Chapter 15

[English text for this chapter is available]

śrīrājovāca |
baleḥ padatrayaṃ bhūmeḥ kasmāddharirayācata |
bhūteśvaraḥ kṛpaṇavallabdhārtho'pi babandha tam || 1 ||
[Analyze grammar]

etadveditumicchāmo mahatkautūhalaṃ hi naḥ |
yajñeśvarasya pūrṇasya bandhanaṃ cāpyanāgasaḥ || 2 ||
[Analyze grammar]

śrīśuka uvāca |
parājitaśrīrasubhiśca hāpito hīndreṇa rājanbhṛgubhiḥ sa jīvitaḥ |
sarvātmanā tānabhajadbhṛgūnbaliḥ śiṣyo mahātmārthanivedanena || 3 ||
[Analyze grammar]

taṃ brāhmaṇā bhṛgavaḥ prīyamāṇā ayājayanviśvajitā triṇākam |
jigīṣamāṇaṃ vidhinābhiṣicya mahābhiṣekeṇa mahānubhāvāḥ || 4 ||
[Analyze grammar]

tato rathaḥ kāñcanapaṭṭanaddho hayāśca haryaśvaturaṅgavarṇāḥ |
dhvajaśca siṃhena virājamāno hutāśanādāsa havirbhiriṣṭāt || 5 ||
[Analyze grammar]

dhanuśca divyaṃ puraṭopanaddhaṃ tūṇāvariktau kavacaṃ ca divyam |
pitāmahastasya dadau ca mālāmamlānapuṣpāṃ jalajaṃ ca śukraḥ || 6 ||
[Analyze grammar]

evaṃ sa viprārjitayodhanārthastaiḥ kalpitasvastyayano'tha viprān |
pradakṣiṇīkṛtya kṛtapraṇāmaḥ prahrādamāmantrya namaścakāra || 7 ||
[Analyze grammar]

athāruhya rathaṃ divyaṃ bhṛgudattaṃ mahārathaḥ |
susragdharo'tha sannahya dhanvī khaḍgī dhṛteṣudhiḥ || 8 ||
[Analyze grammar]

hemāṅgadalasadbāhuḥ sphuranmakarakuṇḍalaḥ |
rarāja rathamārūḍho dhiṣṇyastha iva havyavāṭ || 9 ||
[Analyze grammar]

tulyaiśvaryabalaśrībhiḥ svayūthairdaityayūthapaiḥ |
pibadbhiriva khaṃ dṛgbhirdahadbhiḥ paridhīniva || 10 ||
[Analyze grammar]

vṛto vikarṣanmahatīmāsurīṃ dhvajinīṃ vibhuḥ |
yayāvindra purīṃ svṛddhāṃ kampayanniva rodasī || 11 ||
[Analyze grammar]

ramyāmupavanodyānaiḥ śrīmadbhirnandanādibhiḥ |
kūjadvihaṅgamithunairgāyanmattamadhuvrataiḥ || 12 ||
[Analyze grammar]

pravālaphalapuṣporu bhāraśākhāmaradrumaiḥ |
haṃsasārasacakrāhva kāraṇḍavakulākulāḥ |
nalinyo yatra krīḍanti pramadāḥ surasevitāḥ || 13 ||
[Analyze grammar]

ākāśagaṅgayā devyā vṛtāṃ parikhabhūtayā |
prākāreṇāgnivarṇena sāṭṭālenonnatena ca || 14 ||
[Analyze grammar]

rukmapaṭṭakapāṭaiśca dvāraiḥ sphaṭikagopuraiḥ |
juṣṭāṃ vibhaktaprapathāṃ viśvakarmavinirmitām || 15 ||
[Analyze grammar]

sabhācatvararathyāḍhyāṃ vimānairnyarbudairyutām |
śṛṅgāṭakairmaṇimayairvajravidrumavedibhiḥ || 16 ||
[Analyze grammar]

yatra nityavayorūpāḥ śyāmā virajavāsasaḥ |
bhrājante rūpavannāryo hyarcirbhiriva vahnayaḥ || 17 ||
[Analyze grammar]

surastrīkeśavibhraṣṭa navasaugandhikasrajām |
yatrāmodamupādāya mārga āvāti mārutaḥ || 18 ||
[Analyze grammar]

