Chapter 20

[English text for this chapter is available]

śaunaka uvāca |
mahīṃ pratiṣṭhāmadhyasya saute svāyambhuvo manuḥ |
kāni anvatiṣṭhad dvārāṇi mārgāya avara janmanām || 1 ||
[Analyze grammar]

kṣattā mahābhāgavataḥ kṛṣṇasyaikāntikaḥ suhṛt |
yastatyājāgrajaṃ kṛṣṇe sāpatyaṃ aghavāniti || 2 ||
[Analyze grammar]

dvaipāyanādanavaro mahitve tasya dehajaḥ |
sarvātmanā śritaḥ kṛṣṇaṃ tatparāṃścāpyanuvrataḥ || 3 ||
[Analyze grammar]

kiṃ anvapṛcchan maitreyaṃ virajāstīrthasevayā |
upagamya kuśāvarta āsīnaṃ tattvavittamam || 4 ||
[Analyze grammar]

tayoḥ saṃvadatoḥ sūta pravṛttā hyamalāḥ kathāḥ |
āpo gāṅgā ivāghaghnīḥ hareḥ pādāmbujāśrayāḥ || 5 ||
[Analyze grammar]

tā naḥ kīrtaya bhadraṃ te kīrtanyodārakarmaṇaḥ |
rasajñaḥ ko nu tṛpyeta harilīlāmṛtaṃ piban || 6 ||
[Analyze grammar]

evaṃ ugraśravāḥ pṛṣṭa ṛṣibhiḥ naimiṣāyanaiḥ |
bhagavati arpitādhyātmaḥ tān āha śrūyatāmiti || 7 ||
[Analyze grammar]

sūta uvāca |
harerdhṛtakroḍatanoḥ svamāyayā |
niśamya goruddharaṇaṃ rasātalāt |
līlāṃ hiraṇyākṣamavajñayā hataṃ |
sañjātaharṣo munimāha bhārataḥ || 8 ||
[Analyze grammar]

vidura uvāca |
prajāpatipatiḥ sṛṣṭvā prajāsarge prajāpatīn |
kiṃ ārabhata me brahman prabrūhyavyaktamārgavit || 9 ||
[Analyze grammar]

ye marīcyādayo viprā yastu svāyambhuvo manuḥ |
te vai brahmaṇa ādeśāt kathaṃ etad abhāvayan || 10 ||
[Analyze grammar]

sadvitīyāḥ kimasṛjan svatantrā uta karmasu |
āho svitsaṃhatāḥ sarva idaṃ sma samakalpayan || 11 ||
[Analyze grammar]

maitreya uvāca |
daivena durvitarkyeṇa pareṇānimiṣeṇa ca |
jātakṣobhād bhagavato mahān āsīd guṇatrayāt || 12 ||
[Analyze grammar]

rajaḥpradhānān mahataḥ triliṅgo daivacoditāt |
jātaḥ sasarja bhūtādiḥ viyadādīni pañcaśaḥ || 13 ||
[Analyze grammar]

tāni caikaikaśaḥ sraṣṭuṃ asamarthāni bhautikam |
saṃhatya daivayogena haimaṃ aṇḍaṃ avāsṛjan || 14 ||
[Analyze grammar]

so'śayiṣṭābdhisalile āṇḍakośo nirātmakaḥ |
sāgraṃ vai varṣasāhasraṃ anvavātsīt taṃ īśvaraḥ || 15 ||
[Analyze grammar]

tasya nābherabhūtpadmaṃ sahasrārkorudīdhiti |
sarvajīvanikāyauko yatra svayaṃ abhūtsvarāṭ || 16 ||
[Analyze grammar]

so'nuviṣṭo bhagavatā yaḥ śete salilāśaye |
lokasaṃsthāṃ yathā pūrvaṃ nirmame saṃsthayā svayā || 17 ||
[Analyze grammar]

