Chapter 5

[English text for this chapter is available]

śrīśuka uvāca |
tasyāṃ sa pāñcajanyāṃ vai viṣṇumāyopabṛṃhitaḥ |
haryaśvasaṃjñānayutaṃ putrānajanayadvibhuḥ || 1 ||
[Analyze grammar]

apṛthagdharmaśīlāste sarve dākṣāyaṇā nṛpa |
pitrā proktāḥ prajāsarge pratīcīṃ prayayurdiśam || 2 ||
[Analyze grammar]

tatra nārāyaṇasarastīrthaṃ sindhusamudrayoḥ |
saṅgamo yatra sumahanmunisiddhaniṣevitam || 3 ||
[Analyze grammar]

tadupasparśanādeva vinirdhūtamalāśayāḥ |
dharme pāramahaṃsye ca protpannamatayo'pyuta || 4 ||
[Analyze grammar]

tepire tapa evograṃ pitrādeśena yantritāḥ |
prajāvivṛddhaye yattāndevarṣistāndadarśa ha || 5 ||
[Analyze grammar]

uvāca cātha haryaśvāḥ kathaṃ srakṣyatha vai prajāḥ |
adṛṣṭvāntaṃ bhuvo yūyaṃ bāliśā bata pālakāḥ || 6 ||
[Analyze grammar]

tathaikapuruṣaṃ rāṣṭraṃ bilaṃ cādṛṣṭanirgamam |
bahurūpāṃ striyaṃ cāpi pumāṃsaṃ puṃścalīpatim || 7 ||
[Analyze grammar]

nadīmubhayato vāhāṃ pañcapañcādbhutaṃ gṛham |
kvaciddhaṃsaṃ citrakathaṃ kṣaurapavyaṃ svayaṃ bhramim || 8 ||
[Analyze grammar]

kathaṃ svapiturādeśamavidvāṃso vipaścitaḥ |
anurūpamavijñāya aho sargaṃ kariṣyatha || 9 ||
[Analyze grammar]

śrīśuka uvāca |
tanniśamyātha haryaśvā autpattikamanīṣayā |
vācaḥ kūṭaṃ tu devarṣeḥ svayaṃ vimamṛśurdhiyā || 10 ||
[Analyze grammar]

bhūḥ kṣetraṃ jīvasaṃjñaṃ yadanādi nijabandhanam |
adṛṣṭvā tasya nirvāṇaṃ kimasatkarmabhirbhavet || 11 ||
[Analyze grammar]

eka eveśvarasturyo bhagavānsvāśrayaḥ paraḥ |
tamadṛṣṭvābhavaṃ puṃsaḥ kimasatkarmabhirbhavet || 12 ||
[Analyze grammar]

pumānnaivaiti yadgatvā bilasvargaṃ gato yathā |
pratyagdhāmāvida iha kimasatkarmabhirbhavet || 13 ||
[Analyze grammar]

nānārūpātmano buddhiḥ svairiṇīva guṇānvitā |
tanniṣṭhāmagatasyeha kimasatkarmabhirbhavet || 14 ||
[Analyze grammar]

tatsaṅgabhraṃśitaiśvaryaṃ saṃsarantaṃ kubhāryavat |
tadgatīrabudhasyeha kimasatkarmabhirbhavet || 15 ||
[Analyze grammar]

sṛṣṭyapyayakarīṃ māyāṃ velākūlāntavegitām |
mattasya tāmavijñasya kimasatkarmabhirbhavet || 16 ||
[Analyze grammar]

pañcaviṃśatitattvānāṃ puruṣo'dbhutadarpaṇaḥ |
adhyātmamabudhasyeha kimasatkarmabhirbhavet || 17 ||
[Analyze grammar]

aiśvaraṃ śāstramutsṛjya bandhamokṣānudarśanam |
viviktapadamajñāya kimasatkarmabhirbhavet || 18 ||
[Analyze grammar]

kālacakraṃ bhramistīkṣṇaṃ sarvaṃ niṣkarṣayajjagat |
svatantramabudhasyeha kimasatkarmabhirbhavet || 19 ||
[Analyze grammar]