hemajālākṣanirgacchaddhūmenāgurugandhinā |
pāṇḍureṇa praticchanna mārge yānti surapriyāḥ || 19 ||
[Analyze grammar]

muktāvitānairmaṇihemaketubhirnānāpatākāvalabhībhirāvṛtām |
śikhaṇḍipārāvatabhṛṅganāditāṃ vaimānikastrīkalagītamaṅgalām || 20 ||
[Analyze grammar]

mṛdaṅgaśaṅkhānakadundubhisvanaiḥ satālavīṇāmurajeṣṭaveṇubhiḥ |
nṛtyaiḥ savādyairupadevagītakairmanoramāṃ svaprabhayā jitaprabhām || 21 ||
[Analyze grammar]

yāṃ na vrajantyadharmiṣṭhāḥ khalā bhūtadruhaḥ śaṭhāḥ |
māninaḥ kāmino lubdhā ebhirhīnā vrajanti yat || 22 ||
[Analyze grammar]

tāṃ devadhānīṃ sa varūthinīpatirbahiḥ samantādrurudhe pṛtanyayā |
ācāryadattaṃ jalajaṃ mahāsvanaṃ dadhmau prayuñjanbhayamindrayoṣitām || 23 ||
[Analyze grammar]

maghavāṃstamabhipretya baleḥ paramamudyamam |
sarvadevagaṇopeto gurumetaduvāca ha || 24 ||
[Analyze grammar]

bhagavannudyamo bhūyānbalernaḥ pūrvavairiṇaḥ |
aviṣahyamimaṃ manye kenāsīttejasorjitaḥ || 25 ||
[Analyze grammar]

nainaṃ kaścitkuto vāpi prativyoḍhumadhīśvaraḥ |
pibanniva mukhenedaṃ lihanniva diśo daśa |
dahanniva diśo dṛgbhiḥ saṃvartāgnirivotthitaḥ || 26 ||
[Analyze grammar]

brūhi kāraṇametasya durdharṣatvasya madripoḥ |
ojaḥ saho balaṃ tejo yata etatsamudyamaḥ || 27 ||
[Analyze grammar]

śrīgururuvāca |
jānāmi maghavañchatrorunnaterasya kāraṇam |
śiṣyāyopabhṛtaṃ tejo bhṛgubhirbrahmavādibhiḥ || 28 ||
[Analyze grammar]

ojasvinaṃ baliṃ jetuṃ na samartho'sti kaścana |
bhavadvidho bhavānvāpi varjayitveśvaraṃ harim || 29 ||
[Analyze grammar]

vijeṣyati na ko'pyenaṃ brahmatejaḥsamedhitam |
nāsya śaktaḥ puraḥ sthātuṃ kṛtāntasya yathā janāḥ || 30 ||
[Analyze grammar]

tasmānnilayamutsṛjya yūyaṃ sarve triviṣṭapam |
yāta kālaṃ pratīkṣanto yataḥ śatrorviparyayaḥ || 31 ||
[Analyze grammar]

eṣa viprabalodarkaḥ sampratyūrjitavikramaḥ |
teṣāmevāpamānena sānubandho vinaṅkṣyati || 32 ||
[Analyze grammar]

evaṃ sumantritārthāste guruṇārthānudarśinā |
hitvā triviṣṭapaṃ jagmurgīrvāṇāḥ kāmarūpiṇaḥ || 33 ||
[Analyze grammar]

deveṣvatha nilīneṣu balirvairocanaḥ purīm |
devadhānīmadhiṣṭhāya vaśaṃ ninye jagattrayam || 34 ||
[Analyze grammar]

taṃ viśvajayinaṃ śiṣyaṃ bhṛgavaḥ śiṣyavatsalāḥ |
śatena hayamedhānāmanuvratamayājayan || 35 ||
[Analyze grammar]

tatastadanubhāvena bhuvanatrayaviśrutām |
kīrtiṃ dikṣu vitanvānaḥ sa reja uḍurāḍiva || 36 ||
[Analyze grammar]

bubhuje ca śriyaṃ svṛddhāṃ dvijadevopalambhitām |
kṛtakṛtyamivātmānaṃ manyamāno mahāmanāḥ || 37 ||
[Analyze grammar]