃsthāpya śobhane sthāne mahīmeva pradāpayet || 29 ||
[Analyze grammar]

vimānenārkavarṇena kiṃkiṇījāla mālinā |
nārāyaṇapuraṃ gatvā kalpatrayamathāvaset || 30 ||
[Analyze grammar]

kṣīṇapuṇya ihābhyetya rājā bhavati dhārmikaḥ |
vijayī śatrudamano bahubhṛtyaparicchadaḥ || 31 ||
[Analyze grammar]

śatakoṭyadhipaḥ śūraścakravartī mahābalaḥ |
sapta janmāni dānasya māhātmyādrājyamāpnuyāt || 32 ||
[Analyze grammar]

dvīpāvikarṣaviṣamāṃ vidhivadvidhāya haimīṃ mahīṃ suramahīmiva vindhyamadhyām |
lokeśaśaṃbhuśivakeśavasaṃyutāṃ ca prāyaccha pārtha tava kiṃ bahunoditena || 33 ||
[Analyze grammar]

iti śrībhaviṣye mahāpurāṇa uttaraparvaṇi śrīkṛṣṇayudhiṣṭhirasaṃvāde pṛthivīdānavidhivarṇanaṃ nāma paṃcaṣaṣṭyuttaraśatatamo'dhyāyaḥ || 165 ||
[Analyze grammar]