Chapter 20

[English text for this chapter is available]

prāvṛḍvarṇanaṃ śaradvarṇanaṃ ca |
śrīśuka uvāca |
tayostadad‍bhutaṃ karma dāvāgnermokṣamātmanaḥ |
gopāḥ strībhyaḥ samācakhyuḥ pralambavadhameva ca || 1 ||
[Analyze grammar]

gopavṛddhāśca gopyaśca tadupākarṇya vismitāḥ |
menire devapravarau kṛṣṇarāmau vrajaṃ gatau || 2 ||
[Analyze grammar]

tataḥ prāvartata prāvṛṭ sarvasattvasamud‍bhavā |
vidyotamānaparidhiḥ visphūrjita nabhastalā || 3 ||
[Analyze grammar]

sāndranīlāmbudairvyoma savidyut stanayit‍nubhiḥ |
aspaṣṭajyotiḥ ācchannaṃ brahmeva saguṇaṃ babhau || 4 ||
[Analyze grammar]

aṣṭau māsān nipītaṃ yad bhūmyāścodamayaṃ vasu |
svagobhirmoktumārebhe parjanyaḥ kāla āgate || 5 ||
[Analyze grammar]

taḍidvanto mahāmeghāḥ caṇḍa śvasana vepitāḥ |
prīṇanaṃ jīvanaṃ hyasya mumucuḥ karuṇā iva || 6 ||
[Analyze grammar]

tapaḥkṛśā devamīḍhā āsīd varṣīyasī mahī |
yathaiva kāmyatapasaḥ tanuḥ samprāpya tatphalam || 7 ||
[Analyze grammar]

niśāmukheṣu khadyotāḥ tamasā bhānti na grahāḥ |
yathā pāpena pākhaṇḍā na hi vedāḥ kalau yuge || 8 ||
[Analyze grammar]

śrutvā parjanyaninadaṃ maṇḍukāḥ vyasṛjan giraḥ |
tūṣṇīṃ śayānāḥ prāg yadvad brāhmaṇā niyamātyaye || 9 ||
[Analyze grammar]

āsan utpathavāhinyaḥ kṣudranadyo'nuśuṣyatīḥ |
puṃso yathāsvataṃtrasya dehadraviṇa sampadaḥ || 10 ||
[Analyze grammar]

haritā haribhiḥ śaṣpaiḥ indragopaiśca lohitā |
ucchilīndhrakṛtacchāyā nṛṇāṃ śrīriva bhūrabhūt || 11 ||
[Analyze grammar]

kṣetrāṇi śaṣyasampadbhiḥ karṣakāṇāṃ mudaṃ daduḥ |
mānināṃ unutāpaṃ vai daivādhīnaṃ ajānatām || 12 ||
[Analyze grammar]

jalasthalaukasaḥ sarve navavāriniṣevayā |
abibhran ruciraṃ rūpaṃ yathā hariniṣevayā || 13 ||
[Analyze grammar]

saridbhī saṅgataḥ sindhuḥ cukṣobha śvasanormimān |
apakvayoginaścittaṃ kāmāktaṃ guṇayug yathā || 14 ||
[Analyze grammar]

girayo varṣadhārābhiḥ hanyamānā na vivyathuḥ |
abhibhūyamānā vyasanaiḥ yathā adhokṣajacetasaḥ || 15 ||
[Analyze grammar]

mārgā babhūvuḥ sandigdhāḥ tṛṇaiśchannā hyasaṃskṛtāḥ |
nābhyasyamānāḥ śrutayo dvijaiḥ kālahatā iva || 16 ||
[Analyze grammar]

lokabandhuṣu megheṣu vidyutaścalasauhṛdāḥ |
sthairyaṃ na cakruḥ kāminyaḥ puruṣeṣu guṇiṣviva || 17 ||
[Analyze grammar]

dhanurviyati māhendraṃ nirguṇaṃ ca guṇinyabhāt |
vyakte guṇavyatikare aguṇavān puruṣo yathā || 18 ||
[Analyze grammar]

na rarājoḍupaśchannaḥ svajyotsnārājitairghanaiḥ |
ahaṃmatyā bhāsitayā svabhāsā puruṣo yathā || 19 ||
[Analyze grammar]

meghāgamotsavā hṛṣṭāḥ pratyanandan śikhaṇḍinaḥ |
gṛheṣu taptā nirviṇṇā yathācyutajanāgame || 20 ||
[Analyze grammar]

pītvāpaḥ pādapāḥ padbhiḥ āsannānātmamūrtayaḥ |
prāk kṣāmāstapasā śrāntā yathā kāmānusevayā || 21 ||
[Analyze grammar]

saraḥsvaśāntarodhaḥsu nyūṣuraṅgāpi sārasāḥ |
gṛheṣvaśāntakṛtyeṣu grāmyā iva durāśayāḥ || 22 ||
[Analyze grammar]

jalaughairnirabhidyanta setavo varṣatīśvare |
pāṣaṇḍināmasadvādaiḥ vedamārgāḥ kalau yathā || 23 ||
[Analyze grammar]

vyamuñcan vānvāyubhirnunnā bhūtebhyo'thāmṛtaṃ ghanāḥ |
yathā'śiṣo viśpatayaḥ kāle kāle dvijeritāḥ || 24 ||
[Analyze grammar]

