Chapter 151

yudhiṣṭhira uvāca |
śrutaḥ purāṇaviṣayastvatprasādānmayācyuta |
saṃsārāsāratāṃ jñātvā śrutaśca vratavistaraḥ || 1 ||
[Analyze grammar]

bhūyaśca śrotumicchāmi dānamāhātmyamuttamam |
kiṃ dīyate kadā kṛṣṇa kenopāyena śaṃsa me || 2 ||
[Analyze grammar]

nahi dānātparataramanyadastīti me matiḥ |
dhanaṃ dhanavatāṃ kiñcidahāryaṃ rājataskaraiḥ || 3 ||
[Analyze grammar]

śrīkṛṣṇa uvāca |
aniścitaṃ nidhānaṃ yadaprayuktaṃ ca varddhate |
anītaṃ yāti cādhvānaṃ dhanaṃ viprakarārpitam || 4 ||
[Analyze grammar]

kiṃ kāyena supuṣṭena balinā cirajīvinā |
yannasattvopakārāya tajjīvitamanarthakam || 5 ||
[Analyze grammar]

grāsādarddhamapi grāsa marthibhyaḥ kiṃ na dīyate |
icchānurūpo vibhavaḥ kadā kasya bhaviṣyati || 6 ||
[Analyze grammar]

ekasminnapyatikrāṃte dine dānavivarjite |
dasyubhirmuṣitaścaiva divārātrau ca śocati || 7 ||
[Analyze grammar]

yasya trivargaśūnyāni dinānyāyāṃti yāṃti ca |
salohakārabhastreva śvasannapi na jīvati || 8 ||
[Analyze grammar]

yairna dattaṃ na ca hutaṃ na tīrthe maraṇaṃ kṛtam |
hiraṇyamannamudakaṃ brāhmaṇebhyo na cārpitam || 9 ||
[Analyze grammar]

dīnā niraśanā rūkṣāḥ kapālāṅkitapāṇayaḥ |
te dṛśyaṃte mahārāja jāyamānā punaḥ || 10 ||
[Analyze grammar]

āyāsaśatalabdhasya prāṇebhyopi garīyasaḥ |
gatirekaiva vittasya dānamanyā vipattayaḥ || 11 ||
[Analyze grammar]

nopabhogaiḥ kṣayaṃ yāṃti na pradānaiḥ samṛddhayaḥ |
pūrvārjitānāmanyatra sukṛtānāṃ parikṣayāt || 12 ||
[Analyze grammar]

adṛṣṭaparatattvopi pātrebhyo visṛjeddhanam |
yasmānmṛtasya tannāsti tasmātsāṃśayikaṃ varam || 13 ||
[Analyze grammar]

dānāni bahurūpāṇi kathayāmi tavānagha |
vyāsavālmīkimanvādyaiḥ kathitāni purā mama || 14 ||
[Analyze grammar]

kiñcidvrataṃ yatkriyate pūjyate ca trilocanaḥ |
dīyate yacca viprebhya etajjanmataroḥ phalam || 15 ||
[Analyze grammar]

yudhiṣṭhira uvāca |
brāhmaṇaprīṇanārthāya keśavasya śivasya ca |
yāni dānāni deyāni tānyācakṣya yadūttama || 16 ||
[Analyze grammar]

yena caiva vidhānena dānaṃ puṇyasukhāvaham |
ehikāmuṣmikāvāptiṃ karoti nahi hanyate || 17 ||
[Analyze grammar]

śrīkṛṣṇa uvāca |
trīṇyāhuratidānāni gāvaḥ pṛthvī sarasvatī |
āsaptamaṃ punaṃtyete dohavāhanavedanaiḥ || 18 ||
[Analyze grammar]

godānamādau vakṣyāmi pratyakṣakramayogataḥ |
yena caiva vidhānena anyūnādhikavistaram || 19 ||
[Analyze grammar]

yudhiṣṭhira uvāca |
deyāḥ kiṃlakṣaṇā gāvaḥ kāśca rājanvivarjitāḥ |
kīdṛśāya pradātavyā na deyāḥ kīdṛśāya vai || 20 ||
[Analyze grammar]