sasarja cchāyayāvidyāṃ pañcaparvāṇamagrataḥ |
tāmisraṃ andhatāmisraṃ tamo moho mahātamaḥ || 18 ||
[Analyze grammar]

visasarjātmanaḥ kāyaṃ nābhinandan tamomayam |
jagṛhuryakṣarakṣāṃsi rātriṃ kṣuttṛṭsamud‍bhavām || 19 ||
[Analyze grammar]

kṣuttṛḍbhyāṃ upasṛṣṭāste taṃ jagdhumabhidudruvuḥ |
mā rakṣatainaṃ jakṣadhvaṃ iti ūcuḥ kṣuttṛḍarditāḥ || 20 ||
[Analyze grammar]

devastānāha saṃvigno mā māṃ jakṣata rakṣata |
aho me yakṣarakṣāṃsi prajā yūyaṃ babhūvitha || 21 ||
[Analyze grammar]

devatāḥ prabhayā yā yā dīvyan pramukhato'sṛjat |
te ahārṣurdevayanto visṛṣṭāṃ tāṃ prabhāmahaḥ || 22 ||
[Analyze grammar]

devo'devāñjaghanataḥ sṛjati smātilolupān |
te enaṃ lolupatayā maithunāyābhipedire || 23 ||
[Analyze grammar]

tato hasan sa bhagavān asurairnirapatrapaiḥ |
anvīyamānastarasā kruddho bhītaḥ parāpatat || 24 ||
[Analyze grammar]

sa upavrajya varadaṃ prapannārtiharaṃ harim |
anugrahāya bhaktānāṃ anurūpātmadarśanam || 25 ||
[Analyze grammar]

pāhi māṃ paramātmaṃste preṣaṇenāsṛjaṃ prajāḥ |
tā imā yabhituṃ pāpā upākrāmanti māṃ prabho || 26 ||
[Analyze grammar]

tvamekaḥ kila lokānāṃ kliṣṭānāṃ kleśanāśanaḥ |
tvamekaḥ kleśadasteṣāṃ anāsanna padāṃ tava || 27 ||
[Analyze grammar]

so'vadhāryāsya kārpaṇyaṃ viviktādhyātmadarśanaḥ |
vimuñcātmatanuṃ ghorāṃ ityukto vimumoca ha || 28 ||
[Analyze grammar]

tāṃ kvaṇaccaraṇāmbhojāṃ madavihvala locanām |
kāñcīkalāpavilasad dukūlat channa rodhasam || 29 ||
[Analyze grammar]

anyonyaśleṣayottuṅga nirantarapayodharām |
sunāsāṃ sudvijāṃ snigdha hāsalīlāvalokanām || 30 ||
[Analyze grammar]

gūhantīṃ vrīḍayātmānaṃ nīlālakavarūthinīm |
upalabhyāsurā dharma sarve sammumuhuḥ striyam || 31 ||
[Analyze grammar]

aho rūpamaho dhairyaṃ aho asyā navaṃ vayaḥ |
madhye kāmayamānānāṃ akāmeva visarpati || 32 ||
[Analyze grammar]

vitarkayanto bahudhā tāṃ sandhyāṃ pramadākṛtim |
abhisambhāvya viśrambhāt paryapṛcchan kumedhasaḥ || 33 ||
[Analyze grammar]

kāsi kasyāsi rambhoru ko vārthaste'tra bhāmini |
rūpadraviṇapaṇyena durbhagānno vibādhase || 34 ||
[Analyze grammar]

yā vā kācittvamabale diṣṭyā sandarśanaṃ tava |
utsunoṣīkṣamāṇānāṃ kandukakrīḍayā manaḥ || 35 ||
[Analyze grammar]

naikatra te jayati śālini pādapadmaṃ |
ghnantyā muhuḥ karatalena patatpataṅgam |
madhyaṃ viṣīdati bṛhatstanabhārabhītaṃ |
śānteva dṛṣṭiramalā suśikhāsamūhaḥ || 36 ||
[Analyze grammar]