śāstrasya piturādeśaṃ yo na veda nivartakam |
kathaṃ tadanurūpāya guṇavisrambhyupakramet || 20 ||
[Analyze grammar]

iti vyavasitā rājanharyaśvā ekacetasaḥ |
prayayustaṃ parikramya panthānamanivartanam || 21 ||
[Analyze grammar]

svarabrahmaṇi nirbhāta hṛṣīkeśapadāmbuje |
akhaṇḍaṃ cittamāveśya lokānanucaranmuniḥ || 22 ||
[Analyze grammar]

nāśaṃ niśamya putrāṇāṃ nāradācchīlaśālinām |
anvatapyata kaḥ śocansuprajastvaṃ śucāṃ padam || 23 ||
[Analyze grammar]

sa bhūyaḥ pāñcajanyāyāmajena parisāntvitaḥ |
putrānajanayaddakṣaḥ savalāśvānsahasriṇaḥ || 24 ||
[Analyze grammar]

te ca pitrā samādiṣṭāḥ prajāsarge dhṛtavratāḥ |
nārāyaṇasaro jagmuryatra siddhāḥ svapūrvajāḥ || 25 ||
[Analyze grammar]

tadupasparśanādeva vinirdhūtamalāśayāḥ |
japanto brahma paramaṃ tepustatra mahattapaḥ || 26 ||
[Analyze grammar]

abbhakṣāḥ katicinmāsānkaticidvāyubhojanāḥ |
ārādhayanmantramimamabhyasyanta iḍaspatim || 27 ||
[Analyze grammar]

oṃ namo nārāyaṇāya puruṣāya mahātmane |
viśuddhasattvadhiṣṇyāya mahāhaṃsāya dhīmahi || 28 ||
[Analyze grammar]

iti tānapi rājendra prajāsargadhiyo muniḥ |
upetya nāradaḥ prāha vācaḥ kūṭāni pūrvavat || 29 ||
[Analyze grammar]

dākṣāyaṇāḥ saṃśṛṇuta gadato nigamaṃ mama |
anvicchatānupadavīṃ bhrātṝṇāṃ bhrātṛvatsalāḥ || 30 ||
[Analyze grammar]

bhrātṝṇāṃ prāyaṇaṃ bhrātā yo'nutiṣṭhati dharmavit |
sa puṇyabandhuḥ puruṣo marudbhiḥ saha modate || 31 ||
[Analyze grammar]

etāvaduktvā prayayau nārado'moghadarśanaḥ |
te'pi cānvagamanmārgaṃ bhrātṝṇāmeva māriṣa || 32 ||
[Analyze grammar]

sadhrīcīnaṃ pratīcīnaṃ parasyānupathaṃ gatāḥ |
nādyāpi te nivartante paścimā yāminīriva || 33 ||
[Analyze grammar]

etasminkāla utpātānbahūnpaśyanprajāpatiḥ |
pūrvavannāradakṛtaṃ putranāśamupāśṛṇot || 34 ||
[Analyze grammar]

cukrodha nāradāyāsau putraśokavimūrcchitaḥ |
devarṣimupalabhyāha roṣādvisphuritādharaḥ || 35 ||
[Analyze grammar]

śrīdakṣa uvāca |
aho asādho sādhūnāṃ sādhuliṅgena nastvayā |
asādhvakāryarbhakāṇāṃ bhikṣormārgaḥ pradarśitaḥ || 36 ||
[Analyze grammar]

ṛṇaistribhiramuktānāmamīmāṃsitakarmaṇām |
vighātaḥ śreyasaḥ pāpa lokayorubhayoḥ kṛtaḥ || 37 ||
[Analyze grammar]

evaṃ tvaṃ niranukrośo bālānāṃ matibhiddhareḥ |
pārṣadamadhye carasi yaśohā nirapatrapaḥ || 38 ||
[Analyze grammar]

nanu bhāgavatā nityaṃ bhūtānugrahakātarāḥ |
ṛte tvāṃ sauhṛdaghnaṃ vai vairaṅkaramavairiṇām || 39 ||
[Analyze grammar]

netthaṃ puṃsāṃ virāgaḥ syāttvayā kevalinā mṛṣā |
manyase yadyupaśamaṃ snehapāśanikṛntanam || 40 ||
[Analyze grammar]

nānubhūya na jānāti pumānviṣayatīkṣṇatām |
nirvidyate svayaṃ tasmānna tathā bhinnadhīḥ paraiḥ || 41 ||
[Analyze grammar]

yannastvaṃ karmasandhānāṃ sādhūnāṃ gṛhamedhinām |
kṛtavānasi durmarṣaṃ vipriyaṃ tava marṣitam || 42 ||
[Analyze grammar]

tantukṛntana yannastvamabhadramacaraḥ punaḥ |
tasmāllokeṣu te mūḍha na bhavedbhramataḥ padam || 43 ||
[Analyze grammar]

śrīśuka uvāca |
pratijagrāha tadbāḍhaṃ nāradaḥ sādhusammataḥ |
etāvānsādhuvādo hi titikṣeteśvaraḥ svayam || 44 ||
[Analyze grammar]