Chapter 8

[English text for this chapter is available]

avadhūtasya ajagarādi navagurūṇāṃ varṇanam |
śrībrāhmaṇa uvāca |
sukham aindriyakaṃ rājan svarge naraka eva ca |
dehināṃ yad yathā duḥkhaṃ tasmān neccheta tad‍budhaḥ || 1 ||
[Analyze grammar]

grāsaṃ sumṛṣṭaṃ virasaṃ mahāntaṃ stokameva vā |
yadṛcchayaivāpatitaṃ graset ājagaro'kriyaḥ || 2 ||
[Analyze grammar]

śayītāhāni bhūrīṇi nirāhāro'nupakramaḥ |
yadi nopanamed grāso mahāhiriva diṣṭabhuk || 3 ||
[Analyze grammar]

ojaḥsahobalayutaṃ bibhrad dehamakarmakam |
śayāno vītanidraśca nehetendriyavānapi || 4 ||
[Analyze grammar]

muniḥ prasannagambhīro durvigāhyo duratyayaḥ |
anantapāro hyakṣobhyaḥ stimitoda ivārṇavaḥ || 5 ||
[Analyze grammar]

samṛddhakāmo hīno vā nārāyaṇaparo muniḥ |
notsarpeta na śuṣyeta saridbhiriva sāgaraḥ || 6 ||
[Analyze grammar]

dṛṣṭvā striyaṃ devamāyāṃ tadbhāvairajitendriyaḥ |
pralobhitaḥ patatyandhe tamasyagnau pataṅgavat || 7 ||
[Analyze grammar]

yoṣiddhiraṇyābharaṇāmbarādi |
dravyeṣu māyāraciteṣu mūḍhaḥ |
pralobhitātmā hyupabhogabuddhyā |
pataṅgavat naśyati naṣṭadṛṣṭiḥ || 8 ||
[Analyze grammar]

stokaṃ stokaṃ grased grāsaṃ deho varteta yāvatā |
gṛhān ahiṃsan ātiṣṭhed vṛttiṃ mādhukarīṃ muniḥ || 9 ||
[Analyze grammar]

aṇubhyaśca mahad‍bhyaśca śāstrebhyaḥ kuśalo naraḥ |
sarvataḥ sāramādadyāt puṣpebhya iva ṣaṭpadaḥ || 10 ||
[Analyze grammar]

sāyantanaṃ śvastanaṃ vā na saṅgṛhṇīta bhikṣitam |
pāṇipātrodarāmatro makṣikeva na saṅgrahī || 11 ||
[Analyze grammar]

sāyantanaṃ śvastanaṃ vā na saṅgṛhṇīta bhikṣukaḥ |
makṣikā iva saṅgṛhṇan saha tena vinaśyati || 12 ||
[Analyze grammar]

padāpi yuvatīṃ bhikṣuḥ na spṛśed dāravīmapi |
spṛśan karīva badhyeta kariṇyā aṅgasaṅgataḥ || 13 ||
[Analyze grammar]

nādhigacchet striyaṃ prājñaḥ karhicit mṛtyumātmanaḥ |
balādhikaiḥ sa hanyeta gajairanyairgajo yathā || 14 ||
[Analyze grammar]

na deyaṃ nopabhogyaṃ ca lubdhairyad duḥkhasañcitam |
bhuṅkte tadapi taccānyo madhuhevārthavinmadhu || 15 ||
[Analyze grammar]

suduḥkhopārjitaiḥ vittaiḥ āśāsānāṃ gṛhāśiṣaḥ |
madhuhevāgrato bhuṅkte yatirvai gṛhamedhinām || 16 ||
[Analyze grammar]

grāmyagītaṃ na śrṛṇuyād yatirvanacaraḥ kvacit |
śikṣeta hariṇād baddhān mṛgayorgītamohitāt || 17 ||
[Analyze grammar]

nṛtyavāditragītāni juṣan grāmyāṇi yoṣitām |
āsāṃ krīḍanako vaśya ṛṣyaśrṛṅgo mṛgīsutaḥ || 18 ||
[Analyze grammar]

jihvayātipramāthinyā jano rasavimohitaḥ |
mṛtyum ṛcchatyasad‍budhiḥ mīnastu baḍiśairyathā || 19 ||
[Analyze grammar]

indriyāṇi jayantyāśu nirāhārā manīṣiṇaḥ |
varjayitvā tu rasanaṃ tannirannasya vardhate || 20 ||
[Analyze grammar]

tāvat jitendriyo na syād vijitānyendriyaḥ pumān |
na jayed rasanaṃ yāvat jitaṃ sarvaṃ jite rase || 21 ||
[Analyze grammar]

