Chapter 1

vedavyāsa uvāca |
evaṃ dvāparasaṃdhyāyā ante sūtena varṇitam |
sūryacaṃdrānvayākhyānaṃ tanmayā kathitaṃ tava || 1 ||
[Analyze grammar]

viśālāyāṃ punargatvā vaitālena vinirmitam |
kathayiṣyati sūtastamitihāsasamuccayam || 2 ||
[Analyze grammar]

tanmayā kathitaṃ sarvaṃ hṛṣīkottamapuṇyadam |
punarvikramabhūpena bhaviṣyati samāhvayaḥ || 3 ||
[Analyze grammar]

naimiṣāraṇyamāsādya śrāvayiṣyati vai kathām |
punaruktāni yānyeva purāṇāṣṭādaśāni vai || 4 ||
[Analyze grammar]

tāni copapurāṇāni bhaviṣyaṃti kalau yuge |
teṣāṃ copapurāṇānāṃ dvādaśādhyāyamuttamam || 5 ||
[Analyze grammar]

sārabhūtaśca kathitaṃ itihāsasamuccayaḥ |
yaste mayā ca kathito hṛṣīkottama te mudā || 6 ||
[Analyze grammar]

vikramākhyānakālāṃte'vatāraḥ kalayā hareḥ |
sa ca śaktyāvatāro hi rādhākṛṣṇasya bhūtale || 7 ||
[Analyze grammar]

tatkathāṃ bhagavānsūto naimiṣāraṇyamāsthitaḥ |
aṣṭāśītisahasrāṇi śrāvayiṣyati vai munīm || 8 ||
[Analyze grammar]

yattanmayā ca kathitaṃ haṣīkottama te mudā |
punaste śaunakādyāśca kṛtvā snānādikāḥ kriyāḥ || 9 ||
[Analyze grammar]

sūtapārśvaṃ gamiṣyaṃti naimiṣāraṇyavāsinaḥ |
tatpṛṣṭenaiva sūtena yaduktaṃ tacchṛṇuṣva bhoḥ || 10 ||
[Analyze grammar]

ṛṣaya ūcuḥ |
śrutaṃ kṛṣṇasya caritaṃ bhagavanbhavatoditam |
idānīṃ śrotumicchāmi rājñāṃ teṣāṃ kramātkulam || 11 ||
[Analyze grammar]

caturṇāṃ vahnijātānāṃ paraṃ kautūhalaṃ hi naḥ |
sa haristriyugī proktaḥ kathaṃ jātaḥ kalau yuge || 12 ||
[Analyze grammar]

sūta uvāca |
kathayāmi muniśreṣṭhā yuṣmākaṃ praśnamuttamam |
agnivaṃśanṛpāṇāṃ ca caritraṃ śṛṇu vistarāt || 13 ||
[Analyze grammar]

pramaraśca mahīpālo dakṣiṇāṃ diśamāsthitaḥ |
ambayā racitāṃ divyāṃ pramarāya purīṃ śubhām || 14 ||
[Analyze grammar]

nivāsaṃ kṛtavānrājā sāmavedaparo balī |
ṣaḍvarṣāṇi kṛtaṃ rājyaṃ tasmājjāto mahāmaraḥ || 15 ||
[Analyze grammar]

trivarṣaṃ ca kṛtaṃ rājyaṃ devāpistanayo'bhavat |
pitustulyaṃ kṛtaṃ rājyaṃ devadūtastato'bhavat |
pitustulyaṃ kṛtaṃ rājyaṃ śṛṇu tatkāraṇaṃ mune || 16 ||
[Analyze grammar]

aśoke nihate tasminbauddhabhūpe mahābale |
kalirbhāskaramārādhya tapasā dhyānatatparaḥ || 17 ||
[Analyze grammar]

paṃcavarṣāntare sūryastasmai ca kalaye mudā |
śakākhyaṃ nāma puruṣaṃ dadau tadbhaktitoṣitaḥ || 18 ||
[Analyze grammar]

tadā prasannaḥ sa kaliḥ śakāya ca mahātmane |
taittiraṃ nagaraṃ premṇā dadau harṣitamānasaḥ || 19 ||
[Analyze grammar]

tatra gopāndasyugaṇānvaśīkṛtya mahābalī |
āryadeśavināśāya kṛtvovodyogaṃ punaḥpunaḥ |
hatavānbhūpatīnbāṇaistasmātte svalpajīvinaḥ || 20 ||
[Analyze grammar]

gaṃdharvasenaśca nṛpo devadūtātmajo balī |
śatārddhābdaṃ padaṃ kṛtvā tapase punarāgataḥ || 21 ||
[Analyze grammar]

śivājñayā ca nṛpatirvikramastanayastataḥ |
śatavarṣakṛtaṃ rājyaṃ devabhaktastato'bhavat |
daśavarṣaṃ kṛtaṃ rājyaṃ śakairduṣṭairlayaṃ gataḥ || 22 ||
[Analyze grammar]

śālivāhana evāpi devabhaktasya cātmajaḥ |
jitvā śakānsa ṣaṣṭyabdaṃ rājyaṃ kṛtvā divaṃ gataḥ || 23 ||
[Analyze grammar]

