Chapter 108

yudhiṣṭhira uvāca |
surūpatā manuṣyāṇāṃ strīṇāṃ ca yadusattama |
karmaṇā jāyate kena tanmamākhyātumarhasi || 1 ||
[Analyze grammar]

surūpāṇāṃ sugātrāṇāṃ suveṣāṇāṃ tathaiva ca |
nyūnaṃ tathādhikaṃ cāpi yathā nāṅgaṃ prajāyate || 2 ||
[Analyze grammar]

samastaiḥ śobhanairaṃgairnarāḥ kecidyadūttama |
kāṇāḥ kubjāṃśca jāyaṃte truṭitaśravaṇāstathā || 3 ||
[Analyze grammar]

narāṇāṃ yoṣitāṃ caiva samastāṅgaḥ surūpatā |
karmaṇā yena bhavati tatpūrvaṃ kathayāmala || 4 ||
[Analyze grammar]

lāvaṇyagativākyāni sati rūpe mahāmate |
kurvaṃtyabhyadhikāṃ śobhāṃ samastāḥ paramā guṇāḥ || 5 ||
[Analyze grammar]

vākyalāvaṇyasaṃskāravilāsalalitā gatiḥ |
viḍaṃbanā kurūpāṇāṃ kevalā sā hi jāyate || 6 ||
[Analyze grammar]

rūpakāraṇabhūtāya karmaṇā prayato bhavet |
tasmāttanme samācakṣva karma yaccāru rūpadam || 7 ||
[Analyze grammar]

śrīkṛṣṇa uvāca |
samyakpṛṣṭaṃ tvayā hīdamupavāsāśritaṃ nṛpa |
kathayāmi yathāproktaṃ variṣṭhena mahātmanā || 8 ||
[Analyze grammar]

vaśiṣṭhamṛṣimāsīnaṃ saptarṣipravaraṃ dvijam |
papracchārundhatī pṛṣṭā yadetadbhavatā vayam || 9 ||
[Analyze grammar]

tasyāstu paripṛcchantyā jagāda munisattamaḥ |
yattacchṛṇuṣva kauṃteya mamedaṃ vadato'khilam || 10 ||
[Analyze grammar]

vaśiṣṭha uvāca |
śrūyatāṃ yadahaṃ pṛṣṭastvayaitadvaravarṇini |
surūpatā nṛṇāṃ yena yoṣitāṃ copajāyate || 11 ||
[Analyze grammar]

anabhyarcya tu goviṃdamanārādhya ca keśavam |
rūpādikā guṇāḥ kena prāpyaṃte'nyena karmaṇā || 12 ||
[Analyze grammar]

tasmādārādhanīyo'gre viṣṇureva yaśasvini |
pāratryaṃ prāptukāmena rūpasaṃpatsutādikam || 13 ||
[Analyze grammar]

yastu vāñchati dharmajñe rūpaṃ sarvāṃgasundaram |
nakṣatrapuruṣaṃ bhadre jitakrodho jiteṃdriyaḥ || 14 ||
[Analyze grammar]

susnātaḥ prayatāhāraḥ saṃpūjayati yo'cyutam |
bhaktyā yoṣinnaro vāpi surūpāṃgaḥ prajāyate || 15 ||
[Analyze grammar]

yoṣitā hi paraṃ rūpamicchantyā jagataḥ patiḥ |
sa evārādhanīyo'gre nakṣatrāṃgo janārdanaḥ || 16 ||
[Analyze grammar]

arundhatyuvāca |
nakṣatrarūpī bhagavānpūjyate puruṣottamaḥ |
mune yena vidhānena tanmamākhyātumarhasi || 17 ||
[Analyze grammar]

vaśiṣṭha uvāca |
caitramāsātsamārabhya viṣṇoḥ pādābhipūjanam |
yathā kurvīta rūpārthaṃ tanniśāmaya tattvataḥ || 18 ||
[Analyze grammar]

nakṣatramekamekaṃ vai snātaḥ samyagupoṣitaḥ |
nakṣatrapuruṣasyāṃgaṃ pūjayecca vicakṣaṇaḥ || 19 ||
[Analyze grammar]

mūle pādau tathā jaṃghe rohiṇyāmarcayecchubhe |
jānunī cāśvinīyoge āṣāḍhe corusaṃjñite || 20 ||
[Analyze grammar]

phālgunīdvitaye guhyaṃ kṛttikāsu tathā kaṭim |
pārśve bhādrapadā gulphe dve kukṣī revatīṣu ca || 21 ||
[Analyze grammar]

