Chapter 4

[English text for this chapter is available]

śrīśuka uvāca – |
kālaste paramāṇvādiḥ dviparārdhāvadhirnṛpa |
kathito yugamānaṃ ca śrṛṇu kalpalayāvapi || 1 ||
[Analyze grammar]

caturyugasahasraṃ tu brahmaṇo dinamucyate |
sa kalpo yatra manavaḥ caturdaśa viśāṃpate || 2 ||
[Analyze grammar]

tadante pralayastāvān brāhmī rātrirudāhṛtā |
trayo lokā ime tatra kalpante pralayāya hi |
eṣa naimittikaḥ proktaḥ pralayo yatra viśvasṛk |
śete'nantāsano viśvaṃ ātmasāt kṛtya cātmabhūḥ || 4 ||
[Analyze grammar]

dviparārdhe tvatikrānte brahmaṇaḥ parameṣṭhinaḥ |
tadā prakṛtayaḥ sapta kalpante pralayāya vai || 5 ||
[Analyze grammar]

eṣa prākṛtiko rājan pralayo yatra līyate |
aṇḍakoṣastu saṅghāto vighāṭa upasādite || 6 ||
[Analyze grammar]

parjanyaḥ śatavarṣāṇi bhūmau rājanna varṣati |
tadā niranne hyanyonyaṃ bhakṣyamāṇāḥ kṣudhārditāḥ || 7 ||
[Analyze grammar]

kṣayaṃ yāsyanti śanakaiḥ kālenopadrutāḥ prajāḥ |
sāmudraṃ daihikaṃ bhaumaṃ rasaṃ sāṃvartako raviḥ || 8 ||
[Analyze grammar]

raśmibhiḥ pibate ghoraiḥ sarvaṃ naiva vimuñcati |
tataḥ saṃvartako vahniḥ saṅkarṣaṇamukhotthitaḥ || 9 ||
[Analyze grammar]

dahatyanilavegotthaḥ śūnyān bhūvivarānatha |
uparyadhaḥ samantācca śikhābhirvahnisūryayoḥ || 10 ||
[Analyze grammar]

dahyamānaṃ vibhātyaṇḍaṃ dagdhagomayapiṇḍavat |
tataḥ pracaṇḍapavano varṣāṇāmadhikaṃ śatam || 11 ||
[Analyze grammar]

paraḥ sāṃvartako vāti dhūmraṃ khaṃ rajasā'vṛtam |
tato meghakulānyaṅga citra varṇānyanekaśaḥ || 12 ||
[Analyze grammar]

śataṃ varṣāṇi varṣanti nadanti rabhasasvanaiḥ |
tata ekodakaṃ viśvaṃ brahmāṇḍavivarāntaram || 13 ||
[Analyze grammar]

tadā bhūmergandhaguṇaṃ grasantyāpa udaplave |
grastagandhā tu pṛthivī pralayatvāya kalpate || 14 ||
[Analyze grammar]

apāṃ rasamatho tejaḥ tā līyante'tha nīrasāḥ |
grasate tejaso rūpaṃ vāyustadrahitaṃ tadā || 15 ||
[Analyze grammar]

līyate cānile tejo vāyoḥ khaṃ grasate guṇam |
sa vai viśati khaṃ rājan tataśca nabhaso guṇam || 16 ||
[Analyze grammar]

śabdaṃ grasati bhūtādiḥ nabhastamanu līyate |
taijasaścendriyāṇyaṅga devānvaikāriko guṇaiḥ || 17 ||
[Analyze grammar]

mahān grasatyahaṅkāraṃ guṇāḥ sattvādayaśca tam |
grasate'vyākṛtaṃ rājan guṇān kālena coditam || 18 ||
[Analyze grammar]

na tasya kālāvayavaiḥ pariṇāmādayo guṇāḥ |
anādyanantamavyaktaṃ nityaṃ kāraṇamavyayam || 19 ||
[Analyze grammar]

na yatra vāco na mano na sattvaṃ |
tamo rajo vā mahadādayo'mī |
na prāṇabuddhīndriyadevatā vā |
na sanniveśaḥ khalu lokakalpaḥ || 20 ||
[Analyze grammar]

na svapnajāgranna ca tatsuṣuptaṃ |
na khaṃ jalaṃ bhūranilo'gnirarkaḥ |
saṃsuptavat śūnyavadapratarkyaṃ |
tanmūlabhūtaṃ padamāmananti || 21 ||
[Analyze grammar]

layaḥ prākṛtiko hyeṣa puruṣāvyaktayoryadā |
śaktayaḥ sampralīyante vivaśāḥ kālavidrutāḥ || 22 ||
[Analyze grammar]

