Chapter 94

śrīkṛṣṇa uvāca |
1 anaṃtavratamastyanyatsarvapāpaharaṃ śivam |
sarvakāmapradaṃ nṛṇāṃ strīṇāṃ caiva yudhiṣṭhira || 1 ||
[Analyze grammar]

śuklapakṣe caturdaśyāṃ māsi bhādrapade śubhe |
tasyānuṣṭhānamātreṇa sarvapāpaiḥ pramucyate || 2 ||
[Analyze grammar]

yudhiṣṭhira uvāca |
kṛṣṇa ko'yaṃ tvayākhyāto hyanaṃta iti viśrutaḥ |
kiṃ śeṣanāga āhosvidanaṃtastakṣakaḥ smṛtaḥ || 3 ||
[Analyze grammar]

paramātmātha vānaṃta utāho brahma ucyate |
ka eṣo'naṃtasaṃjño vai tathyaṃ brūhi keśava || 4 ||
[Analyze grammar]

śrīkṛṣṇa uvāca |
anaṃta ityahaṃ pārtha mama nāma nibodhaya |
ādityādiṣu vāreṣu yaḥ kāla upapadyate || 5 ||
[Analyze grammar]

kalākāṣṭhāmuhūrtādi dinarātriśarīravān |
pakṣamāsartuvarṣādi yugakalpavyavasthayā || 6 ||
[Analyze grammar]

yo'yaṃ kālo mayākhyātastava dharmabhṛtāṃ vara |
so'haṃ kālo'vatīrṇo'tra bhuvo bhārāvatāraṇāt || 7 ||
[Analyze grammar]

dānavānāṃ vināśāya vasudevakulodbhavam |
māṃ viddhyanaṃtaṃ pārtha tvaṃ viṣṇuṃ jiṣṇuṃ haraṃ śivam || 8 ||
[Analyze grammar]

brahmāṇaṃ bhāskaraṃ śeṣaṃ sarvavyāpinamīśvaram |
viśvarūpaṃ mahātmānaṃ sṛṣṭisaṃhārakārakam || 9 ||
[Analyze grammar]

pratyayārthaṃ mayākhyātaṃ so'haṃ pārtha na saṃśayaḥ |
yudhiṣṭhira uvāca |
anantavratamāhātmyavidhiṃ vada vidāṃ vara || 10 ||
[Analyze grammar]

kiṃ puṇyaṃ kiṃ phalaṃ cāsya hyanuṣṭhānavatāṃ nṛṇām |
kena vādau purā cīrṇaṃ martye kena prakāśitam || 11 ||
[Analyze grammar]

evaṃ samastaṃ vistārya brūhyanaṃtavrataṃ hare |
śrīkṛṣṇa uvāca |
āsītpurā kṛtayuge sumaṃto nāma vai dvijaḥ || 12 ||
[Analyze grammar]

vaśiṣṭhagotre cotpannaḥ surūpaśca bhṛgoḥ sutām |
dīkṣāṃ nāmopayeme tāṃ vedoktavidhinā tataḥ || 13 ||
[Analyze grammar]

tasyāḥ kālena saṃjātā duhitānaṃtalakṣaṇā |
2 śīlā nāma suśīlā sā vardhate pitṛsadmani || 14 ||
[Analyze grammar]

mātā ca tasyāḥ kālena haradāhena pīḍitā |
vinanāśa nadītīre mṛtā svargapuraṃ yayau || 15 ||
[Analyze grammar]

sumaṃtopi tatonyāṃ vai dharmapuṃsaḥ sutāṃ punaḥ |
upayeme vidhānena karkaśāṃ nāma nāmataḥ || 16 ||
[Analyze grammar]

duḥśīlāṃ karkaśāṃ caṃḍīṃ nityaṃ kalahakāriṇīm |
sāpi śīlā piturgehe gṛhārcanaratā vibho || 17 ||
[Analyze grammar]

kuḍyastaṃbhatulādhāradehalītoraṇādiṣu |
cāturvarṇakaraṃ vaiśyanīlapītasitāsitaiḥ || 18 ||
[Analyze grammar]