anurādhāsūraḥ pṛṣṭhaṃ dhaniṣṭhāsvabhipūjayet |
bhujayugmaṃ viśākhāsu haste caiva karadvayam || 22 ||
[Analyze grammar]

punarvasāvaṃgulīśca āśleṣāsu tathā nakhān |
jyeṣṭhāyāṃ pūjayedgrīvāṃ śravaṇe śravaṇe tathā || 23 ||
[Analyze grammar]

puṣye mukhaṃ tathā svātau daśanānabhipūjayet |
āsyaṃ śatabhiṣagyoge maghāyoge ca nāsikām || 24 ||
[Analyze grammar]

mṛgottamāṃge nayane pūjayedbhaktitaḥ śubhe |
citrāyoge lalāṭaṃ ca bharaṇīṣu tathā śiraḥ || 25 ||
[Analyze grammar]

saṃpūjanīyā vidvadbhirārdrāyāṃ ca śiroruhāḥ |
upoṣito naro bhadre snānamabhyaṃgapūrvakam || 26 ||
[Analyze grammar]

varjanīyaṃ prayatnena rūpaghnaṃ tadvinirdiśet |
pūjayettacca nakṣatraṃ nakṣatrasya ca daivatam || 27 ||
[Analyze grammar]

somaṃ nakṣatrarājānaṃ svamantrairarcayedbudhaḥ |
pratinakṣatrayoge ca bhojanīyā dvijottamāḥ || 28 ||
[Analyze grammar]

nakṣatrajñāya viprāya dānaṃ dadyācca śaktitaḥ |
antarāye samutpanne sūtakāśaucakārite || 29 ||
[Analyze grammar]

upoṣya vācopa viśennakṣatramaparaṃ punaḥ |
evaṃ māghāvasāne tu vratapāraḥ samāpyate || 30 ||
[Analyze grammar]

samāpte tu vrate dadyācchaktyā sopaskarānvitam |
nakṣatrapuruṣaṃ haimaṃ pūjaye ttatra śaktitaḥ || 31 ||
[Analyze grammar]

brāhmaṇaṃ brāhmaṇīṃ caiva vastrālaṃkārabhūṣaṇaiḥ |
śayyāyāṃ tu samāsannaṃ gandhamālyānulepanaiḥ || 32 ||
[Analyze grammar]

saptadhānyaṃ yathālābhaṃ gāṃ savatsāṃ payasvinīm |
chatropānadyugaṃ caiva ghṛtapātraṃ tathaiva ca || 33 ||
[Analyze grammar]

maṃtreṇānena viprāya suśīlāya nivedayet |
yathā na viṣṇubhaktānāṃ vṛjinaṃ jāyate kvacita |
tathā surūpatārogya sukhasaṃpadihāstu me || 34 ||
[Analyze grammar]

yathā na lakṣmyā śayanaṃ tava śūnyaṃ janārdana |
śayyā mamāpyaśūnyāstu tathā janmani janmani || 35 ||
[Analyze grammar]

evaṃ nivedya tatsarvaṃ praṇipatya kṣamāpayet |
śaktihīnastu gāṃ dadyād ghṛtapātrasamanvitām || 36 ||
[Analyze grammar]

nakṣatrapuruṣākhyo'yaṃ yathāvatkathitastava |
pāpāpanodaṃ kurute samyakchraddhāvatāṃ satām || 37 ||
[Analyze grammar]

aṅgopāṅgāni caivāsya pādādīni yaśasvini |
surūpāṇyabhijāyaṃte sadā janmāntarāṇi ve || 38 ||
[Analyze grammar]

gātrāṇi caiva bhadrāṇi śarīrārogyamuttamam |
saṃtatiṃ manasaḥ prītiṃ rūpaṃ cātīva śobhanam || 39 ||
[Analyze grammar]

vāṅmādhuryaṃ tathā kāṃtiṃ yaccānyadapi vāṃchitam |
dadāti nakṣatrapumānpūjitaśca janārdanaḥ || 40 ||
[Analyze grammar]

vaśiṣṭhena yathākhyātaṃ sarvaṃ tatte niveditam |
nakṣatrapuruṣaṃ nāma vratānāmuttamottamam || 41 ||
[Analyze grammar]

hṛdbāhujānunayanorunitaṃbabhāgaṃ dakṣaiḥ prakalpya sutanuṃ puruṣottamasya |
ye pūjayaṃti jitakopamanovikārāḥ kauṃteya te nanu bhavaṃti surūpadehā || 42 ||
[Analyze grammar]