buddhīndriyārtharūpeṇa jñānaṃ bhāti tadāśrayam |
dṛśyatvāvyatirekābhyāṃ ādyantavadavastu yat || 23 ||
[Analyze grammar]

dīpaścakṣuśca rūpaṃ ca jyotiṣo na pṛthagbhavet |
evaṃ dhīḥ khāni mātrāśca na syuranyatamādṛtāt || 24 ||
[Analyze grammar]

buddherjāgaraṇaṃ svapnaḥ suṣuptiriti cocyate |
māyāmātramidaṃ rājan nānātvaṃ pratyagātmani || 25 ||
[Analyze grammar]

yathā jaladharā vyomni bhavanti na bhavanti ca |
brahmaṇīdaṃ tathā viśvamavayavyudayāpyayāt || 26 ||
[Analyze grammar]

satyaṃ hyavayavaḥ proktaḥ sarvāvayavināmiha |
vinārthena pratīyeran paṭasyevāṅga tantavaḥ || 27 ||
[Analyze grammar]

yatsāmānyaviśeṣābhyāṃ upalabhyeta sa bhramaḥ |
anyonyāpāśrayāt sarvamādyantavadavastu yat || 28 ||
[Analyze grammar]

vikāraḥ khyāyamāno'pi pratyagātmānamantarā |
na nirūpyo'styaṇurapi syācceccitsama ātmavat || 29 ||
[Analyze grammar]

na hi satyasya nānātvamavidvānyadi manyate |
nānātvaṃ chidrayoryadvat jyotiṣorvātayoriva || 30 ||
[Analyze grammar]

yathā hiraṇyaṃ bahudhā samīyate |
nṛbhiḥ kriyābhirvyavahāravartmasu |
evaṃ vacobhirbhagavānadhokṣajo |
vyākhyāyate laukikavaidikairjanaiḥ || 31 ||
[Analyze grammar]

yathā ghano'rkaprabhavo'rkadarśito |
hyarkāṃśabhūtasya ca cakṣuṣastamaḥ |
evaṃ tvahaṃ brahmaguṇastadīkṣito |
brahmāṃśakasyātmana ātmabandhanaḥ || 32 ||
[Analyze grammar]

ghano yadārkaprabhavo vidīryate |
cakṣuḥ svarūpaṃ ravimīkṣate tadā |
yadā hyahaṅkāra upādhirātmano |
jijñāsayā naśyati tarhyanusmaret || 33 ||
[Analyze grammar]

yadaivametena vivekahetinā |
māyāmayāhaṅkaraṇātmabandhanam |
chittvācyutātmānubhavo'vatiṣṭhate |
tamāhurātyantikamaṅga samplavam || 34 ||
[Analyze grammar]

nityadā sarvabhūtānāṃ brahmādīnāṃ parantapa |
utpattipralayau eke sūkṣmajñāḥ sampracakṣate || 35 ||
[Analyze grammar]

kālasrotojavenāśu hriyamāṇasya nityadā |
pariṇāmināmavasthāstā janmapralayahetavaḥ || 36 ||
[Analyze grammar]

anādyantavatānena kāleneśvaramūrtinā |
avasthā naiva dṛśyante viyati jyotiṣāmiva || 37 ||
[Analyze grammar]

nityo naimittikaścaiva tathā prākṛtiko layaḥ |
ātyantikaśca kathitaḥ kālasya gatirīdṛśī || 38 ||
[Analyze grammar]

etāḥ kuruśreṣṭha jagadvidhātuḥ |
nārāyaṇasyākhilasattvadhāmnaḥ |
līlākathāste kathitāḥ samāsataḥ |
kārtsnyena nājo'pyabhidhātumīśaḥ || 39 ||
[Analyze grammar]

saṃsārasindhumatidustaramuttitīrṣoḥ |
nānyaḥ plavo bhagavataḥ puruṣottamasya |
līlākathārasaniṣevaṇamantareṇa |
puṃso bhavedvividhaduḥkhadavārditasya || 40 ||
[Analyze grammar]

purāṇasaṃhitāmetām ṛṣirnārāyaṇo'vyayaḥ |
nāradāya purā prāha kṛṣṇadvaipāyanāya saḥ || 41 ||
[Analyze grammar]

sa vai mahyaṃ mahārāja bhagavān bādarāyaṇaḥ |
imāṃ bhāgavatīṃ prītaḥ saṃhitāṃ vedasammitām || 42 ||
[Analyze grammar]

imāṃ vakṣyatyasau sūta ṛṣibhyo naimiṣālaye |
dīrghasatre kuruśreṣṭha sampṛṣṭaḥ śaunakādibhiḥ || 43 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ dvādaśaskandhe caturtho'dhyāyaḥ || 4 ||
[Analyze grammar]