svastikaiḥ śaṃkhapadmaiśca arcayantī punaḥpunaḥ |
pitrā dṛṣṭā sumantena strīcihnā yauvane sthitā || 19 ||
[Analyze grammar]

kasmai deyā mayā śīlā vicāryaivaṃ suduḥkhitaḥ |
pitā dadau munīndrāya kauṃḍinyāya śubhe dine || 20 ||
[Analyze grammar]

smṛtyuktaśāstravidhinā vivāhamakarottadā |
nivartyodvāhikaṃ sarvaṃ proktavānkarkaśāṃ dvijaḥ || 21 ||
[Analyze grammar]

kiñcidāyādikaṃ deyaṃ jāmātuḥ pāritoṣikam |
tacchrutvā karkaśā kruddhā proddhṛtya gṛhamaṇḍapam || 22 ||
[Analyze grammar]

kapāṭe susthiraṃ kṛtvā gamyatāmityuvāca ha |
bhojyāvaśiṣṭacūrṇena pātheyaṃ ca cakāra sā || 23 ||
[Analyze grammar]

kauṃḍinyopi vivāhyaināṃ pathi gacchañchanaiḥśanaiḥ |
śīlāṃ suśīlāmādāya navoḍhāṃ gorathena hi || 24 ||
[Analyze grammar]

madhyāhne bhojyavelāyāṃ samuttīrya sarittaṭe |
dadarśa śīlā sā strīṇāṃ samūhaṃ raktavāsasām || 25 ||
[Analyze grammar]

caturdaśyāmarcayantaṃ bhaktyā devaṃ pṛthakpṛthak |
upagamya śanaiḥ śīlā papraccha strīkadaṃbakam || 26 ||
[Analyze grammar]

nāryaḥ kimetanme brūta kiṃnāma vratamīdṛśam |
tā ūcuryoṣitaḥ sarvā ananto nāma viśrutaḥ || 27 ||
[Analyze grammar]

sābravīdahamapyevaṃ kariṣye vratamuttamam |
vidhānaṃ kīdṛśaṃ tatra kiṃ dānaṃ kasya pūjanam || 28 ||
[Analyze grammar]

striya ūcuḥ |
śīle pakvānnaprasthasya punnāmnaḥ sukṛtasya tu |
arddhaṃ viprāya dātavyamarddhamātmani bhojanam || 29 ||
[Analyze grammar]

kartavyaṃ tu sarittīre kathāṃ śrutvā harerimām |
anaṃtānaṃtamabhyarcya maṃḍale gaṃdhadīpakaiḥ || 30 ||
[Analyze grammar]

dhūpaiḥ puṣpaiḥ sanaivedyaiḥ pītālaktaiścatuḥśataiḥ |
tasyāgrato dṛḍhaṃ sūtraṃ kuṃkumāktaṃ sudorakam || 31 ||
[Analyze grammar]

caturdaśagraṃthiyutaṃ vāme strī dakṣiṇe pumān |
maṃtreṇānena rājendra yāvadvarṣaṃ samāpyate || 32 ||
[Analyze grammar]

anaṃta saṃsāramahāsamudre magnānsamabhyuddhara vāsudeva |
anaṃtarūpe viniyojitātmā hyanaṃtarūpāya namonamaste || 33 ||
[Analyze grammar]

anena dorakaṃ baddhvā bhoktavyaṃ svasthamānasaiḥ |
dhyātvā nārāyaṇaṃ devamanaṃtaṃ viśvarūpiṇam || 34 ||
[Analyze grammar]

bhuktvā cāṃte vrajedveśma hīdaṃ proktaṃ vrataṃ tava |
sāpi śrutvā vrataṃ cakre śīlā baddhvā sudorakam || 35 ||
[Analyze grammar]

bhartā tasyāḥ samāgatya tāṃ dadarśa mahādhanām |
pātheyaśeṣaṃ viprāya dattvā bhuktvā tathaiva ca || 36 ||
[Analyze grammar]

