Chapter 152

śrīkṛṣṇa uvāca |
athātaḥ saṃpravakṣyāmi dhenūnāṃ kalpanā nṛpa |
viśeṣavidhinā yāśca deyāḥ kāmānabhīpsubhiḥ || 1 ||
[Analyze grammar]

kāmaṃ yaddīyate dānaṃ samagraṃ tatsukhāvaham |
asamagraṃ tu doṣāya bhavatīha paratra ca || 2 ||
[Analyze grammar]

tasmānna dakṣiṇāhīnaṃ vidhānavikalaṃ tathā |
deyaṃ dānaṃ mahārāja samagraphalakāmyayā || 3 ||
[Analyze grammar]

anyathā dīyamānaṃ tadahaṃkārāya kevalam |
pratyakṣaṃ cārthahāniḥ syānna vā tatphaladaṃ bhavet || 4 ||
[Analyze grammar]

tiladhenuṃ pravakṣyāmi śṛṇu pārthivasattama |
vārāheṇa purā proktāṃ mahāpātakanāśinīm || 5 ||
[Analyze grammar]

yāṃ dattvā brahmahā goghnaḥ pitṛhā gurutalpagaḥ |
agāradāhī garadaḥ sarvapāparatopi vā || 6 ||
[Analyze grammar]

mahāpātakayuktaśca saṃyuktaścopapātakaiḥ |
mucyate hyakhilaiḥ pāpaiḥ svargalokaṃ ca gacchati || 7 ||
[Analyze grammar]

anulipte mahīpṛṣṭhe kṛṣṇājinasamāvṛte |
dhenuṃ tilamayīṃ kṛtvā darbhānāstīrya sarvataḥ || 8 ||
[Analyze grammar]

tilāḥ śvetāstilāḥ kṛṣṇāstilā gomūtravarṇakāḥ |
tilānāṃ ca vicitrāṇāṃ dhenuṃ sarvāṃ ca kārayet || 9 ||
[Analyze grammar]

droṇasya vatsakaṃ kuryāccaturāḍhakikāṃ ca gām |
svarṇaśṛṃgīṃ raupyakhurāṃ gandhavarṇavatīṃ tathā || 10 ||
[Analyze grammar]

kāryā śarkarayā jihvā guḍenāsyaṃ ca kambalaḥ |
ikṣupādāṃ tāmrapṛṣṭhīṃ śuktimuktāphalekṣaṇām || 11 ||
[Analyze grammar]

praśastapatraśravaṇāṃ phaladaṃtavatīṃ śubhām |
sragdāmapucchāṃ kurvīta nava nītastanānvitām || 12 ||
[Analyze grammar]

sitavastraśirālambāṃ sitasarṣaparomikām |
phalairmanoharairannairmaṇimuktāphalānvitām || 13 ||
[Analyze grammar]

īdṛksaṃsthānasampannāṃ kṛtvā śraddhāsamanvitaḥ |
kāṃsyopadohanāṃ dadyātparvakāle samāgate || 14 ||
[Analyze grammar]

yā lakṣmīḥ sarvabhūtānāṃ yā vai deveṣvavasthitā |
dhenurūpeṇa sā devī mama pāpaṃ vyapohatu || 15 ||
[Analyze grammar]

tataḥ pradakṣiṇāṃ kṛtvā pūjayitvā praṇamya ca |
sadakṣiṇā mayā tubhyaṃ dattetyuktvā visarjayet || 16 ||
[Analyze grammar]

anena vidhinā dattvā tiladhenuṃ narādhipa |
sarvapāpavinirmukto paraṃ brahmādhigacchati || 17 ||
[Analyze grammar]

yaśca gṛhṇāti vidhivaddīyamānāṃ pramodate |
dīyamānāṃ praśaṃsaṃti ye ca saṃhṛṣṭamānasāḥ || 18 ||
[Analyze grammar]

tepi doṣavinirmuktā brahmalokaṃ vrajaṃti te |
praśāṃtāya suśīlāya vedavrataratāya ca || 19 ||
[Analyze grammar]

dhenuṃ tilamayīṃ dattvā na śocati kṛtākṛte |
trirātraṃ yastilāhārastiladhenuprado bhavet || 20 ||
[Analyze grammar]

ekāhamatha vā rājanna yucchedantarātmanā |
dānādviśuddhiḥ pāpasya tasya puṇyavato nṛpa || 21 ||
[Analyze grammar]