1 piṅgalā nāma veśyā'sīd videhanagare purā |
tasyā me śikṣitaṃ kiñcit nibodha nṛpanandana || 22 ||
[Analyze grammar]

sā svairiṇyekadā kāntaṃ saṅketa upaneṣyatī |
abhūtkāle bahirdvāri bibhratī rūpamuttamam || 23 ||
[Analyze grammar]

mārga āgacchato vīkṣya puruṣān puruṣarṣabha |
tān śulkadān vittavataḥ kāntān mene'rthakāmukā || 24 ||
[Analyze grammar]

āgateṣvapayāteṣu sā saṅketopajīvinī |
apyanyo vittavān ko'pi māmupaiṣyati bhūridaḥ || 25 ||
[Analyze grammar]

evaṃ durāśayā dhvastanidrā dvāryavalambatī |
nirgacchantī praviśatī niśīthaṃ samapadyata || 26 ||
[Analyze grammar]

tasyā vittāśayā śuṣyadvaktrāyā dīnacetasaḥ |
nirvedaḥ paramo jajñe cintāhetuḥ sukhāvahaḥ || 27 ||
[Analyze grammar]

tasyā nirviṇṇacittāyā gītaṃ śrṛṇu yathā mama |
nirveda āśāpāśānāṃ puruṣasya yathā hyasiḥ || 28 ||
[Analyze grammar]

na hyaṅgājjātanirvedo dehabandhaṃ jihāsati |
yathā vijñānarahito manujo mamatāṃ nṛpa || 29 ||
[Analyze grammar]

piṅgalovāca |
aho me mohavitatiṃ paśyatāvijitātmanaḥ |
yā kāntād asataḥ kāmaṃ kāmaye yena bāliśā || 30 ||
[Analyze grammar]

santaṃ samīpe ramaṇaṃ ratipradaṃ |
vittapradaṃ nityamimaṃ vihāya |
akāmadaṃ duḥkhabhayādhiśoka |
mohapradaṃ tucchamahaṃ bhaje'jñā || 31 ||
[Analyze grammar]

aho mayā'tmā paritāpito vṛthā |
sāṅketyavṛttyātivigarhyavārtayā |
straiṇānnarād yārthatṛṣo'nuśocyāt |
krītena vittaṃ ratimātmanecchatī || 32 ||
[Analyze grammar]

yadasthibhirnirmitavaṃśavaṃśya |
sthūṇaṃ tvacā romanakhaiḥ pinaddham |
kṣarannavadvāramagārametad |
viṇmūtrapūrṇaṃ madupaiti kānyā || 33 ||
[Analyze grammar]

videhānāṃ pure hyasmin ahamekaiva mūḍhadhīḥ |
yānyamicchantyasatyasmād ātmadāt kāmamacyutāt || 34 ||
[Analyze grammar]

suhṛtpreṣṭhatamo nātha ātmā cāyaṃ śarīriṇām |
taṃ vikrīyātmanaivāhaṃ rame'nena yathā ramā || 35 ||
[Analyze grammar]

kiyat priyaṃ te vyabhajan kāmā ye kāmadā narāḥ |
ādyantavanto bhāryāyā devā vā kālavidrutāḥ || 36 ||
[Analyze grammar]

nūnaṃ me bhagavān prīto viṣṇuḥ kenāpi karmaṇā |
nirvedo'yaṃ durāśāyā yanme jātaḥ sukhāvahaḥ || 37 ||
[Analyze grammar]

maivaṃ syuḥ mandabhāgyāyāḥ kleśā nirvedahetavaḥ |
yenānubandhaṃ nirhṛtya puruṣaḥ śamamṛcchati || 38 ||
[Analyze grammar]

tenopakṛtamādāya śirasā grāmyasaṅgatāḥ |
tyaktvā durāśāḥ śaraṇaṃ vrajāmi tamadhīśvaram || 39 ||
[Analyze grammar]

santuṣṭā śraddadhatyetad yathālābhena jīvatī |
viharāmimunaivāhamātmanā ramaṇena vai || 40 ||
[Analyze grammar]

saṃsārakūpe patitaṃ viṣayairmuṣitekṣaṇam |
grastaṃ kālāhinātmānaṃ ko'nyastrātumadhīśvaraḥ || 41 ||
[Analyze grammar]

ātmaiva hyātmano goptā nirvidyeta yadākhilāt |
apramatta idaṃ paśyed grastaṃ kālāhinā jagat || 42 ||
[Analyze grammar]

śrībrāhmaṇa uvāca |
evaṃ vyavasitamatiḥ durāśāṃ kāntatarṣajām |
chittvopaśamamāsthāya śayyāmupaviveśa sā || 43 ||
[Analyze grammar]

āśā hi paramaṃ duḥkhaṃ nairāśyaṃ paramaṃ sukham |
yathā sañchidya kāntāśāṃ sukhaṃ suṣvāpa piṅgalā || 44 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ ekādaśaskandhe aṣṭamo'dhyāyaḥ || 8 ||
[Analyze grammar]