punarjagāma sā hṛṣṭā gorathena svamāśramam |
bhartrā sahaiva śanakaiḥ pratyakṣaṃ tatkṣaṇādabhūt |
tenānaṃtaprabhāveṇa śubhagodhanasaṃkulaḥ || 37 ||
[Analyze grammar]

gṛhāśramaḥ śriyā yukto dhanadhānyasamāyutaḥ |
ākulo vyākulo ramyaḥ sarvatrātithipūjanaḥ || 38 ||
[Analyze grammar]

sāpi māṇikyakāñcībhirmuktāhāravibhūṣitā |
divyāṃgavastrasaṃchannā sāvitrīpratimābhavat || 39 ||
[Analyze grammar]

kadācidupaviṣṭena dṛṣṭaṃ baddhaṃ sudorakam |
śīlāyā hastamūle tu sākṣepaṃ troṭitaṃ ruṣā || 40 ||
[Analyze grammar]

tena karmavipākeṇa tasya sā śrīḥ kṣayaṃ gatā |
godhanaṃ taskarairnītaṃ gṛhaṃ cāgnividāhitam || 41 ||
[Analyze grammar]

yadyadevāgataṃ gehe tatra tatraiva naśyati |
svajanaiḥ kalaho mitrairvacanaṃ na janaistathā || 42 ||
[Analyze grammar]

anaṃtākṣepadoṣeṇa dāridryaṃ patitaṃ gṛhe |
na kaścidvadate lokastena sārddhaṃ yudhiṣṭhira || 43 ||
[Analyze grammar]

tato jagāma kauṃḍinyo nirvedādvanagahvaram |
manasā dhyāyatenaṃtaṃ kadā drakṣyāmi keśavam || 44 ||
[Analyze grammar]

vrataṃ niraśanaṃ gṛhya brahmacaryaṃ japanharim |
vihvalaḥ prayayau pārtha araṇyaṃ janavarjitam || 45 ||
[Analyze grammar]

tatrāpaśyanmahāvṛkṣaṃ phalitaṃ puṣpitaṃ tathā |
tamapṛcchattvayānaṃtaḥ kaccidṛṣṭo mahādruma |
tadbrūhi sopyuvācedaṃ nānaṃtaṃ vedmyahaṃ dvija || 46 ||
[Analyze grammar]

evaṃ nirīkṣitastena gāṃ dadarśa savatsakām |
tṛṇamadhye pradhāvantīmitaścetaśca pāṃḍava || 47 ||
[Analyze grammar]

sobravīddhenuke brūhi yadyanaṃtastvayekṣitaḥ |
gauruvācātha kauṃḍinya nānaṃtaṃ vedmyahaṃ vibho || 48 ||
[Analyze grammar]

tato jagāmātha vane govṛṣaṃ śādvale sthitam |
dṛṣṭvā papraccha gosvāminnanaṃto lakṣitastvayā || 49 ||
[Analyze grammar]

govṛṣastamuvācātha nānanto vīkṣito mayā |
tato vrajandadarśāgre ramyaṃ puṣkariṇīdvayam || 50 ||
[Analyze grammar]

anyonyajalakallolavīcibhiḥ pariśobhitam |
channaṃ kumudakahlāraiḥ kumudotpalamaṃḍitam || 51 ||
[Analyze grammar]

sevitaṃ bhramarairhaṃsaiścakraiḥ kāraṃḍavairbakaiḥ |
te apṛcchaṃ dvijonanto bhavadbhyāṃ nopalakṣitaḥ || 52 ||
[Analyze grammar]

