Chapter 107

yudhiṣṭhira uvāca |
aprāptairna tathā duḥkhamaiśvaryādyairnarottama |
yathā manorathaiḥ svaiḥ svairnānāduḥkhaṃ bhavennṛṇām || 1 ||
[Analyze grammar]

yathā manorathairlabdhairna syādduḥkhabhayaṃ nṛṇām |
aiśvaryādvicyuto vāpi saṃtaterdevalokataḥ || 2 ||
[Analyze grammar]

abhīṣṭādanyato vāpi yadāghena viniṣkṛtim |
prāpnoti puruṣo vātha nārī vā puṇyasaṃcayāt |
tanmamācakṣva bhagavanyena nābhyeti vicyutim || 3 ||
[Analyze grammar]

śrīkṛṣṇa uvāca |
satyametanmahābhāga duḥkhaṃ prāpnotyasaṃśayaḥ || 4 ||
[Analyze grammar]

aiśvaryodayacittasya baṃdhuvargasukhasya ca |
tadetacchrūyatāṃ pārtha yathā neṣṭātparicyutiḥ || 5 ||
[Analyze grammar]

svargāderjāyate samyagupavāsavatāṃ satām |
dvādaśarkṣāṇi rājendra pratimāsaṃ tu yāni vai || 6 ||
[Analyze grammar]

tannāmnā cācyutaṃ teṣu samyaksaṃpūjayennṛpa |
puṣpairdhūpaistathāṃbhobhirabhīṣṭairaparairapi || 7 ||
[Analyze grammar]

āditaḥ kṛttikāṃ kṛtvā kārttike nṛpasattama |
kṛśarāmatra naivedyaṃ pūrvaṃ māsa catuṣṭayam || 8 ||
[Analyze grammar]

nivedayetphālgunādi saṃyāvaṃ ca tataḥ param |
āṣāḍhādiṣu devāya pāyasaṃ vinivedayet || 9 ||
[Analyze grammar]

tenaivānnena rājendra brāhmaṇānbhojayedbudhaḥ |
pañcagavyajalasnānaṃ tasyaiva prāśanācchuciḥ || 10 ||
[Analyze grammar]

samyaksaṃpūjya rājendra tameva puruṣottamam |
praṇamya prārthayedviṣṇuṃ śuciḥ snāto yathāvidhi || 11 ||
[Analyze grammar]

namonamaste'cyuta me kṣayostu pāpasya vṛddhiṃ samupaitu puṇyam |
aiśvaryavittādi tathā'kṣayaṃ mekṣayaṃ ca mā saṃtatirabhyupaitu || 12 ||
[Analyze grammar]

yathācyutastvaṃ parataḥ parasmātsa brahmabhūtaḥ parataḥ parātmā |
tathācyutaṃ me kuru vāṃchitaṃ tvaṃ harasva pāpaṃ ca tathāprameya || 13 ||
[Analyze grammar]

acyutānaṃta govinda prasīda yadabhīpsitam |
tadakṣayamameyātmankuruṣva puruṣottama || 14 ||
[Analyze grammar]

evamevaṃ samabhyarcya prārthayitvā tathā śivam |
naivedyaṃ svayamaśnīyānnaktaṃ saṃpūjitecyute || 15 ||
[Analyze grammar]

tataḥ saṃvatsarasyāṃte sukhasuptotthite'cyute |
ghṛtapūrṇaṃ tāmrapātraṃ brāhmaṇāya nivedayet || 16 ||
[Analyze grammar]

śaktito dakṣiṇāṃ dadyādacyutaḥ prīyatāmiti |
tatastu saptame varṣe kuryādudyāpanaṃ budhaḥ || 17 ||
[Analyze grammar]

kāryā caivācyutasyārcā śaktyā svarṇamayī nṛpa |
tadagre brāhmaṇī sthāpyā sthavirā sāṃbharāyaṇī || 18 ||
[Analyze grammar]

mahāsatī raupyamayī samānārhā sadevatā |
tatastau pūjayitvā ca mālyavastravilepanaiḥ || 19 ||
[Analyze grammar]

maṃtreṇānena rājendra praṇipatya vidhānataḥ |
prativarṣaṃ ca dattaṃ cettāmraṃ pātraṃ dvijātaye || 20 ||
[Analyze grammar]

tadevahelayā dadyātsahiraṇyāśvasaṃyutam |
gāśca pradadyātsaṃ pūjya savatsāḥ kāṃsyadohanāḥ || 21 ||
[Analyze grammar]

ekāṃ vā śaktito dadyādbhaktyā tuṣyati keśavaḥ |
ghaṭāḥ satpātranirdiṣṭāḥ sānnāḥ pūrṇajalojjvalāḥ || 22 ||
[Analyze grammar]

chatropānadyugaiḥ sārdhamevaṃ dattvā visarjayet |
śayyāṃ satūlikāṃ dadyādgṛhaṃ copaskaraiḥ saha || 23 ||
[Analyze grammar]