iti sāyantanīṃ sandhyāṃ asurāḥ pramadāyatīm |
pralobhayantīṃ jagṛhuḥ matvā mūḍhadhiyaḥ striyam || 37 ||
[Analyze grammar]

prahasya bhāvagambhīraṃ jighranti ātmānamātmanā |
kāntyā sasarja bhagavān gandharvāpsarasāṃ gaṇān || 38 ||
[Analyze grammar]

visasarja tanuṃ tāṃ vai jyotsnāṃ kāntimatīṃ priyām |
te eva cādaduḥ prītyā viśvāvasupurogamāḥ || 39 ||
[Analyze grammar]

sṛṣṭvā bhūtapiśācāṃśca bhagavān ātmatandriṇā |
digvāsaso muktakeśān vīkṣya cāmīlayad dṛśau || 40 ||
[Analyze grammar]

jagṛhustadvisṛṣṭāṃ tāṃ jṛmbhaṇākhyāṃ tanuṃ prabhoḥ |
nidrāṃ indriyavikledo yayā bhūteṣu dṛśyate |
yenocchiṣṭāndharṣayanti tamunmādaṃ pracakṣate || 41 ||
[Analyze grammar]

ūrjasvantaṃ manyamāna ātmānaṃ bhagavānajaḥ |
sādhyān gaṇān pitṛgaṇān parokṣeṇāsṛjatprabhuḥ || 42 ||
[Analyze grammar]

te ātmasargaṃ taṃ kāyaṃ pitaraḥ pratipedire |
sādhyebhyaśca pitṛbhyaśca kavayo yadvitanvate || 43 ||
[Analyze grammar]

siddhān vidyādharāṃścaiva tirodhānena so'sṛjat |
tebhyo'dadāt taṃ ātmānaṃ antardhānākhyamad‍bhutam || 44 ||
[Analyze grammar]

sa kinnarān kimpuruṣān pratyātmyenāsṛjatprabhuḥ |
mānayannātmanātmānaṃ ātmābhāsaṃ vilokayan || 45 ||
[Analyze grammar]

te tu tajjagṛhū rūpaṃ tyaktaṃ yatparameṣṭhinā |
mithunībhūya gāyantaḥ taṃ evoṣasi karmabhiḥ || 46 ||
[Analyze grammar]

dehena vai bhogavatā śayāno bahucintayā |
sarge'nupacite krodhāt utsasarja ha tadvapuḥ || 47 ||
[Analyze grammar]

ye'hīyantāmutaḥ keśā ahayaste'ṅga jajñire |
sarpāḥ prasarpataḥ krūrā nāgā bhogorukandharāḥ || 48 ||
[Analyze grammar]

sa ātmānaṃ manyamānaḥ kṛtakṛtyamivātmabhūḥ |
tadā manūn sasarjānte manasā lokabhāvanān || 49 ||
[Analyze grammar]

tebhyaḥ so'sṛjatsvīyaṃ puraṃ puruṣamātmavān |
tān dṛṣṭvā ye purā sṛṣṭāḥ praśaśaṃsuḥ prajāpatim || 50 ||
[Analyze grammar]

aho etat jagatsraṣṭaḥ sukṛtaṃ bata te kṛtam |
pratiṣṭhitāḥ kriyā yasmin sākaṃ annamadāma he || 51 ||
[Analyze grammar]

tapasā vidyayā yukto yogena susamādhinā |
ṛṣīn ṛṣiḥ hṛṣīkeśaḥ sasarjābhimatāḥ prajāḥ || 52 ||
[Analyze grammar]

tebhyaścaikaikaśaḥ svasya dehasyāṃśamadādajaḥ |
yattat samādhiyogarddhi tapovidyāviraktimat || 53 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
tṛtīyaskandhe viṃśo'dhyāyaḥ || 20 ||
[Analyze grammar]