cāndrāyaṇādabhyadhikaṃ kathitaṃ tilabhakṣaṇam |
bālatve caiva yatpāpaṃ yauvane vārddhake tathā || 22 ||
[Analyze grammar]

vācā kṛtaṃ tu manasā karmaṇā yacca saṃcitam |
udakaṣṭhīvane caiva nagnasnānena yadbhavet || 23 ||
[Analyze grammar]

muśalenodyate nāpi laṃbite brāhmaṇe tathā |
vṛṣalīgamane caiva gurudārābhigāmini || 24 ||
[Analyze grammar]

surāpānena yatpāpamabhakṣyasya ca bhakṣaṇāt |
tatsarvaṃ vilayaṃ yāti tiladhenupradāyinām || 25 ||
[Analyze grammar]

yamamārge mahāghore nadī vaitaraṇī smṛtā |
vālukāyāḥ sthalaṃ caiva pacyate yatra pāpinaḥ || 26 ||
[Analyze grammar]

yatra lohamukhāḥ kākā yatra śvāno bhayāvahāḥ |
nikṛtya pāpināṃ māṃsaṃ bhakṣayaṃti bubhukṣitāḥ || 27 ||
[Analyze grammar]

asipatravanaṃ caiva lohakaṃṭakaśālmalīm |
etānsarvānatikramya tato yamapuraṃ vrajet || 28 ||
[Analyze grammar]

vimāne kāṃcane divye maṇiratnavibhūṣite |
tatrāruhya naraśreṣṭho gacchate paramāṅgatim || 29 ||
[Analyze grammar]

guṇahīne na dātavyā na dātavyā dhaneśvare |
kuṇḍe gole ca lubdhe ca na ca deyā kadāpi sā || 30 ||
[Analyze grammar]

ekā ekasya dātavyā munibhiḥ kathitaṃ purā |
araṇye naimiṣe pārtha nāradena niveditam || 31 ||
[Analyze grammar]

tattehaṃ saṃpravakṣyāmi samyakphalasahasradam |
idaṃ puṇyaṃ pavitraṃ ca māṅgalyaṃ kīrtivardhanam || 32 ||
[Analyze grammar]

viprāṇāṃ śrāvayecchrāddhe anantaphalamaśnute |
bahubhyo na pradeyāni gaurgṛhaṃ śayanaṃ striyaḥ || 33 ||
[Analyze grammar]

vibhajyamānānyetāni dātāraṃ pātayaṃtyadhaḥ |
sā tu vikrayamāpannā dahatyāsaptamaṃ kulam || 34 ||
[Analyze grammar]

asyā dānaprabhāvena vimānaṃ sarvakāmikam |
samāruhya naro yāti yatra devo hariḥ svayam || 39 ||
[Analyze grammar]

eṣā caiva pradātavyā prayatenāntarātmanā |
paurṇamāsyāṃ ca māghasya kārtikyāṃ caiva bhārata || 36 ||
[Analyze grammar]

candrasūryoparāge tu viṣuve ayane tathā |
ṣaḍaśītimukhe caiva vyatīpāte tu sarvadā || 37 ||
[Analyze grammar]

vaiśākhyāṃ mārgaśīrṣyāṃ vā gajacchāyāsu caiva hi |
eṣā te kathitā pārtha tiladhenurmayānagha || 38 ||
[Analyze grammar]

yāvaṃti dheno romaṇi gātreṣu nṛpapuṅgava |
tāvadvarṣasahasrāṇi tadā svarge mahīyate || 39 ||
[Analyze grammar]

yaśca gṛhṇāti vidhivaddīyamānāṃ ca paśyati |
anumodayate caiva te sarve svargagāminaḥ || 40 ||
[Analyze grammar]

dhenuṃ dhanādhipatayo magadhodbhavena mānena ye tilamayīṃ caturāḍhakena |
kṛtvā yathoktaracanāṃ kṛtacāruvatsāṃ yacchaṃti te bhuvi bhavaṃti vimuktapāpāḥ || 41 ||
[Analyze grammar]

pratigṛhṇāmi devi tvāṃ kuṭuṃbabharaṇāya ca |
kāmaṃ deyā dayāsmabhyaṃ dheno tvaṃ sarvadā hyasi || 42 ||
[Analyze grammar]