śriyā ca saha viṣṇuṃ ca pūjayedbhūṣayetprabhum |
vastrairābharaṇaiścaiva praṇipatya kṣamāpayet || 24 ||
[Analyze grammar]

kṛtenānena rājendra cyutiṃ nāpnoti mānavaḥ |
saṃtateḥ svargavittāderaiśvaryasya tathaiva ca |
yadvābhimatamanyacca tato na cyavate naraḥ || 25 ||
[Analyze grammar]

tasmātsarvaprayatnena māsanakṣatrapūjanaiḥ |
yajetākṣayakāmastu sadaiva puruṣottamam || 26 ||
[Analyze grammar]

śrīkṛṣṇa uvāca |
atrāpi śrūyate kācitsiddhā svarge mahāvratā |
nārī tapodhanā bhūtvā prakhyātā sāṃbharāyaṇī |
samastasaṃdehaharā sadāsvargau kasāṃ hi sā || 27 ||
[Analyze grammar]

kasyacittvatha kālasya devarājaḥ śatakratuḥ |
pūrvendracaritaṃ rājanpapracchedaṃ bṛhaspatim || 28 ||
[Analyze grammar]

pūrvendrātparataḥ pūrve ye babhūvuḥ sureśvarāḥ |
teṣāṃ caritamicchāmi śrotumaṃgirasāṃ vara || 29 ||
[Analyze grammar]

evamuktastadā tena devendreṇāmaladyutiḥ |
prāha dharmabhṛtāṃ śreṣṭhaḥ paramarṣirbṛhaspatiḥ || 30 ||
[Analyze grammar]

nāhaṃ ciraṃtanānvedmi devarāja sureśvarān |
ātmanaḥ samakālīnamavehi ca sureśvara || 31 ||
[Analyze grammar]

tataḥ papraccha devendraḥ kosmābhirmunipuṃgavaḥ |
praṣṭavyo'tra mahābhāga kṛtādivasatirdivi || 32 ||
[Analyze grammar]

bṛhaspatiściraṃ dhyātvā tataḥ prāha śacīpatim |
tapasvinīṃ mahābhāgāṃ pṛcchaitāṃ sāṃbharāyaṇīm || 33 ||
[Analyze grammar]

ityuktastena devendraḥ kautūhalasamanvitaḥ |
yayau yatra mahābhāgā samyagāste tapasvinī || 34 ||
[Analyze grammar]

sā tau dṛṣṭvā samāyāṃtau devarājabṛhaspatī |
samyagarghyeṇa saṃpūjya praṇipatyāha suvratā || 35 ||
[Analyze grammar]

namo'stu devarājāya tathaivāṅgirase namaḥ |
yadvāṃ kāryaṃ mahābhāgau sakalaṃ tadihocyatām || 36 ||
[Analyze grammar]

yadi kartuṃ mayā śakyaṃ tatkariṣye vimṛśya ca || 37 ||
[Analyze grammar]

bṛhaspatiruvāca |
āvāmabhyāgatau praṣṭuṃ tvāmatrātivivekinīm |
yacca kāryaṃ mahābhāge pṛṣṭaṃ tatkathayasva naḥ || 38 ||
[Analyze grammar]

yadi smarasi kalyāṇi pūrvendracaritāni vai |
tadākhyāhi mahābhāge devendrasya kutūhalam || 39 ||
[Analyze grammar]

sāṃbharāyaṇyuvāca |
yo vai pūrvaṃ sureṃdrasya tataśca prathamo hi yaḥ |
tasmātpūrvataro yasya tasyāpi prathamaśca yaḥ || 40 ||
[Analyze grammar]

teṣāṃ pūrvatarā ye ca vedmi tānakhilānaham |
teṣāṃ ca caritaṃ kṛtsnaṃ jānāmyagirasāṃ vara || 41 ||
[Analyze grammar]

manvaṃtarāṇyanekāni sṛṣṭīśca tridivaukasām |
saptarṣīnsubahūnvedmi manūnāṃ ca sutānnṛpān || 42 ||
[Analyze grammar]

evamuktvā tatastābhyāṃ suhṛṣṭā sāṃbharāyaṇī |
yathāvadācaṣṭa tayoḥ pūrvendracaritaṃ mahat || 43 ||
[Analyze grammar]

svāyaṃbhuve yastu manau manau svārociṣe ca yaḥ |
uttame tāmase caiva raivate cākṣuṣe tathā || 44 ||
[Analyze grammar]

ye babhūvurhi devendrāstasya tasya tapasvinī |
tadā jagāda caritaṃ yathāvatsāṃbharāyaṇī || 45 ||
[Analyze grammar]

kathayāmāsa cāścaryaṃ taccāpi kathayāmi te || 46 ||
[Analyze grammar]