evaṃ vanaṃ tad varṣiṣṭhaṃ pakvakharjura jambumat |
gogopālairvṛto rantuṃ sabalaḥ prāviśad hariḥ || 25 ||
[Analyze grammar]

dhenavo mandagāminya ūdhobhāreṇa bhūyasā |
yayurbhagavatā'hūtā drutaṃ prītyā snutastanīḥ || 26 ||
[Analyze grammar]

vanaukasaḥ pramuditā vanarājīrmadhucyutaḥ |
jaladhārā girernādād āsannā dadṛśe guhāḥ || 27 ||
[Analyze grammar]

kvacid vanaspatikroḍe guhāyāṃ cābhivarṣati |
nirviśya bhagavān reme kandamūlaphalāśanaḥ || 28 ||
[Analyze grammar]

dadhyodanaṃ samānītaṃ śilāyāṃ salilāntike |
sambhojanīyairbubhuje gopaiḥ saṅkarṣaṇānvitaḥ || 29 ||
[Analyze grammar]

śādvalopari saṃviśya carvato mīlitekṣaṇān |
tṛptān vṛṣā vatsatarān gāśca svodhobharaśramāḥ || 30 ||
[Analyze grammar]

prāvṛṭśriyaṃ ca tāṃ vīkṣya sarvabhūtamudāvahām |
bhagavān pūjayāṃcakre ātmaśaktyupabṛṃhitām || 31 ||
[Analyze grammar]

evaṃ nivasatostasmin rāmakeśavayorvraje |
śarat samabhavad vyabhrā svacchāmbvaparuṣānilā || 32 ||
[Analyze grammar]

śaradā nīrajotpattyā nīrāṇi prakṛtiṃ yayuḥ |
bhraṣṭānāmiva cetāṃsi punaryoganiṣevayā || 33 ||
[Analyze grammar]

vyomno'bbhraṃ bhūtaśābalyaṃ bhuvaḥ paṅkamapāṃ malam |
śarat jahārāśramiṇāṃ kṛṣṇe bhaktiryathāśubham || 34 ||
[Analyze grammar]

sarvasvaṃ jaladā hitvā virejuḥ śubhravarcasaḥ |
yathā tyaktaiṣaṇāḥ śāntā munayo muktakilbiṣāḥ || 35 ||
[Analyze grammar]

girayo mumucustoyaṃ kvacinna mumucuḥ śivam |
yathā jñānāmṛtaṃ kāle jñānino dadate na vā || 36 ||
[Analyze grammar]

naivāvidan kṣīyamāṇaṃ jalaṃ gādhajalecarāḥ |
yathā'yuranvahaṃ kṣayyaṃ narā mūḍhāḥ kuṭumbinaḥ || 37 ||
[Analyze grammar]

gādhavāricarāstāpaṃ avindan śaradarkajam |
yathā daridraḥ kṛpaṇaḥ kuṭumbyavijitendriyaḥ || 38 ||
[Analyze grammar]

śanaiḥ śanairjahuḥ paṅkaṃ sthalānyāmaṃ ca vīrudhaḥ |
yathāhaṃmamatāṃ dhīrāḥ śarīrādiṣvanātmasu || 39 ||
[Analyze grammar]

niścalāmburabhūt tūṣṇīṃ samudraḥ śaradāgame |
ātmani uparate samyaṅ munirvyuparatāgamaḥ || 40 ||
[Analyze grammar]

kedārebhyastvapo'gṛhṇan karṣakā dṛḍhasetubhiḥ |
yathā prāṇaiḥ sravajjñānaṃ tannirodhena yoginaḥ || 41 ||
[Analyze grammar]

śaradarkāṃśujāṃstāpān bhūtānāṃ uḍupo'harat |
dehābhimānajaṃ bodho mukundo vrajayoṣitām || 42 ||
[Analyze grammar]

khamaśobhata nirmeghaṃ śarad vimalatārakam |
sattvayuktaṃ yathā cittaṃ śabdabrahmārthadarśanam || 43 ||
[Analyze grammar]

akhaṇḍamaṇḍalo vyomni rarājoḍugaṇaiḥ śaśī |
yathā yadupatiḥ kṛṣṇo vṛṣṇicakrāvṛto bhuvi || 44 ||
[Analyze grammar]

āśliṣya samaśītoṣṇaṃ prasūna vanamārutam |
janāstāpaṃ jahurgopyo na kṛṣṇahṛtacetasaḥ || 45 ||
[Analyze grammar]

gāvo mṛgāḥ khagā nāryaḥ puṣpiṇyaḥ śaradābhavan |
anvīyamānāḥ svavṛṣaiḥ phalairīśakriyā iva || 46 ||
[Analyze grammar]

udahṛṣyan vārijāni sūryotthāne kumud vinā |
rājñā tu nirbhayā lokā yathā dasyūn vinā nṛpa || 47 ||
[Analyze grammar]

puragrāmeṣvāgrayaṇaiḥ indriyaiśca mahotsavaiḥ |
babhau bhūḥ pakvasasyāḍhyā kalābhyāṃ nitarāṃ hareḥ || 48 ||
[Analyze grammar]

vaṇiṅmuni nṛpasnātā nirgamyārthān prapedire |
varṣaruddhā yathā siddhāḥ svapiṇḍān kāla āgate || 49 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe pūrvārdhe viṃśo'dhyāyaḥ || 20 ||
[Analyze grammar]