śrīkṛṣṇa uvāca |
taruṇī rūpasaṃpannā suśīlā ca payasvinī |
nyāyārjitā savatsā ca pradeyā śrotriyāya gauḥ || 21 ||
[Analyze grammar]

vṛddhā sarogā hīnāṃgī vaṃdhyā duṣṭā mṛtaprajā |
dūrasthā'nyāyalabdhā ca deyā gaurna kathaṃcana || 22 ||
[Analyze grammar]

sā dattaiva haretpāpaṃ śrotriyāyāhitāgnaye |
atithipriyāya dāṃtāya dhenuṃ dadyādguṇādhike || 23 ||
[Analyze grammar]

akulīnāya mūrkhāya lubdhāya piśunāya ca |
havyakavyavyapetāya na deyā gauḥ kathaṃcana || 24 ||
[Analyze grammar]

śrīkṛṣṇa uvāca |
puṇyaṃ dinamathāsādya snātvātarpya pitṝṃstathā |
ghṛtakṣīrābhiṣekaṃ ca kṛtvā viṣṇoḥ śivasya ca || 25 ||
[Analyze grammar]

samabhyarcya yathānyāyaṃ puṣpādibhiranukramāt |
udaṅmukhīṃ prāṅmukhīṃ vā gṛṣṭiṃ kṛtvā payasvinīm || 26 ||
[Analyze grammar]

savatsāṃ vastrasaṃvītāṃ sitayajñopavītinīm |
svarṇaśṛṅgīṃ raupyakhurāṃ kāṃsyadohanakānvitām || 27 ||
[Analyze grammar]

śaktito dakṣiṇāyuktāṃ brāhmaṇāya nivedayet |
pucche kṛṣṇājinaṃ deyaṃ gāṃ pucche kariṇaṃ kare || 28 ||
[Analyze grammar]

aśvaṃ sadā sukarṇe vā dāsīṃ śirasi dāpayet |
gāvo mamāgrataḥ saṃtu gāvo me saṃtu pṛṣṭhataḥ || 29 ||
[Analyze grammar]

gāvo me hṛdaye saṃtu gavāṃ madhye vasāmyaham |
pradakṣiṇāṃ tataḥ kṛtvā dhenuṃ dvijavarāya tām || 30 ||
[Analyze grammar]

imāṃ ca pratigṛhṇīṣva dhenurdattā mayā tava |
evamuccārya taṃ vipraṃ deveśaṃ parikalpayet || 31 ||
[Analyze grammar]

anuvrajecca gacchaṃtaṃ padānyaṣṭau narādhipa |
anena vidhinā dhenuṃ yo viprāya prayacchati || 32 ||
[Analyze grammar]

sarvakāmasamṛddhātmā svargalokaṃ sa gacchati |
sapta pūrvānsapta parānātmānaṃ caiva mānavaḥ || 33 ||
[Analyze grammar]

sapta janmakṛtātpāpānmocayatyavanīpate |
pade pade'śvamedhasya gośatasya ca mānavaḥ || 34 ||
[Analyze grammar]

phalamāpnoti rājendra dakṣāyaivaṃ jagau hariḥ |
sarvakāmapradā sā syātsarvakāleṣu pārthiva || 35 ||
[Analyze grammar]

bhavatyasau pāpaharā yāvadiṃdrāścaturdaśa |
sarveṣāmeva pāpānāṃ kṛtānāmapi jānatā || 36 ||
[Analyze grammar]

prāyaścittamidaṃ proktamanutāpopabṛṃhitam |
sarveṣāmeva dānānāmekajanmānugaṃ phalam || 37 ||
[Analyze grammar]

brāhmaṇaiḥ kṣatriyairvaiśyaiḥ śūdraiścānyaiśca mānavaiḥ |
lokāḥ kāmagamā prāptā dattvaitadvidhinā nṛpa || 38 ||
[Analyze grammar]

gobhyodhikaṃ jagati nāparamastikiñciddānaṃ pavitramiti śāstravido vadaṃti |
tatsaṃpadaḥ surasadaśca samīhamānairdeyāḥ sadaiva vidhinā dvijapuṃgavāya || 39 ||
[Analyze grammar]