Chapter 156

sumanturuvāca |
itthaṃ dattvā varaṃ bhānurīśvarāya viśāṃ pate |
śālagrāmaṃ jagāmāśu varaṃ dātuṃ harernṛpa || 1 ||
[Analyze grammar]

dadarśa sa hariṃ tatra tapantaṃ paramaṃ tapaḥ |
kṛṣṇājinadharaṃ śāntaṃ prajvalantaṃ svatejasā || 2 ||
[Analyze grammar]

pūjayantaṃ mahadvyoma cakrākāramanaupamam |
gandhamālyopahāraiśca nṛtyagītapravāditaiḥ || 3 ||
[Analyze grammar]

evaṃ saṃpūjya tadvyoma bhaktyā śraddhāsamanvitaḥ |
jagāma śirasā bhūmiṃ hṛdi dhyāyandivākaram || 4 ||
[Analyze grammar]

viṣṇuṃ taṃ praṇataṃ dṛṣṭvā tuṣṭo devo vibhāvasuḥ |
uvāca viṣṇumāmaṃtrya paśya māmāgataṃ hare || 5 ||
[Analyze grammar]

tadvākyaṃ keśavaḥ śrutvā śirasā ca mahīṃ gataḥ |
namaste sarvadeveśa namaste gaganecara || 6 ||
[Analyze grammar]

jagatpate namaste'stu grahāṇāṃ pataye namaḥ |
dāridryavyādhiduḥkhaghna namaste bhavanāśana || 7 ||
[Analyze grammar]

ādityārka rave bhāno bhaga pūrṇa divākara |
namaste sarvatattvajña sarvapāpavitarjita || 8 ||
[Analyze grammar]

prasīda me jagannātha haṃsānagha divaspate |
saṃsārārṇavamagnānāṃ trāhi deva vṛṣadhvaja || 9 ||
[Analyze grammar]

putro'haṃ tava deveśa dvitīyo brāhmaṇo'nagha |
piteva putrasya rave dehi kāmāñjagatpate || 10 ||
[Analyze grammar]

viṣṇorvacanamākarṇya harṣaṃ prāpya divākaraḥ |
uvāca kuruśārdūla harṣagadgadayā girā || 11 ||
[Analyze grammar]

sādhu kṛṣṇa mahābāho tuṣṭohaṃ tava keśava |
niśamya te parāṃ bhaktiṃ śraddhāṃ ca puruṣottama || 12 ||
[Analyze grammar]

varaṃ varaya tasmāttvaṃ vatsa yaṃ manasecchasi |
varado' hamanuprāpto bhaktyākrāṃtastavānagha || 13 ||
[Analyze grammar]

niśamya vacanaṃ bhānorviṣṇurbhaktyā samanvitaḥ |
kṛtāṃjalipuṭo bhūtvā idaṃ vacanamabravīt || 14 ||
[Analyze grammar]

kṛtakṛtyo'smi deveśa nāsti dhanyataro mama |
yasya me bhagavaṃstuṣṭo varadastvaṃ gataḥ svayam || 15 ||
[Analyze grammar]

yadi tuṣṭo mama vibhurbhaktyā krīto mayā yadi |
prayaccha tvacalāṃ bhaktiṃ yathā śatruṃ parājaye |
tathā mama varaṃ dehi sarvārāti vināśanam || 16 ||
[Analyze grammar]

mama sthānaṃ ca paramaṃ sarvalokanamaskṛtam |
lokānāṃ pālane yuktiṃ balaṃ vīryaṃ yaśaḥ sukham || 17 ||
[Analyze grammar]

evamukto ravirbhaktyā viṣṇunā vākyamuttamam |
uvāca kuruśārdūla gajatsannādayanniva || 18 ||
[Analyze grammar]

sādhu sādhu mahābāho brahmaṇastvaṃ jaghanyajaḥ |
harasya agrajaścāpi sarvadevanamaskṛtaḥ || 19 ||
[Analyze grammar]

bhaktaścāpi mamātyaṃtaṃ brahmaṇyaśca sadānagha |
tasmāttavācalā bhaktirbhaviṣyati mamopari || 20 ||
[Analyze grammar]

etadeva mahadvyoma cakraṃ te prabhaviṣyati |
sarvāyudhavaraṃ vīra sarvārātivināśanam |
tathā sthānaṃ ca paramaṃ sarvalokanamaskṛtam || 21 ||
[Analyze grammar]

itthaṃ bhānorvaraṃ prāpya harirdevo jagatpatiḥ |
mahāprasādamityuktvā jagāma śirasā mahīm || 22 ||
[Analyze grammar]

bhāskaro'pi varaṃ dattvā keśavāyāmitaujase |
jagāmāśu mahārāja svapuraṃ vibudhādhipaḥ || 23 ||
[Analyze grammar]

lokānāṃ pālane śaktiṃ balaṃ vīryaṃ yaśaḥ sukham |
dattvā kṛṣṇāya deveśastathānyadapi kāṃkṣitam || 24 ||
[Analyze grammar]

evaṃ brahmādayo devāḥ pūjayitvā divākaram |
śaktimaṃto babhūvuste sargādīnāṃ pravartane || 25 ||
[Analyze grammar]

iti te kathitaṃ puṇyamākhyānaṃ pāpanāśanam |
tridaivatyamupākhyānaṃ traisuraṃ lokapūjitam || 26 ||
[Analyze grammar]

stotratrayasamāyuktaṃ dharmakāmārthasādhanam |
dharmyaṃ svargyaṃ tathā puṇyamārogyadhanadhānyadam || 27 ||
[Analyze grammar]

ya idaṃ śṛṇuyānnityaṃ paṭhetstotratrayaṃ ca yaḥ |
so'gneyaṃ yānamārūḍho yāti bhānoḥ para padam || 28 ||
[Analyze grammar]

aputro labhate putramadhano dhanamaśnute |
vidyārthī labhate vidyāṃ prasādādbhāskarasya tu || 29 ||
[Analyze grammar]

tejasā ravisaṃkāśaḥ prabhayā pṛśnisannibhaḥ |
modate suciraṃ kālaṃ jñānināmuttamo bhavet || 30 ||
[Analyze grammar]