śaṃkukarṇastadā daityo babhūvātyaṃtadurjayaḥ |
sa lokapālānsamare vijitya saha daivataiḥ |
indrasyāsādya bhavanaṃ praviveśa sunirbhayaḥ || 47 ||
[Analyze grammar]

taṃ dṛṣṭvā sahasā prāptaṃ śakraḥ śayyātale'luṭhat |
jugopa sahasātmānaṃ śaṃkukarṇabhayārditaḥ || 48 ||
[Analyze grammar]

dānavaḥ śakraśayane tasminnupaviveśa ha |
indrāṇyapi tathā bhītā gatā vācaspatergṛham || 49 ||
[Analyze grammar]

atha devāḥ samājagmurbhayāddraṣṭuṃ suradviṣam |
āsīnaṃ śakraśayane praṇipātapurassarāḥ || 50 ||
[Analyze grammar]

vāsudevo'pi tatrāgāttaṃ draṣṭuṃ devakaṃṭakam |
dṛṣṭvā kṛṣṇamanuprāptaṃ dānavaḥ prāha harṣitaḥ || 51 ||
[Analyze grammar]

dhanyo'haṃ kṛtakṛtyohaṃ yasya me garuḍadhvajaḥ |
śakraśayyāsanasthasya draṣṭumabhyeti keśavaḥ || 52 ||
[Analyze grammar]

tataḥ kare samālaṃbya śayanābhyāśamānayat |
cakāra kaṃṭhagrahaṇaṃ bāṃdhavasyeva harṣita || 53 ||
[Analyze grammar]

tataḥ kṛṣṇastu sahasā gṛhya dorbhyāṃ śanaiḥ śanaiḥ |
pīḍayāmāsa vihasannadaṃtaṃ bhairavānravān |
mamāra dānavendro'sau balādbhagnāsthipañjaraḥ || 54 ||
[Analyze grammar]

nirjagāma tataḥ śakraḥ śayyāmūlādavākchirāḥ |
tuṣṭāva harimāsīnaṃ śaṃkhacakragadādharam || 59 ||
[Analyze grammar]

etaddṛṣṭaṃ mayā śakra vasaṃtyā surasadmani || 56 ||
[Analyze grammar]

tataḥ kutūhalaparo devarāṭ tāṃ tapasvinīm |
uvāca jānāsi kathaṃ tvametānsāṃbharāyaṇi || 57 ||
[Analyze grammar]

sāṃbharāyaṇyuvāca |
sarva eva hi devendrāḥ svargasthā yemareśvarāḥ |
babhūvurete caritameteṣāṃ vedmi tena vai |
caritaṃ ca mayā teṣāṃ śrutaṃ dṛṣṭaṃ tathaiva ca || 58 ||
[Analyze grammar]

indra uvāca |
kiṃ kṛtaṃ vada dharmajñe tvayā yeneyamakṣayā |
svarloke vasatiḥ prāptā yathā nānyena kenacit || 59 ||
[Analyze grammar]

aho sarvavratānāṃ tu hyupoṣitamathādbhutam |
pradhānataramatyaṃtaṃ svargavāsapradaṃ matam || 60 ||
[Analyze grammar]

evamuktā tatastena devendreṇa tapasvinīṃ |
pratyuvāca mahābhāgā yathāvatsāṃbharāyaṇī || 61 ||
[Analyze grammar]

māsarkṣe hyacyuto devaḥ pratimāsaṃ sureśvara |
yathoktavratayā samyaksaptavarṣāṇi pūjitaḥ || 62 ||
[Analyze grammar]

tasyeyaṃ karmaṇo vyuṣṭiracyutārādhanasya me |
devalokādabhimatā devarājapadacyutiḥ || 63 ||
[Analyze grammar]

svargendravibhavaiśvaryaṃ saṃtatiṃ yāti cācyutim |
naro vāñchati tenetthaṃ toṣaṇīyastataḥ prabhuḥ || 64 ||
[Analyze grammar]

etatte pūrvadevendracaritaṃ sakalaṃ mayā |
svargavāsākṣayatvaṃ ca māsarkṣācyutapūjanāt |
yathāvatkathitaṃ deva pṛcchatastridaśeśvara || 65 ||
[Analyze grammar]

dharmārthakāmamokṣāśca vāñchitā vibudhādhipa |
viṣṇorārādhanādanyatparamaṃ siddhikāraṇam || 66 ||
[Analyze grammar]

tasyāstadvacanaṃ śrutvā devarājabṛhaspatī |
tattathetyūcatuḥ sādhvīṃ ceratuścāpi tadvratam || 67 ||
[Analyze grammar]

tasmātpārtha prayatnena pratimāsaṃ samāhitaḥ |
māsarkṣācyutapūjāyāṃ bhavethāstanmanāḥ sadā || 68 ||
[Analyze grammar]

ye sāṃbharāyaṇikathācaritavratesminvarṣāṇi sapta vidhinā sudhiyo nayaṃti |
te svagarlokamabhigamya kṛtādhivāsāḥ kalpāyutāyutaśatairapi na cyavaṃte || 69 ||
[Analyze grammar]