śālihotrastasya suto rājyaṃ kṛtvā śatārddhakam |
svargalokaṃ tataḥ prāptastatsutaḥ śālivarddhanaḥ || 24 ||
[Analyze grammar]

pitustulyaṃ kṛtaṃ rājyaṃ śakahantā tato'bhavat |
pitustulyaṃ kṛtaṃ rājyaṃ suhotrastanayo'bhavat || 25 ||
[Analyze grammar]

pitustulyaṃ kṛtaṃ rājyaṃ havirhotrastato'bhavat |
pitustulyaṃ kṛtaṃ rājyamiṃdrapālastato'bhavat || 26 ||
[Analyze grammar]

purīmiṃdrāvatīṃ kṛtvā tatra rājyamakārayat |
pitustulyaṃ kṛtaṃ rājyaṃ mālyavānnāma tatsutaḥ |
purīṃ mālyavatīṃ kṛtvā pitustulyaṃ kṛtaṃ padam || 27 ||
[Analyze grammar]

anāvṛṣṭistataścāsīnmahatī caturabdikā |
tataḥ kṣudhāturo rājā śvaviṣṭhādhānyagarhitam || 28 ||
[Analyze grammar]

saṃskṛtya maṃdire rājā śālagrāmāya cārpayat |
tadā prasanno bhagavānvacanaṃ nabhaseritam || 29 ||
[Analyze grammar]

kṛtvā dadau varaṃ tasmai śṛṇu tanmunisattama |
kule yāvannṛpā bhāvyāstava bhūpatisattama |
anāvṛṣṭirna bhavitā tāvatte rāṣṭra uttame || 30 ||
[Analyze grammar]

suto mālyavataścāsīcchaṃbhudatto harapriyaḥ |
pitustulyaṃ kṛtaṃ rājyaṃ bhaumarājastato'bhavat || 31 ||
[Analyze grammar]

pitustulyaṃ kṛtaṃ rājyaṃ vatsarājastato'bhavat |
pitustulyaṃ kṛtaṃ rājyaṃ bhojarājastato'bhavat || 32 ||
[Analyze grammar]

pitustulyaṃ kṛtaṃ rājyaṃ śaṃbhudattastato'bhavat |
daśahīnaṃ kṛtaṃ rājyaṃ bhojarājapitussamam || 33 ||
[Analyze grammar]

śaṃbhudattasya tanayo biṃdupālastato'bhavat |
biṃdukhaṇḍaṃ ca rāṣṭraṃ vai kṛtvā sa sukhito'bhavat |
tena rājyaṃ pitustulyaṃ kṛtaṃ vedavidā mune || 34 ||
[Analyze grammar]

biṃdupālasya tanayo rājapālastato'bhavat |
pitustulyakṛtaṃ rājyaṃ tasmājjāto mahīnaraḥ || 35 ||
[Analyze grammar]

pitustulyaṃ kṛtaṃ rājyaṃ somavarmā nṛpo'bhavat |
pitustulyaṃ kṛtaṃ rājyaṃ kāmavarmā suto'bhavat || 36 ||
[Analyze grammar]

pitustulyaṃ kṛtaṃ rājyaṃ bhūmipālastato'bhavat |
bhūsarastena khanitaṃ puraṃ tatra śubhaṃ kṛtam || 37 ||
[Analyze grammar]

pitustulyaṃ kṛtaṃ rājyaṃ raṃgapālastato'bhavat |
bhūmipālastu nṛpatirjitvā bhūpānanekaśaḥ || 38 ||
[Analyze grammar]

vīrasiṃhastato nāmnā vikhyāto'bhūnmahītale |
svarājye raṃgapālaṃ sa cābhiṣicya vanaṃ yayau |
tapaḥ kṛtvā divaṃ yāto devadevaprasādataḥ || 39 ||
[Analyze grammar]

kalpasiṃhastato jāto raṃgapālānnṛpottamāt |
anapatyo hi nṛpatiḥ pitustulyaṃ kṛtaṃ padam || 40 ||
[Analyze grammar]

ekadā jāhnavītoye snānārthaṃ mudito yayau |
dānaṃ dattvā dvijātibhyaḥ kalpakṣetramavāptavān || 41 ||
[Analyze grammar]

puṇyabhūmiṃ samālokya śūnyabhūtāṃ sthalīmapi |
nagaraṃ kārayāmāsa tatra sthāne mudānvitaḥ || 42 ||
[Analyze grammar]

kalāpanagaraṃ nāmnā prasiddhamabhavadbhuvi |
tatra rājyaṃ kṛtaṃ tena gaṃgāsiṃhastato'bhavat || 43 ||
[Analyze grammar]

navatyabdavapurbhūtvā so'napatyo raṇaṃ gataḥ |
tyaktvā prāṇānkurukṣetre svargalokamavāptavān |
samāptimagamadvipra pramarasya kulaṃ śubham || 44 ||
[Analyze grammar]

tadanvaye ca ye śeṣāḥ kṣatriyāstadanaṃtaram |
tannārīṣvamitovipra babhūva varṇasaṃkaraḥ || 45 ||
[Analyze grammar]

vaiśyavṛttikarāḥ sarve mlecchatulyā mahītale |
iti te kathitaṃ vipra kulaṃ dakṣiṇabhūpateḥ || 46 ||
[Analyze grammar]