ūcatuḥ puṣkariṇyau taṃ nānaṃtaṃ vidvahe dvija |
tato brahmandadarśāgre gardabhaṃ kuñjaraṃ tathā || 53 ||
[Analyze grammar]

tāvapyuktau sumaṃtena tasyāpi viniveditam |
nāvābhyāṃ vīkṣitonaṃtastacchrutvā niṣasāda ha || 54 ||
[Analyze grammar]

tasminkṣaṇe munivare kauṃḍinye brāhmaṇottame |
kṛpayānaṃtadevopi pratyakṣaḥ samajāyata || 55 ||
[Analyze grammar]

vṛddhabrāhmaṇarūpeṇa ita ehītyuvāca tam |
praveśayitvā svagṛhaṃ gṛhītvā dakṣiṇe kare || 56 ||
[Analyze grammar]

tāṃ purīṃ darśayāmāsa divyanārīnarairyutām |
tasyāṃ niviṣṭamātmānaṃ varasiṃhāsane nṛpa || 57 ||
[Analyze grammar]

pārśvasthaśaṃkhacakrāsigadāgaruḍaśobhitam |
darśayāmāsa viprāya pūrvoktaṃ viśvarūpiṇam || 58 ||
[Analyze grammar]

vibhūtibhedaiścānantamanantaṃ parameśvaram |
taṃ dṛṣṭvā tu dvijonantamuvāca parayā mudā || 59 ||
[Analyze grammar]

pāpohaṃ pāpakarmāhaṃ pāpātmā pāpasambhavaḥ |
pāhi māṃ puṇḍarīkākṣa sarvapāpaharo bhava || 60 ||
[Analyze grammar]

adya me saphalaṃ janma jīvitaṃ ca sujīvitam |
cūtavṛkṣo vṛṣaḥ kastu kā gauḥ puṣkariṇīdvayam |
gardabhaṃ kuñjaraṃ caiva deva me brūhi tattvataḥ || 61 ||
[Analyze grammar]

anaṃta uvāca |
cūtavṛkṣo hi viprosau vidvānyo vedagarvitaḥ |
vidyādānaṃ nopakurvañchiṣyebhyastarutāṃ gataḥ || 62 ||
[Analyze grammar]

sā gaurvasundharā dṛṣṭā niṣphalā yā tvayekṣitā |
sa harṣo vṛṣabho dṛṣṭo lābhārthaṃ yastvayā vṛtaḥ || 63 ||
[Analyze grammar]

dharmādharmavyavasthānaṃ tacca puṣkariṇīdvayam |
kharaḥ krodhastvayā dṛṣṭaḥ kuṃjaro dharmadūṣakaḥ |
brāhmaṇosāvanaṃtohaṃ guhāsaṃsāragahvare || 64 ||
[Analyze grammar]

ityuktaṃ te mayā sarvaṃ vipra gaccha punargṛham || 65 ||
[Analyze grammar]

carānaṃtavrataṃ tattvaṃ nava varṣāṇi paṃca ca |
tatastuṣṭaḥ pradāsyāmi nakṣatrasthānamuttamam || 66 ||
[Analyze grammar]

bhuktvā ca vipulānbhogānsarvānkāmānyathepsitān |
putrapautraiḥ parivṛtastato mokṣamavāpsyasi || 67 ||
[Analyze grammar]

iti dattvā varaṃ devastatraivāṃtarhito'bhavat |
kauṃḍinyopyāgato gehaṃ cacārānaṃtasadvratam || 68 ||
[Analyze grammar]

śīlayā saha dharmātmā bhuktvā bhogānmanoramān |
aṃte jagāma ca svargaṃ nakṣatraṃ ca punarvasum |
kalpasthānī ca saṃbhūto dṛśyatedyāpi sa jvalan || |
anaṃtavratadharmeṇa samyakcīṇeṃna kaurava || 70 ||
[Analyze grammar]

etatte kathitaṃ pārtha vratānāmuttamaṃ vratam |
yatkṛtvā sarvapāpebhyo mucyate nātra saṃśayaḥ || 71 ||
[Analyze grammar]

ye ca śṛṇvaṃti satataṃ vācyamānaṃ narottama |
te sarve pāpanirmuktā yāsyaṃti paramāṃ gatim || 72 ||
[Analyze grammar]

saṃsārasāgaraguhāṃ susukhaṃ vihartuṃ vāṃchaṃti ye kurukulodbhava śuddhasattvāḥ |
saṃpūjya te tribhuvaneśamanaṃtadevaṃ badhnaṃti dakṣiṇakare varadorakaṃ me || 73 ||
[Analyze grammar]